حواديت حبيبه ويونس كاملة بقلم عهد عامر حصريه
حواديت حبيبه ويونس كاملة بقلم عهد عامر حصريه
_ انا جاهزة!
بصيت عليها كانت لابسه دريس احمر وعليه حجاب ابيض وماسكة بلطو ابيض فى ايديها ده غير الهيلز اللى طوله 20 سم عشان تطولنى ويادوب واصلة لكتفى بالعافية.
~: جاهزة لايه بالظبط؟
بصتلى بإحباط كأنها كانت مستنيه منى رد فعل غير كده
_: جاهزة اننا نخرج فى يوم أجازتك يا يونس زى ما وعدتنى فى الخطوبة
يونس: انا يا بنتى؟ امتى ده حصل يا حبيبة؟
حبيبة بغيظ: والله قولتلى وطلعلك الشات اللى مابينا وانت بتقول
يونس: انا مش خرجتك فى السنه الهجرية صح ولا غلط؟ هو اى بعزقة وخلاص؟
حبيبة: بعزقة؟ يونس متهزرش انا انهارده مخلصه كل اللى ورايا بدرى مخصوص عشان لما ننزل قوم بقا
يونس: يا بنتى هننزل نعمل ايه فى التلج ده؟
حبببة: نتمشى، انا زهقانه اوى يا يونس طول الوقت بين الاربع حيطان وانت فى شغلك عشان خاطرى يلا.
يونس: امرى لله يا ستى، يلا بينا
فرحت زى الطفلة اللى باباها مخرجها مشوار وليه زى الطفلة ماهى طفلة فعلا!
لبست الجاكت بتاعى ونزلنا سوا
يونس: ها ياستى تحبى تروحى فين؟
حبيبة: اى مكان مش مهم، المهم انى معاك.
يونس: ااااه بتوقعينى فى الفخ صح؟
حبيبة: ليه؟
يونس: عشان اتثبت واقولك اى مكان مش خسارة فيكى واتدبس فى عزومة تقضى على مرتبى ونشحت باقى الشهر اللى لسه مجاش اصلا
ضحكت ضحكتها اللى بتخطف قلبى فى كل مره بتضحكها قدامى
حبيبة: لا ياسيدى طيب بص روح الكورنيش ونتمشى هنا
يونس: وانتى متخيله انى همشيكى على الكورنيش فى وقت زى ده؟
حبيبة: مانت معايا!
يونس: فاكس شوفى غيره
حبيبة: مممممم مش عارفة ودينى مكان على زوقك
يونس: تمام
اتحركت بالعربية وفضلنا نتمشى لغايه ماركنتها فى حتة هاديه وخدتها من ايديها اشترينا ايس كريم بالتوت والليمون زى ما الست بتحب واتمشينا وهى ماسكة فيا.
يونس: الناس كلها بتحب الايس كريم بنكهات طبيعيه الا انتى غاوية حوادق حتى فى الايس كريم
حبيبة: مانا قولتلك هات مانجا زى ما بتحب
يونس: على اساس انه مش من ضمن الخروجة اللى وعدتك بيها اننا ناكل ايس كريم توت وليمون ونتصور!
بصت عليا وابتسمت بحب انى فاكر التفاصيل دى، مهو بالعقل كده يا جماعة حبيبتى ونفسها فى حاجة محققهاش؟
طلعت الفون واتصورنا كتير اوى واتمشينا اكتر لغايه مارجلها وجعتها من الشوز
حبيبة: يونس
يونس: عيونه
حبيبة بابتسامة: رجلى وجعتنى اوى من الشوز ده
يونس: اااه، قولى بقا انك طمعانة فى الكوتشى اللى حيلتى
حبيبة: ايه ده؟ لا طبعا انا بقولك كده عشان نروح خلاص الزهق راح.
ضحكت عليها وفى لحظة كنت شايلها بين ايديى وماشى بيها لغايه العربية
حبيبة: بتعمل ايه يا مجنون انت الناس
يونس: ميهمنيش حد فى الكون غيرك، انتى معايا بالدنيا
ميلت راسها على كتفى بحب ومسكت فيا كأنها بتاخد الدفا من حضنى متعرفش انى بحتاج الدفا ده منها ومن ضمتها.
رجعنا البيت ومصدقنا دخلنا وخلعت الشوز وفضلت تحرك رجلها فى الهوا وهى قاعدة على الكرسى.
يونس بضحك: طالما بيضايقك كده بتلبسيه ليه يا حبيبتى
حبيبة: عشان اعرف اطولك، مانا متجوزه عمود نور
يونس: الله يسامحك بس برضو هتفضلى اوزعة
ضحكت وانا بجرى فى الشقة وهى ورايا وبتصرخ بعلو صوتها بغيظ وهى بتقول: على فكره الورد مبيطولش.
معاها حق على فكرة تشبه نفسها بالورد مهى وردة حياتى.
♡♡♡♡♡♡♡♡♡♡♡♡♡
بعد شوية….
غيرنا هدومنا للبس بيتى واللى حبيبة أصرت اننا نلبس حاجة شبه بعض ماتشينج يعنى
حبيبة: يونس يا قمر
يونس: ممممم
حبيبة بحماس: تيجى نطلب لينا اتنين بيتزا كده و v7 كولا وانا موجود عندى كاندى ومكسرات وعاملة كب كيك قمر ومزيناه ونعمل movi night .
بالرغم انى كنت هلكان وهموت وأنام الا انى مش هقدر اكسر حماسها ده ولا نبرة صوتها اللى كلها رجاء انى اوافق
يونس: ممممم موافق يلا بينا
قامت بحماس وهى بتسقف زى الاطفال ودخلت المطبخ تجهز الحاجة وانا طلبت الاكل وطلبتلها مولتن كيك عشان عارف انها بتعشقه وجهزت القعدة وفضلت ادور على فيلم جميل ولقيت homealon بيبدأ فى اللحظه اللى الاوردر وصل فيها ووضبنا سهرتنا وقعدنا نسمع الفيلم واحنا بناكل.
يونس: مممم الكب كيك جميل اوووى.
حبيبة: شوفتنى وانا مزيناه بقلوب حمرا زى ما بتحبها
يونس: قمر يا عيونى تسلم ايديكى
حبيبة: تسلم لقلبى ياروحى انت
يونس: بالمناسبة القمر دى اتفضلى
فتحت العلبة وخرجت المولتن كيك وفرحت بيها وفضلت تسقف وكأنى جايبلها الماس مش مولتن كيك والله انا بحب هبلة، حضنتنى بكل الفرحة اللى فى الدنيا وبعدها بدأت تاكلها وانا آكل الكب كيك التحفة ده وميمنعش من مشاركتها فى بعض الاحيان.
حبيبة: يونس
يونس: نعم
حبيبة: تعرف ايه ادفى مكان فى العالم؟
يونس: اكيد يا حبيبتى، جنب الدفايا
ضربتنى على كتفى وقالت: بطل رخامة
يونس: خلاص خلاص قولى
حبيبة: حضنك
يونس: مممم دافى يعنى
حبيبة: اوى، بحس فيه بدفا وامان وراحة وسعادة وكل حاجة حلوة، بحس انى عايشة فى العالم وحدى ومستحيل حاجة تزعلنى طول مانا معاك وفى حضنك بحس انك بتعمل اى حاجة عشان بس افرح لكن الحقيقة ان انا فرحتى فى حضنك.
يونس: تعرفى انتى بقا ايه اجمل حاجة فى الدنيا دى
ردت عليا بابتسامتها: ايه؟
يونس: انك معايا ومنورة حياتى، انتى بتدينى كل حاجة عايزها من غير ماطلبها ومن غير حتى ماتستنى المقابل، فرحتك بأبسط الحاجات تبينلى انى اخترت صح وتخلينى اهد الدنيا باللى فيها عشان اشوف ابتسامتك بس، انا بحبك يا بيبا.
ابتسمت من قلبها وضمت نفسها لحضنى جامد وكأن العالم حوليها خلص بكل ما فيه.
«حلو شعور الأمان وانك تتطمن بوجود نصك التانى، الحياة مش كلها وردى فيها الحلو وفيها الوحش فيها السهل وفيها الاصعب والأمر بس اللى بيهون كل ده وجود نصك التانى، يقويك ويشجعك، يطبطب عليك فيديك باور، يقولك كلمة حلوة تخليك أد الدنيا باللى فيها.
بيقولوا ان الحب بيصنع المعجزات، وانا بقول الحب بيصنع شخص تانى بنسخة أقوى وأنجح من الأول.
حبك الحقيقى هتلاقيه فى مراتك، فى بنتك، لازم تحافظ عليه بكل قوتك، الحب مش كلمه بحبك وخلاص بالعكس فى الوقت اللى انت بتكون حاسس نفسك فيه اتعس واحد فى الدنيا الحب قادر يحولك لأسعد واحد فى الدنيا.
الدفا، الأمان، الحنان، الاهتمام، الحب كل دول لما يتجمعوا فى شخص واحد يبقى يابختك بمكسبك فى الدنيا.»
#حواديت_يونس_وحبيبة.
_يا بنتى مالك بس بتعيطى كده ليه؟ اهدى يا حبيبة
حبيبة: بقا انا بعد كل اللى عملته معاه يا منه واطلع قليلة الأصل ومش مستحمله ظروفه، أنا؟!
منه: طيب ايه اللى حصل طيب ماله بيكى
حبيبة: كنت قاعدة معاه امبارح فا بقوله مخنوقة يا يونس تعالى نروح مصيف او نسافر فى اى مكان انا زهقانة، لقيته فجأة زعق فيا وفضل يقولى انتى مش حاسة باللى احنا فيه؟ الظروف معاندة معانا من كل ناحية وانتى جاية تقوليلى نخرج ومصيف ده بدل ماتفكرى معايا هندبر حالنا ازاى؟ بقولك ايه انا مكنتش فاكرك كده روحى عند ابوكى لحد ما الازمة دى تعدى وارجعى تانى وابقى قوليله يخرجك وسابنى ودخل نام
منه: ايه ده هو ماله، انتى يعنى كنتى أجرمتى عشان طلبتى تخرجى
حبيبة بعياط: مش عارفه يا منه ايه اللى قلب حاله كده حتى نزل الصبح من غير ما يعبرنى ولا يحاول يصالحنى
منه: طيب اهدى، لمى انتى هدومك وروحى عند بيت ابوكى زى ما قالك انتى مش قليلة عشان يقولك حاجة زى دى وانا هجيلك هناك
حبيبة بعياط: لا يا منه انا متأكدة ان فيه حاجة كبيرة معاه خلته يطلع عصبيته فيا ده مش يونس حبيبى ابدا
منه : طيب خلاص هاتى رقمه اكلمه واحاول افهم ماله، وانتى خدى كام غيار قدامه وروحى على بيت عمو وارجعى اخر اليوم متباتيش نعمله كارت ارهاب يعنى عشان نعرف ماله
حبيبة: وهقول لبابا ايه؟ لا انا مش هسيب البيت انا هعمله اكله حلوة كده واستناه لما يرجع
منه: ياستى قوليله اى حاجة انك جاية تقضى اليوم معاه، وابقى ارجعى اخر اليوم مش حوار، وانا اكلم يونس واقوله انك زعلانه وبتكلمينى وانتى منهاره اوى ومعرفتش اسكتك ووصلتك لبيت اهلك لحد ما نعرف ماله، متبقيش خايبة عشان ميسوقش فيها، الرجالة عايزة قرصة ودن
حبيبة بتردد: تفتكرى؟!
منه بتأكيد: طبعا يا بنتى مش بعيد يكلمك ويصالحك وانتى هناك، يلا قومى كده وروحى عند بيت اهلك هو زمانه راجع من الشغل دلوقتى وابعتيلى رقمه وانا اكلمه واظبط الدنيا ما بينكم متقلقيش خالص
حبيبة: شكرا يا منه انا مش عارفه من غيرك كنت عملت ايه
منه: بس يا هبلة دانتى اختى واكتر كمان المهم يلا متتعطليش.
قفلت معاها وانا مترددة انزل ولا لا؟ بس انا من امتى بسيب يونس فى زعله لوحده كده اينعم المرادى قسى عليا واوى كمان بس برضو ده حبيبى ازاى اعمل كده؟
وفجأة رنت فى ودنى جملة منه وهى بتقول (متبقيش خايبة عشان ميسوقش فيها) هو ممكن يغلط كده مرة تانيه ويعتمد انى هسامحه؟!
لا انا هنزل اروح لبابا دلوقتى وهو اما ييجى ومنه تكلمه هييجى يصالحنى ايوه منه هتخليه يصالحنى
وبتهور بعت رقمه لمنه صحبتى وقولتلها انى نزلت وفعلا نزلت وروحت لبابا وانا بجلد ذاتى انى هسيبله البيت.
من اول جوازنا واحنا متفقين ان زعلنا جوة بيتنا وجوة اوضتنا ليه عملت كده؟
♡♡♡♡♡♡♡♡♡♡♡♡
عند يونس…..
كان راجع من شغله وهو زعلان من نفسه انه زعلها، معقول يقول كده وهى ياما شالته وياما وقفت جنبه، لا وكمان يزيد الوجع عليها ويقولها روحى عند ابوكى؟
قاطع شروده رنة موبايله
يونس: الو مين معايا؟
منه: انا منه يا يونس صاحبة حبيبة
يونس باستغراب: خير يا منه فيه حاجة؟ وجبتى رقمى منين؟
منه: من حبيبة، مالكم يا يونس حبيبة بتكلمنى وهى منهارة من خناقتكم ايه اللى حصل
غمض يونس عيونه بزعل من نفسه:مفيش يا منه شدينا بس فى الكلام سوا
منه: بصراحة الله يعينك يا يونس انا عارفة ان الدنيا مأزمة معاك اليومين دول معايا صحاب فى نفس الشركه اللى انت فيها وقالوا انهم هيستغنوا عن كام موظف وانت من ضمنهم هى ازاى مش بتقدر حاجة زى دى
يونس: لا حبيبة بتقدر، هى بس مش فاهمه
منه بسخرية: وحياتك حتى لو عارفة انا حبيبة صحبتى من ابتدائى يعنى عارفة دماغها اكتر منك طالما عايزة حاجة بتصر عليها حتى لو الظروف ايه
يونس: معتقدش يا منه، حبيبة طول فترة جوازنا فى ال٣ سنين واقفة جنبى بكل حاجة، هى بس اليومين دول مش عارف مالها
منه: ولله يا بنى انا من الاول قولت انكم مش راكبين مع بعض
يونس وهو بيسيب المفتاح على ترابيزة الشاشة: ازاى يعنى يا منه؟
منه: يعنى المفروض انها تحس بيك اكتر من كده، طيب تعرف من شوية وانا بكلمها بتقولى انا لازم اروح عند بابا هو مش سامعلى كلمه، اقولها يا بنتى اهدى جهزيله اكله حلوة واتفاهمى معاه، تقولى متبقيش خايبة الراجل لازمله قرصة ودن عشان ميسوقش فيها، وكلام كتير غريب
يونس: حبيبة قالت كده؟
منه: واكتر من كده وحياتك، بص انا تحت بيتك اصلا اطلع؟
يونس: اطلعى
وقفلت معاه وطلعت وهو فتحلها ودخلت وساب باب الشقة مفتوح.
يونس: كنتى بتقولى ايه بقا
منه: صدقنى انت تستاهل الاحسن منها واحده تشيلك فى عنيها وتقف جنبك احنا من الاول قولنا لو يونس مع واحده تانيه وحبيبة مع واحد تانى كانت الدنيا مشيت
يونس وقف بعصبية: انتى بتقولى ايه؟ واحد تانى ايه وواحده تانيه ايه، انتى جايه تصلحى ولا تخربى ما بينا؟ انتى خونتى صحبتك اللى آمنتك على سرها وجاية لجوزها؟
منه: هى اللى غبية مش عارفه تحتويك ولا تطبطب عليك، ياما قولتلها تخلى بالها منك وهى راكبة دماغها وسايقة الهبل عالشيطنة
يونس بصدمة: انتى مستحيل
تكونى صحبتها، حبيبة أرق من انك تتكلمى عليها كده حبيبة مش عشرة يوم ولا اتنين حبيبة عشرة ٧ سنين اتنين خطوبة وكانت ملتزمة بكل ضوابطها وبكل حاجة فيها واتنين كتب كتاب واول زنقة تحصلى فى كتب كتابنا حبيبة مترددتش لحظه فى انها تخلع دهبها من ايديها وتديهولى وتقولى المهم انت وطز فى اى حاجة فى الدنيا دى انت اللى باقيلى مش الدهب، حبيبة اللى عشت معاها ٣ سنين جواز عمر ما خناقنا طلع بره ده اذا كان فيه خناق أصلا، خناقنا دايما كان بينتهى بعد ساعة بالكتير ومن غير ماحد يعرف مش انتى اللى هتعرفينى مراتى، مش انتى اللى هتقوليلى مراتى ايه اللى فيها وايه اللى مفيهاش، العنوان غلط يا منه اذا كانت هى حكتلك فهى للأسف فكراكى اختها إنما أنا فأنا بحب مراتى ولو السما انطربقت على الارض هى على زمتى وانا راجلها الوحيد.
منه بإصرار: وانا بقولك متنفعكش مش بعيد تلاقيها متصلة بيك دلوقتى بتقولك انا عند بابا وابعتلى ورقتى دى مجنونة وتعملها.
مكملتش كلامها والفون رن بإسم (حبيبةُ يونُس)
منه بسخرية: جالك كلامى، رد بقا
فتح يونس المكالمه وحبيبة فضلت ساكته
يونس: خير يا حبيبة
حبيبة: يونس، انا عارفه انك مضغوط وعارفه ان فيه حاجة حاصلة معاك انت مش قايلهالى الله اعلم هى ايه، بس اللى كان بيكلمنى امبارح ده مش يونس جوزى وحبيب عمرى ده واحد تانى انا معرفوش جديد عليا، واحد خوفنى منه لأول مره من ٧ سنين، انا مسبتش البيت زى مانت فاكر انا كنت فعلا رايحة عند بابا بس اخر اليوم وهرجع بعدين مقدرتش، مقدرتش ازود همومك هم تانى لغايه ما أشوف مالك، بس اللى قولته يا يونس انا مش هعديه هنخرج من ازمتنا وهنحل كل حاجة وبعدها نتصافى أنا وانت، أنا راجعة على البيت دلوقتى وبعد اذنك هجيب اكل من بره لانى عارفة انك جعان ومش هتصبر لغايه ما احضر الاكل، سلام يا يونس
قفلت المكالمه معاه ويونس بقى بيبص للفون بابتسامة واسعة انها مخذلتوش وكأنها واقفة قدامه بعدها رفع راسه لمنه اللى كانت
واقفة
يونس بحب: صدقتينى لما قولتلك ان حبيبة مراتى مش كده؟ اللى لسه مكلمانى دى حبيبة مراتى مش حد تانى
منه: انا هثبتلك انها كذابه دى هى اللى بلسانها قايلة انا مش قادرة استحمل العيشة معاه، ومش قادرة استحمل انه حارمنى من كل حاجه حتى الخروجة، وادخل هتلاقيها واخده هدوم معاها، حبيبة بتاعة مصلحتها مش اكتر
وقربت منه واتكلمت وعيونها فى عنيه: صدقنى يا يونس انت تستاهل واحدة احسن منها بكتير تستاهل واحدة تحافظ عليك من الهمسة، تستاهل واحدة متطلعش اسرار بيتها لحد
يونس بسخرية: والحد ده انتى صح؟
منه: طبعا انا، محدش هيحبك ولا يحافظ عليك أدى، تعرف انا اتمنيتك كتير فى كل وقت كنت بتكون فيه مع حبيبة بتمناك معايا حتى كلام حبيبة عنك انك جبتلها حاجة ولا دلعتها بتمنى ان ده يكون ليا، صدقنى يا يونس حبيبة متستاهلكش ولا انت تستاهل واحدة زيها.
كنت سامعة كل كلمة بتقولها، قلبى فى اللحظة دى اتفتت معقول؟ صاحبة عمرى واختى تخونى بالشكل ده؟!
محستش بحاجة غير وانا داخلة وواقفة قدامها بعد ما رميت الحاجة اللى فى ايدى على الارض من الصدمة
حبيبة: انتى يا منه؟ ليه؟ دانتى اختى، صاحبتى وصاحبة عمرى اللى تعرفى عنى حاجات امى ذات نفسها متعرفهاش، مستكتره عليا جوزى؟ وانا الخايبة اللى طنت زعلانه ومش عارفه افضفض مع مين جريت عليكى يا اختى، انتى ازاى كده؟ ازاى عندك الشجاعة انك تخونينى بالطريقة دى؟ انا عملتلك ايه وأذيتك فى ايه؟ دانا الكل كان بيقول ابعدى وانا اقول اختى، الكل يقولى بتكرهك واقول يا جماعه انتو ظالمينها، دى بتنصحنى احافظ على بيتى اتاريكى بتطفشينى منه عشان يخلالك الجو معاه؟
لفيت ليونس وكملت بدموع: حقك عليا انى عرضتك لموقف زى ده، حقك عليا انى خرجت اسرار بيتنا لأول مرة فى حياتى لشخص مبيقدرش ولا يصون حتى العيش والملح اللى بينا. خرجها برة عشان خاطرى خرجها
قولت كلامى ده وأغمى عليا بين ايدين يونس.
شالها يونس ودخلها الاوضة بسرعة ورجع طرد منه اللى كانت مصدومة من رجوع حبيبة بالسرعة دى، وكلم الدكتورة وجات كشفت على حبيبة وبشرته انها حامل فى شهرين ولازملها الراحة.
بعد شوية كانت حبيبة فاقت ويونس جابلها الاكل وغصب عليها تاكل وكل معاها وخدت شاور وجات قعدت فى السرير ويونس جنبها وحاضنها وساكت.
حبيبة: يونس
يونس: نعم
حبيبة بدموع: انا اسفة
يونس: متتأسفيش يا حبيبة براءتك عمتك عن اللى حواليكى، بس اهى غلطة صغيرة علمتك، اينعم الدرس صعب بس انتى اقوى منه، حطى دايما فى دماغك ان مش كل اللى بتقولك ازيك يبقى قصدها تتطمن عليكى بالعكس اوقات كتير بيبقى قصدها تشوف حياتك حلوة ولا مكلكعة، والحقد والكره يشتغلوا، اديكى شوفتى موقف صغير ما بينا فى لحظة غضب كان هيضيع اجمل سنين عمرنا وكل اللى بينا، دى ماسمهاش صحبة دى حتى السلام خسارة فيها، اللى تبص على نعم غيرها ولا حياة غيرها متتصاحبش، اعتبرى خسارتها مكسب ليكى مش العكس، متآمنيش لحد يدخل ما بينا يا حبيبة، مشاكلنا فى بيتنا وفى حياتنا محدش هيحبك أدى وأد نفسك ومحدش هيخاف على مصلحتك غير نفسك، البيت عشان يعمر ميدخلوش تالت فهمانى يا حبيبتى.
حبيبة: فهماك يا حبيبى وحقك عليا انا اتعلمت الدرس وبالقوى كمان
يونس: ربنا يكلمك بعقلك يا روحى، ايوه كده خلى الواد ييجى يشوف امه سترونج
حبيبة: ما يمكن بنت
يونس: هتبقى أحلى بنوتة فى العالم عشان من احلى بيبا فى الدنيا.
حبيبة: انا بحبك اوى
يونس وهو بيشدد على حضنها: وانا بموت فيكى
#حواديت_يونس_وحبيبة
_انتى اتجننتى عايزة تلبسى دبلة واحد وانتى على زمة واحد تانى يا حبيبة؟
حبيبة: وفيها ايه؟ وبعدين مانا ياما اقنعتكم انى مش عايزة اتجوز حد تانى انا مستنيه جوزى يا سارة
سارة: جوزك؟ وهو فين جوزك ده؟ انتى هتجننينى
حبيبة بهدوء: صدقينى راجع، وهياخدنى احنا مكتوب كتابنا كل الحكاية ان ظهور خالى فجأة بوظ الدنيا وخلاه يطلقنى بس هو مطلقنيش هو قال لخالى انا طلقتها عشان يحمينى
سارة: برضو مش مقتنعه وافقتى تقابلى العريس ليه طالما انتى لسه بتحبى يونس
حبيبة: يا سارة اى خطوبة ولا جوازه حتى ليا باطله، انا متجوزة يونس ومش هتجوز حد غيره مهما يحصل وبعدين…
فى اللحظة دى دخل خالى الاوضة بكل عصبية ومسكن… ى من شعرى
خالى: ايه اللى انتى بتقوليه ده، الواد ده احنا مش قولنا منجيبش سيرته على لسانا، ده طلقك وسابك يعنى رماكى افهمى
حبيبة: يونس مرمانيش يونس بيحبنى، هو من ضغطك عليه قالك انه طلقنى
رمانى على الارض لدرجة ان راسى اتخب.. طت فى السرير وجابت د.. م، وطلع ورقة من جيبه ورماها ليا
خالى: اتفضلى قسيمة طلاقك اهى
مسكتها بايد بتترعش ومهتمتش بالد.. م اللى نازل من دماغ.. ى عشان نزي.. ف قلبى كان اكبر فى الوقت ده
حبيبة بتوهان: م مستحيل، يونس ميعملش فيا كده، يونس بيحبنى لا
خالى: لسه بتقول بيحبنى مهو طلقك ورماكى، اعملى حسابك اهل خطيبك جينلك بكره
سابنى وخرج وسارة جريت عليا وفضلت تكتم فى الجر.. ح وف لحظة توهت عن الدنيا كلها، محستش غير بروحى بتتسحب بالبطئ للضلمة، بس ضلمتى من غير يونس اكبر.
♕♕♕♕♕♕♕
ماما: نورتونا، اهلا وسهلا اهلا
محمد: بنورك يا طنط
دخل محمد ومامته (عريس الغفلة) وفضلوا يتكلموا وخالى معاهم لغاية ما خالى غمز لماما انها تقوم تجيبنى.
كنت مغطية الجرح بطرحتى بس كان باين جزء من البلاستر.
سلمت عليهم وقعدت وانا باصة على الارض وساكتة
خالى: طيب نسيب العرسان لوحدهم
وقاموا يقعدوا فى الصاله وقعدت انا ومحمد فى الصالون
محمد : ايه الجرح ده؟
حبيبة: عادى
محمد بهمس: يونس بيسلم عليكى
فى اللحظة دى رفعت دماغى ليه بلهفة وقربت اقعد على الكرسى اللى جنبه
حبيبة بلهفة: يونس، انت تعرف يونس؟ هو فين؟ وعامل ايه؟ و..
محمد: ششششش اهدى اهدى، هو كويس والله وبيقولك متقلقيش هيجيلك قريب
حبيبة بدموع: خدنى ليه، انا عايزه اشوفه قوله حبيبة محتجالك قوى
محمد: حاضر، متقلقيش هو راجع وقريب اوى كمان، انتى دلوقتى هتقولى انك موافقه على الخطوبة وهنتخطب عشان خالك ميعملكيش حاجة.
حبيبة: مش مهم اى حاجة المهم يو… يونس طلقنى
محمد باستغراب: ازاى؟
حبيبة: خالو جابلى ورقة طلاقى امبارح ومتوقعة من يونس
محمد: حبيبة، يونس برة مصر ليه شهرين ونص من وقت خناقته مع خالك عشان يسيبك.
حبيبة بتوهان: يعنى برضو سابنى ومشى
محمد: صدقينى غصب عنه، يونس هربان من خالك، خالك هدده انه لو مبعدش عنك هيدخله السجن فى شيكات وبلاوى كتيرة اوى، وانتى عارفة ان خالك يقدر يعمل كده، وهو رفض وعرفنا ان خالك فعلا راح بلغ عنه بتهمة شيكات مزورة ومنعرفش جاب توقيع يونس عليها ازاى، عرفنا ده من زمايلى فى القسم وبسرعة هربته لبرة وبالعافية كمان مكنش عايز يسيبك ويمشى
حبيبة بصدمة: خالو يعمل كل ده؟
محمد: واكتر كمان، صدقينى يونس بيحبك وهو اللى بعتنى اعمل انى عريس عشان يضمن ان محدش ييجى جنبك عشان عارف ومتأكد ان خالك مش هيسكت والنتيجة واضحة على وشك اهو.
حبيبة: انا عايزة اكلمه
محمد: حاضر، هخليكى تكلميه المهم دلوقتى تمسحى دموعك وحاولى تثبتى عشان خالك ميشكش فى حاجة
حبيبة: حاضر، حاضر
ومسحت دموعى بسرعة وخالى دخل هو وماما ومامة محمد، وانا كنت ماسكة دموعى بالعافية لغايه م مشيوا ودخلت اوضتى واترميت على سريرى وانا مش عارفة افرح ولا ازعل؟
افرح ان يونس مباعنيش ولا طلقنى زى ما قالى؟
ولا ازعل انه بعيد عنى بسببى؟
قومت اتوضيت وصليت وفضلت ادعى ربنا طول الليل انه يحفظه ويرجعهولى بالسلامة .
♕♕♕♕♕♕♕♕♕♕♕
عدت الايام، وخالى وافق على محمد من غير حتى مايرجعلى وجه محمد وكان جايب نفس شكل دبلة يونس وهمسلى انى اعمل نفسى بخلع الدبلة دى وبلبس دبلته وانا ف الاساس خلعت دبلت يونس ولبست دبلة يونس برضو، والدبلة التانية شيلتها.
كنت قاعدة فى اوضتى زى عادتى بكتب اشتياقى ليونس للمرة اللى مش عارفة عددها فى النوت بتاعتى وكأنها صديقة الرحلة واللى شاهدة على كل حاجة جوايا، شاهدة على وجعى ودموعى واشتياقى وحبى حتى ضحكتى وانا بتخيله معايا.
بدأت اكتب……..
«لم أجد أى حيلة أُصبرُ بها قلبى وأهدِّئ بها روحى، لم أعد أستطع الصمود أكثر من ذلك، أقسم لك أن كل جميل تحول للأسوأ دونك، حتى جدران غرفتى بعدما كانت تشهد على فرحتى وسعادتى أصحبت لا تشهد سوى على ألمى ببعدك، عُد أناجيك بكل جوارحى أن تَعُدْ، قلبُ حبيبتك يؤلمها، وروحها منكسرة، لا أحد يستطيع أن يرمم أشلائهم سواك، بربك عد لهم سريعًا». عهد عامر.
قفلت النوت وحطيتها فى الدرج وفضلت قاعدة بفتكر ذكرياتنا سوا.
يتبع……
دخلت ماما الاوضة وهى ماسكة فى ايدها المغرفة
ماما: تعالى ياختى ساعدينى فى المطبخ
حبيبة: حاضر
قومت ودخلت وراها المطبخ لقيتها بتجهز اكل وقالتلى انها عازمة محمد ومامته وان خالى هو اللى عزمهم
وقفت جنبها وهى بتعمل الاكل وانا ساكته ومكنش ليا نفس انى امسك معلقة حتى.
افتكرت بعد كتب كتابى بيوم لما كنا عازمين يونس
flash back
دخلت المطبخ من بدرى زى عادتى لما يونس بيكون معزوم، عملت شعرى كحكة لفوق وشغلت أغنية لعبد الحليم حافظ واندمجت فى الاكل لغاية مخلصت
وبسرعة اخدت شاور ولبست دريس بيتى بينك وفردت شعرى وحطيت فيه طوق بينك على شكل فيونكة وخرجت على المطبخ اكمل باقى الحاجة.
محستش بحاجة غير ويونس واقف على باب المطبخ ومربع ايده وبيتفرج عليا وانا بزين كيكة الفراولة قبل ماحطها فى التلاجة وانا بدندن أغنية «ياما ليالى وانت مش معايا انا كنت بحلم بيك معايا»
وكملها ورايا «دلوقتى وانت هنا معايا هحتاج لايه وانت هنا »
لفيت ليه بفرحة وجريت اتعلقت فى حضنه زى الطفلة
حبيبة: وحشتنى أوى
يونس: وحشتينى أكتر، بتعملى ايه بقا
حبيبة بحب: بعملك كيكة فراولة
يونس: ايه ده فراولة بتعمل فراولة يا خواتى
حبيبة بكسوف: بس يا يونس
يونس: تعالى ورينى يلا اساعدك
وقف معايا وانا بزين الفراولة على شكل قلب فى كل الكيكة وحطيتها فى التلاجة وغرفنا الاكل سوا وقعدنا ناكل سوا
يونس: لا لا لا الاكل مسكر
حبيبة باستغراب: ازاى
يونس بغمزة: عشان العسل عامله
حبيبة: يا لهوى يا يونس خضيتنى
ضحك يونس بحب وكمل أكله وكان بيغيب ويألكنى معاه بحنية.
وقام يغسل ايده وعملتله القهوة اللى بعد الاكل زى ما بيحب يشربها وطلعتهاله فى البلكونة.
حبيبة: القهوة
يونس: تسلم ايد القمر، تعالى بقا
وقفنى قدامه وخرج انسيال على شكل نجوم صغيرة بللون البينك ولبسهولى وباس ايدى بحب
يونس: دى حاجة بسيطة عشان مراتى القمر
حبيبة بانبهار: تحفة يا يونس، تحفة بجد
يونس: انا لو طولت اجيبلك العالم كله مش هتأخر
حبيبة: وانا مش عايزة حاجة من العالم غير وجودك
يونس: وعد منى عمرى مهسيبك.
وحضنى بدفا وأمان.
back..
محستش غير بدموعى بتنزل وانا بقول: وأديك خلفت بوعدك وسبتنى يا يونس.
انتبهت ليا ماما وبصتلى وقربت منى
ماما: ايه اللى جبرك؟
حبيبة: يعنى مش عارفة؟
ماما: حقك عليا يا بنتى، حقك عليا، انا السبب فى الى انتى فيه ده
حبيبة: الحمد لله يا ماما، ده نصيبى
حضنتنى ماما وطلبت منى ادخل اوضتى ارتاح فيها، ومحبتش تضغط عليا اكتر من كده.
دخلت اوضتى وقفلت الباب ورايا وفضلت اعيط بصوتى كله: ارجعلى يا يونس، ارجعلى.
وفى الوقت ده صوت جالى من برة بأغنية ميادة الحناوى «كان ياما كان الحب مالى بيتنا، ومدفينا الحنان، مدفينا الحنان، زارنا الزمان، سرق منا فرحتنا والراحة والأمان، الراحة والأمان»
كملت وراها وانا دموعى بتنزل وقلبى بيتقطع «حبيبى كان هنا مالى الدنيا عليا بالحب والهنا، حبيبى يا انا يا اغلى من عنيا نسيت مين انا،انا الحب اللى كان اللى نسيته زمان من قبل الاوان، نسيت اسمى كمان، نسيت يا سلام على غدر الانسان»
ونمت مكانى ودموعى على خدى محستش غير بماما بتصحينى البس عشان محمد ومامته جم بره وفعلا قومت غسلت وشى ولبست دريس اسود وحجاب بينك ولبست الانسيال بتاع يونس اللى مش بيفارق ايدى زيه زى الدبلة وقعدت معاهم لغايه ما خدوا واجبهم وقعدنا فى الصالون كلنا.
مامة محمد: شكلك بتحبى اللون البينك اوى يا حبيبة كل حاجة بينك من الحجاب للشوز حتى الانسيال الجميل اوى ده خد بالك بقا يا محمد
حبيبة بتلقائية: ده يونس جابهولى بعد كتب كتابنا وقالى متقلعيهوش من ايدك خا…
سكت لما لقيت الكل بيبصلى ومامة محمد اتضايقت من ذكرى لجوزى قدامهم
مامة محمد بغضب: هى ايه الحكاية يا ام حبيبة، كل شوية يونس يونس احنا مش هنخلص من السيرة دى ولا ايه؟
ماما بتوتر: معلش… اصلى.. يعنى… هى… لسه مش متعوده
محمد: وانا مش متضايق من حاجة يا طنط هتتعود بعدين
مامة محمد: هو ايه اللى تتعود بعدين، اسمع يا محمد حالا تسيب البنت دى
خالى: استهدى بالله بس يا ام محمد، وانتى يا بت اتعدلى مش كده، وآدى الأنسيال
شد خالى من ايدى الانسيال قط.. عه نصين وانا بقيت باصه عليه بصدمة وانا شايفاه مرمى على الارض وهو مقطوع وكل اللى حوليا كانوا باصينلى بشفقة وخوف من انهيارى
محمد: مكنش ليه داعى اللى حضرتك عملته ده
خالى: اسكت انت انا عارف اخرتها ايه، قومى يا بت اعملى شاى يلا
ماما شدتنى بسرعة لبرة وانا باصه قدامى وساكتة وعملت الشاى وبقيت تكلمنى وانا ولا شايفة ولا سامعة اى حاجة حوليا كل اللى فى دماغى الانسيال اللى اتقطع!
ماما خلتنى امسك صنية الشاى وهى بتهدينى ودخلت ليهم تانى وحطيت الشاى ملقتش الانسيال مكانه؟!
حبيبة بتوهان: الانسيال فين؟
خرجه محمد من جيبه: اهو
خدته منه بلهفة وانا بحاول اقنع عقلى انه سليم، دموعى نزلت وانا بحاول الصمه فى بعضه ومهما يتكلموا حوليا مش سامعه اى حاجة محستش غير بخالى بيمسكه من ايدى تانى والمرادى رماه من الشباك
حبيبة بصراخ: انت عملت ايه، ليه بتعمل كده؟
خالى: اكتمى يا بت، واقعدى احترمى نفسك والناس اللى قاعدة، ولا انتى دلع ابوكى خربك
حبيبة: ابويا لو كان عايش مكنتش قدرت ترفع عينك فيا، ابويا لو كان معايا كان زمان القلم اللى بتديهولى بينزل عشرة منه على وشك.
خالى: اخرسى
حبيبة: مش هخرس، انت دمرتنى، خليتنى على طول بعيط، حرمتنى من أغلى انسان على قلبى، حرمتنى من روحى وحرق..تها، ليه؟ انا عملت فيك ايه؟ ليه تعمل فيا كده لييه؟؟ انت مستحيل تكون بنى آدم، انت اسوأ واحقر حد انا شوفته فى حياتى كلها.
فى اللحظة دى مسك خالى الشاى ودل.. قه وكان رايح ييجى على وشى ومطالش غير جزء من ايدى ومكنش سخن اوى، استغل محمد اللى حصل وفى الوقت ده طلع س.. لاحه من جيبه وطلب من مامته تفتح الباب زى مكانوا متفقين على كل ده
وفتحت الباب كان يونس!
حبيبة بدموع: يونس.
دخل يونس ومسك خالى وض.. ربه بكل ما فيه، طلع فيه غيظ وقهرت الشهور اللى فاتت
يونس بغضب: بقى انت تحرمنى من مراتى كل ده؟ انت تعمل فيا انا كده؟ ليه؟؟ اناا عملتلك ايه؟ أذيتك فى ايه قولى؟ انا اصلا معرفكش ولا انت تعرفنى، انطق
خالى: انا كنت عايزلها جوازه احسن بس هى اللى وش فقر
حبيبة بجنون: جوازة احسن؟ وانت مالك؟ جوازة احسن فى ايه؟ فى انك تجيب واحد من سن ابويا واتجوزه عشان فلوسه؟ جوازة احسن فى انك تجيبلى تاجر مخ.. درات ولا آثار عشان ليك مصلحة معاه لولا ما محمد جه اتقدم؟
وبصت على يونس وكملت بدموع: انت ليه سكتله كل ده؟ ليه سيبتى ومشيت، انا ضعت من بعدك، دم.. رنى، والله دم. رنى وبقيت بتمنى الموت اكتر ما بتنفس، كس.. رونى من غيرك يا يونس كس.. رونى وعدوا على قلبى رايح جاى انت سبتنى لوحدى لييييه.
انهارت من العياط وخرجت كل الحزن اللى كنت كبتاه الشهور اللى فاتت، حضنى بكل قوته وانا فى اللحظة دى انهارت ومبقتش بعمل اى حاجة غير انى بعيط وبقول:
كسرونى من غيرك، والله كسرونى.
وماما واقفة ومش قادرة تقرب منى ومحمد اخد خالى ونزل لتحت بعد ما مضاه على تنازل عن الشيكات المزيفه اللى كان رافعها على يونس، واخد والدته ونزل وماما دخلت اوضتها تعيط انها سابتنى كل ده من غير ما تدافع عنى.
♕♕♕♕♕♕♕♕♕
كنت فى حضنه مكانا على الارض وانا مش حاسه بالوقت ولا اى حاجة ساكته وباصة قدامى ودموعى بتنزل بهدوء فى صمت بيقطعه صوت عياطى من وقت للتانى.
يونس: مسبتكيش، انا كنت معاكى طول الوقت، وعارف عنك كل حاجة بس مكنش ينفع اقربلك انا كان مطلوب القبض عليا وأى ظهور كان هيحقق هدف خالك انه يبعدنى عنك للأبد، لغاية ماعرفت ازيف باسبور وانزل بيه، صدقينى انا مبعدتش عنك بمزاجى، انا كل يوم كنت بموت الف مره عشان انتى مش فيه، وبفضل اسمع ريكورداتك اللى بصوتك عشان احس انك معايا، محدش بيسيب روحه يا عبيطة وانتى روحى اللى مقدرش اعيش من غيرها.
حضنته اكتر ودخلت جوة حضنه وكأنى بأكد لنفسى انه فعلا هنا وانا معاه.
♡♡♡♡♡♡♡♡♡♡♡
عدت الأيام وانا بحاول اتعافى من الفترة اللى فاتت بوجود يونس وماما جنبى، ويونس رجع لشغله تانى وبقى كل يوم ييجى يطمن عليا ويقعد معايا شوية ويمشى وهو بيوعدنى ألف وعد انه هيروح ويجيلى بكرة.
لغاية ما جه يوم فرحنا واللى أصريت فيه على يونس انه يبقى سيشن بسيط وفلوس القاعة نعمل بيها عمرة وهو وافقنى على كده جدا، جهزت ونزلت للمكان بتاع السيشن ويونس كان واقف مستنينى.
جريت عليه ومهتمتش بتقل الفستان ولا بأى حاجة حوليا كل اللى كان فى دماغى انى احضن يونس واتأكد فعلا انه معايا
يونس بمرح: لو اعرف ان بعدى عنك هيخليكى كل شوية تدينى حضن مطارات كنت…
قاطعته بغضب وانا ببعد عنه : كنت عملت ايه يا بيه؟
يونس بغمزة: كنت قربت اكتر
وشدنى لحضنه تانى
يونس: وعد منى انى عمرى ما هبعد عنك مهما يحصل فى الدنيا، انتى نفسى وحياتى كلها، محدش يقدر يعيش من غير قلب زى ما يونس ميقدرش يعيش من غير حبيبته.
وطلع انسيال جديد بدل اللى اتقطع ولبسهولى وباس ايدى
حبيبة بحب: إلى متى يا لوز؟
يونس: إلى الأبد يا سكر.
وحضنى بكل قوته ولف بيا وسط تسقيف الكل وفرحتهم بينا.
#حواديت_حبيبة_ويونس.
بقلم: عهد عامر
تمت.. ♡
رأيكم
التعليقات