ميار….بس طلعو خالتي ومحمود من البيت كمت ابجي
ابجي على ابني مهما يكون مااكدر استغني عنه
فحطت من البجي ردت احد يطمني احد يواسيني
ياخذ من خاطري
جبت التليفون واتصلت على ادم
اول مافتح الخط انفجرت بلبجي
ادم…هااا الله يستر شكو ليش تبجين منو وياج محمود ضربج شكووو اسكتي خل افهم
ميار…اهيييي ابني محمود اخذ ابني
ادم…بس هاي شنو يعني ترا ابو ماخذه قابل يبيعه لو يعذبه بلعكس هسه يدللونه دلال راح يكسر خاطرهم
لان امه بعبده عنه وراح يعيش ملك
بس طمنيني اطلكتي
ميار…اهييي اي اطلكت
ادم….اي تمام هيج بعد اطلكي بلمحكمه حتى نزوج اني وياج رسمي حبيبتي كل دمعه نزلت من عيونج الحلوات
راح اعوصج عنها حب وسعاده وفرح
واخيرا اني وياج راح نتجمع بمكان واحد
اني ما مصدك راح تصيرين اليه يابعد روحي انتي
ميار….مجاي اكدر اتخيل افارك ابني
ادم…اسكتي حبيبتي ترا هسه ااجر سياره واجي اني ماتحمل اسمعج تبجين
ميار…شلون راح انام اليله ماادري شلون انام وابني مو بحضني جمانه السعيدي
ادم….اخذي حبايه منوم واني راح ابقى ا وياج
عندي خدمه راح ابقى احجي وياج منا لمن تنامين
ميار…بقى ادم يسولف عليه ماسد الخط ابد اخذت حبايه منوم بقينا للساعه ٣ وهو يحجي وياي منا لمن نعست ونمت بدون مااقفل الخط
كعدت الصبح الساعه عشره ونص ادم كعدني
ادم…صبآح الخير حبيبي هاي رابع مره اتصل عليج
الضاهر الحبايه قويه
ميار…راسي يوجعني من البجي
ادم…اكعدي وصحصحي لازم ترحين للمحكمه ترفعين قضية طلاك
ميار…راسي يوجعني وعيوني مورمه من البجي
ادم…. ادخلي للحمام اسبحي واشربي كهوه وجاي حتى اصحصحين واني وياج يله كومي حبيبي شوفي اني شلون متحمس وانت لا
ميار…اي هسه راح اكوم
ميار دخلت للحمام سبحت وطلعت مالي واهس اكل
شربت كهوه وبدلت وطلعت اخذت تكسي وطلعت كبل للمحكمه رفعت قضيه طلاك
انطيت فلوس للمحضر حتى يوصل البلاغ المحمود بسرعه
اني مجاي اكدر اكعد بلبيت وحدي
بنفس اليوم وصل البلاغ المحمود ثاني يوم حضرنا ثنيبنه
القاضي كال احولكم الباحث الاجتماعي يشوف شنو اسباب الخلاف بلكت يصير صلح
محمود…ماكو داعي احنا اصلا انفصلنا يم الشيخ وهاي ورقة الطلاك ممكن تعجلون بلطلاق
القاضي…بابا انتي موافقه
ميار.. اي موافقه
القاضي..اخذتي حقوقج
ميار…اتنازلت عنهن كلشي مااريد
القاضي….ليش بابا ما تاخذون وقت تفكرون ايجوز يصير صلح
محمود…احنا متفقين على الطلاك ممكن تكمل الاجرائات
القاضي..تمام انتضرو برا
ميار… طلعنا كعدنا برا بلاستراحه تقريبا نص ساعه
ونادو علينا اني ويااا وقعنا قرار الطلاك وكل واحد اخذ نسخه وطلع من المحكمه جمانه السعيدي
بس طلعت من المحكمه اتصلت على ادم
ادم…هاا حبيبي كلشي تمام
ميار.. اي قرار الطلاك باايدي
ادم…تمام يله جيبي ملابسج واصعدي الاربيل واني راح اكون منتضرج هناك
ميار.. اي حبيبي
جان سمعت صوت محمود من وراي
محمود…هذا حبيبج الي عفتي ابنج علموده
ميار…ضميت التليفون ودرت وجهي ومشيت
محمود….روحي خلي يفيدج ضيعتي حياتج علموده جنت شاك اكو واحد نذل بلموضوع وهسه اتاكدت
انتي مومال بيت وعائله انتي وحده دايحه مال ملاهي
وكل شويه وياا واحد الحمد لله خلصت منج
ميار…محمود مستمر يحجي عليه وصلت للتكسي وصعدت وهو بعده يحجي ويغلط صعدت ورجعت للبيت
جمعت ملابسي والشغلات الضروريه قفلت البيت
وطلعت اجرت تكسي كبل للكراج
صعدت الاربيل خلاص اني راح ابدي حياة جديده
لازم انسى الماضي وابدي من جديد
طول الطريق ادم يتصل عليه حتى يطمن وين وصلت
الطريق طويل كلش يمكن ست ساعات منا لمن وصلت تعبانه كلش
بس نزلت لكيت ادم منتضرني شافني والابتسامه ترست الوجه
ادم…الحمد لله على السلامه
ميار..الله يسلمك
ادم…واخيرا انجمعنا بعد كل هذا الوقت
ميار…الحمد لله
ادم…يستاهل الحمد لان انطاني هيج نعمه يله تعاي
شأل الجنط اجر تكسي وطلعنا للشقه مالته
الشقه بلطابق الثاني صعدنا لكيته محضر الاكل أشكال واللوان ومشتريلي ملابس كلش حلوات
وعطور تخبل كعدنا ناكل اني وياا
ادم…باجر من الصبح نعقد
ميار…يصير نعقد لان اني صار يومين من اطلكت
ادم.. اي يصير
ميار….والعده
ادم…انتي مو تكولين صار فتره محمود مايقرب عليه
ينام بمكان واني بمكان خلاص يعني هاجر الفراش وهذا الشي كافي تزوجين بدون ماتكعدين عده
خلي كلشي عليه تمام
ميار….على فكره من استلمت ورقة طلاكي سمعني احجي وياك وكام يحجي ويغلط عليه كدام الناس
ادم…خلي يضرب راسه بلحايط بعد ماله اي سلطه عليج
خلي يحجي خسر جوهره ما تتعوض
ميار…همزين خلصت منه ماكاسر ضهري غير ابني
ادم…عوفي هذا الحجي هسه كومي اسبحي وادخلي نامي وارتاحي وباجر نبدي حياة جديده اني وياج
انتي من اليله انولدتي يله كومي
ميار …. سبحت غيرت ملابسي ودخلت بلغرفه نمت
احس نفسي حيل تعبانه من الطريق وقبل ليله مانايمه زين
الصبح فتحت عيوني على ادم
ادم…صبآح الخير حبيبي هذا احلا صباح شافته عيوني
ميار…صباح الخير بيش الساعه
ادم..بلعشره وثلث يله حضرت الريوك وحجزت بلمكتب
حتى نروح نعقد اليوم اني عريس
واخيرا راح ازوج حبيبتي واعيش وياها طول العمر
اني اول مره راح اكون عريس بحياتي
ميار…كام يركص بلغرفه ويهوس ( اريد اليوم اودع العزوبيه)
ميار…كمت من مكاني حضني وباسني اتريكنا وبدلت وطلعنا للمكتب عقدنا
اني جايبه كل اوارقي وياي
بعد العقد رحنا اني وادم نفتر شكو منطقه حلوه
رحنا بيها رحنا للمطعم اكلنا وما رجعنا اله بليل
عشت ليله احلى من كل عمري الي راح
شوفو عمري كله الي فات شي وهاي اليله شي
حسيت نفسي اختلف
انسانه مميزه فعلا ادم يعاملني مثل الاميره
شهر كامل احنا طلعات وونسات ومصرف
فعلا شهر عسل واحلى من العسل ياربي اني ووين جنت وهسه ووين
همزين خلصت من محمود
يعني هذا زواج وزواجي من محمود زواج
لا مستحيل اني فعلا انولدت من جديد
نسيت كلشي بلماضي ومااريد اذكر اي شي اريد هاي الايام ما تخلص جمانه السعيدي
معقوله هي هاي اني ادم شايلني من الكاع شيل
حاير شلون يعاملني وشلون يداريني كل يوم طلعات وونسات ولعب ضحك
ادم…حبيبي مرتاحه
ميار…الله يحفظك اليه انت احلى شي صار وياي بحياتي
ادم….انتي وياي مراح تندمين طول العمر اموت عليج
بعد ماخلص شهر العسل اجاني ادم ضايج
ميار…شكووو
ادم…ماكو شي
ميار…شلون ماكو شي انت ضايج
ادم…عفت الشغل تعاركت وياهم يعني عايفين كل الشغل عليه مايصير هيج
ميار…ميخالف راح تلكه شغل غيره لا اضوج
ادم…اكيد راح الكه شغل غيره
يومين يطلع ويرجع يكول ماكو شغل
اليوم الثالث كال اي لكيت شغل رجع يصرف عليه ونطلع ونأكل برا
اسبوع ورجع بطل من الشغل
هلمره كعد اسبوع بلبيت كلما يطلع يدور شغل مايلكه شي يناسبه كعد ضايج بلبيت
اجا ابو الايجار يطالب بلايجار لان اتاخرنا
ادم طلب منه مهله للشهر الجاي وينطي ايجار شهرين سوا
الرجال قبل
المشكله ابو السوبر ماركت هم يطلبنا فلوس
كل يوم يطلع ويرجع يكول مالكيت شغل
ميار…حبيبي ميخالف لا اضوج
ادم…اني ضايج علمودج اني قسمت مااخليج تحتاجين شي بس الضروف ضدي
ميار…ياعيوني انت اني مااريد بس اشوفك كدامي
ادم….انت احلى شي صار بحياتي
ميار….عادي هاك هاي الكلاده الذهب مالتي بيعه وخل ندفع الايجار والطلب منا لمن تلكه شغل
ادم…اني ما انطيتج مهر ولا جبتلج ذهب وهسه اخذ ذهبج
ميار…ميخالف اني وياك واحد ماكو فرق
هسه تشتغل وتعوضني
ادم….حبيبتي انتي السند الحقيقي بحياتي
ميار…الله يحفظك اليه
ادم…. ويحفظج
ميار…مجاي تحجيلي عن اهلك
ادم… عادي جاي اتصل اطمن عليهم أمورهم زينه
ميار…اتصلت مرتين خلال هاي الفتره على خالتي ماترد عليه
اكيد زعلانه عليه جمانه السعيدي
اني ماايرد منه شي بس اطمن على حسوني
اتصلت على حماتي الزغيره
اول مره ماردت عليه
ثاني مره ردت اكو صوت هوسه يمها ردت بدون ماتشوف الاسم
ميار…هلو ليلي شلونج
ليلى…هلو منو
ميار.. اني ميار
ليلى مجاي اسمع اليوم عدنا مهر اخوي محمود ومجاي اسمع من الصوت شويه وارجعي اتصلي عليه
ميار…هاا محمود جاي يعقد الله وياج
رجعت بعد يومين اتصلت عليها اربع مرات ماترد عليه
ميار…هلو ليلى ليش ماتردين
ليلى…الصراحه اهلي ما يقبلون احجي وياج
ميار…فدوه اريد اطمن على حسوني
ليلى…زين حسوني امي كل النهار شايلته تخاف علي من الهوى الطاير
ميار…ديري بالج علي خاف محمود يزوج وزوجته اتاذي
ليلى….زوجته شرطت مالها شغل بي ولا يعيش وياها
امي تكول اني اربي ماانطي الها
ميار…زوجته منيين
ليلى….موضفه وياا بلدائره وشرطت بيت وحدها ماتعيش ويانه محمود يريد يااجر بيت يزوج هو وياها
ميار…تمام فدوه عينج على حسون حبيبتي
ليلى…ميخالف
ميار…كلت اذا انت هيج زين ليش جنت تعاملني اسوء معامله ايجوز عنده علاقه بهاي الموضفه لان شبسرعه عقد
لا ويريد يعوف ابنه يم خالتي علمودها بيتها وحدها
ولله وكت اغبر يله اني شنو علاقتي بي
اني مرتاحه وياا ودم خلي محمود يزوج انشاء الله
مايرتاح بحياته
السابع عشر من هنا
التعليقات