رواية مذكرات حبيبة ( الجزء الثاني ) الفصل الأول والثاني بقلم عادل عبد الله
رواية مذكرات حبيبة ( الجزء الثاني ) الفصل الأول والثاني بقلم عادل عبد الله
للتذكرة بنهاية الجزء الأول
خرجت من دار حماتي وانا حاسة اني خرجت من جهنم و اول ما دخلت عند امي اترميت في حضنها وقعدت اعيط .
: فيه اي يا حبيبة ؟ مالك يا بنتي كفانا الشر .
: الحقيني يامه .
: مالك يا بت وقعتي قلبي .
: تعالي جوه علشان اعرف اتكلم .
دخلنا الاوضة وقالتلي : اتكلمي يا بنتي ، حصل اي ؟؟
: دياب اخو جوزي .
: ماله ؟
: اغتصبني يامه .
: يا مصيبتي !! يانهار اسود ومهبب !! بتتكلمي جد يا بت ؟؟
: ايوه يامه .
: يا فضحيتنا يافضيحتنا السودا !!
: اعمل اي يامه ؟؟ اروح فين واجي منين ؟؟ انا هموت نفسي احسن .
: اوعي يا بت !! قولتي لحد ؟؟
: ايوه قولت لأمه .
: وعملت اي ؟
: قالتلي انتي لسه صغيرة وفي عز شبابك ومحتاجة راجل ، وراجلك مش موجود !! اعتبري ان ده راجلك علي ما جوزك يرجع !!!
: الولية الناقصة قالتلك كده ؟!!
: ايوه يامه .
: اما وليه بنت ….. ناقصة ، اكيد هي عملت كده علشان كده عايزاكي زيها .
: اعمل اي يامه دلوقتي ؟
: انتي تسكتي خالص ومتعمليش اي حاجة ولا تتكلمي ولا تعرفي سرك لحد ، وتطلبي من جوزك يبعتلك تسافري معاه وتبقي جنبه بعيد عن القذارة دي !!
: يعني اسافر لجوزي يامه ؟
: ايوه تاخدي عيالك وتسافري لجوزك علشان طول ما انتي بعيدة عنه ومش معاكي راجل ده وغيره هيطمعوا فيكي .
: اقول لجمال ؟
: اوعي تعملي كده !! جوزك ممكن يموته وساعتها مين اللي هيربي عيالك !!
: واخد حقي ازاي ؟
: حقك ربنا هو اللي هيجبهولك .
: انتي شايفة كده يامه ؟
: ايوه يا بت ده عين العقل .
: طيب انا هقعد معاكي لحد ما اسافر لجمال .
: لا ، جوزك هيسأل عن السبب وهيستفسر وممكن تقعي بالكلام ، خليكي في دارك لحد ما تسافري بس اهم حاجة تخلي بالك من نفسك وتقفلي بابك علي نفسك كويس وخلي السكينة علطول جنبك لو حسيتي انه هيعمل اي حاجة هدديه بالسكين لكن اوعي تموتيه .
: حاضر يامه ، منه لله حسبي الله ونعم الوكيل فيه وفي امه .
رجعت قعدت لوحدي مش بتكلم مع حد لغاية لما كلمت جمال بالليل وطلبت منه انه يبعت يسفرني له هناك ، لكن المفاجأة ان جمال رفض بشكل قاطع وقالي ان الحياة هناك غالية جدا وان هو لوحده مش لاقي ياكل ، هيصرف علينا ازاي ؟!!!
حسيت ان الدنيا سودا في عينيا بعد ما كان اخر أمل. ليا اني اسافر لجوزي دلوقتي الامل ده انتهي !!
وفي اللحظة دي وانا قاعدة ببكي الموبايل رن بصيت لقيت رقم شريف !!
حسيت ساعتها ان شريف هو النجدة اللي هتنقذني من اللي انا فيه .
فتحت علي شريف وقولتله : ازيك يا استاذ شريف .
: ازيك انتي وحشتيني اوي رغم اني معرفش اسمك بس ملامحك و شكلك محفور في قلبي ومش قادر انساه .
: انا اسمي حبيبة .
: وانتي حبيبتي انا بس يا حبيبة .
: استاذ شريف انا عايزة اشوفك !!!
تعجب اوي شريف من كلمتي وقالي : وانا كمان وحشتيني اوي ونفسي اشوفك ، تحبي نتقابل امتي ؟
: في اي وقت .
: ينفع بكره .
: ماشي نتقابل بكره .
ومن اليوم ده اتغيرت حياتي واتحولت ١٨٠ درجة .
الجزء الثاني
الحلقة الاولي
تاني يوم الصبح لبست وخرجت ، حماتي سألتني : رايحة فين ؟ قولتلها : التليفون الجديد مش شغال هروح أصلحه .
: مش هتاخدي الولاد معاكي ليه ؟
: اصلهم لسه نايمين .
: استني صحيهم وخديهم معاكي .
دخلت صحيت الولاد واخدتهم وخرجت وروحت لشريف المحل !!
اول ما شافني كان واضح عليه السعادة وابتسم وقالي : وحشتيني اوي .
: وطي صوتك الولاد يسمعوا .
: لسه صغيرين مش هيفهموا حاجة .
: بيتهيألك ده عندهم ٣ سنين ، قولي بقي انت عايز اي مني ؟
: انا بحبك و عايزك .
: عايز تمشي معايا يعني ؟! لو عايز تمشي معايا انا مش بتاعت الكلام ده ، انا ست متجوزة .
: ما انا قولتلك قبل كده اتطلقي من جوزك ونتجوز .
: انت بتتكلم بجد ولا عايز تضحك عليا ؟
: وهو الجواز فيه ضحك ولا هزار !!! بتكلم جد طبعا .
: طيب عموما انا كده كده كنت هتطلق من جوزي ، بس حتي لما اتطلق انا هتجوزك ازاي وانا معرفش عنك حاجة ؟!!
: شكلي اهو قدامك وشغلي كمان قدامك ، قوليلي عايزة تعرفي اي تاني ؟
: عايزة اعرف انت متجوز ولا لأ ؟ عندك عيال ولا لأ ؟ حياتك ماشية ازاي ؟ شخصيتك اي واخلاقك اي ؟ بتحب اي ومش بتحب اي ؟ باختصار عايزة اعرف عنك كل حاجة .
: انا كنت متجوز ومطلق من سنتين وعندي بنت صغيرة اسمها سما عمرها ٤ سنين عايشة مع امها ، وانا عايش لوحدي حاليا وكنت بدور علي بنت الحلال واول ما شوفتك حبيتك وقولت هي دي اللي كنت بدور عليها من زمان .
: لكن انت متعرفنيش !! حبيتني ازاي ؟؟
: بصيت في عينيكي عرفت كل حاجة عنك .
: وده ازاي ده يعني ؟!
: انتي متعرفيش ان العين مراية الانسان اللي بتظهر وبتقول كل حاجة عنه .
: اول مرة اعرف الكلام ده !!
: علشان انتي بس متعرفيش اي حاجة في الدنيا وحياتك مقفولة علي البيت والغيط وبس .
: صح انت عندك حق انا فعلا معرفش اي حاجة في الدنيا .
: معايا هتعرفي كل حاجة في الدنيا وهتشوفي الدنيا كلها علي حقيقتها .
: بجد ؟
: ايوه طبعا .
: انت متعلم ؟
: ايوه معايا بكالوريوس سياحة وفنادق .
: كان نفسي اتعلم علشان اعرف اتكلم زيك كده لكن ابويا الله يرحمه خرجني من المدرسة بعد تالتة اعدادي علشان اتجوز .
: عموما انتي لسه صغيرة وقدامك الفرصة لسه ، هخليكي تكملي تعليمك لو انتي عايزة كده ، هخليكي يا حبيبة حد تاني خالص .
: انت عندك كام سنة ؟
: فرق السن يفرق معاكي ؟؟
: لا ابدا ما انا عارفة انك اكبر مني ، لكن عايزة اعرف انت عندك كام سنة علشان تعرف وتفهم كل حاجة وتتكلم حلو كده ؟
: عندي ٣٨ سنة ، وانتي عندك كام سنة ؟
: عندي عشرين سنة .
: مادام عايزة تعرفي الدنيا معايا هخليكي تعرفي كل حاجة .
: خايفة اكون بحلم واصحي علي كابوس !!
: معايا مفيش كوابيس ، معايا كل حاجة هتبقي جميلة حتي احلامك .
: نفسي اصدقك .
: صدقيني ومتخافيش يا حبيبة .
: خلاص انا مصدقاك ، بس اللي انا مستغرباه انتي هتعمل معايا كل ده ليه ؟
: علشان حبيتك وهتبقي مراتي وقبل كل ده انتي تستاهلي اكتر من كده .
: نفسي اعرف حبيتني امتي وليه وازاي ؟؟؟
: حبيتك اول ما شوفتك ، وليه ، علشان شوفت في عينيكي جمال وبراءة عمري ما شوفتهم قبل كده ، اما ازاي حبيتك ، اسألي قلبي وهو هيقولك .
: أسأله أزاي ده ؟
: خلي قلبك يسأله .
: كلامك حلو اوي يا استاذ شريف .
: اسمي شريف بس .
: كلامك حلو اوي يا شريف ، انا حاسة اني بحلم ومش عايزة افوق من الحلم الجميل ده .
: اتطلقي من جوزك وانتي هتشوفي بنفسك ان اللي بتقولي عليه حلم ده هيبقي حقيقة وهتعيشيها .
: انا باين عليا حبيتك ولا اي !!!
: الله ، كلمة حبيتك منك حلوة اوي ، هستناكي تتصلي بيا وتقوليلي انك اتطلقي وانا هبدأ اجهز نفسي من دلوقتي .
: ماشي ، بس عيالي !! هتوافق يكونوا معايا ؟
: العيال هيعطلوكي عن مستقبلك معايا ، خليهم مع جدتهم وابقي اطمني عليهم في اي وقت ولما توصلي للحياة اللي تستاهليها يبقوا ييجوا يعيشوا معانا .
مشيت من عند شريف وانا حاسة اني كنت بحلم حلم جميل اوي ومش قادرة استوعب ان ممكن الحلم ده ممكن يكون حقيقة !!
لكن حتي لو مش هيكون حقيقة ، حتي لو كان شريف مش هينفذ كل وعوده ليا لكن علي الاقل هبعد عن قذارة دياب اخو جوزي وامه !! علي الاقل هيتعامل معايا كأنسانة ليا مشاعر واحساس !!
رجعت الدار وبمجرد ما شوفت حماتي صحيت من الحلم الجميل اللي كنت عايشاه !!
وطول اليوم بفكر في الاحلام اللي حلمتها وشريف بيكلمني عن شكل المستقبل معاه لما نتجوز !!
الشئ الوحيد اللي كان بينغص عليا الحلم الجميل ده هو بعد ولادي عني !!
لكن قعدت افكر ، ما انا ممكن من اللي بيحصل معايا في الدار دي اموت نفسي وابعد عنهم وابقي خسرتهم وخسرت نفسي وحياتي !!
علي الاقل لو مشيت واتجوزت شريف هكسب حياتي اللي كل حاجة فيها هتتغير وفي نفس الوقت ولادي هييجي يوم ويرجعولي .
وطول النهار بفكر في شريف ومترددة بين الاحلام الجميلة اللي شريف وعدني بها وبعدي عن ولادي اللي مش عارفة هقدر اتحمله ولا لأ وخوفي من شريف لأنه رغم كلامه الجميل لكن انا فعلا معرفش عنه حاجة !!!!!
طول اليوم كنت سرحانة ومش بتكلم مع حد ولما كانت شهد او حماتي يكلموني كنت برد عليهم بأختصار وارجع اكمل تفكير في كلام شريف .
وكل ما اقرر اني خلاص همشي واروح اتجوز شريف وافتكر اني هسيب ولادي كنت باخدهم في حضني وارجع في كلامي واقول لأ مش همشي وهكمل مع ولادي مهما حصل !!
وبالليل اخدت ولادي ودخلت اوضتي علشان ننام لكن للاسف نسيت اقفل الباب بالمفتاح تاني !!!
مذكرات حبيبة الجزء الثاني
الحلقة ٢
وبالليل اخدت ولادي ودخلت اوضتي علشان ننام لكن للاسف نسيت اقفل الباب بالمفتاح تاني !!!
ونمت جنب ولادي واخدتهم في حضني وانا بفكر في كل كلام شريف لحد ما ناموا وقومت رجعت انام علي سريري .
وبعد ما عيني بدأت تغفل وانام حسيت بدياب جنبي !!
قومت اتفزعت : انت بتعمل ايه !! امشي !!
لكن دياب مش رد عليا وكأنه مش سامعني !!
: امشي حرام عليك العيال هيصحوا .
: وطي صوتك يا حبيبة بس وهما مش هيصحوا .
: حرام عليك !! انت اي !!
: انا بحبك اوي .
: امشي بدل ما اصرخ واسمعهم .
: انا ميهمنيش حد صرخي و انا هقولهم ان دي مش اول مرة وانك انتي اللي لعبتي عليا ووقعتيني .
: ابوس ايدك ابعد عني ، انت معندكش ضمير .
وكرر نفس اللي عمله قبل كده !!!
وبعدها كنت اخدت قراري خلاص اني لازم امشي من البيت ده واروح ابدأ حياة جديدة مع شريف .
ومن حزني علي نفسي واللي بيحصلي فضلت صاحية لحد الصبح ولبست واخدت الولاد وخرجت .
حماتي قالتلي : رايحة فين ؟
: رايحة عند امي .
: ليه ؟
: هروح اقعد عندها .
: جوزك عارف انك هتروحي تعيشي هناك ؟
: لا .
: طيب مفيش خروج الا لما تقوليله .
: انا خارجة ومش راجعة البيت القذر ده تاني .
: احنا دارنا قذر يا زبالة يا لمامة يا قليلة التربية !!
: انا ماشية وابقي خلي ابنك يطلقني .
: لو هتمشي هتسيبي العيال ومش هتاخديهم .
: لا ، هاخدهم معايا .
راحت حماتي اخدت العيال مني بالغصب !!
شهد خرجت علي صوتنا وقالت : في اي؟ بصيت لهم وسيبتهم ومشيت .
خرجت من الدار ومعايا شنطتين فيهم هدومي وحاجتي المهمة كلها .
كنت هروح عند امي لكن لو كنت روحت هناك كانت حماتي وشهد ودياب راحوا ورايا علشان يرجعوني .
اتصلت بشريف وقولتله : صباح الخير يا شريف .
: صباح الفل علي عيونك ، اي الصباح الجميل ده !!
: انا جايالك دلوقتي .
: بتتكلمي بجد ؟
: ايوه انا في الطريق .
وبعد نص ساعة كنت عنده في المحل ومعايا حاجاتي .
: انتي سيبتي البيت خلاص ؟؟
: ايوه ، خلاص انا مشيت من هناك ومش راجعة تاني ابدا .
: طيب تعالي معايا .
: هنروح فين ؟
: هتروحي شقتي ، اومال يعني هتعيشي فين ؟
: بس انا عندي شرط واحد .
: اي هو ؟
: مش هتلمسني الا بعد شهور العدة تخلص وبعدها نتجوز .
: حاضر ، انتي اتطلقتي خلاص ؟
: ايوه ، هفهمك كل حاجة لما نقعد ونتكلم .
شريف اخدني في عربيته وروحنا شقته وقالي : دي من النهاردة شقتك رتبيها واعملي فيها كل اللي تحبيه ، انا دلوقتي هنزل اروح شغلي واسيبك برحتك تعملي كل اللي تحبيه ، ولما تحبي تاكلي التلاجة فيها اكل .
شريف نزل وانا بدأت اخرج هدومي وحاجاتي واحطها في الدولاب و بدأت انضف الشقة وارتبها ، وطلعت اكل من التلاجة وطبخت الاكل اللي موجود ، وبعدها دخلت نمت ساعتين علشان ارتاح .
وبالليل شريف رجع من شغله وبمجرد ما دخل الشقة انبهر بالنظافة والترتيب اللي عملتها .
: ماشاء الله اول مرة اشوف شقتي بالجمال ده !!
: انا دايما بحب اقعد في اي مكان نضيف ومترتب .
: بس اكيد انتي تعبتي اوي النهاردة .
: لا مش اوي ، تحب اجهزلك العشا ؟
: ياريت لأني راجع جعان اوي .
دخلت جهزت له العشا وهو اول ما شاف الأكل قال : وكمان طبختي ؟! برافو عليكي ، ده انتي ست بيت شاطرة اوي .
ضحكت وسكت وقعدت بعيد ، قالي : انتي قاعدة بعيد ليه ؟ ما تيجي تاكلي معايا .
: لا انا اكلت .
: تعالي كلي معايا علشان تفتحي نفسي .
: معلش مليش نفس .
: علشان خاطري ، علشان يبقي عيش وملح .
قعدت واكلت معاه وهو طول ما احنا قاعدين كان بيبص لي ويبتسم .
: مالك ؟ بتضحك ليه ؟
: بصراحة فرحان بيكي اوي .
خلصنا العشا وقالي : نفسي بقي اشرب قهوة من ايديكي .
: بتحب تشربها ازاي ؟
: بحبها مظبوطة ، كل حاجة في حياتي بحبها مظبوطة .
عملت له القهوة وقالي : تعالي اقعدي بقي واحكيلي عن حياتك .
: ابقي احكيلك بعدين ده الساعة ١١ دلوقتي !!
: انتي وراكي حاجة ؟
: لا ابدا مفيش حاجة بس المفروض ننام دلوقتي .
: لسه بدري .
: احنا عندنا كنا بنام قبل دلوقتي بكتير .
: ده عندكم هناك ، انما هنا بنسهر براحتنا ، ده انا حتي رجعت بدري النهاردة من المحل علشان اقعد اتكلم معاكي .
وبدأت احكي لشريف عن حياتي من وانا صغيرة لحد ما اتجوزت جمال وعن حبي الاول لهادي الله يرحمه وبعدها جوازي من جمال وازاي كان بيعاملني معاملة قاسية وصعبة جدا، واتفاجئت ان الساعة كانت ٢ ونص بعد نص الليل !!!!!
قولت له : كفاية بقي كده النهاردة نبقي نكمل بكره لاني تعبت وعايزة انام .
: حكايتك زعلتني اوي .
: ليه ؟
: انتي قاسيتي واتظلمتي كتير اوي يا حبيبة .
: انا عارفة .
: وانا كمان من اول ما شوفتك حسيت بيكي علطول علشان كده حبيتك من اول نظرة وكنت عايز اخرجك من الظلم اللي انتي عايشاه .
: طيب ادخل انت نام وانا هدخل انام في اوضة الضيوف .
: لا لا مستحيل ، انتي هتنامي في الاوضة الكبيرة وانا هنام في الاوضة التانية .
: لا مش هينفع ، انت لازم تنام في مكانك .
: اسمعي اللي بقولك عليه وروحي نامي في الاوضة الكبيرة .
دخلت انام في الاوضة الكبيرة وقبل ما ادخل قولت لشريف : انا واثقة فيك علشان كده جيت وأمنتك علي نفسي مش عايزة الثقة دي تتهز .
ضحك شريف اوي وقالي : متخافيش يا حبيبة نامي واطمني .
دخلت انام وقفلت الباب عليا ولأول مرة كنت انام في راحة وانا فعلا مطمنة رغم اني في بيت راجل غريب لكن كنت حاسة انه فعلا انسان كويس مش همجي زي دياب .
نمت كتير اوي وكأني مش نمت قبلها من اسبوع ولما صحيت كانت الساعة حوالي ١٢ الضهر ، لما خرجت من اوضتي اتفاجئت بشريف نزل اشتري اكل وكان واقف بيجهز الفطار .
وقالي : انتي بنت حلال ، كنت لسه بفكر اصحيكي لكن كنت متردد وعايزك تصحي لوحدك لما تشبعي نوم .
: انت بتجهز الفطار بنفسك ؟!
: وفيها اي ؟ عادي .
: طيب وسع كده وروح اقعد مكانك وانا هجيبلك الفطار لحد عندك .
كملت تجهيز الفطار و فطرنا احنا الاتنين وكنت من جوايا سعيدة اوي وخصوصا لما اطمنت اكتر لشريف .
نزل شريف بعدها لشغله وانا بدأت اقوم بواجباتي في البيت كأنه بيتي بالظبط من طبخ وغسيل وتنظيف وكنت حاسة بسعادة حقيقية عكس ما كنت في بيت جمال واهله .
ولما رجع بالليل اتعشينا وكملنا كلامنا وبدأت احكي له علي كل افعال حماتي معايا وافتراها عليا وعلي مطاردة دياب اخو جوزي ليا واللي عمله معايا .
وهو كمان حكي لي علي حياته قبل جوازه وازاي اتجوز وحياته مع مراته لحد ما وصلوا للطلاق .
وكل يوم كنا بنحكي جزء من حكايتنا احنا الاتنين .
وفي كل يوم كنت بطمن له اكتر واحس معاه بالامان اكتر .
وبعد اكتر من اسبوع واحنا سهرانين بالليل شريف سألني : انا عايز اعرف انتي بتحسبني عدة طلاقك ازاي ؟
: انا زي ما حكيتلك كنت متجوزاه عرفي لأني كنت صغيرة ونسينا نكتب رسمي لما عديت السن وورق العرفي معايا ، وجمال قالي لو مشيتي من البيت وانا مسافر تبقي طالق فأنا حسبت لنفسي انه طلقني من يوم ما مشيت وجيت لك هنا .
: يعني انتي كده مطلقة من ١٢ يوم تقريبا .
: بالظبط كده .
: ياااه ، ده لسه بدري اوي علي ما عدتك تخلص علي حسابك ده !!
: باقي حوالي شهرين ونص تقريبا .
: واحنا لسه هنستني الوقت ده كله .
: قصدك اي ؟
: قصدي اني نفسي اتجوزك النهاردة قبل بكره .
: هانت يا شريف ، الايام بتعدي بسرعة .
: تعرفي اننا ممكن نتجوز عند مأذون دلوقتي ويبقي جوازنا سليم !!
: ليه بقي ؟
: علشان جوازك العرفي ده دلوقتي مفيش دليل عليه ، يعني انتي كأنك مش اتجوزتي اصلا .
: لكن ده هيبقي حرام علينا .
: ليه ؟ مش هو مسافر من اكتر من شهرين ؟
: ايوه .
: طيب و عدة الطلاق دي بتكون علشان لو فيه حمل يكون ظهر عليكي ، وانتي كده من اكتر من ٣ شهور بعيد عنه ولو كان فيه حمل كان ظهر ، يعني كده احنا ممكن نتجوز من دلوقتي .
: معلش يا شريف انا مش مطمنة للكلام ده وخايفة لو اتجوزنا قبل ال ٣ شهور يكون حرام علينا .
: ماشي يا حبيبتي اللي يريحك ، اهم حاجة عندي راحتك .
كل يوم كان شريف بيحاول يقرب مني اكتر وانا كنت بعجب به وبحبه اكتر .
بعد كده بقي يحاول يمسك ايدي وبيعمل اي موقف علشان يلمسني !!
ورغم اني حبيته لكن كنت بحاول ابعده واتهرب منه وهو كان بيتفهم موقفي ومش بيزودها معايا .
وفي يوم رجع من شغله وانا كنت بستحمي ، ونادي عليا رديت وقولتله اني باخد دش في الحمام .
وبعد دقيقتين لقيته بيخبط علي باب الحمام وبيقولي افتحي !!!
تكملة الرواية من هناااااااا
التعليقات