رواية مستشفى السعاده كاملة جميع الفصول بقلم عيلياء عبد الصبور

اتحرك التاكسي وفضلوا هما الاتنين ساكتين خالص.. لحد ما بدأت هي بالكلام 

_ هو ممكن أسألك سؤال 

– أه طبعا اتفضلي 

_ أنا أسفة يعني لو السؤال رخم.. بس معلش.. هو انت ازاي نازل لوحدك؟ 

– كنت مضطر 

_ يعني ما عندكش حد يوصلك 

– لا الحمد لله عندي.. بس للأسف النهاردة مواعيدهم كلهم كانت مش مناسبة للمشوار بتاعي.. اخواتي واصحابي وأمي كمان 

_ يعني انت متعود تنزل لوحدك كدة 

– لا مش متعود أوي.. بعملها لما اتزنق 

_ طيب ليه ما طلبتش عربية تجيلك تحت البيت 

– مش عارف.. بس حسيت اني هقدر اوصل لأول الشارع وهلاقي عربية بسهولة.. حبيت أكسر الخوف شوية من اني اتحرك لوحدي برة 

_ أيوة بس ده خطر عليك 

– قل لن يصيبنا إلا ما كتب الله لنا 

_ ونعم بالله 

– انتي رايحة فعلا مصر الجديدة 

_ أمممم. في الحقيقة لأ 

– كنت حاسس.. صعبت عليكي.. صح؟ 

_ لا.. مش فكرة صعبت عليا.. بس أنا رايحة مكان قريب من هناك.. فقولت اطمن عليك واكمل على المكان اللي انا ريحاه 

– انتي رايحة شغل 

_ لا.. هقابل صحابي

– تمام.. عموما شكرا على المساعدة وأسف لو تعبتك 

_ لا ما فيش تعب خالص.. ممكن أسألك سؤال تاني؟ 

– أه طبعا.

_ انت رايح المستشفى ليه.. تعبان ولا رايح علشان عنيك؟  

– لا الحمد لله مش تعبان.. ومش علشان عنيا.. عنيا ما برحش علشانهم لدكتور.

_ ليه

– علشان ما فيهمش أمل.. هعيش طول حياتي بيهم كدة

ردت بتأثر 

– الحمد لله على كل حال 

ابتسم ورد 

_ ألف حمد وشكر طبعا 

– طيب رايح ليه المستشفى 

وقبل ما يرد كملت بإحراج.

_ أنا رغاية أوي.. صح؟ 

– لا خالص.. بالعكس 

_ فضولية وبدخل نفسي في اللي ما ليش فيه؟ 

ضحك من طريقتها ورد

_ عادي.. فضول المرأة يعمل أكتر من كدة. 

كشرت وقالت : 

– سوري لو ضايقتك.. وما فيش فضول ولا حاجة.. أنا بس بحاول افتح معاك كلام علشان الطريق يعدي أسرع. 

ابتسم وقال 

_ يعني مش عايزة تعرفي انا رايح ليه؟ 

– لأ 

بص ناحيتها كأنه شايفها وقال :

_ بس انا عايزك تعرفي 

– طيب انت رايح ليه

ضحك وقال :

_ فضول المرأة يأبى ألا تعرف 

– تصدق انا غلطانة.

ودت وشها الناحية التانية واتقمصت.

كان  عندها احساس انها تعرف اللي قاعد جنبها بقالها ميت سنة  وكانت هتموت وتعرف هو رايح المستشفى ليه وليه مضطر يروح لوحده 

وقبل ما تقول كلمة تانية قالها :

_ لو عندك وقت ياريت تيجي معايا 

– أجي معاك فين حضرتك، لا انا ركبت معاك علشان اساعدك مش اكتر وواضح انك فهمتني غلط 

_ فهمتك غلط اية.. ما انا عارف انك ركبتي معايا علشان انا ادفع فلوس التاكسي

قالت بغضب :

– على جنب لو سمحت 

ضحك بصوت عالي وقال : 

_ بهزر يا بنتي بهزر.. أنا عارف والله انك بتعملي خير فيا.. وانك بتوصليني علشان خوفتي ما عرفش اوصل 

– ماشي بس هنزل برضوا 

_ لا ما تنزليش.. وبعدين انت فكراني بقولك تعالي معايا فين؟ 

– ما عرفش والله 

_ أنا بقولك تيجي معايا المستشفى.. مستشفى السعادة. 

السواق قطع كلامهم 

_ المستشفى هنا

قالها :

_ تعالي ومش هتندمي 

ومن غير ما تفهم هي قالت كدة ازاي.. ردت عليه بماشي. 

ومن هنا بدأت القصة

خرج المحفظة من جيبه وادهالها.. طلب منها تدفع اجرة التاكسي 

_ لا خلاص انا دفعت

– دفعتي اية.. انتي لحقتي 

– يلا بس انزل 

خرجت من التاكسي ولفت الناحية التانية علشان تساعده يخرج 

كانت حريصة إن إيديها ما تجيش على ايده وهو كمان كان حريص على كدة 

_ اتفضلي المحفظة وخدي اللي دفعتيه واياكي تعملي كدة تاني 

– لا والله؟ 

_ اه والله.. خدي فلوسك

– بقولك اية.. أنت مش خايف اخد المحفظة وأجري

_ خديها وأجري.. كدة كدة هي مفيهاش غير ٢٥ جنية 

– طيب انا دفعت ٥٠ جنية للسواق.. وانت معاك ٢٥ جنية.. كدة انا خسرانة 

_ لا ما انتي اكيد هتبيعي المحفظة.. كدة يبقى فلوسك وصلتلك 

– ناصح 

_ خدي المحفظة وخدي فلوسك.. أنا عارف إنك مش هتجري 

– وعرفت منين اني مش هجري 

_ احساس 

– احساس؟.. بقولك اية.. ما تنزلش بمحفظة تاني 

_ خدي الفلوس 

– لا مش هاخدها طبعا

_ هاتي المحفظة 

– اتفضل المحفظة 

مد ايدة بعد ما سند على الحيطة وخرج منها مبلغ وقالها 

_ خدي الفلوس

– اية كل ده.. اومال اية ٢٥ جنية وبيعي المحفظة 

_ خوفت تطمعي في ثروتي وتاخدي المحفظة وتجري.

ضحكت وقالت :

_ لا حويط

– مش هاخدها

– خدي الفلوس 

_ انت علقت؟ 

– خدي الفلوس.. لاما مش هاخدك معايا وهنده على أمن المستشفى أقولهم انك بتحاولي تخطفيني 

_ لا يا عم وعلى أية.. هات الفلوس

اخدت اللي دفعته ورجعت الباقي في المحفظة

مد ايده لقدام وقال :

_ اتفضلي.. أخرتيني

مشيت جنبه ودخل المستشفى ومشي جواها بسهولة وكأنه حافظ  الطريق.. كان كل اللي يشوفه يسلم عليه.. واضح انه معروف هنا.. فضلت ساكته وهو كان ساكت مش بيتكلم.. كأنه بيركز وخايف يتكلم فيغلط.. مشيوا في ممر طويل.. يمينه كان فيه جنينة.. محطوط فيها كراسي مرصوصة على شكل دايرة.. كل الكراسي مليانة إلا كرسي واحد.. واضح ان الكرسي مستنيه.. وبمجرد ما وصل.. قام واحد من اللي قاعدين بابتسامة كبيرة سلم عليه وساعده يقعد.. وطلب منها تقعد مكانه..  وراح يجيب لنفسه كرسي.

وبدأ مروان الكلام 

_ السلام عليكم.. يارب كلكم تكونوا بخير.. ومتقبل طبعا اعتذاركم عن التأخير ده.. بس ياريت ما تتكررش تاني 

ضحك كل الموجودين على هزاره وضحكت هيا.. وفضلت بصاله وهي لحد دلوقتي مش فاهمة.. مين ده وبيعمل اية هنا في مستشفى السعادة.. وأية الفرحة اللي في عين الناس اللي هنا.. بس كل اللي كانت عارفاه إنها من النهاردة هتعيش تجربة جديدة.. تجربة احساسها بيقولها إنها هتاخد بأيديها لطريق السعادة.

#يتبع

_ للناس اللي جاية جديد..أعرفكم بنفسي .. أنا مروان حامد.. طبيب متقاعد.. بمارس الطب على أد مقدر بعيدا عن العيادات والمستشفيات .. حاليا بشتغل في التدريب والدعم النفسي وبكتب.. المكان هنا مساحة آمنة إننا نعبر عن نفسنا ونحكي اللي بيوجعنا.. مشاركة خبرات وقصص.. هنسمع بعض ومش هنحكم على بعض.. هنفضفض ونتناقش، لعل حد يسمع كلمة من حد تاني تساعده وتقويه.. وتنورله قلبه.

المهم.. تحبوا ابدا انا بقصتي ولا حد حابب يبدأ.

كلهم أجمعوا علي إن هو اللي يبدأ فحكى :

_ زي ما الناس القديمة عارفة.. أنا فقدت البصر من عشر سنين تقريبا .. حادثة.. كنت راجع من الشغل متأخر بعد يوم طويل.. كنت سايق على طريق سريع ومركز أوي.. بس زي ما بيقولوا.. الحذر لا يمنع القدر.. عربية نقل كبيرة شايلة حديد وقفت فجأة ومش عارف ازاي دخلت فيها بكل قوة.. اخذتها بالحضن يعني.. ودي كانت آخر حاجة افتكرتها في اليوم ده.

ابتسم  وكمل 

_ لا ما فقدتش الذاكرة.. صحيت تاني يوم لقيت نفسي في  المستشفى وأهلي حواليا.. سامع صوتهم بس مش شايفهم.. والدي كان أول واحد سمعت صوته.

_ انت كويس يا مروان

– هو فيه اية

صوت والدتي مخنوق من العياط

_ حمد الله على سلامتك يا حبيبي

– هو فيه اية

صوت والدي تاني

_ ما فيش حاجة يا حبيبي.. طمنا عليك بس

– اية اللى على عيني ده؟ 

_ حادثة بسيطة وعينك فيها خدش بسيط

– خدش بسيط؟ فيه اية يا بابا؟ 

صوت اخويا ظهر:

_ ما تقلقش يا مروان.. ما فيش حاجة.. إصابة بسيطة وإن شاء الله خير

من بين كل ده كنت مركز مع صوت بكا والدتي.. واللي أكدلي إن الموضوع مش بسيط مش بسيط خالص.. سألت :

_ أنا عميت؟

على أساس إن ده اللي بيحصل في الأفلام يعني

ردت امي من بين دموعها:

– بعد الشر عنك يا حبيبي، إن شاالله أنا

رديت :

_ أنا تعبان  

ودي كانت آخر كلمة نطقتها، حسيت بعدها بألم عمري ما تخيلت أني أحسه ومن شدته فقدت وعي وصحيت بعدها وأنا عندي يقين إني من النهاردة بقيت كفيف ومش هشوف النور بعيني تاني 

بكيت يوميها وفضلت ادعي ربنا يهون عليا المصيبة.. دعيت كتير

اللهم أجرني في مصيبتي وأخلفني خيرا منها.

كنت انا اللي بطمن أهلي وبصبرهم.. المؤمن مبتلى يا أمي.. أنا راضي يا بابا.. ما تزعلش نفسك يا احمد هكون بخير ان شاء الله.. ما تبكيش يا سلمى صحابك هيفضلوا يزنوا عليكي تجوزيهملي وانا برضوا هرفض 

كنت بقولهم كلام محتاج اسمعه.. ورغم الافكار اللي سيطرت عليا بأن حياتي انتهت.. سمعت أصوات جاية من جواياه بتقولي.. ما حدش بينتهي باختيار ربنا ليه.. فين ثقتك في ربنا؟

تعبت فترة بعدها لحد ما اعتدت الوضع الجديد.. بس أصعب موقفين مروا عليا لما المستشفى اللي بشتغل فيها رفضت اني استمر معاها مع اني كنت شايف اني ممكن اقدر اكمل بمساعدة ممرض أو ممرضة مثلا.. والموقف التاني لما خطيبتي سابتني.. كنت بحبها ومش متخيل تعمل كدة.. وكنت فاكر انها كمان بتحبني بس اتضحلي أنها ما كنتش بتحبني لشخصي كانت شيفاني مناسب.. دكتور ناجح وإمكانياته المادية معقولة وأخلاقي كويسة وعنيا خضرة

سمع ضحكة من حد من الموجودين فكمل:

_ بتضحك على أية يا بهاء.. مش مصدق إن عنيا خضرة. 

رد بهاء

_ لا مصدق يا دكتور .. وعارف كمان إن شعرك أصفر. 

ضحك ضحكة عاليه ورد

_ ما تبالغش يا بهاء.. عنيا مدارية بالنضارة.. بس كل الناس شايفة شعري.

ضحك كل الموجودين.. فكمل

_ عذرتها.. حقها تخاف تكمل حياتها مع حد هيبقى عبء وحتى ملامح مستقبله ما بقيتش واضحة.

سكت للثانية وكمل:

_صدمة، انك تتحول من دكتور ناجح وشاب كله مرح وإقبال على الحياة، لشخص عاجز.. ما تقدرش تتحرك إلا بمساعدة.. ما تعرفش تفرق انت بالليل ولا بالنهار.. الضلمة وحشة.. والعجز أوحش.. بس برضوا اختيارات ربنا خير.. وزي ما راح مني البصر فأنا لسة عندي البصيرة.. كنت بقول لنفسي كدة.. بس برضوا انا في الاخر بشر.. كان لازم تعدي عليا فترة احس فيها إن الأرض اتهزت من تحت رجلي.. كان حقي أخاف. 

عشت فترة مصدوم أوي.. أيأس شوية وأحس شوية بأمل.. كنت بنام وبصحى من غير هدف.. معتقد إن حياتي وقفت على كدة.. راضي بقضاء الله.. بس مستسلم.

صدقت اني ما نفعش في أي حاجة ولا أنفع  لأي حد.

دمعت عنيها.. هي وناس من الموجودين

كمل كلام :

لحد ما في يوم والدي قعد معايا.. وقالي كلام كتير مش فاكرة كله.. بس مضمونه.. إن الحياة لازم تستمر.. وإن كل اللي حصل ده ابتلاء، صبري عليه هيخليني في مكانة أفضل عند ربنا.. كنت مقتنع بكل كلمة بيقولها.. بس مش عارف المفروض اعمل ايه.. طلب مني اقعد افكر مع نفسي واعمل خطة بديلة لحياتي.. مش هينفع تشتغل في الطب شوف حاجة تانية بتحبها وشوف نتعلمها ازاي ونستغلها ازاي.. مش عارف تنزل من البيت.. كلنا موجودين وتحت امرك في اي وقت.. خايف تنزل تصلي في المسجد.. أنت حافظ الطريق وهترجع تصلي.. مش عارف تقرأ هنتعلم برايل ونستخدم برامج لمساعدة المكفوفين.. فتحلي طاقة نور رغم بساطتها إلا أن عيني كانت متغمية عنها.

وقد كان.. بدأت اقعد اكلم نفسي كتير وادعي ربنا يدلني.. لحد ما وصلت لشوية حاجات بحب اعملها وكان الشغل والمذاكرة طول الوقت شاغلني عنهم.. والفرصة جت إني أعمل كل الحاجات دي.. بدأت ارجع للصلاة في المسجد وانتظم في حلقات حفظ القرآن.. وبدأت أقرأ كتير في علم النفس وتطوير الذات وأخد دورات متخصصة.. ورجعت اكتب.. الكتابة كانت بالنسبالي ملاذ آمن طول الوقت.. لكن مع زحمة الحياة نسيت اني بعرف اكتب أو اني بحب الكتابة.. عملت بيدج على الفيس بوك وبدأت اكتب عليها بمساعدة اخواتي.

بقي ليا حياة.. يومي اتشغل لدرجة ما بقاش عندي وقت افكر في اللي حصل وفي اللي فقدته وفي اللي سابني.

سنة تقريبا بذاكر وبعمل كل حاجة من البيت.. ما عدا الصلوات وحلقات القرآن وخروجات بسيطة مع أهلي.. لحد ما بقي عندي الجرأة.. إني أواجه العالم.. وأقول لأي حد.. ايوة أنا كفيف.. بس مش عاجز.

صقفت أوي وكأنها نسيت اللي موجودين

ابتسم وكمل

_ حاليا بشتغل في اكتر من مركز تدريب وبعمل جروبات دعم نفسي تطوعية.. زي اللي احنا فيها هنا.. وعلى فكرة دي المستشفى اللي رفضوا اني أكمل معاهم أول ما تعبت.. ولحسن حظي إن فيها قسم نفسي.. ورحبوا بفكرة جروبات الدعم اللي تطوعت اني اعملها.

الجروبات دي بالنسبالي حياة.. بستنى من الأسبوع للأسبوع ميعادها.

سكت ثانية وكمل

_ أنتوا عارفين.. أنا النهاردة جازفت وجيت لوحدي لأن مواعيد اهلي كانت النهاردة مش مناسبة لميعاد الجروب، لظروف خارجة عن إرادتهم

وعارفين كمان

_ أنا كنت هتخطف

بص للحظة ناحية الصوت اللي وصله منه صقفة وكمل

_ أو يمكن اتخطفت.

بصت للي حواليها بخجل، وكأن كلهم فهموا إن هي اللي مقصودة من هزاره ورجعت بصت للأرض.

ظهر صوت بهاء تاني

_ بعد الشر عنك يا دكتور.. مين اللي يقدر يخطفك، ده انت بتشوف احسن مننا كلنا، قلبك مرايتك

ابتسم وقال :

_ بهزر يا رمضان، انت ما بتهزرش

وكمل

_ أي حد عنده تعقيب كلنا هنسمع، ولو ما فيش تعقيب عايزين حد مستعد يحكلنا شوية يحكي.

ردت بنت من الموجودين وقالت :

_للمرة الخامسة يمكن بسمع قصتك يا دكتور، وعمري ما بمل، كل مرة حكايتك بتلمس حاجة جديدة جوايا.. مع انها نفس القصة، بس مش عارفة ليه كل مرة بسمعها بشكل جديد، نفسي ابقي قوية زيك. 

رد ببساطة :

– مين قال إنك مش قوية زي، أنتِ بس محتاجة تساعدي نفسك، واتمنى يكون عندك الرغبة النهاردة انك تتكلمي واحنا اللي نسمعك. 

_ النهاردة مستعدة، عايزة أتكلم وافضفض، ومش مهم أي حاجة بعدها.

_ كلنا سامعين يا داليا، وتأكدي إنك لما تتكلمي هتستريحي.

نفس عميق أخدته وبصوت مخنوق حكت :

_ أنا داليا، عندي ٢٠ سنة، مشكلتي هي والدي، أب قاسي ولا يمت للأبوة بصلة ، حطمني بكل ما تحمل الكلمة من معاني، عمره ما قالي كلمة حلوة ولا أخدني في حضنه ، كلمته اللي دايما بيقولها، البنت عار ، ولسوء حظي اني طلعت بنت.. بنت وسط أربع ولاد.. أنا اشطر واحدة فيهم.. لأني ما كنش عندي حاجة احط فيها همي غير المذاكرة.. بابا كان دايما يقولي، انتي خدامة، البنت أصلا اتخلقت علشان الخدمة .. كنت أعيط واقوله بس انا مش خدامة.. ما كنش يرد عليا بالكلام لما أعترض وأقوله انا انسانة يا بابا.. أنا مش خدامة.. كان يرد بالأفعال.. يتعمد يطلب مني حاجة تذلني.. زي انه يندهلي أحط الأكل لأخواتي وأشيله بعد ما يخلصوا أكل وهما قاعدين.. أو يخليني أروح اجيب لأخويا الجزمة وهو نازل وأحطها تحت رجله .. أو أنوا يصحيني من أحلى نومة علشان أحطله ياكل أو اعمل حاجة ما ينفعش هو يعملها علشان هو راجل.. كانت كلمته وكلمة اخواتي سيف علي رقبتي.. ما فيهاش نقاش.

كرهني في كوني بنت.. وكرهني في اخواتي.. وكرهني فيه.. أخواتي بقيوا صورة طبق الأصل منه.. بس استريحت منهم لما اتجوزوا.. أمي كانت سلبية.. بتشوف بعنيها اللي بيحصلي وبتسكت.. لأني كنت شايلة عنها.. ما طول ما انا موجودة كنت انا البديل للخدامة اللي هي أمي.. كان مصمم ما كملش تعليمي غير لحد ثانوي.. بس بعد إلحاح من كل اللي حواليا.. وتوصية من عمي اللي هو في مقام أبوه وافق وسابني أدخل الكلية.. حياتي كلها قضيتها في البيت.. بروح المدرسة أو الجامعة وارجع منهم على البيت علشان أشوف طلبات بابا وأخواتي.. ما كنتش راضية.. كنت بحس بذل وقهر لما يكونوا كلهم قاعدين وانا اللي مطلوب مني أعمل كل حاجة.

سكتت واتنهدت وكملت :

_ المشكلة مش في العمايل.. المشكلة في النظرة الدونية اللي كانت في عين ابويا واخواتي ليا.. أنت ممكن تعمل لحد كل حاجة من غير ما يطلب  بس لما تكون بتعمل الحاجة بحب وبرضا.. بابا رباني اني خدامة واني عار.. وأنا عمري ما كنت عار.. أنا كنت بحافظ على نفسي قبل ما يكون علشانه علشان ربنا.. كتير حاولت اتكلم معاه وافهمه إن البنت جنة.. البنت مش عار.. كان دايما يقولي.. ما هي دي غلطتي إني علمتك علشان تتفلسفي.. البنت مش زي الولد.. الراجل سند والبنت ضلع أعوج.

_لا يا بابا انا مش ضلع أعوج.

-اكسر للبنت ضلع يطلعلها أربعة وعشرين.. أحمدي ربنا اني ما كسرتلكيش ضلع.. وغوري اعمليلي كوباية شاي.

كان دايما بيكسرني علشان شايف إن في كسري استقامته.. فاكر لو حن عليا ودلعني اني هجيبله العار.. أنا ما جبتلوش العار.. بالعكس كل الناس بتحلف بأخلاقي.. نفسي أحس إن بابا بيحبني.. بموت من الغيرة لما اشوف أبو واحدة من صحابي حاضنها ولا بيكلمها بلين.. بموت مع كل كلمة حلوة بابا بيقولها لحد من اخواتي وبيحرمني منها انا.. مش المفروض انا بنت ويكون تعامله معايا برحمة ولين أكتر من الولاد.؟.. مش المفروض يحبني ويرعاني ويحتويني علشان ما اجيبلوش العار؟ مش الرسول قال : رفقا بالقوارير.. مش الرسول وصاهم علينا؟

اية ذنبي في أن تربيته كانت بعيدة عن الدين إلا في اللي بيختاره .. بينقي ليه من الدين اللي يجي على هواه ويمشي العادات اللي اتربى عليها في حاجات تانية بصرف النظر عن كلام الدين؟ 

اية ذنبي إن عقده النفسية خلته يكره البنات وأية ذنبي إني ما تولدتش ولد.. يا ريتني كنت ولد.. يا ريتني كنت ولد.

اتخنق صوتها من العياط وسكتت.. وسكت كل الموجودين.. وجعها وجعهم وحرقة قلبها حرقت قلوبهم.

صوته ظهر من بين كل الألم اللي ملا المكان وقال :

_ كويس جدا يا داليا انك تتكلمي.. كنت مستني أنك تتشجعي وتحكي بقالي كذا مرة.. مبسوط انك حكيتي.. حسيت بكل كلمة قولتيها.. وملتمسلك العذر في كل المشاعر اللي حسيتيها.. بس تحبي ننتناقش ولا تكتفي بالكلام

مسحت دموعها وردت :

_ أحب نتناقش.. عايزكم تريحوني.. أنا تعبانة.. أنا علشان اجي الجروب بزوغ من الجامعة لاني ما قدرش اقول اني هاجي.. المرة الوحيدة اللي اعمل فيها حاجة زي دي.. بس مش هقدر اقوله إني جاية اشتكيه.. مش هقدر اقوله اني رايحة حتة غير الجامعة.. محتاجة تساعدوني لاني مش لاقية اللي يساعدني.

_ عارفة يا داليا.. وضعك بيفكرني بزميلة ليا في كلية الطب.. كان والدها بيجيبها الجامعة ويوديها.. وفي مرة حد سخيف من الزملا قالها هو انتي عيلة.. قالتله بابا بيخاف عليا.. مع إن حد تاني ممكن يشوف ده خنقة وعدم ثقة.. الفكرة في نظرتنا للأمور.

والدك يستحق انك تشفقي عليه.. عارفة ليه؟

ومن غير ما يدلها فرصة ترد كمل :

_ لأن زي ما انتي قولتي.. هو تربيته كدة.. يعني تخيلي واحد في بيئة كانت بتقوله كل يوم البنت عار.. البنت خدامة.. الراجل راجل والست ست.. عايزة تعامله معاكي يكون ازاي.

أخد نفس وكمل :

 انتي بقالك عشرين سنة بتقاومي في وضع ومش عارفة تغيريه.. بالعكس كل ما بتقاوميه وبترفضيه بيزيد سوء.. ليه ما تجربيش تتقبلي.. بمعنى انك كدة كدة هتعملي كل حاجة في البيت، فبدل ما تعملي الحاجة وجواكي احساس بالذل.. اعمليها برضا وبصيلها من ناحية انها بر لأبوكي.. هو شايف انك عار أثبتيله بأفعالك إنك فخر مش عار.. شايف إن اخواتك أفضل منك وأهم، أثبتيله بأفعالك وحنيتك أنك بتراعي ربنا فيه زيك زيهم وأنك وقت الجد هتكوني الايد اللي بتطبطب عليه .. والدك مهما ظهر قاسي فهو بيحبك وقلبه مليان بالمشاعر الطيبة ليكي.. هو بس اتربى غلط واترسخت جواه أفكار مسمومة.

خلي علاقتك به طيبة وحاولي إنك تقربي منه وتغيري منظورك لطريقة تعامله معاكي.. هو بيظلم نفسه قبل ما يظلمك، بس بلينك ورحمتك ليه وتفهمك لفكرة إنه اتربى غلط فتلتمسيله عذر في طريقته، هيتغير.. وحتى لو ما اتغيرش فأنتي هتتقبلي.. هو ظالم ومظلوم.. ادعيله ربنا يسامحه ويغيره.. الدعاء بيصنع المعجزات.. والتقبل في الأمور اللي مش بأيدينا نغيرها، والعلاقات اللي مش هينفع ننهيها نص حل المشكلة.. والنص التاني أننا نبص للي بيحصل من منظور الفاعل مش من منظورنا فنلتمسله عذر.

خلي عندك إيمان إن بكرة احسن وإن ربنا هيعوضك عن كل لحظة عانيتي فيها.. طبطبي على والدك وربنا هيرزقك بالأيد اللي تطبطب عليكي.

_ مش حاسة إني هقدر

– هتقدري.. عارفة ليه؟ علشان كلنا هندعيلك وكلنا هندعمك.. قرري واحنا وراكي.. كل جروب هتيجي تحكيلنا على التغيير البسيط اللي عملتيه في نظرتك للأمور وفي رد فعلك.. وواحدة واحدة هنوصل للتقبل.. حتى لو فضل الوضع على ما هو عليه.

ابتسم وكمل :

_ وقومي اعمليلنا كوباية شاي.

ضحكت وردت :

_ أنا مش خدامة

– احنا اللي خدامينك يا ست الكل.

_ ربنا يعزك يا دكتور 

– المرة الجاية عايزين نشوف ابتسامة.. مش عايزين نشوف دموع.

_ شكرا يا دكتور

سأل الموجودين :

_ حد عنده تعقيب على كلام داليا 

الكل سكت فرد بهاء 

_ ما فيش تعقيب بعد كلامك يا دكتور.. احنا بس بنتمنالها السعادة. 

– تمام.. كدة ناخد بريك خمس دقايق ونرجع. 

قربت منه اللي لسة لحد دلوقتي ما يعرفش اسمها و قالت : 

_ أنا اتبسطت أوي 

ابتسم وبدعابة قال :

– أية ده انتي لسة هنا 

_ شكلي هبقى هنا كل مرة 

– وهتحكي؟ 

_ احكي اية؟ 

– أي حاجة محتاجة تحكيها 

_ مش حاسة اني عايزة احكي.. بس ليه بتهتم إن الناس تحكي

– علشان الحكي بينضف جوانا.. اللي بيخرج بالحكي.. بياخد بعد كدة حجمه الطبيعي.. ما بيفضلش كبير جوانا زي ما كان. بحب نسمع بعض.. علشان مؤمن إن الكلمة نور.. أحيان كتير بيكون كل اللي محتاجينه كلمة.. كلمة ترد فينا الروح وتنور جوانا لمبات موجودة بس مطفية.. تجربتي ممكن تفيد حد تاني انه يقوى وتجربتك ممكن تصغر حاجة كبيرة جوه حد كان قبل حكيك شايفها مأساة. 

_ ربنا يجازيك خير 

– وإياكم يارب

_ كدة اتأخرتي على صحابك 

– بعتلهم رسالة إني مش هعرف اجي

وهو بيتكلم جاله تليفون فاستأذنها يرد :

_ ايوة يا ماما يا حبيبتي.. مش انا بعتلك رسالة اول ما وصلت.. قلقانة ليه.. هخلص واجي على طول. 

-……… 

_ لا ما تتعبيش نفسك.. هاجي زي ما روحت.. سلام دلوقتي علشان هنبدأ

قفل وبص ناحيتها كأنه شايفها : 

_ يلا نبدأ 

– أظن إني هحكي  

_ أكيد هتحكي 

خمس دقايق فعلا والناس كلها كانت قاعدة في أماكنها مش ناقصين واحد وكالعادة بدأ مروان  بالكلام:

_ كلنا آذان صاغية.. مين مستعد يحكي

– أنا يا دكتور

_ الصوت ده أول مرة اسمعه.. ولا وداني خانتني؟

– لا.. أنا فعلا دي أول مرة ليا هنا

_ اهلا وسهلا.. نورتنا

– ده نورك يا دكتور

ابتسم وقال :

_ أتفضل.. المايك معاك

– أولا.. أنا عايز اشكركم على الفكرة الحلوة دي.. أنا عرفت عن الجروب من صديق.. وكان بيشكر جدا في الفكرة وفي حضرتك.. وفعلا عنده حق من اول ما جيت وانا حاسس بدفأ وكأني وسط ناس اعرفهم من زمان 

ثانيا : كنت متخيل اني هاخد وقت علشان اقدر أحكي.. بس الجو ده خلاني مستعد احكي خصوصا إني محتاج أحكي 

– احنا فعلا هنا كلنا عيلة واحدة.. حتى اللي بنشوفه مرة واحدة.. عارف ليه 

_ ليه 

– علشان احنا هنا علشان بعض.. وكلامنا كله من القلب.. واللي بيخرج من القلب بيوصل للقلب 

_  ده احساسي فعلا يا دكتور 

– اتفضل.. احنا سامعينك 

_ أسمي مجدي.. عندي ٤٥ سنة.. بشتغل محاسب في شركة.. حياتي كانت هادية وراضي بكل حاجة فيها .. بس كنت زي أي شاب عايز تبقى في حياتي ست.. كنت بقاوم كل يوم فتن حواليا وأقول لا بلاش تضعف.. هانت.. بكرة تتجوز وعيش كل الحاجات الحلوة مع مراتك.. ما عدا العلاقات الخفيفة يعني.. شات ولا مقابلة مع بنت نتكلم شوية.. زي اي شاب يعني.. عافرت عقبال ما كونت نفسي علشان اكمل نص ديني زي ما بيقولوا.. لحد ما قدرت اجيب شقة وأحوش تكاليف الجواز.. واتقدمت فعلا لواحدة من جيرانا، ساكنة في الشارع اللي ورانا.. بنت زي القمر، ما كنتش شوفتها قبل كدة غير قبل ما اتقدمتلها بحوالي سنة.. من أول ما شوفتها وانا ما عرفتش اطلعها من دماغي.. بس خوفت اكلمها تكون مرتبطة.. وأنا ما كنتش لسة مستعد.. إعجابي بيها  هو اللي خلاني اشتغل شغل إضافي علشان اكون جاهز واتقدملها ..  وفعلا سألت عليها أول ما لقيت نفسي جاهز وعرفت أنها مش متجوزة.. اتخطبت كذا مرة وما حصلش نصيب.. وعرفت انها على أد حالها.. فاتشجعت واتقدمت.. كنت مرعوب ما توافقش.. بس هي وافقت.. كنت فرحان أوي إن واحدة زي دي وافقت عليا.. أنا شكلي مش حلو يعني.. علشان توافق عليا.. كنت طاير من السعادة.. وأمي كانت على طول تقولي والله بنت خالتك أحلى منها.. بنت خالتي دي كانت بتحبني طول عمرها بس انا كنت بشوفها اختي.. بيقولوا الراجل بيحب بعنيه.. وصراحة عيني عمرها ما حبيتها.. ما كنتش حلوة.. وأنا كان نفسي في واحدة حلوة.. يمكن نقص جوايا علشان أنا شكلي مش حلو.. ويمكن كل الرجالة كدة.. مش عارف.. المهم اني ما رضيتش ابدا اتجوز بنت خالتي.. وفرحت أوي لما اتجوزت واحد قريبنا علشان أخلص من زن امي. 

. 

شرد شوية وكمل : 

_  خطيت جارتي وكنت حاسس اني ملكت الدنيا.. كان وقتها عندي سبعة وتلاتين سنة.. وهي كانت تلاتين..  سألتها كتير ازاي واحدة حلوة زيك ما تجوزتش لحد دلوقتي.. وكانت اجابتها دايما اهو اللي حصل، ما كنتش بحس حد من اللي بيتقدمولي ولا اللي بتخطبلهم.. علشان كدة ما تجوزتش.. ولما سألتها طيب اشمعني وافقتي عليا انا جاوبت إجابة خلتني في حتة تانية من السعادة.. قالتلي اصل انت طيب وأنا بحب الطيبين.. وكمان مناسب.. كفاية انك موظف اد الدنيا مش صنايعي زي معظم اللي بيتقدمولي.. فرحت أوي بكلامها وحسيت لأول مرة إني مميز أوي.

سكت لثانيةوكمل : 

_ طبعا أنا زي أي شاب زي ما قولت، عرفت بنات في حدود اللي قولته، بس دايما كانت اللي بترضى تعرفني شبه بنت خالتي.. فكوني اسمع كلمتين زي دول من واحدة زي دي كان بالنسبالي حدث. 

فضلنا مخطوبين حوالي ست شهور.. كان كلامها قليل.. وأنا كنت راضي وشايف إن ده حياء.. طبيعي تكون خجولة.. سألتها كتير.. بتحبيني.. عمرها ما  قالت أه ولا حتى قالت لأ.. كانت إجابتها محايدة.. لحد ما اتجوزنا.. وكنت فاكر إن فترة الكسوف خلصت واني هسمع وهحس كل اللي كان نفسي اسمعه واحسه.. أكيد بتحبني.. أمال رضيت بيا ليه من بين كل رجالة الدنيا. 

دمعت عنيه.. مسح دموعه بسرعة وكمل : 

_ أنا حبيتها أوي.. كان عندي استعداد أعمل علشانها اي حاجة.. كنت بسمع كلامها وبنفذ أي طلب تطلبه علشان ترضى.. وكنت فاكرها رضيت.. بس للأسف طلعت ما رضيتش. 

فضلنا سبع سنين متجوزين.. كنت راضي فيهم بأي حاجة تديهالي وبعديلها اي حاجة وحشة تعملها في حقي.. بس كان احساسي أيقن انها ما بتحبنيش.. حياتي أتحولت لجحيم.. نفسي ألاقي عندها اللي أي راجل بيحتاجه من مراته.. حب.. حنان.. تقدير.. ما لقيتش اي حاجة منهم.. ومع ذلك فضلت أحبها.. كانت عايشة حياتها علشان ابننا وأنا درجة تانية.. كنت بقول لنفسي عادي.. اكيد انت بتعمل حاجة غلط في تعاملك معاها ويجيب الغلط عندي.. سألتها كتير بتعملي كدة ليه.. انتي ما بتحبنيش.. وكأن ردها انت أبو أبني.. أنا بس طبيعتي كدة. 

صدقتها لحد ما شوفت اللي فسرلي أية السبب في كل اللي بيحصل. 

وهنا شرد وسكت لحد ما افتكروا إن ما بقيش عنده استعداد يكمل كلام.. ولسة مروان هيقوله.. خلاص يا مجدي نكمل في وقت تاني.. ظهر صوته تاني وكمل بصوت كله وجع :

_ راحت تزور مامتها في يوم ونسيت موبايلها.. مش عارف اية اللى خلاني امسك الموبايل.. كان معمول ببسوورد.. وبالصدفة دخلت تاريخ ميلاد ابننا.. فالموبايل فتح.. طبعا ما هي عمرها ما هتشك اني هفتح موبايلها فعادي تعمل باسوورد سهل. 

كنت بتسلى مش أكتر.. ما كنش قصدي أفتش وراها.. ولا كان في نيتي أفتح الرسايل.. بس لسوء حظي أو يمكن لحسنه.. لقيت رسالة جت من واحد.. كنت اول مرة أشوف اسمه أو اسمعه.. رسالة كان لازم بعدها.. افتح باقي الرسايل اللي جايه منه.. رسالة بيسألها فيها.. انتي فين يا قلبي. 

كل اللي قاعدين كانوا مشدودين لحكايته.. ومنهم اللي توقع بقيت الحكاية.. بس القواعد بتقول إنه لازم يكمل لحد ما هو اللي ينهي.

كمل كلام وكأنه مش شايفهم : 

_ كذبت نفسي.. أكيد واحدة صاحبتها عاملة اكونت باسم ابنها جوزها اخوها ابوها.. أي حاجة.. بس في الاخر بنت.. فتحت الرسايل ولقيت جواها اللي عمري ما كنت أتوقعه. 

حرمي المصون كانت متجوزاني علشان أهلها غصبوا عليها انها تتجوز لأن سنها كبر.. وأنا الوحيد اللي شافت فيا طيبة أو يمكن هبل تخليني ما ركزش معاها،  علشان تفضل علاقتها بالراجل اللي كانت بتحبه قبل ما اتجوزها.. الراجل اللي رفض يتجوزها لأن أهله مش هيوافقوا أنه يتجوزها علشان مستواها. 

نزلت دموعه جدا وايده بقيت بتترعش وصمم يكمل :

_ سبع سنين مراتي كانت على علاقة بحد تاني.. اللي فهمته إن علاقتهم ما كنتش بتتخطي الكلام.. ومقابلات بسيطة في أماكن عامة.. لكن اللي شوفته دبحني.. طعني في رجولتي وفي قبلي.. ليه عملتي كدة.. ده انا حبيتك حب عمرك ما كنتي هتلاقيه.. ده انا كان عندي استعداد اموت بس انتي ترضي.. ده أنا استحملت منك بعد وجفا ورفض يخلوا اي راجل غيري يرميكي ويذلك. 

ليه عملتي كدة؟ كان غلط اني حبيتك؟ ولا غلط اني ما افترضتش فيكي سوء النيه إلى أن يثبت العكس؟.. ولا كان غلط اني ضيعت بنت خالتي وبعت الغالي بالرخيص.

بص للموجودين وكمل : 

_ لما واجهتها.. ما انكرتش.. وبررت اللي حصل بأنها ما عرفتش تنساه.. كانت كل ما بتحاول تبعد.. بيشدها بكل الطرق ناحيته.. وكانت كل ما بتحاول تكون معايا بقلبها  .. كلامه المعسول بيخليها مش شايفة غيره.

مت ميت مرة وانا بسمعها.. اعتذرت كتير.. كأنها مثلا داست على رجلي بالغلط فشايفة إن الاعتذار كفاية. 

مسكتها من شعرها وقولتلها.. لو قتلتك دلوقتي يمكن أشفي غليلي بس انا مش هقتلك انا هسييك تعيشي كل يوم وانتي ميتة.. غوري روحي للراجل اللي يشبهك.. وطلقتها.

سنة عدت على اللي حصل ده وانا مش عارف انسى.. موجوع وفاقد ثقتي في الناس كلهم.. كان المفروض اقتلها.. بس فكرت في ابني.. أنا أخدته منها بالمناسبة في مقابل إني ما فضحهاش أودام أهلها.

بص لمروان وبصوت مبحوح قال : 

_ اية الغلط اللي ارتكبته علشان الوحيدة اللي حبيتها تعمل فيا كدة؟ أنا مش راجل؟ صح؟ انا اول مرة اتكلم في اللي حصل مع حد.. شايل كل الوجع جوايا وماشي بيه.. ماشي بسكينه في ضهري اتغرست فيه بأيد أكتر واحدة حبيتها.. هو انا غلطت علشان حبيتها.. ولا غلطت علشان كنت زي ما هي قالت.. طيب.

كلامه لمس مروان لدرجة خلته مش عارف يرد.. للحظة افتكر انه مش هيقدر يناقشه.. بس استجمع قواه ورد :

_ مبدئيا كونك اتكلمت بعد كل الكتمان ده.. في دي خطوة مهمة جدا علشان تعدي التجربة اللي انت مريت بيها دي.. لأن ده اول خطوة في تحرير المشاعر.. مبسوط من شجاعتك جدا يا مجدي.. ومقدر الألم اللي مريت بيه.. الخيانة شئ قاسي طبعا.. بس لو بصينالها من منظور عقلاني بعيدا عن العاطفة هنلاقي إن اللي حصل ده ما لوش علاقة بيك خالص.. اللي بيخون هو اللي عنده مشاكل نفسية وقبل المشاكل النفسيه عنده خلل في قيمه الدينية وعلاقته بربنا.. اللي بيخون قبل ما بيخون الشخص، بيخون ربنا.. خاصة في العلاقات الزوجية.. لأن عقد الزواج بيكون ميثاق على سنة الله ورسوله.. مراتك لما خانتك كانت مقررة تعمل ده من قبل ما تعرفك اصلا.. بس هو نصيبك اللي وقعك في سكتها.

سكت لثانية وكمل :

_ جاير كان فيه جزء من الخطأ عليك.. وهو انك ما استوثقتش بشكل كافي عن البنت اللي رايح تخبطها.. وركزت على المظهر اكتر من تركيزك على الجوهر.. بس ده وارد.. كلنا بنغلظ ونتعلم.. تنكح المرأة لأربع.. ومنهم الجمال… بس الحديث أكد أظفر بذات الدين تربت يداك.

حقك انك تهتم تتجوز واحدة راضي عن شكلها بس مش حقك إنك تخلي الشكل هو الفيصل.. بتقول انك شايف نفسك مش جميل فكنت بتعوض نقصك انك تتجوز واحدة جميلة.. طيب هو جمال حد غيرنا هيعوض نقصنا؟ .. أنت بدل ما تبص للحاجات الكويسة اللي فيك ولطيبة قلبك اللي ما بقيتش موجودة كتير فتركز عليهم وتعلي ثقتك بنفسك، دورت على عامل خارجي يزود ثقتك بنفسك.. احساسك إنك مرغوب من واحدة حلوة كان مغمي عينك عن كل حاجة.. وده كان السبب الأساسي اللي خلاها تشوفك صيد سهل.

_ عندك حق يا دكتور.. الغلطة غلطتي.

– من أهم خطوات التعافي من أي مشكلة أو أي ألم.. إننا نتحمل مسئولية أفعالنا وما نعيش دور الضحية.

انت أخطأت في اختيارك.. وهي عملت اللي عملته علشان هي طبيعتها كدة.. وانت كنت شايفها من برة ومش شايفها من جوة.

سكت لثانية وكمل :

– لازم تتعامل على إن اللي حصل مجرد تجربة، ألمها هياخد وقته ويعدي.. لا تبكي على اللبن المسكوب.

_ الكلام سهل يا دكتور

– اللي بقوله مش مجرد كلام.. قرر انك هتخف وانت هتخف.. كلم نفسك بالمنطق وحلل اللي حصل هتلاقي إنه تجربة زي اي تجربة بنمر بيها.. تجربة مريت بيها علشان تعلمك وتقويك.. مش علشان تقتلك. 

احنا معاك لحد ما تتخطى الألم ده.

وبعدها هتلاقي الإنسانة اللي تستاهلك واللي هتعوضك عن التجربة دي.. ربنا ما بيظلمش حد يا مجدي .. جايز اللي حصل تكفير ذنب بنت علقتها بيك ومشيت، وجايز ابتلاء يرفع قدرك عند ربنا.. أيا كان اية السبب فكل تجربة بنمر بيها بنمر بيها لحكمة.. وكل شخص بنقابله بنقابله برضوا لحكمة وبيمشي لأن دوره انتهى.

أحنا كلنا هنا معاك بشرط تعزمنا على فرحك أول ما تقابل بنت الحلال وتأكلنا جاتوه.. واعمل حسابي في ملفيه علشان بحبه

_ رد بهاء

_ أنا عايز تلات قطع جاتوه شيكولاته وعليهم كريز

ابتسم مجدي وقال

_ كل اللي انت عايزينه بس أخف

رد مروان

_ هتخف.. لأنك ببساطة جيت هنا.. لأنك قررت انك تخف.

_ بحبك يا دكتور

– ده حب من أول نظرة يا مجدي.  يعني خطر.. هستنى اسمعها منك في المقابلة العاشرة على الأقل.. وانت بتعزمني على الملفيه.

ابتسم مجدي وكمل مروان.. أي حد عنده تعقيب عل كلام مجدي؟ 

ردت بنت من الموجودين وقالت :

_ أنا مش عندي تعقيب.. بس قصته هونت عليا اللي كنت هحكيه.

رد مروان.. يبقى انتي يا ربا اللي عليكي الدور تحكي..

احكي يا شهرزاد.

ردت بصوت مليان  حسرة:

_ ياريتني كنت شهرزاد.. على الأقل شهريار حبها. 

بصت في الأرض لثانية وكملت

_ أنا ربا.. عندي ٢٥ سنة.. دي مش اول مرة اجي هنا.. كل مرة بأجي أحكي بحس إن اللي هحكيه ولا حاجة بالنسبه للي بسمعه.. ورغم إنه ولا حاجة.. بس بيوجعني أوي.. قلبي موجوع على نفسي قبل ما يكون موجوع من حد .

بحس إن أنا اللي عملت في نفسي كدة.. ووصلت نفسي للي حاسة بيه دلوقتي.

عارف يا دكتور أنا حاسة بأية

بصت لمروان  وما استنتش رد وجاوبت على سؤالها :

_ حاسة إني ولا حاجة.. وإني رخيصة أوي

شدت جملتها الأخيرة كل الموجودين.. كملت:

_ أنا طول عمري عايشة بمبادئ اتربيت عليها.. زرعتها فيا أمي هي وأبويا.. كنت حريصة طول الوقت أتمسك بالمبادئ دي.. ومن بين المبادئ دي.. إني علاقتي بأي واحد..تكون في  أضيق الحدود.. علشان كدة ما كنتش بسمح لحد يقرب مني.. من وانا في المدرسة.. علاقتي بالبنات وبس.. كتير حاولوا يقربوا مني بس كنت بصد.. بقفل على نفسي باب الفتن.. كان نفسي أحب وأتحب.. بس زي ما بيقولوا.. كنت مقتنعة بمقولة لأن الحلال أجمل سأنتظر.

انتظرت كتير والحلال ما جاش.. ومع ذلك كنت متأكدة إنه مسيره يجي.. لما صحابي كانوا يقولولي كدة انتي مش هتتجوزي، أصلك مقفلة أوي.. كنت أقولهم مش مهم.. المهم إني ما عملش حاجة مش راضية عنها.

لحد ما ظهر هو في حياتي.. كان زميلي في كورس كنت باخده بعد ما اتخرجت من الجامعة على طول.. قرب مني ما عرفش ازاي.. كنت بصده في الأول.. وما كنش على لساني غير كلمة أنا ما بكلمش ولاد،كل ما يجي يكلمني بطريقة مختلفة عن طريقة الزمايل.. ويقولي عادي احنا زمايل ومش بنتكلم في حاجة غلط.. أقوله نفس الكلمة.. معلش أنا ما بكلمش حد.. محاضرة ورا التانية ورا التالتة بقي بيتفنن علشان بس أرضى ارد على أسئلته ليا.. كان مهتم بيا لدرجة غريبة.. بنات كتير كانوا أحلى مني في الكورس.. بس هو كان مركز معايا أنا.. حبيت اهتمامه.. وبقيت بستني ميعاد الكورس علشان بس اشوفه.

سكتت لثانية وكملت

_ مش عارفة ازاي انا عندي الجرأة إني أحكي.. زمان كان استحالة احكي مشاعر حساها ناحية حد.. كان بالنسبالي عيب.. بس يمكن علشان زمان انا كنت غير دلوقتي.. أو يمكن علشان محتاجة حد يرجعلي ثقتي في نفسي.. أو يرجعهولي.

أنا حبيته أوي.. كان أول حب في حياتي.. وكان كل حلمي إني أكمل بقيت حياتي معاه.

كنت في حالي وهو اللي قرب مني.. كل ما أقوله أبعد يقرب.. وكل ما أصد يصمم.. لحد ما بقيت أصد مرة واستجيب مرة.. ومن غير ما يعترفلي بأي مشاعر ناحيتي.. كان بيتسرسب جوايا واحدة واحدة.. بيقرب مني بكل الطرق.. ولما أصد يقولي اعتبريني صديق .. كنت اقوله ما فيش صداقة بين ولد وبنت.. وكان يقولي مين قالك كدة.. لا طبعا فيه صداقة بين ولد وبنت.. وبدأت واحدة واحدة أنسى جملة.. أنا ما بكلمش ولاد.. نسيتها معاه هو بس.

كنت بشوف الفرحة في عينه لما برد عليه.. واللهفة في صوته لما بيكلمني.. بقيت بخصه في التعامل لدرجة خلت كل اللي حواليا يلاحظوا ده. 

اتطورت علاقتنا من مجرد كلام في الكورس، لتليفونات من باب إنه بيطمن عليا.. بس أنا عمري ما رديتله المكالمة .. وعمري ما اخدت خطوة ناحيته.. كنت دايما رد فعل.. كنت ابقى هموت وأكلمه وأعمل نفسي مش مهتمة..كنت ابقى طايرة من الفرحة لما اشوفه واحسسه انه ولا همني..وهو كان ثابت أوي في طريقته.. يحسسني باهتمامه ويسعى لأن علاقتنا تقوى بس ما قالش صراحة  إنه بيحبني. 

طيب هو الحب اية غير اهتمام ورغبة.. والاتنين موجودين.. يبقى أكيد بيحبني، وخايف يصارحني لحسن أبعد.

أربع خمس شهور.. ما صارحنيش بحاجة.. وأنا كنت تعبت من اللوم لنفسي.. كنت بجلد نفسي مع كل كلمة بتكلمها معاه.. وكل استثناء باستثنيهوله.. بس كل ما ببعد مش بيديني فرصة.. لحد ما قررت اني خلاص هنهي العلاقة دي اللي ما فيهاش وضوح.

أخدت نفس عميق وكملت :

قولتله معلش بلاش نتكلم تاني لاني مش مستريحة وحاسة إني بعمل حاجة انا مش متعودة عليها.. قعد يقنعني أننا مش بنعمل حاجة غلط وإن عمره ما تجاوز معايا.. وبعد مناقشة طويلة صممت على موقفي. 

تعبت أوي لما بعدت.. كنت بحلم بيه كل يوم.. وما بقاش ليا نفس لأي حاجة في الدنيا.. بروح الشغل وارجع انام.. وطبعا كان الكورس خلص فما بقيتش اشوفه حتى. 

وبعدها بأسبوع لقيته بيكلمني وبيعترفلي إنه بيحبني.. ما كنتش مصدقة.. يعني كان لازم يحس إني هضيع منه علشان ينطق.. ومع اول اعتراف ليه.. لقيت نفسي بقول كل اللي كان نفسي اقوله. 

كنت بريئة أوي.. ومصدقة جملة أحمد زكي ” كلمة بحبك عقد”. 

فاكرة كويس اوي ردي عليه ساعتها… رديت بفرحة :

 _وأنا كمان.. أنا من أول ما سمحت لنفسي إني أخصك في التعامل عن رجالة الأرض.. وأنا  شيفاك كل رجالة الأرض.

ضحكت ضحكة فيها تريقة على الكلام :

_ مش عارفة اية اللي قولته ده.. بس ده فعلا اللي كنت حساه.

المهم اني عشت سنة بعدها كنت فيهم طايرة.. بيكلمني كل يوم و بشوفه كل فترة.

كان بيزعل كتير ومن أقل حاجة.. وكل ما يزعل كنت بعتذر واجي على نفسي حتى لو مش غلطانة.. مش مهم ما هو هيبقى جوزي.. لازم أعود نفسي إني استحمله.. كان يقولي أقابلك اقوله ما ينفعش علشان أهلي.. ولما ألاقيه زعل اقوله خلاص وأقابله.. كان يقولي ما تكلميش فلانة ما كلمهاش.. ما تروحيش الحتة الفلانية ما روحهاش.

كل ده علشان ده جوزي المستقبلي.

والله انا عمري ما كلمت حد قبله.. ولا حتى بعده.. هو كان استثناء على القاعدة.. حبي ليه هو اللي كان بيخليني أقبل اكلمه وانا ما بكلمش حد.. وخوفي إنه يسبني هو اللي كان بيخليني أقابله من ورا أهلي.

وتقريبا زي ما بيقولوا اللي بيخاف من العفريت يطلعله.

ضمت ايديها وكأنها بتضم نفسها وقالت :

_ بدأ يتغير معايا.. بدل اتصال كل يوم اتصال كل أسبوع.. وبدل ما يقولي هقابل باباكي يقولي لو حد اتقدملك اتجوزيه علشان أنا عارف إن ظروفي صعبة ومش عايز أظلمك.. كان بيسيب أيدي واحدة واحدة.. وأنا أقول لنفسي اكيد زعلتيه.. أكيد طريقتك غلط.. واتنازل واتنازل علشان ما يسبش أيدي.. كل ما أشد على أيده هو يرخي.

لحد ما في يوم، مش فاكرة اي حاجة فيه إلا وجعه قالي انه هيخطب غصب عنه بنت صاحب باباه.

_ ازاي.. طاب وأنا

– والله غصب عني

_ غصب عنك ازاي.. وكل اللي بينا

– ربنا هيعوضك اكيد بحد احسن مني

_ مش انت بتحبني

– ما قدرش اكسر كلام أبويا

_ طاب وانا

– ما تصعبيهاش عليا

– مصعبهاش عليك.. وهي مش صعبة عليا

_ كل شئ نصيب

– قربت مني ليه طالما هتعمل فيا كدة

_ ما كنتش قاصد إن كل ده يحصل

– بالله عليك ما تسبنيش.. وأنا هعمل كل اللي يرضيك.. حاول مع باباك.. قوله انك بتحبني

وعدني انه هيحاول.. وتاني يوم لقيت صور خطوبته مغرقة الفيس بوك.. عمرك شوفت صور بتدبح.. أنا صوره دبحتني.. بنت أقل مني في الجمال.. وأكيد ما حبيتوش زي ما انا حبيته.. سابني وراحلها. 

نزلت دموعها وكملت :

_ أنا اللي سمحتله يعمل فيا كدة لاني رخصت نفسي.. بس والله انا ضعفت.. حبيته غصب عني.. وسمحتله باللي ما سمحتش بيه لغيره لاني كنت فكراه بيحبني.. كنت كتير بحاول ابعد بس بخاف أخسره.. يا ريتني كنت بعدت من الأول.

صعب أوي انك تشوف نفسك قليل ورخيص وهاين.. وصعب إنك تكون انت اللي حطيت نفسك في الوضع ده.. والأصعب والأصعب اني مش عارفة انساه.. عندي امل يفسخ خطوبته ويجي يعتذرلي ويقولي نرجع.. أو حتى يكلمني علشان  أسأله سؤال واحد بس .. ليه؟

مسحت دموعها وسكتت خالص.

وبدون استئذان ردت بنت من الموجودين : 

_ أقولك انا ليه.. ببساطة علشان اتنازلتي.. اللي شده ليكي في البداية إنك كنتي صعبة.. مختلفة عن اللي بيقابلهم كل يوم.. وبما إن الراجل بطبعه صياد.. فكان لازم يصطادك.. مش مهم اية اللى حيحصلك بعدها.. جايز يحبك وجايز ما يحبكيش.. بس في الاخر هيبقى مرضي.. هدفه ما كنش انه يتجوزك زي ما كنتي فاكرة.. هو كان هدفه التجربة.. طلعتي البنت اللي نفسه يرتبط بيها كان بها.. طلعتي مش هي فهيكون اشبع جواه احساس هو محتاجه.. احساس انه صياد شاطر. 

لكن لما وصلك زهد فيكي.. وعارفة اية أكتر حاجة خلته يزهد فيكي.. أنك اتنازلتي عن مبادئك.

 الراجل بيحب الست اللي مبادئها سيف علي رقبتها.. مش هيقدر انك غيرتي مبادئك دي علشانه.. وانك كنتي خايفه تضيعيه.. بالعكس.. هيشوف أنك متناقضة.. بتقولي حاجة وتعملي حاجة عكسها.. أنا كبنت فاهمة إنك ما كنتيش بتمثلي وأنك كنتي مقتنعة تماما إن علاقة الست بالراجل مش مقبولة غير في إطار الضرورة وإن استثناؤه من القاعدة كان ناتج عن إن مشاعرك اتحركت ناحيته.. لكن هو كراجل.. مش هيفهم كدة.. كل اللي هيوصله التناقض بين الفعل والكلام.

غير اعترافك الصريح ليه بحبك .. من غير ما تزعلي ده كان غباء منك.. الراجل بطبعه يحب يتعب علشان يوصل.. وكل ما كان التصريح بمشاعرك عزيز.. كل ما هيبذل هو مجهود علشان يسمعها منك صريحة.. انتي طمنتيه من قبل ما مشاعره تتحرك ناحيتك إنك بقيتي مضمونة.. والراجل لما بيحس انك بقيتي مضمونة، بيستريح وواحدة واحدة بيزهدك. 

كانت بصلها جدا وهي بتكلمها.. وجعتها بالكلام جايز.. بس قبل ما توجعها كانت بتوجع نفسها.. وكأنها قرأت في عنيها أنها خلاص مش هتستحمل كلمة زيادة.. قالت :

_ قصتك قصة ملايين البنات.. علشان البنت لما بتحب بتحب بجد.. وبتعمل اي حاجة علشان تحافظ على اللي بتحبه.. لأنها بتكون مش فاهمة إن علشان راجل يحبك.. ما تعمليش اللي يريحه.. غير لما يثبتلك إنه يستحق .. لو عايزه راجل يحبك.. ما تخليهوش يضمنك.

ردت عليها باختصار 

_ عندك حق.. أنا اللي رخصت نفسي 

ظهر صوت مروان وقال 

_ أكتر كلمة يا ربا  لفتت نظري في كلامك هو وصفك لنفسك بالرخيصة.. انتي مش رخيصة.. انتي بشر.. بشر عنده جوانب قوة وجوانب ضعف.. جايز ارتباطك بالطريقة دي ما كنش هو أحسن حاجة.. خصوصا إنه كان من ورا أهلك.. وخصوصا إنك فعلا اتصرفتي عكس قناعاتك.. لكن زي ما قولت كتير احنا بنتعلم من التجارب اللي بنمر بيها.. مش معنى إننا غلطنا إننا وحشين.. احنا بنغلط علشان إحنا بني آدمين.. أول خطوة علشان تنسي الشخص ده.. هو انك تسامحي نفسك وتعترفي ببشريتك وتصدقي إنك مش رخيصة.. انتي بس كان عندك احتياجات وهو عرف يشتغل على احتياجاتك دي.. هو لمس الجوع اللي جواكي للكلمة الحلوة والاهتمام فاستغل ده.. وانتي علشان بريئة ما عرفتيش تفرقي بين اللي بيجرب واللي بيحب بجد.. اللي بيحب بجد ياربا بيبقى عايز علاقته باللي بيحبه تكون في النور.. بيحترم أفكاره ومبادئه ويتقبلها مش بيسعى إنه يخليه يغيرها.. ما بيقبلش إن اللي بيحبه يجي على نفسه علشان بس يرضيه.. ما بيسعاش يخليه نسخة تانية غير اللي حبها.

لف وشه ناحية البنت اللي عقبت وكأنه بيوجه كلامه ليها ليقينه انها مرت بتجربة شبيهة ومش حابة تقول ده  وقال : 

_ انتي مش رخيصة.. وهو على فكرة عارف إنك مش رخيصة.. ولازم تصدقي ده. 

وبعد ما تصدقي.. لازم تتقبلي اللي حصل وتقرري إنك هتنسيه.. تجربة اتعلمتي منها ازاي بعد كدة تحافظي على قلبك وما تسمحيش لحد إنه يلعب بيكي.

– حاسة إني مش هعرف احب حد تاني 

_ بيتهيألك.. الحياة ما بتقفش على حد.. وزي ما فيها الوحش فيها الحلو.. تعالي نحط خطة علشان ننسى وبلاش نفكر في اللي جاي.. اللي جاي بأيد ربنا. 

– تفتكر هنسى 

_ أكيد هتنسي.. أي حاجة في الدنيا بتبدأ كبيرة وبتصغر.. حتى الألم.. كويس انك معترفة بمشاعرك ومش بتنكريها.. بس اعتقد إن آن الأوان إنك تتخطي مشاعر الحزن دي لأنها كدة طولت.. فكري كدة مع نفسك هل اللي سابك ده يستحق إنك تفكري فيه.. وعلى رأي تامر حسني “من حبنا حبناه وصار متاعنا متاعه ومن فارقنا فارقناه يحرم علينا اجتماعه”.. كل ما تفتكريه افتكري اللي عمله فيكي.. مش عايزك تكريه بس عايزك تفهمي إنه ما يستاهلكيش.. وياريت تحاولي تبعدي عن أي حاجة بتفكرك بيه.. لو جايبلك هدايا اتبرعي بيها.. ولو رقمه عندك أو هو عندك على أي تواصل امسحيه.. كل ما تحسي برغبة إنك عايزة تتكلمي عنه اعملي اي حاجة تشغلك وما تتكلميش عنه.. كوني صداقات جديدة واشتركي في  أعمال تطوعية.. أملي وقتك.. ما تخليش عندك وقت فراغ تفكري فيه .. وفكري نفسك دايما إنك كنتي شيفاه من بعيد.. واكيد ربنا ببعده عنك منع عنك شر ما كنتيش تتوقعيه لأن ربنا دايما بيعملنا الخير والصالح.. صلي وادعي ربنا كتير إنه يربط على قلبك.. واستغفري كتير كتير بنية الفرج.

أخد نفس وكمل :

_ وبالله عليكي يا شيخة.. بلاش تسمعي محمد محي وهو بيقول سابني وراح يا هوى

ضحكت ضحكة خفيفة وقالت

_ ده مش محمد محي.. ده تامر عاشور

رد عليها بهاء وقال

_ ما تفتيش يا ربا.. ده وليد سعد

ضحك مروان وسأله:

_ مين وليد سعد ده يا بهاء؟ 

– بتاع سابني وراح يا دكتور 

_ ما تقول كدة يا راجل

ظهرت تاني علامات الجد على وشه وكمل 

_ بتكلم جد.. ممنوع الأغاني يا ربا.. احنا مش ناقصين شحتفة.. ولو لازم أوي أغاني.. خليكي في كوكو واوا.. أهي زي الفل وربت أجيال عظيمة. 

ضحكت ربا وقالتله :

_ ربنا يريح قلبك يا دكتور ويجعل تطيبك لخاطرنا في ميزان حسناتك. 

ابتسم وقال : 

اللهم آمين.. اعتقد خلاص وقت الجروب قرب ينتهى وما فيش وقت نسمع حكاية جديدة أو فضفضة.. بس هنلحق نمتن. 

وهنا ظهر الصوت اللي كان نفسه يسمعه بيحكي وسأل : 

_ يعني اية نمتن؟ 

– لف بجسمه كله ناحية الصوت وابتسم ابتسامة كلها بهجة 

_ كل نهاية جروب لازم كل واحد فينا بيقول حاجة هو ممتن ليها في الجروب أو ليها علاقة بالجروب .. الامتنان عموما باختصار هو شكر لنعمة معينة واستشعارها.. وده من الحاجات اللي بتحافظ على المشاعر عالية وبتزود الطاقة الإيجابية.. ومن الحاجات اللطيفة اللي ممكن الإنسان يعملها كل يوم الصبح إنه يفتكر نعم ربنا عليه ويمتن للنعم دي.. لأن ده فيه تذكير للنفس بفضل ربنا علينا.. مفهوم كدة؟

ردت باختصار 

_ مفهوم

وجه كلامه لكل الموجودين.

_ هنبدأ من اليمين 

كل الموجودين تقريبا قالوا إنهم بيمتنوا لدكتور مروان ولنصايحه ولدعمه

أما هي فقالت:

_ أنا ممتنة لخروجة صحابي اللي اتكنسلت و بسببها حضرت الجروب .

وزي كل مرة ختم هو فقرة الامتنان بس المرادي قال :

_ أنا ممتن النهاردة لربنا إنه ما خلنيش أعرف أعدي الطريق لوحدي وانا جاي الجروب. 

أحمر وشها بعد كلمته 

سكت لوهلة وكمل 

_ وممتن جدا لوجودكم في حياتي.

#يتبع

خلص الجروب .. كل اللي عنده سؤال جانبي سأله لمروان .. كان بيجاوب بسرعة وبدون تركيز.. خايف تمشي من غير ما ياخد انطباعها.. ومش عارف حتى ينده عليها.. أصله لحد اللحظة دي ما يعرفش اسمها.

من قواعد الجروب إن كل واحد يعرف نفسه في البداية.. بس لانه بدأ متأخر ما كانش فيه وقت يعرفوا نفسهم.. ومن قواعد الجروب إن اللي يتكلم يبدأ بالتعريف بنفسه.. بس لما يحكي، مش لما يمتن.. وهي ما حكيتش.

وقفت على جنب.. مترددة تعمل اية.. الصح انها تمشي ولا الصح انها ترجع معاه زي ما جت معاه.. طريقها وطريقه واحد.. بس مش دايما اللي طريقهم واحد لازم يمشوه مع بعض.. فكرت تمشي.. بس إحساسها قالها ما تمشيش وتسبيه.. يمكن لو كان إحساسها ما قلهاش.. كانت الأمور هتبقى أسهل.. وما كنتش هتسيبه.. لأن وقتها كان الموضوع كله هيكون من باب المساعدة لإنسان محتاج مساعدة.. بعيد عن أي مشاعر.. غير مشاعر الرحمة.. لكن واضح إن معاه المشاعر متداخله.. الاحساس اللي مسيطر عليها انها ما ينفعش تمشي.. احساس سببه شخص، مش سببه موقف.. لما وصلته وهما جايين كان من باب التعاطف.. لكن الغريبة إن الوضع دلوقتي مختلف.. هي عايزة توصله علشانه مش علشان متعاطفة معاه.

بعد تردد فكرت تمشي ورا إحساسها.. لأن حتى من منظور العقل.. مش هتخسر حاجة لو خدته في طريقها.

بس صوت قوي جواها قالها : طيب ومن منظور الدين والصح والغلط، الرضع اية؟.. نيتك مش نفس النية اللي كنتي جاية بيها.. وربنا بيحاسب عن النوايا.. ما ينفعش توصليه. 

وقررت بعد كل التردد .. تمشي ورا الصوت الأخير.. بس على  الأقل هتنستنى تشكره وتطمن إن حد هيساعده إنه يرجع.

قربت منه بعد ما كل اللي موجودين مشيوا.. واللي كان أخرهم بهاء.. بعد ما سأله هتروح ازاي وعرض يعمل إذن من المستشفى ويجي معاه يوصله ويرجع.. طمنه إنه هيروح في تاكسي زي ما جه.. فكر إن حتى لو هي مشيت فهو هيعتمد على نفسه ويروح لوحده زي ما كان مرتب من الأول.

بعد فشل بهاء إنه يقنعه يوصله، قاله :

_ خلاص يا سيدي هخرج معاك أوقفلك تاكسي على الأقل 

– شكرا يا بهاء.. ما تقلقش مش اول مرة اجي واروح لوحدي… عملتها مرتين قبل كدة.. عايز أتعود أعتمد على نفسي أكتر 

التفت بهاء لمحها.. ابتسم ابتسامة فيها مكر وقال :

_ انت متأكد انك هتمشي لوحدك

– ايوة يا عم متأكد

_ طيب يا استاذ.. ابقي طمني لما توصل.. هسيبك دلوقتي علشان عندي شغل

كان خلاص فقد الأمل أنها تكون مستنياه.. ويادوب هيقوم من مكانه.. سمع صوتها اللي حفظه :

_ أنا عايزة اشكرك بجد على انك عرفتني على الجروب.

ابتسم وقال

_ افتكرتك مشيتي

– مستنية اشكرك

_ أي خدمة.. بس لازم مقابل للخدمة دي

– اتفضل طبعا

_ خديني في طريقك.. وأوعدك.. مش هقول اي حاجة طول الطريق.

– ليه بتقول كدة

_ علشان متأكد إنك بتفكري تمشي

– عرفت منين

_ إحساسي بيقول كدة

وبعد ما كانت مقرره تسيبه.. رجعت في كلامها مع أول كلمة ليه :

– لا احساسك غلط.. خدني انت في طريقك.. بس بشرط واحد

_ شرط اية؟

– أنا اللي هدفع فلوس التاكسي

_ هو انتي اسمك اية؟

– مريم

_ مستعد اسيبك تدفعي فلوس التاكسي.. بس بشرط واحد يا مريم 

– اية هو 

_ هقولك اول ما نوصل 

– اتفقنا 

خرجوا من المستشفى ووقفوا تاكسي.. تعمد إنه يركب جنب السواق.. كان متأكد إنها خايفة بعد حكايات الجروب انه يفهمها غلط.. وكان شايف كمان إنه أڨور في طريقته معاها من البداية.. في النهاية هو اجنبي عنها.. وما ينفعش ابدا يتباسط في الكلام معاها بالشكل ده .. بس يمكن الراحة اللي حس بيها ناحيتها.. خلته حس إنه يعرفها من زمان.. وطبيعته المرحة غلبت عليه .. بس برضوا مش لازم لما نضعف نكمل للنهاية.. تدارُك الخطأ من البداية بيعنا إننا ما نتماداش فيه .. كل كلمة بيقولها لأي بنت في الجروب بيكون مقصدها دعم.. وأي دعابة بيكون وراها حكمة.. لكن معاها كان الوضع مختلف.. ازاي مش عارف.. وليه مش عارف.. والمفروض يعمل اية برضوا مش عارف.. الحاجة الوحيدة اللي كان عارفها.. إنه لازم يقفل على نفسه باب الفتن.. وصوتها للأسف كان بالنسباله فتنة. 

هي كمان كانت أفكارها كلها عن ازاي شايفها دلوقتي.. وهل كونها وافقت توصله هيفهمها غلط.. وليه وافقت توصله أصلا بعد ما اخدت قرار انها مش هتعمل كدة.. وايةسبب الراحة الغريبة اللي حساها تجاهه.. وازاي اتكلمت معاه كدة من غير ما تكون تعرفه.. وازاي كل كلمة قالها اتحفرت جواها كدة. 

اما هو فبعد كل الأفكار اللي جت في دماغه.. سيطرت عليه فكرة واحدة، أنه عايزها تكون مش أجنبية عنه.. أكيد مش بيحبها بس حاسس براحة ما حسش بيها من ساعة ما ساب خطيبته.. صوت جواه سأله معقول بتفكر ترتبط.. رد عليه صوت أعلى، لأ استحالة أكيد مش هتفكر ترتبط.. رد عليه الصوت التاني لا ينفع ترتبط.. بس هي ترضى.. بس الصوت الأعلى سأل أسئلة منطقية .. هو انت تعرفها أو تعرف عنها حاجة، طيب مش يمكن أصلا مرتبطة أو متجوزة.. بس السؤال اللي فضل يزن في عقله.. حتى لو مش مرتبطة.. هتوافق ترتبط.. بواحد أعمى؟ 

صوتها خده من أفكاره وهي بتقول للسواق : 

_ على جنب لو سمحت.

دفع الفلوس للسواق ونزل وسألها بعد خناقة تانية على ازاي هو يدفع الفلوس

_ احنا كدة فين

– في نفس المكان اللي أخدناه منه التاكسي واحنا رايحيين 

_ هتساعديني أعدي الشارع؟

– أكيد هساعدك.. ولحسن حظنا الشارع ما فيهوش اي عربيات.. يلا عدي

عدوا الشارع وبمجرد ما عدوا شاورلها على العمارة اللي في وشهم وقال :

_ أنا ساكن هنا

– حمد الله على السلامة.. هقف لحد ما تدخل المدخل.

_ الله يسلمك.. هسألك سؤال أخير يا مريم

حست بتوتر كبير وقالت :

_ اية هو السؤال

– انتي مرتبطة؟

أحمر وشها وما كنتش عارفة أية طريقة الإجابة ولا اية سبب السؤال وقبل ما ترد.. ظهر صوت والدته :

_ حمد الله على سلامتك يا مروان يا حبيبي.. ينفع اللي عملته ده

_ الله على الوقت المناسب اللي اختارتيه يا ماما

قالها لنفسه وهو في شدة غيظه.. بس بأدب متعود عليه رد :

_ الله يسلمك يا ماما.. ما انا رجعت اهو الحمد لله وزي الفل.. اعرفك باستاذة مريم

 كانت شيفاها بس ما توقعتش انها تكون واقفة معاه.. كانت فكراها واقفة مستنية حد .. بس بعد كلمته التفتتلها ومدت ايديها سلمت عليها :

_ اهلا وسهلا أستاذة مريم.. أنا والدة مروان

ردت مريم بارتباك

_ اهلا وسهلا بحضرتك 

– انتي زميلة مروان

ما عرفتش ترد بأية فرد مروان بسرعة علشان يعفيها من الحرج :

_ ايوة يا ماما.. زميلة في الجروب

– اهلا وسهلا يا حبيبتي.. انتي جاية مع مروان من المستشفي

رد مروان برضوا قبلها :

_ ايوة يا ماما.. كتر خيرها.. جابتني في طريقها

كانت حاسة انها عايزة تجري من قدامهم من كتر الكسوف.. ابتسمت وقالت

_ فرصة سعيدة يا طنط.. استأذنكم

– لا تستأذنينا أية.. انتي لازم تطلعي تشربي حاجة.

_ لا معلش يا طنط مش هقدر.. أنا اتأخرت وبابا وماما هيقلقوا عليا

_ لا اطلعي خمس دقايق بس.. مش هنأخرك.. ما ينفعش تبقى تحت البيت وما تطلعيش

بصت لمروان وكملت :

_ ما تقولها حاجة يا مروان

رد بهدوء : 

_ سبيها على راحتها يا ماما

وجه كلامه على طول لمريم من غير ما يدي لمامته فرصة تعرض عليها تاني :

_ متشكر أوي يا مريم.. وما تنسيش ميعاد الجروب الجاي.. هتيجي صح ؟

– مش عارفة لسة

_ حاولي على أد ما تقدري

_ إن شاء الله هحاول

بصت لمامته بابتسامه خفيفة وقالت :

_  فرصة سعيدة فعلا اني اتعرفت على حضرتك.. استأذن 

– انا الأسعد يا حبيبتي.. قوليلي بس.. انتي ساكنة قريب من هنا

_ ايوة.. أنا ساكنة في العمارة اللي في  أخر الشارع دي

شاورت على العمارة بتلقائية.. فردت مامت مروان عليها 

– خلاص نيجي نوصلك

_ لا شكرا يا طنط.. البيت يا دوب خطوتين

– لا يا حبيبتي نوصلك.. كفاية انك تعبتي نفسك ووصلتي مروان

رد مروان عنها تاني :

_ سبيها يا ماما على راحتها

_ شكرا يا طنط تسلمي.. السلام عليكم

_ وعليكم السلام يا حبيبتي.

سابتهم وراها وعقلها فضل معاهم.. فكرت يا ترى هتشوفه تاني.. وليه أصلا شاغلها السؤال ده.

أما هو فمسك ايد مامته وقبل ما يخطوا خطوة.. سألته بفرحة :

_ هي دي اللي ما عرفتش تلغي الجروب علشانها

– اية يا ماما اللي بتقوليه ده

_ يا سلام.. هتخبي على ماما

ضحك وقالها

_ يلا نطلع يا ماما وبلاش المسلسلات التركي اللي بتتفرجي عليها تأثر عليكي

_ مسلسلات تركي؟ .. يلا يا سي مروان.. التركي كله شكله هيبقى عندك.. نطلع ومش هسيبك غير لما تحكيلي كل حاجة

.

فرحتها كانت ناتجة عن أمنية بتدعيها كل يوم.. إن ربنا يرزقه بالزوجة الصالحة.. كانت مرعوبة تسيبه لوحده في الدنيا.. من بعد موت والده  وهي كل همها تجوزه.. عارفة إن أخواته موجودين وبيحبوه.. بس غصب عنهم حياتهم هتشغلهم عنه.. اخته اتجوزت وأخوه مسيره يتجوز في يوم.. كانت شايلة هم تسيبه لمين لو جرالها حاجة.. وكانت الكلمة اللي على لسانه كل ما تقوله كدة.. ” ربنا ما بيسيبش حد”.. وكان دايما يأكد إنه مش هيتجوز لأنه مش حابب يكون عبء على حد.

حاولت كتير معاه ورشحتله عرايس كتير بس كان دايما بيرفض من البداية.. دعت ربنا وهي طالعة إنه يكون غير رأيه واقتنع إنه زيه زي أي شاب لازم يتجوز ويعيش حياته عادي.

يا دوب طلعوا وفتحت الباب.. قعدته وقعدت جنبه وسألته :

_ مين بقى آنسة مريم دي يا مروان

ضحك من طريقتها وقالها :

_ وانتي عرفتي منين بقى أنها آنسة يا حاجة سامية

– مش بتقول بابا وماما هيقلقوا عليا.. يبقى آنسه يا خويا.. وكمان مش لابسة دبلة

حس براحة بعد كلمتها فابتسم وقال

_ مش سهلة انتي يا سمسم

– الموضوع مش مستاهل يعني.. أي حد هيعرف من كلمتها ..  وغير كدة ارتباكها وخجلها يقول أنها لسة آنسة

_ طيب شكلها اية يا ماما ؟

ضحكت بفرحة وقالت :

_ مش بقولك.. فيه في الأمور أمور.. أول مرة تسألني على شكل واحدة

_ يا ماما.. بلاش دماغك تروح لبعيد.. قوليلي بس شكلها اية وانا هحكيلك اللي حصل

– قمحوية .. وملامحها هادية.. مش جميلة أوي.. بس وشها مريح.. وطولها متوسط.. ممكن طول اختك كدة.. اية الحكاية بقى يا عم مروان

_ سبيني اغير هدومي وأصلي المغرب قبل العشا وهقولك.

وصلت مريم بيتها.. كانت مبسوطة.. مبسوطة أوي.. كانت خارجة من البيت بإحساس.. ورجعت بإحساس تاني.. سلمت على باباها ومامتها  ودخلت غيرت هدومها وصلت المغرب وخرجت لقيت باباها قاعد

_ اية يا مريومة.. اية موضوع الجروب بقى اللى لغيتي  خروجة اصحابك علشانه.. استغربت لما بعتي تقوليلي انك هتلغي الخروجة وتحضري جروب

حكت لباباها  اللي حصل باختصار .. متعودة ما تكذبش.. وطالما سألها يبقى لازم تجاوب

قلقت من رد فعله بس فاجأها رده :

_ برافو انك ساعدتيه.. ربنا يحفظك ويديم عليكي قلبك.. بس لو حصل الموقف ده تاني نخلي مساعدتنا احنا أخر الحلول.. بمعنى.. لو لقينا راجل يساعد  يبقى أفضل.. لأنه رغم أنه كفيف.. بس برضوا راجل غريب.

– معاك حق يا بابا.. هاخد بالي لو اتكرر موقف زي ده

_ اتغديتي

– شوية كدة وهاكل

_ ماشي وانا هقوم أشوف ماما بتعمل اية.

باباها كان دايما سرها ومعلمها.. ثقته فيها وتوجيهها باين كانت بتخليها ما تخبيش حاجة عليه وتكون حريصة ما تعملش حاجة تتعارض مع اللي رباها عليه.. واللي زرعه فيها كان طول الوقت هو اللي بيحصده.. بتحب مامتها بس باباها  هو الأقرب لقلبها.. طول عمره كان صاحبها.. من كتر حبها فيه نفسها تتجوز واحد زيه ويمكن ده السبب اللي خلاها ما تتجوزش لحد دلوقتي.

دخلت أوضتها .. طلعت كشكولها اللي بتكتب فيه يوميا ملخص للي حصل على مدار اليوم .. صندوقها الأسود اللي فيه كل حاجة عنها من أول ما اتعلمت الكتابة.

وكانت أول جملة كتبتها ” النهاردة كان يوم من أحلى أيام حياتي “

كتبت كل مشاعرها وكل اللي حصل ونهت اللي كتبته   بسؤالين “هو المرة الجاية هينفع اروح الجروب؟ وهل لو روحت .. هروح علشان فعلا الجروب عجبني ولا هروح علشان دكتور الجروب؟

قفلت كشكولها وقالت : ما فيش غير الاستخارة.

_ ها يا مروان… مش هتحكيلي اية اللي حصل النهاردة

– هحكيلك يا ماما وأنا ليا غيرك أحكيله 

حكى اللي حصل بالظبط وقال في الاخر

_ عارفة يا ماما.. أنا مستغرب الراحة اللي حاسسها ناحيتها.. وخايف جدا انها ما تجيش المرة الجاية

– هتيجي ما تخافش

_ متأكدة أوي كدة ليه

_ هي حكت

_ لا ما حكتش

– يا حبيبي اي حد بيحضر الجروب بتاعك.. ما بيبطلش يجي إلا أما يحكي علشان يسمعك .. وطالما هي ما حكيتش يبقى هتيجي

ضحك ضحكة خفيفة وقال

_ ثقتك فيا دي يا ماما.. هتوديني في داهية

– بعد الشر عنك يا نور عيني… ربنا يحفظك ليا يا مروان.. بس قولي

_ ناوي على أية لو جت

– مش عارف يا ماما.. المهم تيجي

_ إن شاء الله هتيجي

– انا مش عارف يا ماما انا عامل كدة ليه.. مستغرب نفسي أوي.. شكلها مراهقة متأخرة

_ لا مش مراهقة.. هي احيانا بتيجي كدة… فيه ناس بنقابلهم بنحس بأنهم قريبين أوي مننا.. حتى من غير ما يتكلموا.. والاحساس ده هو اللي بيخلينا ناخد خطوة بعدها.. بس طبعا عايزة افكرك.. احنا لسة ما تعرفش حاجة عنها

– انا فاهم يا ماما.. بس مش عارف اية اللى المفروض يتعمل

_ نسألها المرة الجاية عن حبة حاجات ولو مش مرتبطة.. ندخل البيت من باباه

– ممكن ما توافقش بظروفي.. وحتى لو وافقت خايف أظلمها معايا 

_ اللي هتكون من نصيبك يا مروان هتكون امها دعيالها يا بني.. ما فيش شباب كتير زيك اليومين دول والله.. أدب وأخلاق وعلم.. كفاية انك حافظ كتاب الله.. وفوق كل، ده زي القمر

– ما هو القرد في عين امه غزال.. خمس دقايق وهتقولي.. الباز أفندي.. ده عريس أنا بذات نفسي استمناه

ضحكت وقالت 

_ لا والله ما عشان إبني .. دي كلمة حق وقليلة عليك يا حبيبي

– ربنا يخليكي ليا يا ماما

_ ويخليك ليا يا حبيبي

عدى الأسبوع ببطء .. وجه ميعاد الجروب.. وصل قبل الميعاد بحوالي عشر دقايق.. كان معظم الناس موجودين.. وكانت مامته معاه.. سألها أول ما وصلوا لأول الجنينة 

_ ها.. جت يا ماما

– أيوة جت

وقبل ما يرد قالت :

_  صراحة مش شايفة أوي.

طول الأسبوع ومريم بتفكر.. تروح ولا ما تروحش.. الجروب عاجبها فعلا ونفسها تحضره.. بس هي صادقة مع نفسها.. السبب الأقوى اللي عايزة تروح عشانه هو مروان.

 صلت استخارة.. وفكرت كتير ومش عارفة توصل لقرار.

وفي يوم الجروب جابت ورقة وقلم واتكلمت مع نفسها كأنها بتكلم واحدة صاحبتها.. طريقة اتعلمتها بتساعدها تاخد قرار.. اتكسفت تاخد رأي باباها أو مامتها.. ما هو مش هينفع تروح تقولهم إن اللي مخليها مترددة، انها شايفة انها عايزة تروح علشانه.. الحل في الورقة والقلم.. سؤال وجواب لحد ما توصل لقرار.. تسأل نفسها وتجاوب :

_ ليه يا مريم عايزة تروحي الجروب؟ 

– بصراحة عايزة أشوفه

_ تشوفيه ليه؟ 

– مش عارفة

_ مشدوداله؟ 

– حاسة انه محتاجلي

_ ومين قالك انه محتاجلك

– قلبي

_ من أمتي بنمشي ورا قلبنا؟ 

– مصدقاه المرادي

_ حتى لو مصدقاه.. عقلك هو الأساس

– بس عايزة أشوفه

_ وبعد ما تشوفيه؟ 

– مش عارفة… هسيبها على الله

_ طيب ما نسيبها على الله من الأول.. ولو مكتوبلك تشوفيه تاني هتشوفيه

– مش هخسر حاجة لو روحت الجروب؟ 

_ لا هتخسري.. هتعلقي نفسك بواحد ما تعرفيش عنه حاجة. 

– مش هعلق نفسي بيه

_ هتفتحي على نفسك باب فتنة انتي في غنى عنها صدقيني.. الشيطان عمره ما بيقولنا أغلطوا.. الشيطان بيدخلنا من مداخل يوهمنا فيها إننا جامدين وبعاد أوي عن الخطأ.. لحد ما يوصل للي هو عاوزه. 

وقفت عند الكلمة دي أوي وردت:

_ عندك حق.. خلاص مش هروح .. من ترك شيئا لله عوضه الله خيرا منه.

خلص الجروب وهو عنده أمل إنه يسمع صوتها بتحكي.. بس للأسف صوتها ما ظهرش.. ورغم انتظاره ليها وتفكيره فيها، إلا أنه عمل جروب جميل بفضل ربنا وبفضل حكايات الموجودين.

وفي فقرة الامتنان قال :

_ أنا ممتن لللسكينة اللي ربنا نزلها على قلبي بفضل حكاياتكم.. وممتن لكل لحظة غمرتوني فيها بحبكم.

خرج من المستشفى مع والدته اللي كانت متأثرة جدا انها ما جتش

_ ما تزعلش نفسك يا حبيبي.. لعله خير

– مش زعلان يا ماما.. أنا برضوا غلطت إني عشمت نفسي.

_ لا يا حبيبي انت ما غلطتش.. تلاقيها بس هي ما كنتش فاضية علشان كدة ماجتش

_ والله انا مش زعلان يا ماما.. ربنا ما بيعملش حاجة وحشة.. أنا برضوا كانت الحماسة وخداني من غير ما احسبها صح. 

– لا تحسبها صح ولا تحسبها غلط.. أنا هحلهالك

_ خلاص يا ماما بقى.. انسي الموضوع ده

فضل طول الطريق مش بيتكلم.. بيفكر ليه ما جتش.. هل ده معناه انها مش عايزة تشوفه ولا ما تحمستش لفكرة الجروب فأكيد مش هتيجي علشانه.. ولا مش فاضية فعلا؟ 

وصلوا البيت.. قعدت مامته معاه وقالتله:

_ عارف يا مروان زمان الجوازات كانت بتبقى ازاي

– ازاي يا ماما

_ لو واحد شاف واحدة وعاجبته.. ما ينفعش ابدا يهوب ناحيتها ولا يكلمها.. كان يجري يطلبها من ابوها ولا اخوها

– وبعدين

_ ولا قبلين.. هو ده اصلا الشرع.. احنا مش هنستني اما هي تيجي.. اصلا جايز ما جتش علشان ما تفتكرش انها جاية علشانك.. احنا اللي هنروحلها

– نروحلها فين

_ بيتها.. البيوت بتدخل من أبوابها.. وهي ساكنة في العمارة اللي في أخر العمارة.. ما ظنش العمارة فيها ميت مريم يعني.. هنسأل عليها ولو لقيناها كويسة نتقدم رسمي.. وتعرفوا بعض في النور.. طلعتوا متاسبين لبعض كان بها.. مش مناسبين يبقى أتبعنا الأصول.

سكت شوية وقالها

– لا يا ماما.. أنا أصلا اتسرعت في قراري.. أنا مش هتجوز

_ والله لتتجوز.. سبلي انا الموضوع ده

وفعلا طلبت من أخوه يسأل عليها في الأول وعلى عيلتها… عرف انها عندها حوالي ٣٢ سنة.. مدرسة أبتدائي.. وحيدة باباها ومامتها.. ملتزمة جدا دينيا.. وأخلاقها كويسة.. وعيلتها طيبة.

ترددت لما عرفت سنها.. خافت تكون فرصة في الإنجاب قليلة… بس رجعت وقالت كله بأيد ربنا.. احنا نتقدم ولو فيها خير ربنا هيكملها.

قالت لمروان كل التفاصيل اللي عرفتها.. فطلب من أخوه يجيب رقم والدها علشان يكلمه.

كلم والدها وطلب منه يزوره في البيت علشان موضوع مهم.. كان مرعوب إن والدها يرفض.. خصوصا إنه ما مهدلوش في التليفون عن أي حاجة.. بس سابها على الله.

كل ده وهي ما تعرفش اي حاجة.. كانت خلاص فاكرة انها مش هتشوفه تاني.. ورضيت بالنصيب.

عرفت من باباها إن فيه واحد من جيرانهم عايزه علشان موضوع.. مامتها خمنت إنه عريس.. بس هي ما توقعتش كدة.. وحتى لو توقعت إنه عريس عمرها ما كانت هتتوقع إنه يكون هو.

وبعد زيارته لقيت والدها داخل عليها الأوضه هو ومامتها .. كانت بتقرا مش مهتمة اصلا باللي برا

وبصوت ما عرفتش تحدد مبسوط ولا زعلان قالها :

_ عارفة مين اللي كان برة

– مين

_ الراجل اللي ساعدتيه

اترعشت ايديها.. وسألت بسرعة

_ عاوز اية

– عاوز يخطبك

باستغراب مختلط بفرحة حاولت تخبيها سألته :

_ يخطبني؟

– أنا اتكسفت اقوله لأ.. علشان ما جرحوش.. بس أنا طبعا مش موافق

وبصوت حزين سألته :

_ ليه يا بابا؟

– علشان كفيف يا مريم.. ينفع تتجوزي راجل كفيف؟

_ ما ينفعش ليه يا بابا

– نعم.. انتي موافقة ولا اية

_ مش فكرة موافقة… بس ما عنديش سبب قوي للرفض.. نشوف وبعدين نقرر

شخطت مامتها فيها وقالتلها :

_ انتي اتجننتي ولا اية يا مريم.. بعد كل الناس اللي رفضتيهم عايزة تتجوزي واحد أعمى

– العمى عمى القلب يا ماما.. وهو قلبه منور

_ لا يا مريم.. ده كلام أفلام يا حبيبتي.. انتي مش فاهمة عواقب جوازك من واحد أعمى

دمعت عنيها وردت :

_ أنا مش بقول هتجوزه.. أنا بقول نشوفه ولو فيه سبب للرفض نرفض.. العمى حاجة هو ما لوش ذنب فيها.. إذا جاءكم من ترضون دينه وخلقه فزوجوه. 

وبعد شد وجذب.. قال باباها :

_ دي حياتك يا مريم وانتي حرة فيها.. هسأل عليه ولو فعلا كان مناسب نفكر

ما سألش حد عنه إلا وشكر فيه وفي أخلاقه.. وبعد حوالي أسبوع قضاهم مروان بين قلق ودعاء، كلمه وطلب منه يحدد يوم يزورهم فيه علشان يشوف مريم أو بالأدق مريم تشوفه.

كان طاير من السعادة

_ وافقت يا ماما

– ربنا يتمملك على خير يا نن عين ماما

_ هي ما وافقتش أوي.. باباها بيقول انهم محتاجين يتكلموا معايا

– هتوافق إن شاء الله يا حبيبي

وجه اليوم اللي حدده باباها معاه.. راح هو ومامته.. كان في منتهى الأناقة.. احساسه مزيج من فرحة وخوف.. فرحة إنه هيشوفها تاني وأنها قبلت تقابله وخوف انها ترفض أو إن يكون قرار الجواز فيه ظلم ليها.. بس سبها على ربنا.

اتكلم شوية مع والدها اللي سأله عن شوية حاجات ..وقعدت  والدته تتكلم مع والدتها..  والدتها اللي دخل مروان قلبها من اول كام دقيقة.. رغم أنها ما كنتش راضية وكانت بتدعي إن الموضوع يبوظ.. بس بعد ما شافته ومع الحاجات اللي سمعتها عنه بدلت دعاءها إن ربنا يكتب اللي فيه الخير.

دخلت هي.. كانت شبه الملايكة.. فرحتها كانت منورة وشها.. بفستانها السماوي اللي عليه زهرات رقيقة روز وحجابها اللي ملفوف بعناية.. كأنه هيكون شايفها.. تعمدت تكون حلوة علشانه مش علشان اي حد معاه.

_ السلام عليكم

ابتسم اول ما سمع صوتها ورد :

– وعليكي السلام ورحمة الله وبركاته

سلمت على مامته اللي قالت اول ما شافتها :

_ بسم الله ما شاء الله.. اهلا بالعروسة.

وبعد حوالي ربع ساعة طلبت مامتها من مامته انهم يدخلوا البلكونة شوية.. قال باباها ليها ولمروان :

_ هسيبكم شوية.

ورغم إن العريس كفيف.. بس كان لازم يلتزم بقواعد الشريعة.. وإن الخلوة ممنوعة.. علشان كدة قعد في مكان بعيد شوية عنهم.. مش سامعهم بس شايفهم وعينه عليهم من دقيقه للتانية.

_ ازيك يا مريم

– ازيك يا دكتور مروان

كانت في شدة الخجل.. بس محضرة نفسها كويس لاسئلة أول مقابلة للجواز واللي على أساسها هتقول أه تتخطب أو لا ما تتخطبش

وقبل ما تقول اي حاجة سألها هو:

_ هتقدري تكملي حياتك مع إنسان كفيف؟

– بالنسبالي القصة مش في كون الإنسان اللي هكمل معاه كفيف ولا مش كفيف .. أهم عندي من البصر، البصيرة.. وزي ما بهاء قال وهو يعرفك أكتر مني.. أنت قلبك مرايتك

_ والله بهاء ده ليه عندي هدية إن شاء الله

ابتسمت وقالت :

_ بيعزك على ما اعتقد

– ايوة الحمد لله.. وأنا كمان بعزه

_ كلمني شوية عن نفسك يا دكتور

– أنا قولت كل حاجة في الجروب.. ده دورك تحكي وبعدين انا هرد على أي سؤال تسأليه 

_ هكحي اكيد.. ولو ربنا كرمنا وكملنا مع بعض مش هبطل حكي.

وانا أوعدك لو حصل نصيب هعملك جروب لوحدك واخليكي كل يوم تحكي فيه .. لأن صوتك هيكون شباكي على الحياة.