رواية شيطان في بيتي الفصل السادس والثلاثون 36 – بقلم زهرة الربيع
السادس_والثلاثون وقعت بين ايديه وهو وقع معاها على الارض هو بيبصلها بزهول شديد وقال يصدمه وهو بيرتعش اسيا… اسيا حبيبتي… فيه ايه…ازاي ..انا مش فاهم حاجه…اسيا كلميني
اسيا حطت ايدها على خده وقالت بتعب شديد…. سامحني ارجوك تسامحني
هز راسو بسرعه وهو بيرفض بشده وقال… لا لا بتقولي ايه …مش هسامحك ابدا…. لو سبتيني مش هسامحك ابدا… اوعي تسيبيني انا ما ليش غيرك….هنروح المستشفى… هاخدك حالا وهتقومي بخير
ووقف بسرعه وحاول يشيلها بس خانته قوته ووقع تاني على ركبه على الارض وحاسس الارض بتدور بيه
بلع ريقه بالعافيه وقال بضعفشديد ….هاخدك يا حبيبتي هتقومي… هتقومي انا معاكي
وحاول يشيلها مره ثانيه بس مش رجليه اللي رفضت الوقوف كمان حتى اديه ما كانش قادر يرفعهم
زعق بالعافيه وهو بينج وقال…. اسعاااااف…. اسعاف بسرعه مراتي… مراتي ارجوكم
الناس جريت عليهم بزهول وطلبوا الاسعاف
في الوقت ده وصل منتصر وعدي اللي اتصدموا بشده
عدي جري عليها وهو مرعوب وقال بزعيق….اسياااا…ايا اللي حصل…. مين عمل فيكي كده
اكمل مسكو من هدومه وبقى يحاول ينطق بالعافيه وقال… المستشفى…ود… وديها المستشفى
عدي هز راسه بالموافقه بسرعه ومنتصر جري على اكمل وقال …ايه اللي بيحصل… انت حصل لك ايه…. اقف معايا يا اكمل قوم
اكمل كان بيتكلم بالعافيه وقال …مش قادر ….مش قادره اقف على رجلي يا منتصر جسمي كله مش حاسس بيه… اسيا الحقها ابوس ايدك
قال كده وغاب عن الوعي ومبقاش حاسس بحاجه ابدا
بعد وقت كانوا كلهم مجتمعين في المستشفى
اكمل في اوضه واسيا في اوضه تانيه حالتها خطر وبيحاولوا يطلعو الرصاصه
خرج الدكتور من عند اكمل
لؤي و منتصر وحتى عدي جريو عليه وقالو ….خير يا دكتور ماله …ايه اللي حصل معاه ده
الدكتور اتنهد وقال ….اهدا يا جماعه وفهموني….هو المريض ده بيتعاطى مخدرات او اي انواع مهدئات
كلهم بصوا لبعض بتساؤل ما حدش يعرف عنه اي حاجه بس لؤي قال بسرعه…. ايوه حضرتك انا دكتور صيدلي وهو بياخد مهدئات قويه
منتصر قال…. انت متاكد
لؤي قال بسرعه…. ايوه كنت عنده في الاوضه ولقيت العلبه بتاعته
بقلم…زهرة الربيع
الدكتور قال …ده السبب واضح انه اخد منه جرعه كبيره شويه تقريبا كان متوتر او حاجه وكانت زياده على المعتاد فجسمو شبه متخدر ومع تأثير الصدمه ما قدرش يتحرك…احب انصحكم نصيحه لازم تقابلو الدكتور بتاعه يخفف له الجرعه دي او بلاش منه اصلا اذا امكن حضرتك مدام دكتور صيدليه اكيد عارف ان المهدئات دي خطر على الجسم..معافى باذن الله
قال كده ومشي ومنتصر اتنهد وقعد بحزن وعدي كمان اما لؤي كان رايح جاي بدموع وخوف شديد على اخته وقال…. ما حدش فيكم عايز يفهمني في ايه…. ما حدش هيقولي مين اللي ضرب عليهم
عدي بص لكنتصر برجاء انه ميتكلمش …ومنتصر هز راسو بيطمنو وهو اصلا مستحيل يتكلم علشان وجود سهيله اللي كانت منهاره من العياط على اسيا ومش عايز يذودها عليها ويقول ان ابوها السبب
الوضع كان مربك جدا خصوصا ان لؤي كانت حالته سيئه قوي ورايح جاي بخوف وقلق
منتصر قرب على عدي وقال بهمس…. ممكن اطلب منك طلب
عدي اتنهد وقال بحزن… عارف عايزني اجيب اختك من عندنا صح
منتصر اتنهد وقال ….ما تزعلش مني بس مش هقدر اسيبها في البيت عندكم اكتر من كده مش مطمن اسيبها بعيد عن عيوني خصوصا بعد اللي عرفته..ومش هقدر اروح اجيبها واسيب سهيله دلوقت ..انت روحلها وقول لوالدك على اسيا… هو اكيد زمانه عرف من اللي اجره بس طبيعي ما يبينش انه عارف
عدي اتنهد بحزن شديد وقال…. حاضر هروح اجيبها
في البيت كان عصران حرفيا هيتجنن وبيزعق في التليفون وبيقول….. انت عايز تشلني يا غبي يا متخلف مش كنت تستنى لما يخلصوا خناق حتى تضرب عليهم… البنت لو حصل لها حاجه انا اللي هخنقك بايديا يا حيواااان
وقفل معاه وهو رايح جاي في المكتب بعصبيه جذب شعره لورا وهو بيقول…. اعمل ايه…. ازاي كده يا رب يا رب انا غلطت كتير عارف…. بس انا ربيتها عمرها كله على ايديا ما تخليهاش تموت بايديا يا رب
وكان واقف مكانه مش عارف يعمل ايه خرج من المكتب وعايز ينزل يخلي نيره تتصل على حد منهم يمكن يعرف حاجه بس جاله اتصال تاني رد بسرعه وهو فاكره من المستشفى هيبلغوه وقال بسرعه…ايوه الو
بس اتصدم صدمة عمره وكان مدير حساباته بيبلغوا بعملية اختلاس كبيره في الشركه ومشاكل ادت لإنسحاب بعض العملاء او بمعنى اصح بيبلغه بافلاسه الفعلي
كانت دي الضربه الاقوى من كل شيئ بالنسبالو وقع التليفون من ايده وهو مش مصدق اللي بيسمعه ومشي قدامه وهو مش منتبه ابدا للسلم اللي قدامه ووقع في لحظات كان نزل على الارض مغمى عليه
نيره صرخت جامد وجريت عليه بقت تحاول تفوقه بس ما كانش بيفوق ابدا
في الوقت ده دخل عدي واتصدم بشده وجري عليه وهو بيحاول يقومه والدموع في عيونه
في المستشفى اكمل كان فاق والدكتور حاول يخليه يفضل في السرير بس ما كانش بيرد ليه وراح وقف عند اوضة اسيا بيبص عليها من القزاز بدموع ورعب شديد
قرب من الدكتور وقال بتعب شديد… ممكن ادخل افضل معها جوه مش هتكلم خالص
الدكتور اتنهد وقال…. بس احنا لسه حالا شايلين لها الرصاصه وهيه تعبانه و
بس اكمل زعق فيه بشده وقال….. انا بقول لك مش هتكلم مش هعمل صوت تنت مالك دي مراتي
الدكتور بلع ريقه بارتباك وقال….ده مش اسلوب يا اكمل بيه لو سمحت اهدى انت في مستشفى
منتصر جري عليه وحاول يهديه وقال..اكمل اهدى مش كده
اكمل بص له برجاء وقال…. عايز اقعد معها .. ممكن تكون اخر مره اكلمها فيها ارجوكم
منتصر مفهمش قصده وقال…. ما تقولش كده الدكتور قال ان الاصابه كانت في الكتف وبسيطه هتكون بخير ان شاء الله… انا هخليك تدخل لها …بس اهدى شويه وانا هتكلم مع الدكتور
اكمل هز راسو بالموافقه وقعد على الكرسي بالعافيه ومنتصر مشي مع الدكتور على جنب
سهيله بصت لحالة اكمل بحزن كان ضعيف ومهزوز والخوف على ملامحه قربت منه وقالت بدموع… الصبر في الوقت ده هو الاجر…. قل لن يصيبنا الا ما كتب الله لنا ..وادعي لها
اكمل تفاجئ منها وبص لها بحرج شديد وقال ….سامحيني يمكن لو سامحتيني ربنا يقومها لي بالسلامه
سهيله اتنهدت وقالت…. يشهد ربي اني ما زعلتش منك ابدا يا اكمل بالعكس اللي عملته معايا شايلاه فوق راسي حتى لو غلطت معايا الاول بس في النهايه الدم اللي بينا منعك ترضى بأذيتي
اكمل لسه هيرد جاله منتصر وقال ….شوفت بالهدوء كل حاجه بتتحل…تقدر ادخلها يلا بس ما تتكلمش كتير
اكمل حضنه بشده وقال شكرا جدا..شكرا
منتثى ابتسم وهو جري ودخل عندها
اول ما دخل لؤي راح لمنتصر وقال بلهفه …طب و انا هشوفها امتى
منتصر ضحك بخفه وقال…. يا ابني هيه كويسه وكمان شويه هتفوق وكلنا هنشوفها عادي ….بس معلش خليه شويه معاها يمكن يرتاح ويتحسن
لؤي اتنهد و هز راسه بتفهم وقعد وهو حاطط ايديه على دماغه بحزن شديد
بص اتصدموا بشده لما لقوا عدي ونيره جايين مع عربيه الاسعاف والممرضين خرجوا عصران من العربيه اخذوه على اوضه بسرعه
سهيله جريت عليه وقالت بزهول …. في ايه… ايه اللي بيحصل ابويا ماله يا عدي ….حد يفهمني
عدي قال بدموع …وقع…وقع من على السلم تقريبا لما عرف باللي حصل لاسيا
سهيله شهقت بزهول ونزلت دموعها وقالت…. لا حول ولا قوة الا بالله العلي العظيم….. لا حول ولا قوه الا بالله العلي العظيم
منتصر حضنها وحوال يهديها وطبعا الجميع كان في حاله سيئه جدا من الارتباك والتوتر
عند اكمل كان قاعد على الكرسي جنب اسيا وماسك ايدها وقال بدموع…وحشاني من اول ثواني فراق يا بنت الانصاري يا بنت الباشوات
و نزلت الدموع من عيونه وقال… يا بنت قلبي
حاسس بقالي عمر ما شفتكيش… قلبي راح مني مع غمضة عينيكي يا اسيا …فتحيهم ورديهولي…فتحيهم واعملي اللي انتي عايزاه كله
و باس جبينها بحنيه وقال …خليكي عارفه اني بحبك مهما طال البعد بنا… حبيتك وحبيت الاسى والوجع منك عايزك زي ما انتي وراضي باقل بسمه منك …راضي بالقليل معاكي وكاره الكتير في بعدك….. ارجعي لي يا قمري قومي يا اسيا انااسف….اسف اني خليتك تيجي ورايا بالشكل ده….واسف لاني انا المقصود بالنومه دي
واحتدت عنيه بغضب وهو متأكد ان عصران هو اللي عمل كده
بس انتبه على صوت زعيق عدي وبكا شديد من سهيله طلع باستغراب وسرعه وتفاجئ بعدي ماسك في الدكتور وبيقول بزعيق…. اتشل يعني ايه…. هو ايه اللي كسر في العمود الفقري انت تتصرف حالا ابويا لازم يفوق ويقف على رجليه انتو بتقولوا ايه
سهيله كانت بتبكي جامد وبتقول…. الذين اذا اصابتهم مصيبه قالوا انا لله وانا اليه راجعون
ومنتصر بيحاول يقعدها وهو زعلان جدا على الللي بيحصل
لؤي كمان نزلت دموعه باسف على عمه
و اكمل بص لهم بدهشه وقعد على جنب ما حبش يبدي اي فرحه باللي بيحصل عشان حالتهم اللي كانت سيئه جدا
عدى اليوم بالعافيه وكان عصران لسه ما فقش
واسيا اول ما فاقت دخلوا كلهم علشان يشوفوها ويطمنوا عليها
اكمل بص عليها من القزاز وهيه بتحضن اخوها وحط ايده على القزاز وهو بيتمنى يكون بيلمس وشها ابتسم ابتسامه جميله وقال….. ايوه كده يا بنت البشوات التعب ما اتخلقش ليكي …اشوف وشك بخير يا اسى قلبي
واستغل انشغالهم مع اسيا وراح ناحية اوضه عصران ودخل لقاه نايم على السرير مش بيتحرك بص لو وابتسم بسخريه وقال…. عارف يعني ايه توصل انسان ان منظرك ده يبقى متعه بالنسبه له….. مش هتفهمها اصلا …مع اني متاكد اني لو انا مكانك كان زمانك حاسس زيي
وقرب منو وقال ….لو كنت سبتني في حياتكم كنت هتخسر ايه…..لو بس تجاوبني على السؤال ده…طب تقدر تقولي لما ضيعتني وشردتني وخليت كل احلامي اني ابقى شايفك بالشكل ده كسبت ايه
على العموم الحرب بيني وبينك خلصت هنا كان نفسي اقدر ابيع كل حاجه واسيبك على الحديده واسيبك للشارع بس للاسف رصاصتي ضربتني اول واحد وسبت قلبي عندك ما اقدرش اخليها تتهان
اعرف من انهارده انك هتعيش مكرم علشان اسيا يا باشا وبكده ابقى سديت عنها دين تربيتك ليا
خرج من عنده وراح ناحيه الاستقبال وقال…. ممكن ورقه وقلم لو سمحت
عند اسيا استنت وقت طويل علشان يدخل يكلمها بس ما جاش قالت بدموع….. هو معقوله بعد كل اللي حصل لي ده لسه زعلان معقوله مش هامه يدخل يطمن عليا
لؤي مسك ايدها وقال….. والله يا حبيبتي لو شوفتيه السعات الي فاتو حالته كانت صعبه جدا اصلا كان جنبك هنا طول الوقت بس انتي عارفه اللي حصل معاه كله ….اديه وقته معلش
منتصر قال لؤي معاه حق..الشاب بيحبك مفيهاش خلاف بس بجد مستنزف من جواه بطريقه صعبه ..انا مش قادر انسى حالته لما وصلنا وكنتي مصابه
اسيا بصت لسهيله وهدي اللي كانو قاعدين بحزن وقالت باستغراب….فيه ايه
لؤي حمحم وقال بتوتر….اسيا لازم تعرفي..عمي وفع من على السلم وعندو كسر في العامود الفقري ادى لشلل للاسف.
اسيا شهقت وحطت ايدها على بقها ودموعها نزلت بصدمه
سهيله جريت حضنتها وبقت تبكي جامد
واسيا بقت تطبطب عليها وتهديها ورغم انها زعلانه جدا من عصران وكمان واثقه ان اللي حصل انهارده هو السبب فيه واكيد يقصد اكمل …بس كل الوقت اللي قضتو مع عصران والعمر اللي عاشته في ضله خلاها تزعل جدا عليه
في الوقت ده دخلت الممرضه وقالت ….الشاب اللي كان معاكم هنا دفع الحساب وساب الجواب ده وقال لمراته
اسيا قلبها دق بخوف وتوتر
منتصر اخد سهيله وخرج
وعدي قال ….انا هروح اشوف بابا
و لؤي راح معاه
اسيا مسكت الجواب فتحته و قريت فيه
حمد الله على السلامه يا بنت البشوات….طالما بتقري الجواب ده يبقى انا مش في المستشفى…ويمكن اكون ركبت الطياره كمان
انا مسافر يا اسيا… انا مش هربان ولا زعلان منك ابدا انا مخنوق من ذكرياتي في البيت والبلد كلها خلاص طاقتي خلصت مبقتش قادر استحمل …لازم ارمم نفسي ولازم اتعالج مش هفضل عايش على المهدئات عمري كله
انتي طبعا عرفتي اللي حصل لعمك …لازم تعرفي كمان انو موقعش علشان عرف انك اتصبتي هو وقع لان الشركه افلست والمصنع كمان…و طبعا من الجمله فهمتي ان انا ورا الموضوع … انا فعلا وراه كنت ناوي على اكتر من كده بكتير لولا وجودك معاه وان اللي هيحصله هيضرك انتي كمان …..عشان كده بعت الاسهم بتاعتي قبل ما اضرب ضربتي وسبت لك تمنها باسمك في البنك وتلقصر لسه موجود
ابدأي حياتك من الاول وانا متاكده انك هتكبري زي عمك واكتر بس اتمنى ما تعمليش زيه وتدوسي على حد في طريقك
كمان هتلاقي في الجواب ده فلاشه …الفلاشه دي علشان لؤي فيها تسجيل لكل حرف حكاهولي علي قبل كده عن فرحه انا كنت مسجله علشان اطلعه لو عمل معايا اي حركه…وطبعا جيه وقته..ده دليل برائتها و هيطلعها ان شاء الله من القضيه زي الشعره من العجين
واخر حاجه مش هقول لك افتكريني بالخير بس هقول لك افتكريني ..افتكريني وبس…..واتاكدي ان في شخص حبك اكثر من حياته .. شخص ما يستاهلكيش يا اسيا ..و عارف كده عارف انك كتيره قوي عليه..كوني بخير في اي وقت ومع اي حد…. اما بالنسبه لجوازي منك اعذريني دي مش هقدر اساعدك فيها…. اطلقي مني غيابي لاني مش هقدر انطقها ابدا مش هقدر والله العظيم…مع السلامه يا بنت البشوات
اسيا كان قلبها هيقف حرفيا مش قادره تتنفس من الصدمه معقوله راح مش هتشوفه تاني معقوله خسرته
نزلت دموعها بحسره وقالت ….حرام عليك….. حرام عليك والله …. وبقت تبكي بشده وحسره وهي ماسكه الجواب وبتضمه
عدت لحظاته معاها قدام عيونها بقت تدور فيهم على ذكرى حلوه او كلمه واحده جميله قالتهالو او هونت على قلبه بيها… ملقتش ولا حرف واحد…وده اسوء احساس .. لما نحس بتقصيرنا في الوقت اللي مينفعش فيه ندم
بقلم…زهرة الربيع
قالت بحزن شديد..انا اسفه…ربنا يعوضك يا اكمل…ربنا يعوضك عن اللي شوفته مننا كلنا
ولسه هتنادي للؤي تديله الفلاشه بس لفت نظرها جمله في ضهر الجواب مكتوب فيها
كل اللي شاغلني دلوقت معقوله الدكاتره وهما بيطلعوا الرصاصه شافوا البدله اللي لابساها تحت العبايه… حظوظ والله تكون في بقك وتتهز لغيرك
ظهرت ابتسامه على شفايفها بدهشه شديده وضحكت بخفه وسط دموعها وقالت… مش هنساك يا مجنون…. مش هنساك ابدا
من بعد اليوم ده اتغيرت كل حاجه حرفيا
اكمل سافر وما سابش وراه اي حاجه توصلهم ليه حاولو كتبر بس معرفوش يوصلولو ابدا
فرحه اخذت براءه بعد تقديم التسجيل لانها حاله دفاع عن النفس ولؤي كان هيتجنن من السعاده بالخبر ده
سهيله وعدي كانو زعلانين جدا على والدهم وبيراعوه خصوصا بعد ما اتصاب بجلطه افقدته النطق لما عرف انه مش هيمشي تاني
منتصر كان ديما واقف جنب سهيله زي العاده و بيهون عليها كتير هو ونيره اللي كانت ديما جنب عدي وساعدته جدا
عصران رجع البيت بعد ايام على كرسي بعجل وبقى يبص للبيت بحسره البيت اللي كان بيمشيه زي الساعه وعلى مزاجه دلوقتي مش قادر يمشي خطوه فيه ولا ينطق بامر واحدد
لكن اسيا كانت واقفه جنبه رغم حزنها الشديد منه لانه سبب اساسي في سفر اكمل …كمان لانها اتأكدت من منتصر وعدي انه كان عايز يقتل اكمل
بعد مرور سنتين كاملين في احتفال صغير في جنينه القصر بمناسبه شراءهم الشركه الكبيره بتاعتهم من تاني وكانت في ناس كثير معزومه واسيا كانت بتستقبل كل الناس بابتسامه جميله وسعاده بنجاحها اللي حققته
كانت واقفه هي وفرحه وسهيله وبيضحكوا مع بعض بسعاده
فرحه قالت هما ليه كل المصورين واقفين على المدخل كده هو فيه حد مهم تاني حاضر الحفله غيري
اسيا ضحكت وقالت….يا بنتي ربنا يديني ربع ثقتك في نفسك دي
سهيله ضحكت وقالت…لا مهو ربنا عارف بيعمل ايه يا بنتي انتي لو يدهالك تخربي الدنيا انما انا علبانه بتيجي مع الهبل دبل
اسيا ضحكت ولسه هترد اتصدمت بشده لما سمعت صوته اللي لا يمكن تنساه بيقول….. اه في فيلم هينزل السنه دي فعلا وهيتصور هنا في مصر
التفتت ناحية المصورين بصدمه وكان فعلا هو..معقوله شيفاه قدامها ..بعد كل الوقت ده غمضت عنيها اكتر من مره بتحاول تتأكد من ملامحه واتقدمت عليه ودموعها بتلمع في عيونها
بس وقفت بصدمه اكبر لما لقتو ماسك ايد بنت جميله معاه ومقربها ليه وبيضحكو سوا قدام الصحافه والاسوء كانت الدبل اللي في اديهم وووووو
الحلقه الأخيره بكررررررره اتأكدو انكم عاملين متابعه للصفحه علشان توصلكم بدون روابط ولا اعلانات من هنا
الصفحة الرسميه للكاتبه زهرة الربيع
ويلا تفاعل يليق بابطاالنا وضرب نار للصباح الباكر
•تابع الفصل التالي “رواية شيطان في بيتي” اضغط على اسم الرواية
التعليقات