رواية يتيمة المشاعر الفصل الحادي عشر 11 بقلم الكاتبة نور ال زيادة

نورزان: توترت ليش مااعرف.؟ اسلوب عمو رافي بالكلام كان يدل هو متفاجىء وغاضب والواضح ماكان يعرف احمد طلبني للزواج نضراته متركزه عليه وعلى احمد منتضر جواب

احمد: اي صح قبل فتره تقدمت ألها، والضاهر ماجانت مقتنعه، واني عفتها على راحتها كلت فتره وأرجع اطلبها من جديد…، واحاول اقنعها بوجهة نضري وبطلبي لأن اني شاريها، لبنت خالتي ومتمسك بيها واحق واحد بيها

رافي: اي شكو بيها وأتقدمت وطلبتها وافتهمت

هل شي بس ألي مافهمته شلون يعني احق واحد بيها؟

احمد: احنا تربينا سوا ودم واحد واهل يعني اني افرض من الغريب، ألي متعرفه

نورزان: احمد رجائا اول شي مو وقت هل الكلام

وثاني شي، كان بوقتها جوابي واضح وماكو داعي نعيد ونزيد انته كلتها تربينا سوا يعني مثل الاخوان

لهذا ماوافقت ولاراح اوافق ان شاء الله تلكي الانسانه ألي تستاهلها وتستاهلك

احمد: الله كريم بعدين نحجي بهل الموضوع

لأن فعلا الضاهر مو وقته

نورزان: حجه هل الكلام وعافنا وراح…

بس عمو حسيته ضايج وباله سارح، ورا ثواني

تقرب بصفي وهمس

رافي: اكلج نورزان هذا شوكت خطبج،اني هسه سمعت ماچنت ادري؟

نورزان: من سوينه عزيمة تخرج زيد، بنفس اليوم

خالتي فتحت الموضوع ويا اهلي عمه والبنات كانن موجودات وسمعن وكل ضني كالو وانت تدري بالموضوع .

رافي: لا ماكو احد كال،،،، عالعموم على كولتج رفضتي وأنسد الموضوع واكيد حتى مره ثانيه من يتقدم هم ترفضي موو؟

نورزان: اكيد،،، كلامي واضح بهل الموضوع، ومااغيره

اني كلت هل كلام انرسمت ابتسامه عريضه على شفته

رافي:هو هذا الصح خلصي دراسه

نورزان: عافني وراح …

كملنا الحفله ورجعنا لبيتنا، ثاني يوم قرروا ميسون حفله بقاعه وهوسه بطلب من العرسان مباشرتا نزفهم للفندق

حضرنا نفسنا ورحنا انطلقت الزفه لبيت العروس

وأخذناها وافترينا بشوارع بغداد وعلى الجادريه نزلنا رغم بساطة العرس لكن كان، الكل فرحان، زفينه العرسان، وكلمن رجع لبيته

بعد ايام بالكليه، خلصت المحاضره،جعت قررت اروح اجيب اكل طلعت تفاجئت من شفت احمد، جاي بأتجاهي

احمد: هلو نورزان شلونج؟

نورزان: الحمد الله، ها اليوم يمنا بالكليه؟

احمد: اجيت اشوفج واحجي وياج، وياريت لو نكعد بمكان ونسولف

نورزان: بس اني عندي بعد شويه محاضره مااكدر

تريد تعال للبيت واحجي ألي عندك

احمد: ترا اني جاي احجي وياج وانتي بنت خالتي

موغريبه، ماكو داعي لهل تصرفات، هنه كلمتين وخلص مااخذ من وقتج

نورزان: قررت اسمعله، واشوف شنو يريد ولو اني اعرف بس يمكن احسن خلي اخلي النقاط على الحروف احسن ميروح لأهلي ويرجعون يضغطون عليه واحتمال يكدر يقنعهم

احمد: خلي اروح اجيب شي نشربه ونسولف

نورزان: ماكو داعي شكرا خلي ندخل بالموضوع لأن بعد شويه عندي محاضره

احمد: تمام،، نورزان، انتي من زمان عاجبتني

من جنا صغار…واني جنت اكول من اكبر اتزوج نورزان جنت منتضرج شوكت تكبرين، وتصيرين ألي ومن طلبتج ورفضتي انقهرت كلش …خصوصا انو سبب الرفض مو مقنع.

نورزان: يعني من اشوفك اخويه مثل زيد

هذا بنضرك سبب مو مقنع؟

احمد: زين انطيني فرصه نكعد نتقرب ونتعرف على بعضنا اكثر يجوز تتغير نضرتج ألي وتقتنعين

نورزان: شوف احمد انت ابن خالتي وربينا سوا

واخ عزيز، لااكثر،….ولاممكن اي شي يخلي نضرتي

تتغير اتجاهك واشوف بيك زوج الي….كل شي قسمه ونصيب وأحنا نصيبنا مو سوه فياريت تفهمني لأن ماراح اغير قراري

احمد: هذا اخر كلام؟

احمد: خلص الله يوفقج

نورزان: ويوفقك ويسعدك ان شاء الله اني مااريد اخسرك…، احنا تربينا سوا، وانت عزيز عليه

احمد: هاي هيه تمام، مثل متحبين يله اني اترخص

نورزان:(بابتسامه) الله وياك ابن خالتي

فرحت انو تفهم كلامي، لأن مااريد مشاكل

ويرجع احد يضغط عليه احمد ميفيدني يريدني ومنتضرني من الصغر ويوميه وياوحده…

، نفضت افكاري وكمت بس من بعيد لمحت امير يباوع عليه لكن هل مره نضرته مختلفه كانت مليانه حقد هز راسه متوعد ألي صراحه خفت منه

رجعت كملت باقي الدوام، لكن قبل لا ينتهي اتصل بيه سيف

سيف: نورزان السياره عطلت راح اجيب سياره اسحبهاوأنتي انتضري راح يجي رافي عليج

نورزان: ياا ليش خابرته؟ زين ليش كلت لعمو كان رجعت ويا وحده من البنات .

سيف: لايمعوده يابنات اهلج مأمنيج يمي

اخليج تروحين ويا البنات شنو…واصلا رافي هم ميرضه لهذا اول ماكتله كلي جاي هسه شويه ويجي انتضري

نورزان: تمام الله وياك

ضليت انتضر والطلاب بدوا يطلعون، ضليت شويه وقررت اطلع انتضر برا

كنت امشي مااحس ألا شخص لزم ايدي بقوه وصار يسحب بيه اخذني على مكان منعزل دفعته وقاومت عطت بي

_وخرررر عني ،،،،شتريد مني شنو هل الجرئه والسخافه

امير: سخافه مو ؟لو هو من يمي اني وشباب الكليه؛ تبيعين شرف؛ وشباب البرا يجون وتكعدين وتسولفين وتضحكين والله واعلم شنو بعد

نورزان: اكل خ***ه انته منو وتحاسبني لتجاوز حدودك مو انته وامثالك يقيمون اخلاقي وشرفي.انته منو تحدد ويا منو اكعد واحجي، الف مره حذرتك .

امير: اني منو بنت كل**ب اني تاج راسج …

هسه اشوفج اني منو، الضاهر هوايه احترمتج..

عبالي محترمه بس امثالج ميجن ألا بالعين الحمره

نورزان: جرني بمكان مابي أحد، وسد حلگي واني الرعب دخل گلبي، وعقل ماضل براسي، صارت افكار تودي وتجيب براسي وعقلي يرسم سيناريوهات

دفعني وضل يقرب وجه مني صرت احس نفسه برگبتي بعدها صار يحضن ويتلمس بجسمي اني هنا متت خوف صرت ادفع بي بقوه وأقاوم وهو يزيد بحركاته المقززه اكثر

ضليت بين ألي جاي اعيشه وبين انو تصير معجزه

ويجي شخص يساعدني ضليت اردد( يا الله ساعدني لتعوفني )

قويت نفسي اكثر واكثر دفعت أيده من حلگي صرت اصرخ بأعلى صوت متأمله احد يسمعني

رجع يسد حلگي واني اعظ بأيده

صرت مكافش أني ويا، صار يغلط عليه ويحجي

بطريقه وكلام مقزز.

اخر شي حسيت وضعه مو طبيعي ونفسه عله

تقرب من اذني همس خ*ه بعرضج شگد حلوه، بنت كب،،، اريدج وراح تصيرين ألي

اني سمعت هل الكلام تخبلت عرفت غايته

صرت اضرب وأعيط وحرت شنو سويت…

ومن بين كل هل الشي وفجئه بلمح البصر امير أنسحب مني ماشفت منو هل شخص نام عليه، ركزت بي طلع عمو فرحت وحسيت بالأمان صار يضرب بي بحرگة گلب دمره دمار ماخله لاضرب لافشار عليه شوه معالم وجه

اني واكفه اتفرج وارجف وعيوني كلها دموع عمو فقد عليه گلت راح يموت بيده خفت بس بنفس الوقت گلت يستاهل طبه مرض خلي يربي بس يافرحه ماتمت اجوي واحد من حماية امير رفع سلاحه على عمو

أنفزعت ضليت اعيط واتوسل…

_عمو الله يخليك عوفه كوم خلص خلي نروح

رافي: عوفيني خلي اربي هذا الساقط حتى يتوب يندگ بأعراض الناس

نورزان: بحيلي اليرجف وخوفي، ضليت اجر بي واسحبه حتى يعوف امير

وكف على حيله وألتاف عليه وبحركه سريعه

لفني بحضنه واني ماصدگت انهاريت بالبجي

ضل يمسح على ضهري ويهدئني

رافي: عمري انتي،،، بنيتي ، لتخافين هاي هيه خلصت

نورزان: بهل اثناء أجه حماية امير كومه من الارض

وهو حالته حاله الخشم كله دم والوجه ملعوب بي لعب

وهو عاد هنا صار ارنولد ، استقوى بحمايته ضل يغلط ويهدد، ويتهنتر علينه جاوبه عمي بأستهزاء….

رافي: خلصت كلامك يله ولي منا، ويكون بعلمك ماخلص حسابك…راح اخليك اتوب طول عمرك بعد توصل يمها او حتى يم غيرها

امير: ليش متعرف اني منو وأبن منو بابا روح بلط

الشط

رافي: لا انته ولاابوك تهموني ولاتخوفون چلبي …

اصلا انت لو رجال مو تستفرد ببنيه غصب عنها

وفوكاها كل ماحجيت تستقوي بأبوك هي بنيه كم مره ردنا ندخل كالتلنا اني احل اموري لأن موعاجزه ولا جبانه …وماناقصني شي حتى ادافع عن نفسي لأن سبعه ومتخاف ، وانته كل حجايه وجبت اسم ابوك بالنص لأن انت لاشيءبدونه واحد نكره

صار بارود من سمع هل كلام جاوبه بغضب

امير: أني رجال وغصبن عليك وعلى الخلفوك

وهسه اشوفك منو اني

نورزان: هو فعلا شخص جبان بس راد يثبت عكس كلام عمو وألي ماحسبنه حسابه يطلع متهور لهل درجه وميحسب حساب شي ألتاف على الحمايه ألي ويا سحب المسدس من أيده وسحب اقسام ووجها علينه

حسيت بوقتها گلبي راح يطلع من مكانه ورجلي ماعادت تشيلني وكملها عمو من كال….

رافي: يعني صار ساعه ألقي محاضره بالرجوله وهذا ألي افتهمته منها ؟بدال متاخذ حقك بيدك تجر سلاح ولو شنو اترجى من واحد جبان وبلا شرف مثلك

امير: رجال وغصبن عنك وهسه اشوفك الرجوله شلونها،،، وشلون تندك بيه

نورزان: نطق هل كلام وبلمح البصر صدى بالمكان صوت طلقه حسيتها زرفت اذني صرخت مفزوعه و بحركه لااراديه سديت عيوني و خليت ايديه ثنينهن، على اذني!!!!

صار هدوء بالمكان فتحت عيني ببطىء وياريت مافتحتها صار الخفت منه عمو رافي رجله متشيله نزل على الارض وكع صرخت بأعلى صوتي نزلت عليه واني متهستره، ادور بي حتى اعرف شنو ألي صار او وين صارت الرصاصه…شفته متألم ولازم بطنه ألي بدى يغطيها الدم

باوع بوجهي وشاف خوفي ودموعي حاول يطمني

رافي: نورزان لتخافين، اهدأي، مابيه شي

نورزان:تخبلت صرت ابجي واشهك ،،، يامابيك شي، شوف الدم ،،شلون مابيك شي

رفعت راسي شفت امير حمايته يسحب بي حتى

يهزمه واني صرت اعيط عليهم واغلط ..همه ولا عبروا الجبناء طلعو بسرعه …

بهل الأثناء اجه صديق سيف يركض ومن بعيد على صوت الطلقه اشوف الأمن مال جامعه

واني حيلي أنهد واضغط على مكان الرصاصه حتى شويه اسيطر على الدم واسمع رافي يحجي وهو يضغط على جرحه وعلى ألمه

رافي: نورزان،، حسن،، ثنينكم اسمعوني، ألي صار مااريد احد يدري بي

نورزان: انت شتحجي هو لعب جهال ألي صار

وليش تتستر على امير

رافي: طز بي،،، اااااخ،،،، افهم،،، شتستر افهميني لتكولون امير تحرش بيج وصار ألي صار…مااريد اسمج ينذكر بالموضوع نهائيا وتصير سوالف عليج ….افهمييييني!!! (الكلمه كالها بألم)

حسن: لعد شنسوي؟

رافي: كولو تلاسنا اني وامير لأن اني اخو سيف وبينهم مشاكل دائما و لهذا صارت عركه وكبرت او وصلت لهل المواصيل..

حسن :تمام، تمام، اتصلوا بالأسعاف راح يجون هسه مو وقت هل الكلام

رافي: اذا طلع غير هل الكلام، ثنينكم احاسبكم

نورزان: الله يخليك مو وقت هل الكلام، ولتعب نفسك، كافي لأن النزف ديزيد

اجوي الأمن واشخاص على الهوسه بدو يلتمون

واني دموعي مانشفت، واعصابي بدت تنهار

ورافي وجها بده يصير شاحب من النزف

بده يغمض ويفتح بعينه، واني اتكلم ويا حتى يبقى صاحي …

فتح عينه ألي بدت تذبل وباوع عليه

رافي: لتخافين نونو ماراح اعوفج، واذا صارت

مو تنسيني، واتذكري انتي اعز انسانه بحياتي كلها

اعز حتى من روحي وماندمان لأن حميتج

نورزان: الله يخليك لتحجي هيج قوي روحك لخاطري اذا يصير عليك شي شلون اعيش بس فهمني …انته ابويه وامي واخويه وصديقي وسندي واماني اذا رحت ألمن اعيش،

حسن: اهدئوا هاي بديت اسمع صوت الأسعاف

بس شويه تحمل وكولو يالله

نورزان:، وصلت الأسعاف، لكن عمو فقد وعيه شالوه بالأسعاف وصعدت ويا اني رجلي صارت ترجف وايدي كلها دم

حسن: روحو واني وراكم وراح اخابر سيف هم

نورزان: انطلقنا للمستشفى واني الطريق كله ابجي وادعي. كل شويه فاتح عينه ويدير وجه يباوع عليه وكأنما هو ألي يطمئن عليه مو اني..نزف هوايه كانت اصابته ببطنه

اول ما وصلنه دخلو طوارىء، وسوله الفحوصات اللازمه …حسن مافاركني ويايا شويه واجه سيف وعلامة الرعب مرسومه بوجها وقع، ودخلو عمليات، من سمعت بالعمليات توترت وخفت صارت عندي دوخه قويه اريد اوكف بعد مااسيطر مشيت حتى اشوفلي مكان اكعد بي لأن تعبت كلش كان اصعب يوم مريت بي بحياتي كل ألي عشته واللي سوا امير وخوفي بكفه…ومن شفت عمو بهل الوضع كان بكفه ثانيه …

اصعب شي بالحياة تشوف اقرب انسان ألك بهل الحاله

مشيت خطوتين ماسيطرت وكعت على وجهي غمضت عيني مستسلمه للضلام!!