ميار…..اول سبب الرجعتي الادم محمود واسلوبه الجاف وياي اني بقيت وحيده من بعد اهلي
محتاجه اهتمام من نوع خاص
بقيت بيتهم سنه ونص قبل لا نزوج وهو عرفني كلش زين اني بطلت هاي السوالف بس بقى يشك بيه ويعاملني
برود لو بس محسسني بحنانه جان عفت كلشي علموده
ادم كدر يستغل نقطة ضعفي عرف منيين يدخل عليه
خصوصا واني كتله اني علاقتي موزينه بزوجي وكوه مستحملته هذا الزواج انفرض عليه
بدا ادم يستغل هذا الموضوع احسن استغلال
……..كل يوم صباح خير
……….مساء الحب
……..العيون الحلوه كاعده لو نايمه
…..اليوم شفت ثوب يخبل وتخيلت انتي لابسته
البارحه حلمت بيج بيت ابيض عالي واني وانتي ساكنين بي
….اليوم ما سمعت صوتج غردي بداعتي اذا مااسمع صوتج مانام
….الله عليج هذا الحب من الله لو شي ثاني
ولج مااكدر اتخيل حياتي من دونج
….هذا زوجج شكدغبي اكو واحد عنده هيج دره وموزين وياها تعاي اخليج بكلبي واقفله عليج جمانه السعيدي
هذا الكلام جان يخليني طايره من السعاده
خصوصا وهو مجاي يطلب مني اي شي بلعكس كان يسئلني اذا كنت محتاجه شي
اويكدر يساعدني بااي شي
وجود ابني بلغرفه خلا محمود يعوف الغرفه نهائيا
وينام ليل نهار جوه حتى يخلص من الهوسه
تعرفون الطفل الزغير هواي يبجي
محمود كام مايصعد فوك بس علمود يبدل وينزل كبل
حتى نسى التليفون وبطل يفتش تليفوني
اما بيت عمي طايرين باابني يتعاركون منو يشبله
منو يلعب علي حمواتي وخالتي حتى يغسلن ويبدلن حفاض اله اني بس بليل اخذه والضهر ينام يمي
رجوع ادم الحياتي خلاني مرتاحه نفسيا
الدعم النفسي والعاطفي الي جاي يقدمه اليه خلاني انتقل
المرحله جديده
حتى خالتي لا حظت هذا الشي
كنت كل الوقت ضايجه ومغندبه بس هسه كله صافنه واضحك وعندي واهس
خالتي فرحانه بهذا التغيير تعتقد اني اجاوزت كلشي وعايشه طبيعي
ادم يدزلي اغاني كلها حب واشعار وكلام رومانسي
لمن خلاني بس افكر بي كل الوقت
وبديت فعلا احاول اتخلص من محمود حتى اكون وياا
بمكان واحد
قبل اضوج من محمود يحجي عليه لو يغلط لو يسمعني كلام جارح
بس هسه اصلا مااعرف هو ووين
اغسل ملابسه واكويهن خالتي تحضرله الاكل
مااشوفه اله يصعد يغير ملابسه فوك لو وقت الاكل
حتى الكلام بينا قل كلش
محمود متوقع اني ملتهيه وياا ابني ومشغوله عنه
لذالك ما يدقق وياي
مر شهرين على رجعت ادم الحياتي
صار عمر ابني شهرين و١٢ يوم صار حلو ويناغي
بليل دزلي ادم رساله
ادم….شلون راح نبقى هيج
ميار…شسوي
ادم…انتي مجاي تحسين بيه احبج يابنت الناس احبج
مجاي اكدر اشتغل و اكعد ولا انام وانتي بعيده عني
مستعد الاي شي اطلبي مني بس وافقي وتعاي نعيش سوا
ميار.. عندك حل
ادم….اطلبي الطلاك قابل هذا الشي صعب عليج
ميار.. اي صعب مو من جهت محمود لا من جهت بيت عمي
ادم…لا اني زعلت انتي حاسبه حساب بيت عمج واني
ما حاسبه حساب زعلي
اذا ما ترديني كولي واني اطلع من حياتج بس تبقى
خطيتي بركبتج لان اني احبج
ميار…شلون مااريدك اني ماحبيت واحد غيرك
فعلا موضوع طلاكي كان شاغل بالي وافكر انفصل من محمود حتى نزوج اني وادم
اني ماأحب محمود ليش اضيع عمري ويااا
هو العمر يزود لو ينقص اني اريد اعيش وياا ادم
بعد مااكدر اتحمل فراك ادم اكثر جمانه السعيدي
كافي الايام الي ضاعت من عمري واني بعيده عنه
بعدها بيومين اتصل عليه ادم
ادم.. اني راح اروح الاربيل لكيت شغل هناك اريد اشتغل واكون نفسي من جديد
ولا تنسين انتي اطلبيني الفلوس الي تقرضتهن منج قبل
اني مانسيتهن
راح اشتغل ليل نهار وارجعلج فلوسج
ميار….يمعود ياا فلوس اني اصلا نسيتهن ولو عندي بعد فلوس مراح ابخل عليك بيهن
فدوه الك كل الفلوس
انتي عندي اغلى من كل الدنيا ومابيها
ادم…راح ابقى على تواصل وياج
هاي كانت خطة ادم الجديده حتى يغويني اعوف كلشي وامشي ورا
طبعا هو اصلا موجود بااربيل لا راح يسافر ولا شي
دزلي صورته من شقته هناك
ادم…شوفي حبيبي اجرت هاي الشقه حتى نسكن اني وياج بيها بشرفي اله اعيش اميره
تكعدين واني اخدمج واعوضج كلشي راح منج
على فكره انتي انخلقتي علمودي مو علمود اي واحد غيري
بعدين دزلي مناضر من اربيل
دزلي صورت فستان وحلف اذا اجيت الاربيل يشتري إليه
دزلي صوره من محل ملابس جاهزه وكال اني هنا اشتغل
هذا مكان عملي
كان بحجيلي تفاصيل يومه وكلشي يمر بي يخلص النهار كله يحجي وياي ويسمعني كلام غزل
صورلي الحياة هناك جنه
كمت انام واكعد احلم اني وياا عايشه هناك
كرهت حياتي هاي
افكر شلون راح اطلب الطلاك واخلص من محمود
اريد اسافر ورا ادم واعيش وياا هناك
اني استاهل حياة احسن من هاي الحياة الي اني عايشه بيها
قررت اطلب الطلاك من محمود واخلص منه
بيوم الي قررت بي اطلب الطلاك اجانا خبر عمي متعرض الحادث وناقلي للمستشفى
البيت انهز كله على هذا الخبر
عمي طيب وحنيين اني اكثر وحده كنت خايفه افقده
صح اني اريد اطلب الطلاك من محمود
بس الشي الوحيد الي كنت خايفه منه ردت فعل عمي اذا سمع اني طالبه الطلاك
شلون راح اواجها وشراح اكله وهو كل عمره واكف وياي وساندني
كلنا رحنا للمستشفى واكفين وكفه اني اكثر وحده كنت ادعي عمي يكوم بلسلامه
هو سندي من بعد رب العالمين بهاي الحياة ماعندي غيره
ضلوعه كلهن مكسرات وداخلات على الرئه
ما يتنفس حتى بجهاز التنفس بصعوبه يتنفس
بقا يومين بالمستشفى ومات
موته اكثر خبر دمرني من بعد وفاة اهلي
انهاريت بلعياط اذكر شلون اخذني البيته وشلون جان يعاملني احسن معامله
ماقصر وياي ابد
يومين ادم يتصل ويدز رسايل ومااجاوبه
مااكدر احجي حتى ابني صارت بي خوفه بسبب العياط
من بعدها دزيت رساله الادم وقفلت التليفون
اخاف يشكون بيه كتبتله
ميار…عمي مات وملتهين اني من افرغ اتصل عليك
ادم…اسف البقيه بحياتج
محمود صار عصبي نار من بعد وفاة عمي
حجيه كله عياط كلشي ماعاجبه اذا يطلب جاي ويتأخر علي يكلب الاستكاين والقوري
اذا دور شي من ملابسه ومااكا يكسر الكنتور تكسير
الولد تخبل علينا
مثل صارت بي حاله نفسيه لان الصبح اتريك وياا عمي
بس وصل للدوام اتصلو علي كالو صار حادث
مثل الي متفاجئ موت عمي ومايكدر يصدك ابو مات وبعد مايشوفه
يطلع عصبيته بهاي السوالف
اني حسيت هاي احسن فرصه اروح اعيش بيت اهلي واطلب الطلاك
من بعد ما طلعت أربعين عمي راحو كلهم للنجف اني مارحت وياهم لان ابني بعده زغير
رجعو تعبانين ونامو من المغرب من كد التعب
بليل حضرت ملابسي وملابس ابني وأخذت ذهبي
وكلشي احتاجه
كعدت الفجر خالتي صلت ورجعت نامت
نزلت على كيف وطلعت برا اجرت سياره كوه حصلت سياره جبته للباب كتله طفي السياره لا أحد يعرف اني طلعت بين ماانزل غراضي
ابني نايم فوك
نزلت الغراض والجنط خليتهن بلسياره
وصعدت جبت ابني وصعدت بلتكسي ورحت بيت ابوي
اول مادخلت البيت متروك وكله تراب
نضفت غرفتي قبل ورتبتها وخليت ببها ابني
وبديت انضف بلبيت شويه شويه
من يبجي ابني اروح اخلي بحضني ومن يسكت انضف
الساعه بلعشره اجاني اتصال من خالتي
ميار..هلو خاله
خالتي…وين انتي اليوم ماشفت حسوني
ميار…اني ببت ابوي
خالتي..بيت ابوج ليش
ميار….اريد اطلك اني ومحمود مانكدر نكمل سوا هو ماكدر يحبني واني مااكدر اتحمل بعد
خالتي..الله يستر ليش يمه تكولين هيج اني مااكدر مااشوف حسوني اذا ما شفته اموت
ميار.. واني اذا بقيت على هذا الوضع اموت اني بعد مااكدر اتحمل محمود مثل ما دخلنا بالمعروف نطلع بالمعروف
خالتي…ارجعي يمه للبيت قبل لا يرجع زوجج
ميار.. ماارجع خلي يطلكني احسن
خالتي.. الخاطري
ميار….خاطرج غالي عليه بس اني بعد ماارجع
خالتي…العصر اني اجي وراج
ميار….ماارجع اني اريد اطلك
الساعه ١١ اخذت ابني ورحت جبت مسواك
رجعت حضرت الغده وتغديت سبحت ابني ونومته
وكملت تنضيف البيت
للعصر اجت خالتي وراي اول ما دخلت حضنت حسوني وباسته
خالتي….هااا شني ليش زعلانه
ميار…من يوم ازوجنا اني ومحمود وهو شايف نفسه عليه
لا حب ولا حنيه ولا اهتمام
قبل عمي واكف بعيني وساكته هسه بعد مااكدر اتحمل
كافي تعبت ليش انتحر مثل امي وتبقى خطيتي بركبته خل يطلكني وكل واحد يشوف حياته جمانه السعيدي
خالتي…شلون تعيشين انتي وحسون منويصرف عليج
شلون ادبرين حالج
ميار….اشتغل واعيش لا تخافين عليه
خالتي…واذا اني اضمنه اللج بعد ما يتعامل وياج هيج
ويغير اسلوبه وياج
ميار…ماارجع بعد لو يقسم على القراءن يتعدل وياي
ماارجع اله اني اصلا ماكدرت احبه
ولا راح احبه طول عمري خل يطلكني احسن اليه واله
خالتي …الله بهديج يمه ويصلح حالج بس فكري باابنج
اذا انفصلتو راح يعيش يتيم طول عمره
التعليقات