روايه خيوط الحب
««الفصل التالت»»
صباح يوم جديد فى شقه صفاء
فيروز دخلت المطبخ:ماما انا راحه المقابله
صفاء:بردو مصممه يابنتى
فيروز:ياصفصف ياحبيبتى دى هيكون زى تدريب ليا عشان لما اتخرج اكون جاهزة لشغل
صفاء:ربنا يوفقك ياحبيبه قلبي
فيروز:يارب ياصفصف
نيرة:ايه الجمال ده ياروزة
فيروز:حبيبه قلب روزة يلا سلام
فيروز خرجت من شقتهم ونزلت كانت نورة واقفه على السلم واول ماشافتها صفرت:ايه الحلاوة دى
فيروز:عيونك الحلوة ياقمرى
نورة:كان نفسي اكون معاكى بس يوسف مش موافق
فيروز:لما نتخرج باذن الله هنكون سواا
نورة:ان شاء الله
فيروز:يلا سلام
فيروز نزلت وكانت واقفه تستنى تاكسي اللى طلبته ويوسف خارج من المحل وهو بيتكلم فى الفون واول ماشافها قفل بسرعه فيروز كانت لابسه سوت رسمى بلون الاسود وطرحه وقميص بلون الابيض وشوز بكعب صغير بلون الاسود
فيروز شافت يوسف بيقرب منها:نهار اسود جاى ليه ده … يووووه التاكسي ده اتاخر ليه
يوسف:انتى راحه فين كدا
فيروز:اظن حاجه متخصكش
يوسف بنفاذ صبر:راحه فين يافيروز
فيروز:يوووه مليون مرة اقولك مالكش دعوة بيا
التاكسي وصل
فيروز لسه هتمشي يوسف مسك ايدها وبص لسواق التاكسي وطلع فلوس وادهاله:خد دول وامشي انت
التاكسي مشي
فيروز بعصبيه:ممكن افهم انت بتعمل ايه
يوسف بحده:صوتك ميعلاش احسنلك انتى فاهمه
فيروز لسه هتمشي يوسف مسك ايدها وراح على عربيته وفتح الباب ودخلها ولف ركب هو كمان
فيروز:انت بتستعبط ايه اللى بتعمله ده
يوسف:راحه فين
فيروز:انت عامل كدا عشان تعرف انا راحه فين مش هقولك بردو
يوسف:يبقي خلاص تنزلى من العربيه وتطلعى على شقتكوو مافيش خروج
فيروز:اوووووف
يوسف:اخلصى راحه فين
فيروز قالتله على العنوان ويوسف اتحرك بالعربيه
*********************
فى محل المجوهرات نورة دخلت وراحت على المكتب ملقتيش يوسف
نورة:عم عبده فين يوسف
عم عبده:مش هنا يابنتى راح يوصل فيروز لو عايزة تستنيه اقعدى فى المكتب
نورة:حاضر ياراجل ياطيب
نورة دخلت قعدت على كرسي يوسف ورا المكتب ولفت بقي ضهر الكرسي للباب
فجاه الباب اتفتح ودخل امير:انت ياعم مش بترد عليا ليه من الصبح وانا برن عليك
نورة قلبها دق لانها عارفه ده صوت مين ويمكن ده اكتر صوت بتحب تسمعه رغم انها مش بتشوفه غير من البلكونه وهو جاى ليوسف وهو عمره ماشافها ابداا
نورة لفت بالكرسي وامير اتفاجأ:انا اسف فكرت يوسف اللى هنا
نورة:يوسف راح مشوار وجاى
نورة مشت ولسه هتخرج
امير:انتى بتشتغلى هنا
نوى لفت وبصتله:لا انا نورة اخت يوسف وكنت بستناه
امير بصلها بصدمه:نورة احلفى كدا انتى نورة
نورة غصبن عنها ابتسمت:اه والله انا نورة
امير:لا اصل اخر مرة شوفتك كنتى راحه المدرسه كنتى صغيرة اوى
نورة:دانت قديم اوى مدرسه ايه انا الوقت فى كليه هندسه
امير:ماشي ياباشمهندسه نورة انا امير صاحب يوسف
نورة بسرعه:مانا عرفاك
امير باستغراب:عرفانى منين
نورة:احم اكيد من يوسف بسمعه يحكى لماما عنك دايما
امير:بالخير ولا الشر بقي
نورة:اكيد بالخير
امير:طب الحمدلله
نورة:عن اذنك
امير:لا خليكى انتى استنى يوسف هنا وانا هخرج استناه برا
نورة:لا انا هطلع عن اذنك
امير:اذنك معاكى
نورة خرجت من المكتب وامير سرح مع نفسه:نورة اللى كنا بنوصلها المدرسه كبرتى وبقيتى الباشمهندسه نورة
*******************
فى عربيه يوسف وصل قدام شركه واتصدم
يوسف:انتى جايه تعملى ايه هنا
فيروز:جايه مقابله شغل ارتاحت كدا
يوسف شغل العربيه ومشي
فيروز:انت مجنون نزلنى
يوسف:مافيش شغل هنا
فيروز:نعم ليه ان شاء الله
يوسف:هو كدا
فيروز:وقف العربيه دى اخلص نزلنى بقي
يوسف:وانا قولت لا
فيروز:اظن دى حاجه تخصنى انا مش انت
يوسف:اللى يخصك يخصنى يافيروز ومافيش شغل هنا ولا فى اى مكان
فيروز:انت بجد مستفز انا عايزة انزل وقف العربيه ياما والله هنط منها
يوسف:نطى
فيروز:ماشي
فيروز جايه تفتح الباب كان مقفول بصت ليوسف:انت بتعمل كدا ليه قولتلك مالكش دعوة بيا وبردو بتتدخل فى كل حاجه تخصنى
يوسف وقف بالعربيه وبصلها اوى واتكلم بحده:لانك مش هتكونى غير ليا يافيروز انسي انك تكونى لغيرى لانك لو بقيتى لغيرى هقتله واقتلك بعده
فيروز خافت من طريقتك:انت بجد مش طبيعى انت مجنون
يوسف:سمينى زى ماتسمينى مش فارق معايا
يوسف اتحرك بالعربيه وبعد شويا وصلو ويوسف فتح الابواب:انزلى
فيروز نزلت بسرعه وطلعت العمارة ودخلت شقتهم وكانت متعصبه جداا ودخلت اوضتها وقفلت الباب عليها
نيرة:هى مالها
صفاء:مش عارفه
صفاء راحت تخبط على باب اوضه فيروز: فيروز ياحبيبتى عملتى ايه
فيروز من ورا الباب:معملتش حاجه ياماما
صفاء:انتى اترفضتى فى المقابله ياحبيبتى
فيروز:هو انا طلعت الشركه اصلا كله من المجنون اللى اسمه يوسف
صفاء ونيرة ضحكوو
صفاء:طب اهدى ياحبيبتى اهدى يمكن مش نصيبك يابنتى غيرى هدومك عشان هنتغدى سوا وهناء ونورة جايين يتغدو معانا
فيروز فتحت الباب:اوعى تقولى انه جاى ياكل معانا
صفاء:لا ياحبيبتى عنده شغل ومش هيطلع
فيروز:الحمدلله
نيرة:والله مانا عارفه بيحبك على ايه بنت فقر
فيروز بصدمه:فقر انا فقر طب تعاليلى بقي
فيروز فضلت تجرى ورا نيرة فى الشقه كلها وصفاء تضحك عليهم
وبعد شويا هناء ونورة جم واتغدو كلهم سواا وقضو وقت حلو مع بعض وبعدها نزلو هناء ونورة وخلص اليوم
*****************
تانى يوم فى مكان جديد اول مرة نزوره وهو معرض عربيات عزام الشرقاوى
(عزام عنده ٣٣ سنه صاحب شركه الشرقاوى وكمان عنده معرض عربيات وهو منافس الاول ليوسف الصياد وبيكره يسمع بس اسمه)
فى مكتب عزام اللى قاعد على كرسي مكتبه ورافع رجليه على المكتب واقف قدامه مساعده وايده اليمين اللى بيثق فيه جدااا محمود:لسه منعرفش الشحنه جديده بتاعه ابن الصياد هتوصل امته ياباشا
عزام نفخ دخان سجارة:لازم نعرف هتوصل امته عشان نضرب السوق
محمود:متقلقش ياباشا
عزام:لا لازم اقلق بعد اللى حصل المرة اللى فاتت لما جاب شحنته وكحوش على السوق كله يبقي لازم اقلق
محمود:مش هتكرر ياباشا
عزام:انا عايزك تشوف حد من اللى بيشتغلو فى المعرض وتخليه يشتغلنا جاسوس ويجبلنا كل اخباره
محمود:حاضر ياباشا
عزام:روح انت
محمود خرج وعزام اتكلم بحده:يانا يانت يابن الصياد
***********************
فى معرض العربيات بتاع يوسف
قاعدين فى المكتب
امير:الشحنه هتوصل بكرة بس انت مش عايز حد يعرف ليه
يوسف:اللى انا متاكد منه ان ابن الشرقاوى هيموت ويعرف هى هتوصل امته عشان ياكل السوق بس مش عليا انا
امير:بلاش نلعب قدامه يايوسف ده ملوش عزيز ياصاحبي
يوسف:وانا مش خايف منه
امير:ربنا يستر
يوسف:ظبطت المعرض هنا زى ماقولتلك
امير:كل حاجه زى مانت عايز واكتر
يوسف:تمام
امير:انا مش فاهم انت عايز تنقل المعرض ليه
يوسف:عشان يكون قريب منى
امير:دول ١٠ دقايق بتكون هنا
يوسف:لا انا بظبط المكان فى العمارة اللى جمبى واول ما يجهز هننقل كل حاجه هناك بس لوقتها محدش ابدا يعرف غيرى انا وانت
امير:تمام ياصاحبي
*********************
فيروز ونورة قاعدين على السطح
فيروز:يعنى ماكنش يعرفك
نورة:لا ياختى مكنتش يعرفنى قال ايه كان لسه بيوصلنى المدرسه مع يوسف
فيروز ضحكت اوى
نورة:اضحكى اضحكى ياختى
فيروز:اهو عرفك اهو ويمكن الصنارة تغمز
نورة:يارب ياختى يارب بس الواد ايه مز مز ياروزة
فيروز:ماشي ياختى
نورة:صح عملتى ايه فى المقابله
فيروز:ونبي بلاش تفكرينى
نورة:فى ايه
فيروز:اخوكى ياختى صمم يوصلنى واول ماوصلنا قدام الشركه كانه ركبه عفريت وقالى مافيش شغل هنا ولف بالعربيه ومشي
نورة:طب ليه
فيروز:معرفش وحياتك وشدينا سواا وسبته ونزلت
نورة:وهتعملى ايه هتروحى تانى
فيروز:للاسف كانت اخر فرصه ليا اكيد اختارو بنت تانيه من المقابلات
نورة:يوسف مش هيعمل كدا غير لو كان فى حاجه يافيروز
فيروز:معرفش بقي اللى حصل مش نصيبى
ايه دخلت السطح:صباح الخير
نورة وفيروز:صباح الخير
ايه راحت عند الورد عشان تقطع منه
فيروز:انتى بتعملى ايه
ايه:هاخد ورد عندك مانع
فيروز:اه طبعا عندى مانع الورد ده مش بنقطع منه
ايه:والله حاجه متخصكيش ده ورد على سطح عمارتنا واخد منه وقت مااحب ولا انتى متعوده تاخدى الحاجه اللى مش ليكى
فيروز فهمت معنى كلامها وانها تقصد يوسف:انا عمرى مااخدت حاجه مش بتاعتى ياايه والله بقي مش ذنبي ان الحاجه دى هى اللى عايزانى
ايه اتغاظت منها:ابعدى عنى انا هاخد من الورد وهنزل
نورة:لا ياايه فيروز قالتلك ان احنا مش بنقطع منه وده الورد بتاعى انا وفيروز وزى مانتى قولتلى مش لازم ناخد حاجه مش بتاعتنا ولا ايه يابنت عمى
ايه:هى بقت كدا يعنى
فيروز ونورة:اه
ايه اضايقت منهم ونزلت ودخلت شقتهم ورزعت الباب
حسن:مالك يابت بترزعى الباب ليه كدا
ايه:معلش يابا غصبن عنى
ايه دخلت اوضتها وسوسن بصتلها اوى ودخلت وراها:مالك يابت
ايه حكتلها اللى حصل
سوسن:متزعليش ياحبيبتى وهجبلك حقك منهم تالت ومتلت كمان
ايه:والست نورة هانم عملالى حبيبه وبتحب الواد صاحب يوسف اللى اسمه امير
سوسن:جبتى الكلام ده منين يابت
ايه:سمعتها وهى بتحكى لمقصوفه الرقبه اللى اسمها فيروز
سوسن:ده حلو اوى ده اوعى يابت تقولى حاجه لحد عن الكلام ده سيبه لوقته وانا هتعامل
ايه:حاضر ياما.
التعليقات