كان قاعد على كرسي وبيبص قدامه في الفراغ وبيفكر بعمق بعد ما عرف من مختار خطة امير المحمدي وبعد وقت بص ل مختار اللي كان متربط قدامه من ايديه ورجليه وقاله: لو عايز تعيش انت ومراتك وعيالك مفيش غير حل واحد.
رد مختار بدون تردد: وانا موافق قبل ما اعرف إيه هو.
عامر: تنفذ كل اللي هقولك عليه واي حركة نداله هبعتلك مكان القبر اللي هدفن فيه مراتك وعيالك وهما صاحين.
مختار بخوف: ان تحت امرك وهنفذ كل اللي تقول عليه بس مراتي وعيالي ملهمش. ذنب ارجوك سيبهم.
عامر قام وقف وهو بيبصله بعمق: هسيبهم بس لو عملت اللي قولتلك عليه بالظبط.
قرب قائد الحرس بتاع عامر منه وقاله: باشمهندس عامر.. الباشمهندس شريف اتصل عليك اكتر من مرة وعايز يطمن عليك وكمان بلغني ان ميسرة هانم مختفيه من إمبارح.
عامر بص قدامه بغضب وقال: انا مش عايز اعرض حياة شريف او امجد للخطر.. هما ملهمش ذنب.. حساب امير المحمدي معايا انا.
رد قائد الحرس: تمام يا باشمهندس واحنا تحت امر حضرتك.
…..
عند ميسرة ومرتضى.
فتحت ميسرة عينيها لقت نفسها نايمه علي الارض في مكان غريب.. كانت حاسه بصداع قوي ومش فاكره ايه اللي حصل معاها.
قامت تفتح باب الغرفة اللي هي فيها لقت الباب مقفول عليها من برا.. خبطت بقوة على الباب وفجأة الباب اتفتح وظهر أمير المحمدي اللي بصلها بسخريه وقال: اهلا ميسرة هانم اللي كانت السبب في موت امي.
ميسرة بصتله بدهشة وقالت: امير..! انت رجعت امتي؟
أمير: رجعت بعد ما سجنتي الراجل اللي ساب مراته تموت من الحسره وضيع عياله عشان يبقى معاكي.
ميسرة: انت بتقول ايه يا أمير.. انا معملتش اللي انت بتقوله ده وباباك اتجوزني بعد موت مامتك.
رد أمير: كانت اكبر غلطه هو غلطها في حياته وبيدفع تمنها دلوقتي.. وانتي كمان هتدفعي تمن اخطائك.
ميسرة بخوف: امير انت عايز مني ايه وازاي جبتني هنا! ؟
ظهر مرتضى جنب امير وقالها: انا اللي جبتك هنا بعد ما فقدتي الوعي وانتي بتشمي المخدرات يا روحي.. شكلك صدقتي اني ممكن احب واحدة زيك عمرها قد عمري مرتين على الاقل.. المفروض كنتي تتكسفي دا ابنك اكبر مني معقول هبصلك!!
ميسرة بصت ل مرتضي بصدمة وبصت ل أمير وقالت بغضب: انتوا مع بعض ؟
رد أمير: انا اللي بعتلك مرتضى وعرفته ازاي يوقعك يا ميسرة هانم.. والسم اللي بيمشي في دمك دلوقتي انا اللي قولتله يعودك عليه عشان تبقي تحت جز*متي انتي وابنك الباشا.
ميسرة بغضب: ملكش دعوه ب ابني يا امير.. صحيح انا هنتظر ايه من خلفة عزيز غير النداله.
امير بغضب: لسه هتشوفي النداله بجد لما الباشا ابنك يشرف عشان ينقذك من هنا.. هتشوفيني وانا بقتله قدام عينك دا بعد ما ينفذ الاتفاق ويخرج ابويا من السجن قصاد حياتك.
ميسرة بصتله بصدمة وامير قفل الباب عليها تاني وميسرة قعدت على الأرض وهي بتحط أيديها علي وشها وبتبكي لانها هتكون السبب في موت ابنها ودايما بتكون سبب في كل مشاكله.
رواية مكتوبة على إسمي بقلمي ملك إبراهيم.
عند ميرنا..
ميرنا كانت قاعدة في الأوتيل خايفه من أمير اخوها ومش عارفه ممكن يعمل معاها ايه لما يخلص علي عامر !
رن تليفونها برقم كوكو و ردت ميرنا بملل: آلو ايوا يا كوكو.
اتكلم كوكو: انتي فين يا ميرو وحشتيني.. مش هتيجي تحضري الحفلة اللي انا عاملها عندي.. دا كل أصحابنا هنا والحفلة وحشه اوي من غيرك.. انا حكيت لكل اصحابنا وقولتلهم ان ميرو بقت غنيه تاني وكلهم نفسهم يشوفوكي.
ميرنا اتحمست وقالت: يعني كلهم عرفوا ان انا بقيت غنيه ومبقوش يقولوا اني فقيرة!؟
كوكو: دول هيموتوا من الغيظ بس مش مصدقني وانا قولتلهم انا هكلم ميرو تيجي الحفلة وتشوفوها بنفسكم وهي غنيه.. بقولك ايه يا ميرو البسي اشيك واغلى فستان عندك انا عايزك تغيظيهم.
ميرنا قامت وقفت بحماس: متقلقش يا كوكو انا هجننهم.. ساعة بالكتير وهكون عندك باي.
كوكو قفل المكالمة وحط التليفون قدامه وعامر بص له وابتسم وحط قدامه شيك مكتوب فيه مبلغ كبير وكوكو اخد الشيك بحماس وقام وقف وقال بسعادة: معقول انت دفعت كل الفلوس دي في ميرو!! طب ايه رأيك اكلم شيري هي كمان عشان تيجي مع ميرو وتكتبلي شيك كمان زي ده.
اتكلم عامر: وانا هعمل ايه ب شيري بتاعك دي انا عايز ميرنا بس.
كوكو بحيرة: يعني هتتجوز ميرو يا عامر!! هو انت ليه بتحب البنات الفقيرة زي آيات وميرو بنت عزيز الحرامي!!
عامر بصدمة: جواز ايه يا متخلف انت.. بقولك ايه ادخل اقعد في اوضتك انا دماغي مش فايقه لك ولما تسمع صوت الجرس تعالى افتح ل ميرنا وتكون طبيعي جدا قدامها انت فاهم.
رد كوكو وهو بيبص ل الشيك بحماس وقال: طب ايه رأيك اخد الفلوس دي كلها واسافر رحله مع أصحابي ولا اعملهم حفلة هنا واعزمهم واخليهم يشوفوني وانا غني.
عامر بص له بعمق وقاله: قد ايه حياتك فاضيه وتافهه يا كوكو.. تعرف انا بحسدك.
كوكو كان بيبص علي الرقم إللي مكتوب في الشيك وبيحلم باللحظة اللي هيصرف فيها الفلوس ومش مركز مع ولا كلمة من عامر وقعد وهو واخد الشيك في حضنه وبيحلم بنفسه وهو غني.
عامر كان قاعد وهو حاسس ان النار اللي في قلبه بتزيد ووجع قلبه بيتضاعف كل ما كان بيفتكر آيات وهي غرقانه ب الد م وابنه اللي دفنه ب ايديه قبل ما يشوف الحياة وأمه اللي مش عارف هي فين دلوقتي ولا ايه اللي بيحصل معاها!
بعد وقت وصلت ميرنا ووقفت ترن الجرس بحماس وكوكو قام فتحلها واستقبلها بطريقته إللي ميرنا متعودة عليها وميرنا قالت بدهشة: هما أصحابنا راحوا فين ؟
رد كوكو: سبقونا علي حفلة تانيه أصلهم مش مصدقين ان انتي بقيتي غنيه تاني.. تعالي اقعدي هنا وانا هلبس ونروحلهم الحفلة التانيه نغيظهم.
ميرنا اتحمست اكتر ودخلت وقعدت وكوكو دخل عند عامر في الغرفة وقالوا ان ميرنا وصلت وعامر طلع لها وميرنا كانت قاعده تبص علي الميكب بتاعها في مرايا صغيره ولسه بترفع عينيها لقت عامر قدامها.. شهقت بخوف وانتفضت من مكانها لما شافت سلاح في ايد عامر وقالت بخوف: عااامر!! انا معملتش حاجة.. صدقني انا زعلت على اللي حصل ل آيات وقولت ل أمير ان آيات متستهلش كده!
رد عامر: عارف يا ميرنا.. بس ليه مقولتليش ان اخوكي رجع؟
ردت بخوف: انااا.. هو.. اصل.. امير قالي ملكيش دعوة بحاجة وقالي انه هيخرج بابا من السجن ونسافر من هنا كلنا.
اتكلم عامر بغضب: وهو فين دلوقتي ؟
ردت ميرنا بخوف: والله معرفش هو حاجزلنا جناح في اوتيل ومش بيتكلم قدامي كتير عشان معرفش عنه أي حاجة.
أتكلم عامر وهو بيقعد قدامها : اخوكي خطف امي وقتل ابني وكان متفق مع رجاله انهم يغتصبوا مراتي ومكفهوش كل ده.. حرق شركتي كمان.
ميرنا بصت ل عامر بصدمة وبكت بخوف: انا معرفش حاجة من دي والله يا عامر.. انا اتفاجأت بكل اللي امير عمله وهو خوفني وحذرني اني مدخلش في شغله.
عامر: يبقى تثبتيلي يا ميرنا انك مش شريكته.
ميرنا بخوف: اثبتلك ازاي؟
عامر: تقوليلي هو خاطف امي فين؟
ميرنا بخوف: والله معرفش صدقني.
عامر بصلها بتفكير وكان مصدق انها فعلا متعرفش وقالها: اتصلي بيه دلوقتي وقوليله اني جتلك الأوتيل وانتي هربتي مني ومش عارفه تروحي فين.
ميرنا بصت ل عامر بخوف وقالت: حاضر هعمل كل اللي انت عايزه…
وبصت علي السلاح إللي في ايديه وقالت برجاء: بس بلاش تموتني يا عامر انا مليش ذنب في كل اللي امير عمله.
عامر هز راسه بالايجاب وقالها: مش هقتلك يا ميرنا ولو ساعدتيني انا كمان هساعدك وهديكي مبلغ تبدئي بيه حياتك وهقف جنبك لو احتاجتيني في أي وقت.
ميرنا هزت راسها بالموافقه و كانت خايفه من أمير اخوها لانه حذرها لو ساعدت عامر تاني وكانت خايفه ان عامر يتهور ويحاسبها على كل اللي اخوها عمله معاه!
فتحت تليفونها واتصلت على اخوها وهي بتبص ل عامر بتوتر وعامر كان متابعها بترقب شديد وملاحظ خوفها وتوترها وبعد لحظات خرج صوتها المهزوز بصعوبه وقالت بصوت مرتجف: الوو.. امير الحقني عامر جالي الأوتيل وانا هربت منه.
رواية مكتوبة على إسمي بقلمي ملك إبراهيم.
داخل قسم الشرطة.
مختار كان قاعد قدام الظابط وهو بيرتجف بعد ما اعترف بكل الجرائم اللي عملها بالاتفاق مع أمير المحمدي وعلاء واعترف ان امير خاطف ميسرة ام عامر الجارحي وبيهدده بيها وان هما اللي حرقوا شركة الجارحي.
كان في محامي تبع عامر حاضر مع مختار في القسم عشان يتأكد ان هو اعترف بكل الجرائم اللي عملوها ويبلغ عامر ان مختار اعترف زي ما اتفقوا مقابل انه يسيب مرات مختار وأولاده يعيشوا.
بعد وقت المحامي جاتله رساله من قائد الحرس تبع عامر وكتب له فيها العنوان اللي فيه امير وعرفه ان عامر دلوقتي في طريقه للعنوان وطلب منه يجيب قوة من الشرطة ويروحلهم بسرعة قبل ما عامر يتهور ويقتل امير.
….
عند أمير المحمدي داخل الشقة اللي خاطفين فيها ميسرة.
اتكلم امير مع مرتضى وقال: اختي جايه هنا دلوقتي.. هتاخدها يا مرتضي وتخبيها في اي مكان بعيد عن هنا لحد ما انتهي من عامر الجارحي ويخرج ابويا من السجن زي ما اتفقنا.
مرتضي هز راسه بثقة وبعد وقت رن جرس الشقه وامير قال ل مرتضى: افتح الباب دي أكيد أختي بس اتأكد الاول انها هي.
مرتضي بص من العين السحريه إللي في باب الشقة وشاف اخت امير.. فتح لها الباب وفجأة ظهر عامر الجارحي خلفها.. مرتضي اتصدم وعامر اقتحم الشقة هو ورجالته وامير انتفض من مكانه بصدمة لما رجالة عامر مسكوا مرتضي وشاف اخته مع عامر وفهم ان ميرنا خانته زي ما عملت مع ابوه وبعته ل عامر الجارحي.
عامر دخل وهو حاطت السلاح على راس ميرنا وبيهدد بيها امير وقاله: امي فين؟
أتكلم امير بغضب مع اخته: الخيانه في دمك يا ميرنا.
اتكلمت ميرنا بخوف وبكاء: انا اسفه يا أمير.. بس انا قولتلك ان عامر مش هيسكت بعد اللي عملته في مراته.
رجالة عامر ضربوا مرتضي علي دماغه غاب عن الوعي واتحركوا بسرعة يدوروا علي ميسرة في الغرف كلها ولقوها فاقدة الوعي على الأرض في احدى الغرف.
امير رفع سلاحه وقال بثقة وهو بيبص ل عامر: لو فاكر إنك بتهددني بيها انا مبتهددش.. ميرنا خاينه وانا حذرتها قبل كده وواضح ان الخيانه في دمها.. انا كنت هكتفي اني اخرب لك حياتك بس يا عامر واخد أبويا وأختي واسافر بس واضح انك مصمم تخسر حياتك على أيدي..
وفجأة بتخرج رصاصه من سلاح أمير اتجاه عامر لكن الرصاصة بتصيب ميرنا بالخطأ وتخترق كتفها وميرنا تقع على الارض بين ايد عامر والسلاح بيقع من ايد امير بصدمة لما يشوف الرصاصة بتصيب اخته وتقع قدام عينيه ويهز راسه بزهول مش مصدق انه قتل اخته!
رجالة عامر خرجوا ومعاهم ميسرة وشافوا إللي حصل وامير كان لسه واقف بصدمة بعد ما طلق رصاصه وجت في أخته قدام عينيه..
عامر كان قاعد على الأرض بيطمن علي ميرنا إللي غمضت عينيها باستسلام بعد ما اعتذرت له وطلبت منه يسامحها..
رجالة عامر التفو حوالين أمير ومسكوه وكتفو ايديه واخدوا السلاح بتاعه..
رجال الشرطة وصلوا العنوان وكان معاهم عربية اسعاف واول لما طلعوا شافوا مرتضى مرمي على الأرض وفاقد الوعي وميسرة كانت غايبه عن الوعي وضربات قلبها ضعيفه جداا.. وميرنا كانت مصابه برصاصه في كتفها وغايبه عن الوعي هي كمان.
عامر جري علي امه ورجال الاسعاف بيشلوها وقالوله ان حالتها خطيرة ولازم تروح المستشفى بسرعة.
عامر وقف مصدوم وهو مرعوب على امه وخايف يخسرها..
رجال الشرطة اخدو امير ومرتضى والمحامي تبع عامر طلب من الظابط ان عامر يروح المستشفى مع والدته ولما يطمن عليها يروحلهم القسم.
عامر نزل ورا عربية الاسعاف واتحرك علي المستشفى بسرعة.
مكتوبة على إسمي بقلمي ملك إبراهيم.
بعد مرور يومين.
داخل المستشفى.
عامر كان قاعد في غرفة الدكتور المسؤل عن حالة ميسرة وسأل الدكتور بقلق: امي بقالها يومين في غيبوبه يا دكتور ؟! هي متعرضتش لأي أصابه عشان حالتها تدهور كده!! انا جايبها هنا وهي غايبه عن الوعي بس!
الدكتور بص ل عامر وقال: للسبب ده انا طلبت اتكلم معاك لوحدك.. تحاليل والدتك ظهرت وللأسف اكتشفنا ان والدتك كانت بتاخد دواء خطير جدا وتضاعفت خطورته بتعاطيها مادة مخدرة.. هير.وين.
عامر بص للدكتور بصدمة وقال: بس امي مكانتش بتاخد اي ادويه!!
وبص قدامه بتفكير وهز راسه بحزن وقال: اكيد هما اللي ادوها الدوا ده!!..
وبص للدكتور وسأله بقلق: يعني علاجها هياخد وقت؟
الدكتور هز راسه بأسف وقال: انا اول مرة يجيلي حالة بصعوبة حالة والدتك ومقدرش اقولك علاجها هياخد وقت قد ايه وهل جسمها هيستجيب للعلاج ولا لا لان مش واضح هي ممكن تفوق من الغيبوبه امتى وكمان لو فاقت ايه الاضرار إللي هتكون حصلت لها وخصوصا ان نوع الدوا اللي خدته ده بيعمل تلف خطير في خلايا المخ.
عامر بصدمة: انا مستعد اعمل اي حاجة عشان امي ترجع للوعي وصحتها تكون كويسه يا دكتور.. لو علاجها هيكون موجود في اي مكان في العالم ياريت تقولي.
الدكتور: الحقيقه علاجها هنا هيكون صعب خصوصا ان دي اول حالة نعالجها من النوع ده لان الادويه إللي اخدتها مش موجوده هنا وواضح انها مهربه من الخارج والأفضل لو سفرتها تتعالج في الخارج وانا هبحث عن مستشفى قدرو يعالجوا حالات مشابه وهبلغك باسم المستشفى.
عامر: وانا هجهز كل إجراءات السفر وفي انتظارك يادكتور.
عامر قام خرج من غرفة الدكتور وشريف وامجد قربوا منه وشريف سأله بقلق: ايه يا عامر طمنا على خالتي؟ ليه الدكتور طلب يتكلم معاك لوحدك ؟ هي خالتي كويسه؟؟
رد عامر بجمود: انا هاخد امي واسافر تتعالج برا مصر.
شريف بقلق: هي حالتها صعبه للدرجة دي؟
عامر: ان شاء الله هتبقى كويسه.. عايز ابدأ في إجراءات السفر لانها لازم تسافر في أسرع وقت وانا هسافر معاها.
شريف بقلق؛ انا هسافر معاك.
رد عامر: لا.. انت لازم تكون هنا عشان خالتي وكمان انتوا لازم تهتموا بالشركة.. انقلوا كل شغلنا في الشركة بتاعي الصغيرة وجددو الشركة الكبيرة بسرعه ورجعوها أحسن من الأول.
أتكلم أمجد: متقلقش يا عامر احنا هنعمل كل ده بس.. آيات.. آيات في المستشفى وانت مشوفتهاش من ساعة اللي حصل وهاجر بتقولي انها بتسأل عليك كل لحظة.
رد عامر ببرود: قولولها متسألش تاني.
شريف بدهشة: يعني ايه؟
عامر بص له وقال بجمود: يعني انا وآيات خلاص.. كل اللي بينا انتهى.. انا هطلقها قبل ما اسافر.
شريف وامجد بصوا لبعض بصدمة وعامر كمل كلامه وقال بإصرار: عرفوها ان كل حقوقها هتوصلها والشقة انا هكتبها بإسمها.
امجد بصدمة: ايه الكلام اللي انت بتقوله ده يا عامر.. حتى لو آيات غلطت مينفعش تعاقبها بالطريقة دي ومتنساش ان هي كمان خسرت ابنها زيك!
رد عامر: انا مش بعاقبها يا أمجد.. انا وآيات خلاص انتهينا ومبقاش ينفع نرجع لبعض تاني وانا خلاص خدت قراري النهائي ومش هرجع فيه.. انا هسافر اعالج أمي ويمكن استقر هناك وعايز انسى كل اللي عشته هنا مش عايز اي حاجة تفكرني ب اللي حصل.
اتكلم شريف بحزن: انا حاسس بيك يا عامر وعارف ان اللي حصل صعب عليك بس ياريت متنساش ان اللي حصل ل آيات برضه صعب عليها.. وزي ما انت فقدت ابنك هي كمان فقدته وحالتها صعبه ومحتاجاك جمبها.. انت لو طلقتها وسيبتها في الوقت ده ممكن تموت فيها.
رد عامر بجمود: انتهينا خلاص يا شريف انا مش هرجع في قراري وياريت تبلغوها كلامي ده.
اتكلم امجد: طب شوفها ولو لأخر مرة وقولها الكلام ده بنفسك لو هتقدر تقوله قدامها يا عامر.. عامر انت بتحب آيات ومش هتهون عليك.
رد عامر بحزن قبل ما يمشي: انا قلبي مات خلاص يا أمجد.. قولولها تعيش حياتها وتنساني.. هي اساسا مكانتش مرتاحة في الحياة معايا وكانت طول الوقت بتشتكي وعايزة تعيش حياة حره وهادية من غير مشاكل.. قولولها ان انا هخرج من حياتها نهائي عشان تعيش الحياة الهادية اللي كانت بتتمناها.
عامر خلص كلامه ومشي وامجد وشريف بصوا لبعض بصدمة وشريف هز راسه بقلة حيلة وقال: معقول حكايتهم تنتهي بالسهولة دي!!
رد امجد: عامر صدمته كانت كبيرة ومحتاج وقت عشان ينسى اللي حصل.. يمكن لما يسافر ويرجع يهدا شويه ويرجعوا لبعض تاني.
شريف بحزن: ربنا يكون في عونه ويهون عليهم الايام الجايه.
رواية مكتوبة على إسمي بقلمي ملك إبراهيم.
بعد مرور أسبوع في المستشفى داخل الغرفة اللي آيات فيها.
آيات كانت قاعدة على السرير بتعب وهدير بتجهز لبس آيات في شنطتها عشان ميعاد خروجها من المستشفى النهاردة..
بصت هدير ل آيات بحزن وقربت منها وقالت بتردد: آيات في حاجة كنا مخبينها عليكي ولازم تعرفيها قبل ما تخرجي من هنا.
آيات بصتلها بقلق وسألتها بلهفة: حاجة ايه يا هدير ؟… بقلمي ملك إبراهيم.
… يتبع
تفتكروا عامر هيقدر فعلا يبعد عن آيات وايه هيكون رد فعل آيات لما تعرف قرار عامر ب انفصالهمولو سافر هيرجع يلاقي آيات زي ما هي ولا هيلاقي حاجات كتير اتغيرت ويمكن يظهر شخص جديد في حياة آيات منتظرة رأيكم في التعليقات
أحداث كتير لسه في انتظارنا الحلقات الجاية متنسوش اللايك بعد القراءة والتفاعل بتعليقات كتير عشان ترفعوا البوست ويوصل لكل المتابعين عايزين نوصل البارت ده ل4000تعليقوشكرا لكل الناس اللي بتتفاعل معايا
التعليقات