رواية زهرة في مستنقع الرذيلة للكاتبة جيهان عيد الفصل الخامس والثلاثون
زهرة: يا نهارك أسود، حصل إزاى ده؟ ومين اللى خونتى جوزك معاه؟
نرمين: والله يا زهرة غصب عنى، أنا ما خونتش جوزى بمزاجى ولا كنت في وعيى.
زهرة: أمال خونتيه وأنتى متنومة مغناطيسي؟ ما تحكى إيه اللى حصل.
نرمين: عزت جارنا في الشقة اللى قصادنا، جالى في يوم وقالى إن مراته تعبانة قوى وهو مش عارف يتصرف، ما كنتش عارفة اللى مخبيهولى من سوء نية، ما كانتش مراته موجودة أصلا، لكن أولاده كانوا موجودين وده اللى طمنى، أول ما دخلت أوضتهم كانت ريحتها غريبة، حسيت بدوار.
زهرة: إزاى تدخلي أوضة نوم حد ما تعرفيهوش؟
نرمين: اللى حصل، بأقول لك أولاده كانوا موجودين، ولما ما لقيتش مراته حاولت أخرج بسرعة، قفل الباب وأتهجم عليا، قاومته لكن هو كان أقوى منى، كمان أنا ما كنتش مركزة، كنت حاسة إن جسمى مش منى، أنا قاومته على قد ما أقدر والله يا زهرة، وكنت هأرمى نفسى من البلكونة لكنى منعنى، حرمنى أموت بشرف وسابنى أعيش بالعار والفضيحة طول عمرى، أنا في مصيبة يا زهرة.
زهرة: حرام عليكى، ليه عملتى كدة؟ ليه ما خدتيش حذرك؟ أنتى كدة هتأكدى له اللى الناس بيقولوه عننا، مين هيصدق إنك بريئة وإنك ما روحتلوش بإرادتك؟!
نرمين: ربنا وحده اللى يعلم إنى اتعاملت معاه بحسن نية، مشكلتنا إننا ما لاقيناش أم تنصحنا وتحذرنا من الاعيب الرجالة.
زهرة: أنتى صغيرة؟ لو عيلة عبيطة حد قال لها اللى اتقال لك ده كانت هتفهم.
نرمين: إحنا طول عمرنا مقفول علينا يا زهرة، لا أتعاملنا مع حد ولا أختلطنا بحد.
زهرة: الدنيا بقت وحشة قوى، والناس يا نرمين بقت صعبة، أنا بأشوف بلاوى.
نرمين: ياريتها جات على قد كدة، الندل صورنى معاه وبيهددنى لو ما روحتلوش في غياب جوزى هيقول له إنى على علاقة بيه وروحت له بمزاجى، مصورنى وأنا معاه كأنى شاربة ومبسوطة مش متخدرة.
زهرة: في بلاوى جديدة، مخدرات بتفقد الانسان السيطرة على جسمه من غير ما تفقده الوعى، يبان إنه صاحى وواعى وبيتكلم وهو جسمه متخدر.
نرمين: ده اللى حصل لى يا زهرة، أنا في الفيديو ظاهرة إنى عادية ومش بأقاوم، وكأنى فعلا معاه بمزاجى، الشيطان قص الحتة اللى كنت بأقاومه فيها، وخلى باقي الفيديو، أرجوكى يا زهرة أنا ما روحتلوش إلا مرة واحدة، ومش عايزة أتورط معاه أكتر من كدة، اللى حصل ده والله كان غصبا عنى.
صمتت زهرة وأمسكت برأسها، لم تجد ردا لما تقوله شقيقتها، فأكملت نرمين: عمر بيثق فيه ثقة عامية، عمر ما يستحقش منى الخيانة اتحدى الكل عشانى، مش عايزة أخذله وأأكد له أنى بذرة وحشة من شجرة وحشة.
زهرة: أروح فين وأجى منين يا ربى؟ دبرنى، هتقلبى علينا القديم والجديد.
نرمين: أنا فكرت أنتحر، بس خوفت يبتز عمر بعد كدة ويفضحنى برضو.
زهرة: اطمنى إن شاء الله هنلاقى لها حل، وربنا هيساعدنا.
نرمين: لازم حل بسرعة يا زهرة، ده عايزنى أروح له بكرة أول ما عمر يخرج على الشغل.
صمت زهرة فترة ثم قالت: تاهت ولقيناها، ما تهدديه أنتى بإنك هتبلغى مراته.
نرمين: المصيبة إن مراته عارفة إنه بيخونها، هي متعودة على كدة وبتتحمل عشان ولادها.
زهرة: اطمنى أنا هاتصرف، نقدر نبلغ في مباحث النت ونوديه في ستين داهية.
نرمين: يا مصيبتى، مباحث وسين وجيم، هأتفضح، وعمر كدة هيعرف.
زهرة: لا المواضيع دى بتكون في سرية.
نرمين: أنا مش هأقدر حتى أروح أقدم البلاغ.
زهرة: هأقدمه أنا، بس هأحاول معاه الأول يمسح الفيديو ويا دار ما دخلك شر.
ذهبت زهرة إلى عزت جار نرمين.
زهرة: انا زهرة أخت نرمين.
عزت: اتفضلى ادخلى المدام جوة.
زهرة: زى ما كانت جوة لما ضحكت على نرمين، أنا مش داخلة، ممكن تمسح الفيديو اللى صورته لأختى.
عزت: بشرط.
زهرة: أنا مستعدة أدفع لك أى فلوس أنت عايزها.
عزت: أنا عايزك أنتى.
زهرة: أنت وقح.
عزت: وأنتى جميلة قوى.
زهرة: خلص تاخد كام وتمسح الفيديو؟
عزت: أنا قولت لك على التمن.
زهرة: نجوم السما أقرب لك، وأنا هأعرف أجيب الشريط اللى معاك، في شرطة تحمى أختى وتربيك.
همت زهرة بالانصراف.
عزت: طب استنى نتفاهم.
زهرة: عايز كام؟
عزت: أنتى فاكرانى عاشق أختك؟ دى هي اللى جات لى ورمت روحها عليا، نفسها هفتها عليه لما شافت النسوان طالعة نازلة عندى.
زهرة: اخرس يا كلب، كلمة تانية عن أختى هأقتلك، قول عايز كام؟
عزت: اتنين مليون جنيه.
زهرة: أنت أكيد اتجننت.
عزت: بين البايع والشارى يفتح الله، أنا بأبيع مش عاجبك التمن ما تشتريش.
زهرة: يبقى أروح أبلغ عنك.
عزت: قبل ما تنزلي من هنا هأكون منزل الفيديو على النت وعلى جروبات مصر الجديدة كلها، أنا أدمن لعشرين جروب عليهم ألوف، وعلى ما الشرطة توصل لى تكون أختك أتفضحت.
زهرة: طب خليهم مليون، واستنى عليا أسبوع.
عزت: موافق.
زهرة: طب أنا إيه اللى يضمن لى إنك مش هتكون ناسخ الفيديو ده وهترجع تهددها بعد ما تاخد الفلوس؟
عزت: قولت لك أنا مش عاشق أختك، والستات على قفا مين يشيل، أطلع لى منها بقرشين وأنا أوعدك مش هتشوفى وشى تانى، مستعد كمان أسيب الشقة لو عايزة، أنا مش غاوى مشاكل ولا بأدور عليها، بس لو جت لى بأقول لها يا أهلا بالأحضان، كل الحكاية إنى عايز أخد منها قرشين، وعشان تتطمنى أكتر ممكن…
زهرة مقاطعة: خلاص خلاص، أنا هأديك اللى أنت عايزه، بس أقسم بالله لو فكرت تقل بأصلك معاها لأقتلك.
عزت: ما أنا قولت لك على اللى فيها.
زهرة: خلاص اصبر عليا أسبوع.
عزت: أسبوع مش أكتر وإلا.
دبرت زهرة المبلغ ببيع بعض مجواهراتها التي لا ترتديها وأعطته لعزت، قام عزت بمسح الفيديو أمامها، فعادت الطمأنينة لها ولشقيقتها بعد أسبوع عصيب.
زهرة: الموضوع خلص على خير.
نرمين: الحمد لله، مش هأنسى لك الجميل ده يا زهرة، والفلوس اللى دفعتيها هأردهالك، أى فلوس هأخدها من عمك ونصيبى في الشقة خديهم.
زهرة: عيب الكلام ده يا نرمين، المهم خلي بالك من نفسك بعد كدة.
فشلت كل محاولات اعتذار هند لعادل، كما فشلت وساطة زهرة.
زهرة: ممكن عشان خاطري تستنى حتى لما تولد، يمكن ربنا يصلح ما بينكوا وتسامحها.
عادل: خاطرك على راسي يا مدام زهرة، بس للأسف مش هأقدر أثق فيها تانى، أنا صدمتى فيها كبيرة قوى، أنا كنت حاسس إنى معايا جوهرة، واحدة حافظت على نفسها، واحدة راضية بظروفى ومستحملة بعدى وانشغالى عنها، كنت فاكر إنى زى ما أنا ما بأشوفش غيرها هي كمان كدة.
التعليقات