رواية اللقاء الثاني الفصل العاشر 10 – بقلم منة محمد

في القريه اسامه اخد البابور وعمروه بالجاز واخد كبريت وولعه

الست خضره طالعه بالدقيق اندهشت شويه وسألته وقالت: كويس يابني انك عرفت تولع البابور برافو عليك

اسامه : متقلقيش انا اتعودت لما كنت عايش في الريف مع جدي وجدتي

بسمله مبتسمه : بجد اول مره اعرف

الست خضره : تعالي معايا يابنتي نرفع الحله

بسمله بصتلها: تمام جايه

الست خضره بفضول : هو ايه الي بينكم انتي مش متجوزه صح

بسمله ابتسمت اوي :هو انا شكلي بيقول اني انسه

الست خضره :انا ست اه عجوزه لكن مش عمياء هو لابس دبله في ايده الشمال بس انتي لاء

بسمله لفت وبصت ع اسامه بأبتسامه كلها حب من غير ما تلفت نظره

اسامه بصلها وضحك وقال : تعالي يا بسمله ساعديني بدل ما عماله تتأملي

بسمله قربت منه وقعدت جنبه وبصتله بشويه غيظ

اسامه بصلها :شكلك زهقتي كان المفروض ترجعي

بسمله : مش المفروض توطي النار عشان يستوي خد الموضوع ع انه تامل ده الي قالته الست خضره

اسامة: هي قالت تعليمات كتير

اسامه تلفونه رن برقم حماه قام بعيد عن بسمله وفتح الخط وقال: اهلا يا عمي

خليل: اهلا بجوز بنتي الي سايبها وطفشان

اسامه: خير يا عمي في حاجه عندكم

خليل: لاء بس زينب واقفه بتعمل الاكل اصلها كافئتنا ع شغلها الجديد في عياده

اسامه: طيب كويس

خليل بغضب: هو ايه ده الي كويس ها عايزني اعلمك درس قاسي

اسامه: ليه بس ياعمي

خليل: ليه انت مزعل بنتي حبيبتي وانا مش هسيبك يا اسامه لانها بنتي الوحيده

زينب جريت اخدت منه الموبيل بعتاب: بابا انت بتقوله ايه

خليل زعق :عملت ايه يا زينب سبيني اكلمه يمكن يخلي عنده شويه دم ويحط عقله في راسه

زينب: اسامه انا بعتذر هو متعصب شويه

اسامه :مفيش مشكله واضح انه متعصب مني

زينب :هو انت بره

اسامه: ايوه عندي شغل

بسمله بصوت عالي مش متعمد :اسامه النار عليت اوي تعالي شوف

اسامه لما بسمله صرخت قال لزينب :هتصل بيكي بعدين

زينب فضلت جامده وحاطه الموبيل ع ودنها وبتسمع

اسامه مسك صوباعها :ليه بس لمستي الحله

بسمله بوجع: اعمل ايه النار عليت وخفت تتحرق

اسامه اخد ايدها وحطها بسرعه تحت الحنفيه وقال: مجرد لاسعه هتفضل شويه تحط الميه البارده وبعدها ندهنها معجون اسنان

بسمله :هي زينب عامله ايه كويسه

اسامه ضم حواجبه :وليه بتسأليني عنها؟

بسمله : شكلي غلطت بخصوصها لانها طلعت بتحبك ده انا قلت هتقولك عن الي حصل بينا يومها

اسامه: ايه الي حصل وتقولي عليه

بسمله :شوفتها من يومين وقعدنا احنا الاتنين سوي

اسامه : ايه , وايه الي اتكلمتوا فيه

بسمله : سمعت انك اشتغلت في شركتي كرد جميل للي حصل في اليونان وانك بتحاول تثبت لها حبك بالطريقه دي وانا كنت مجروحه وانا بسمع ده لان مشاعري ليك لسه زي ماهي ومش هقدر اخبي بعد كده والافضل اتعامل معاها

اسامه : والمعني

بسمله : يعني بجد مش فاهم اني لسه بحبك رغم قلبي مليان اوي منك لان انا بحاول بكل جهدي اقربك مني لدرجه مبقتش قادره اركز بسببك انت لسه جوه قلبي يا اسامه وبشتاقلك وعايزه ابقي معاك عقلي بيصرخ بيقول لاء لكن قلبي رافض يسمعها فكرت لوهله اني ممكن ابقي احسن مع الوقت لكن المشكله حبك زاد اضعاف عن زمان

اسامه : بسمله ممكن تسمعيني

بسمله قطعته بدموع كتير: عارفه انت راجل متجوز وانا ممكن اعملك مشاكل بس انا مش انانيه ومش بفكر افرق بينك وبين زينب ولا عمري هطلبها

اسامه قرب عليها : تمام تعالي احطلك معجون ع ايدك

بسمله : لاء خلاص سيبني انا هكمل ممكن اعمله بنفسي كفايه عالجت رجلي مره مش عايزه ازيد همي عليك

اسامه : عمرك ما كنتي هم يا بسمله

بسمله: لاء كنت همك لما ضربتني بالقلم يا اسامه وبعدها روحت وسبتني

اسامه: عشان كنت بقوقك من الجنان الي كنتي ناويه تعمليه

بسمله بنفعال قوي :جنان كون اننا نتجوز انا وانت بتسميه جنان

اسامه: ايوه جنان لما تطلبي مني اخدك من وري رضا ابوكي يبقه اسمه جنان وانا مقدرش اسيرك ابدا فيه

بسمله: لكن العقل جريت واتجوزت زينب مش كده كانك بتعاقبني وتربيني

اسامه: انا لاكنت بعاقبك ولا بربيكي انا كنت مجبور اقبل كانت كل الظروف ضدي لما امي شافت قهرتي عليكي وراحت لحد فيلا ابوكي الي عاملها اقل من الجرثومه وقالها كلام انا مش عايز اكرره لانه بيوجعني يومها امي رجعت مدمره وتعبت ودخلت المستشفي وطلبت مني اتجوز زينب وبيها اقدر انساكي واطوي صفحتك

بسمله: وقدرت تنساني

اسامه :مقدرتش ومعرفتش بالعكس كنت بفتكرك كل ليله كل لحظه في اليوم كل دقيقه كل ثانيه كنت بفتكرك لدرجه من قهرتي قلت يارتني ماحبيتك ابدا يارتني معرفتك ابدا ابدا

بسمله : اسفه شكل كلامي ضايقك

اسامه : لاء بس انا شايف نفسي مذنب لانك وقفتي حياتك ومتجوزتيش

بسمله :وانت شايف اني ممكن اتجوز حد تاني واعيش معاه نفس قصه الحب الي بيني وبينك مستحيل عشان كده وقفت مكان ما سبتني وانا كل ليله ببكي وقلبي مكسور عشان كده مش عايزه اكسر زينب

اسامه: وانا مش مستعد اكسرها وصدقيني اوقات بناخد قرار واحنا عارفين انه هيقسم قلبنا نصين بس كتير بيكون ده الصح و الي لازم يتعمل

بسمله سالت دموعها بغزاره : خلاص متكملش لان انا بجد مجروحه دلوقت ومش عايزه ارجع هربانه للقاهره

اسامه لفها ناحيته: بس لازم تسمعي الكلام الي هقوله انا لسه بحبك نفس الاول ويمكن اكتر بكتير وبفكر فيكي وبتوحشيني وبشتاقلك ومش عايز ولا لحظه تبعدني عنك ايوه ولسه بكنلك نفس المشاعر من ست سنين بس خلينا نقف هنا مش عايز مشاعري تروح اكتر من كده لان عندي زينب وبحبها بموده وعطف واعتبري دي اخر ساعات لينا سوي

بسمله: بما انها اخر ساعات سوي خليها تبقي ذكري حلوه و حط في بالك انا مستحيل اضرك في يوم من الايام حتي لو مفيش تعامل بينا زي ما كان قربي منك لطيف وهيكون بعدي عنك لطيف

……………………….قصص منه محمد كاتب…………………….

خالد بصله : تقصد ايه

مدير اعمال بسمله :صاحب الفندق اعلن انه هيعقد اجتماع مع شركه حورس بخصوص بيع الفندق وهيدي نفس الفرصه لشركتين وبعدها يقارن الشروط

خالد: هو مش احنا الشركه الوحيده الي كنا متفقين

مدير اعمال بسمله :هو اعلن ده بنفسه ومعرفش مين السبب وري ده بس صاحب الفندق غير رآيه

خالد كرمش ملامحه: ازاي يعني متعرفش السبب اكيد هي بسمله ولعبت في الخفاء

مدير اعمالها بدفاع قوي: بس دي مش الاعيب بسمله هانم الي انا اعرفها

خالد خبط ع المكتب بغيظ: فعلا عندك حق وده امر غريب مش اسلوبها فيه حاجه مش مفهومه وبسمله بتتصرف بدماغ حد تاني

مدير اعمالها: مين هو

خالد: اكيد الراجل الي اسمه اسامة هو الي قلب عليا التربيزه

خالد تلفونه رن برقم زينب قام بسرعه رحلها لقاها قاعده في كافيه فندق ومنهاره

خالد قرب عليها بقلق : مدام زينب مالك ايه الي حصل

زينب بصتله وعيونها كلها دموع : حاسه اني هنفجر بس مش عارفه اتكلم مع مين قلت اكيد انت هتسمع لي

خالد بهتمام : احكيلي وع اقل من مهلك

زينب ببكاء :ولا حاجه بس صعبان عليا نفسي قوي عشان الطيبه الي جوايا ضيعت من عمري سنين طويله ع ناس متستاهلش ولا تستحق عشت بنفذ الي بيطلب مني لحد ما بقيت من غير قيمه بكل بساطه طول حياتي فكرت لما اكتم غضبي حاجه كويسه ولما ادي كتير حياتي هتمشي بس خلاص قررت اوقف كل ده وحالا عشان كدا محدش يقولي اعمل ايه

خالد التفت حواليه ورجع بصلها: ممكن تهدي لو جوزك شافك في الحاله دي هيقلق عليكي

زينب بقهر: هو مش في البيت احنا عايشين كل واحد في ناحيه اصله رجع لحبيبته القديمه وشكله هيتجوزها احنا انفصلنا وقلوبنا انفصلت كمان مستر خالد تحب تنام معايا

خالد وسع عيونه: ايه الي بتقوليه ده

زينب: سيبك مش مهم لو نمنا مع بعض ولا لاء المهم هتدفعلي كام واعيش معاك اربع ايام هتديني مليون جنيه

خالد: انا مش بالجنان ده

زينب بنرفزه عاليه : كداب انا عارفه الي زيك ومن صنفك الي بيسحبوا الناس بفلوسهم وبيبقوا واثقين هيكعبلوا اي حد في شباكهم انت بثروتك مالك العالم كله وتاخد الي انت عايزه بأي طريقه تخليك مبسوط انت وهي شبه بعض

خالد: هي دي تبقي بسمله رؤف مش كده وبرغم مش فاهم ايه الي بيحصل بينكم انتم التلاته بس انا مختلف لو عايزك وليا رغبه فيكي هخليكي تعوزيني وترغبيني الاول يا زينب

ابراهيم داخل مع عميل شاف زينب وخالد مسندها وطالع بيها غرفه في الفندق وسع عيونه وبسرعه اتصل بأسامه

اسامه رد: اه وسهلا ها خلصت شغلك

ابراهيم بتوتر: سيبك من الشغل دلوقت واسمعني كويس

اسامه بقلق : في حاجه حصلت بخصوص الفندق

ابراهيم: انا شوفت مراتك من شويه طالعه غرفه في فندق مع خالد مندور

اسامه حصله حاله ذهول قفل السكه وساق العربيه باقصي سرعه لحد الفندق وراح ناحيه الاسانسير يخبط عليه زي المجنون وعيونه تغلي شرار حاسس ان الجدران انهارت فوقه حاسس بالم كبير فوق الاحتمال

ابراهيم: اهدأ

اسامه بصراخ: اهدأ ده ايه مراتي فوق مع خالد انا لازم اطلعلهم

ابراهيم: وهتعمل ايه لو طلعت هتقتلهم استناها هنا وبعدها اتكلموا

اسامه بعصبيه وغضب: انت تقدر تعمل كده تقبلها ع كرامتك ورجولتك لو مراتك فوق مع راجل وضيع في اوضه

ابراهيم بصله ومش بيرد عليه لان شايف انه حقه واسامه مقدرش يستني نزول الاسانسير اخد السلم جري

…………………………قصص منه محمد كاتب……………..

زينب دخلت الحمام وبدئت تتقيئ وتعيط

خالد كلم المساعده ع الموبيل انتي فين دلوقت ….تمام فوتي ع اقرب صيدليه هاتي دواء يمنع الترجيع لمدام زينب وتعالي ع الفندق بسرعه لو سمحتي

زينب فضلت تتقئ في الحمام وتعيط بصوت كله قهر

خالد خبط ع الباب برفق وقال: مدام زينب ممكن ادخل اساعدك

زينب : لاء متجيش الامر هيبقي محرج متدخلش اذا سمحت

الباب خبط وخالد فكرها المساعده جات وراح فتح الباب اتفاجئ بوجوده

زينب بسؤال: ازاي عرفت اني هنا

اسامه بعصبيه وصوت عالي: ده كل الي همك

زينب بنظرةٍ قوية : متعليش صوتك انا عندي صداع وانت زودته

خالد بقلق : استاذ اسامه عارف ان الوضع مش كويس لكن ارجوك خليك هادي هي كانت منهاره

اسامه صرخ فيه: انت اقفل بؤك وغور من وشي لو مش عايزني اقتلك واقتلها

خالد :منا لو مشيت انت هتفكرني وضيع

زينب بصت لـ اسامه وفي منتهي الهدوء: انا الي طلبت منه كده بعد ما رمتني زي فرده الجزمه حسيت اني مش مظبوطه وجيت ع هنا وطلبت منه يحجزلي اوضه عشان اقدر ارتاح مستر خالد معملش حاجه غلط

اسامه بنبره كلها استهزاء: مستر خالد مش لايقه ع الوضع الي انتم فيه

زينب: وانا بسألك عرفت مكاني منين ياتري بتراقبني ولا حاجز اوضه معاها هنا( حطت ايدها ع وشه) بس ياتري دفعتلك المره دي كام مليون تاني

اسامه مسك ايدها بغضب:انتي مش في وعيك

زينب: لاء انا في كامل وعي وطلبت من خالد يعمل معايا علاقه بس هو مش هيدفعلي مليون تخيل بس حبيبتك القديمه بتحبك كتير وانت عارف ده كويس يله روحلها لو عايز انا موافقه

اسامه بصلها من فوق لتحت بحتقار وسابها ومشي خالد طلع يجري وراه قابل المساعده داخله طلب منها تهتم بزينب

خالد طلع ومسك دراعه:اسامه ميصحش تمشي بالشكل ده وتسيب مراتك ده هيأذيها اكتر

اسامه: واو انت فعلا مستمع كويس للغير واظن قلت لك اقفل بؤك

خالد: تمام هقفله واطلع من المشكله دي خالص بس اتكلموا مع بعض وقدملها تفسير ومبرر او الي تشوفه صح

اسامه : هو انت متعرفش تسكت انت اخر واحد ممكن يتكلم لانك خدعتنا وكنت عارف ان مستر مايكل مش هو الي كنا هنتقابل معاه ونتفق ع بيع الفندق

خالد مثل الاندهاش: ايه

اسامه : خد ده الكارت مكتوب فيه الرقم الحقيقي تتصل بيه وده رد ع الخدمه الي قدمتهالي قبل سابق

استوب ومنتظره رايكم وياتري اسامه هيعمل ايه في زينب ومؤمن لما يعرف

اسامه هيرجع لبسمله ولا حكايتهم انتهت ع كده