رواية يتيمة المشاعر كامله وحصريه بقلم الكاتبة نور ال زيادة
رغُمً الصعاب مًآزٍلَتٌ تٌسِکْنِ جّآنِبًيَ آلَآيَسِر….
…………………………………………
ضوضاء وأصوات هورنات السيارات وسوالف، فتحت عيوني يكعدوني من النوم …
ريام: نونو كعدي..
نورزان: اباوع نسيت اني وين حتى استغربت المكان، بعدين حاولت اصحصح، …صرت افتح عيوني التعبانه والذبلانه من السهر ، صارت بوجهي اختي ..
ريام: بيج شي نورزان ؟صار ساعه احاول اصحي بيج، وانتي قافله…شنو هل النوم، نسيتي احنا بالسياره؟
نورزان: ريام عوفيني تعبانه صار ايام منايمه زين
ريام: ملاحضه هل شي ليش متنامين وحتى ذبلانه، صارحيني اني اختج …حاولي تفتحين گلبج الي…
شنو ألي ديصير وياج ؟
نورزان: مابيه شي بس تعبانه ليضل بالج
ريام: ان شاء الله، لعد اني شنو اريد اهم شي راحتج…ولو اني ادري بيج شي وٌعٌنِدٍجّ هّمً،، وهم كبير، بس ادري بكل الاحوال ماراح تحجين….
، ماكول غير الله يشيل الهم من كلبج ويسعدج ..
نورزان: اميين، اي والله محتاجه للدعاء، ادعيلي الله يفرجها عليه ..
ريام: ان شاء الله
الام ابتهال: يله بنات وصلنا،،،، ننزل ونمشي سوا موكلمن يمشي وحد وأضل حايره ادور عليجن
نورزان: نزلنا بعد وصولنا كربلاء، حتى نزور
اول مادخلنا وشفت المنضر والناس، حسيت برغبة شديده بالبكاء….
بعد سنين اجينه نزور، اذكر اخر مره اجينا للزياره كنت سعيده ومطمئنه..اما اليوم احس روحي تطلع….توقفت صرت اباوع على الناس وعلى المكان هاجمتني الذكريات ، لااراديا نزلت دموعي ماكدرت اسيطر…
،، حسيت ايد أنمدت على كتفي من جهت ضهري وبعدها أنحضنت ألتفتت شفت براء ، رجعت راسي مسحت دموعي بأيد ترجف احاول اخفي ألمي واسراري اخ لو تعرفون شنو بيه
براء: نورزان حبيبتي لتمسحين دموعج، نزليهن وارتاحي،الدموع تبرد الگلب
نورزان: ماكو شي يبرد گلبي، ولاشي يريحني بس فرج رب العالمين
براء: والنعم بالله، بس ميخالف الدموع تريح الگلب ،،،، اخذي نصيحه من صديقتج المابيها خير حتى لنفسها وطبقي نضريتي بالحياة
نورزان: اي ياحضرة الفهيمه نوريني شنو نضريتج العضيمه
براء: هههه باعي، لتمسحين دموعج امسحي ألي نزلها
نورزان: ياريت لو السالفه بهل السهوله كان ماترددت ل لحضه..
رددت ويا نفسي اه لو تدرين شنو ألي بگلبي
فزيت من صفنتي لمن اجوي الباقيين دخلنا نزور
زرت وفرغت همي وصليت ودعيت وطلعت، مسحت دموعي و اتضاهرت بالقوه، واني داخلي منهار..
رحت كعدت انتضر الباقيين يجون،،، اجتي براء كعدت يمي …
وبعدها اجت سمر هم، سمر صار فتره مبتعده عني صايره علاقتنه رسميه، بس اليوم مااعرف ليش احسها بعيونها نضرة شفقه عليه تقربت كعدت يمي
سمر: نورزان وجهج لونه اصفر، اخاف ضغطج هابط
نورزان: لا مااضن بس تعبانه، باوعتلي وبعيونها الف سؤال ؟؟؟؟
سمر: اكلج اخاف انتي حامل؟
نورزان: باوعتلها بتعجب!!، كلتلها لا، لا، موحامل مابيه شي، بس منايمه وطريق طويل فتعبت
سمر: ها لعد ان شاء الله خير
نورزان: ثواني وسمعت رنة موبايل سمر، فزت وهي متوتره، لمحة بشاشة الموباييل مكتوب (رافي) …
اني هنا جسمي كله رجف وكياني تخربط، رادت تكوم مسكت ايدها وباوعتلها بنضرة توسل
سمر الله يخليج احلفج بكل عزيز، بس خليني اسمع صوته، والله مااحجي شي اضل ساكته بس اسمع …رفضت هزت راسها بالنفي..
سمر: مااكدر ميرضى ..
نورزان: صدكيني مااخلي يعرف بوجودي ارجوج بس اسمعه والله، ماافتح حلكي …جسمي صار يرجف بس ضليت ماسكه ايدها واترجاها
هي انقهرت عليه وجاوبت على الأتصال يمي…
من سمعت صوته وهو يكول (الو) حسيت كأني ملكت الدنيا وحسيت بالامان والراحه كان صوته كفيل انو يغير كل شي بيه ..
سمر: الو
رافي: الو، هلو سموره، شلونج ؟
سمر: الحمد لله وانته؟
رافي: بخير على الله، شلونهم الاهل ؟
سمر: زينين كلهم
رافي: شنو هاي الاصوات انت وين ؟
سمر: احنا بكربلاء دنزور
رافي: مممم، الله،،، ياريت اني يمكم، والله مشتاق لهذيج ايامنا الحلوه، من سوا نروح للزياره
سمر: الله كريم حبيبي ان شاء ترجع بالسلامه ونسويلنا روحه جديده، ونعيد ايامنا..
رافي: بتنهيده، ان شاء الله، ان شاء الله، ولو ألي راح مايرجع
نورزان: رأسن سمر باوعت عليه بنضرة حزن
سمر: حبيبي رافي اخذ راحتك اني راح اروح، بعدين نتواصل، تعرف اني هسه برا وناس مااكدر احجي..
رافي: تمام عمري، روحي وسلميلي
نورزان: قبل لينتهي الاتصال كال….
رافي: سمممر
سمر….. نعم
سكت وتنهد، بعدين كمل كلامه…
رافي :تعرفين شي عن نورزان؟
تفاجأت وباوعت على سمر! ! هي هم باوعت عليه مصدومه
سمر:ها،، لا،، ليش ؟
رافي: ماادري، گلبي مامرتاح وصار ايام احلم بيها
واشوفها بالحلم تعبانه وخرابيط هوايه،،مااعرف احس بيها شي ..
نورزان: اني هنا متحملت، نزلت دموعي لاارادي
سمر: ليضل بالك زينه وهم أسال واشوف، يله حبيبي الله وياك
نورزان: حسيت كلماته دوا لجروحي معقوله يحس بيه؟
براء: يعني هو وبعيد وبغير قاره، ويحس بيج والله عمي بخت
نورزان: سكتت لأن ماعندي اي جواب، ضليت كاعده والبنات يسولفن واني احس روحي تريد تطلع، الذكريات هجمت عليه ..
راح اعرفكم عن نفسي :
اني اسمي نورزان، ترتيبي الثاني بعائلتي، عندي اخ اكبر مني اسمه زيد واخت اصغر مني اسمها ريام
اسكن ببغداد، اني من عائله مثقفه وميسورة الحال
تربيت بعائله مرتبه تتكون من ام واب و٣ابناء
هواي اشخاص يشبهوني بأمي والبعض شبهوني بعمتي ألي للان ماشايفتها لأن خارج العراق صح بي شبه من امي لكن لون عيني يختلف يكولون نفس عيون عمتي وحتى احمل طباعها
من كنت صغيره لحد ماكبرت يتغزلون بجمالي …
أي شخص يشوفني يتوقعني مو عراقيه،لأن جمالي غربي ومميز وهذا الشي صراحه خلاني انغر،
ماكنت اعرف انو الجمال على كد ماهو نعمه فهو هم نقمه ….
وبمرور الايام أتمنيت لو كنت بشعه على كد ماجمالي اذاني …
رجعت ذاكرتي لسنوات بعيده لما كنت صغيره
(العوده للماضي):
******
كنت كاعده بغرفتي ضايجه معاقبيني لأن تعاركت ويا زيد، والدي ووالدتي اهم شخص بالحياة عدهم زيد لأن الولد الوحيد وريام تصير اخر العنقود
اما اني فالأنسانه المنبوذه والمكروهه من قبل الكل لسبب راح تعرفو بعدين وبسبب هل شي تدمرت حياتي وتمنيت الموت ولا اكون انولدت بهل بيت وبوسط هل العائله ألي حقدها والماضي خلو حياتي تصير جحيم
ريام: نورزان ماما أنطتني فلوس كالت روحو اشترو انتي وزيد..
نورزان: اني انتفضت من سريري وكمت وكفت..
، كلتلها….. واني مااشتري؟
، ريام: لا لأن انتي معاقبه متطلعين من غرفتج حتى تتربين،
هجمت عليها ردت اضربها بس تذكرت اذا ضربتها اطلع اني ألي بديت والمتجاوزه عليها مو هيه، ..
ورا ثواني طلعت وأجتي وياها امي، جرتني من شعري
ام زيد: نورزان انت شوكت تتربين وتالي وياج
نورزان: ماما والله مامسويه شي،أااي،،، راسي دتأذيني
ام زيد :شلون مامسويه شلون تضربين اختج شنو هل الغيره …..ليش تأذين اخوتج احسن متغارين منهم صيري مثلهم وبطلي رعونيه..
نورزان: ماما انتو ليش تكرهوني ؟
ام زيد: انت الضاهر الحجي ميفيد بيج يجي ابوج
وهو يعلمج، كل هل الدلال والصرف واحسن لبس واحسن اكل وتكلي تكرهوني، والله الضاهر صار عندج بطر على نعمة الله…
كالت هل كلام امي و طلعت من غرفتي واني ضليت ابجي بهدوء ….
ماكو احد يفهمني عبالهم اني ابجي على فلوس لو علمود اشتري حلويات،،،،اني ابجي من التفرقه وعدم الاهتمام…..المشكله انو اني كتومه مااعبر عن ألي بداخلي ولهذا من كنت صغيره من اضوج اكعد اكل وهل شي احد اغلاطي ألي ارتكبتها بحق نفسي….
اتذكر في يوم تعاركت ويا زيد وريام، لأن لكيتهم ماكلين حلوياتي كلهن
نورزان: زيد هاي انته مو،، كول الحقيقه انت اكلت حلوياتي؟
زيد: شتريدين هسه اكلتهن، شتسوين سوي..
نورزان: انت شكد حقير وصلف وفوكاها تتباهى انو انت اخذت شي مو ألك،،
هجم عليه و ضربني واني هم خرمشته، يعني وحده بوحده
ام زيد: لج يامضروبة الجلوه، هاي شمسويه بأخوج
شكد رعنه انتي شلون هيج تسويين؟ ، روحي لغرفتج هسه ومن يجي ابوج هو يربيج
نورزان: يووووه، امشي وادردم ويا نفسي كل ماحجيت ويااحد وكلولي روحي لغرفتج ومامتربايه ومن هل الكلام …ومن يجي ابوج بالليل يربيج، هو ابويا بس بالليل نشوفه من يرجع من عمله، رحت لغرفتي واني صايره نار،،،،
يعني اذا امي ماكلفت نفسها تسمعني وتفهمني علساس ابويه راح يسمعني، اجه بابا بالليل وصاحني
ابو زيد: نورززززان …
نورزان: سمعت صوته عالي فزيت وبعدها نزلت وكلت … نعم بابا
ابو زيد: هاي شمسويه بأخوج، شلون تمدين ايدج عليه، وهو اكبر منج؟
نورزان: بابا والله هو هم ضربني، بعدني مامكمله كلامي حسيت بصفعه على خدي، حسيت نار بوجهي، ،،،كلش انقهرت، بس مابجيت، وقررت مااسكت
_بابا، زيد وريام اخذو حلوياتي واكلوهن بدون استأذان، ولهذا تعاركنا، وهو ضربني وبعدين ضربته
سكت بابا محجه شي…بس زيد تدخل
زيد: بابا شوفها صايره شسمنها، ماخذه عافيتنا، اني لمصلحتها حتى لتسمن بعد..وألا اني شسوي بيهن قابل ماشايف لو ماماكل ، قابل ابن فكر، انت مامقصر ويانا،(ونضرلي بخبث)
ابو زيد: شفتي شلون اخوتج يخافون عليج، وانت كاتلج الحقد، …
روحي شوفي نفسج شصايره خففي وزنج، صايره عبالك هايشه، ،،،باجر عكبه تكبرين منو ياخذج تبورين وتكابلينا
ام زيد: يمعود شتحجي هذا كله وهي منغره بنفسها لأن عيونها زرگ سبحان الله حتى بهاي على عمتها
نورزان:خزرها والدي وأشرلي اروح،،،، انقهرت قهره بيومها الى درجة، انتضرتهم ينامون والليل كله ساكنه المطبخ، ونايمه بالثلاجه اكل
وكأنما الشي ألي اسوي عناد بيهم مو بنفسي والاضرب من هذا كله دمعه مانزلت مني، يكومون ويكعدون يعيرون بيه، لأن عندي شويه وزن
وكأنما تشوه لو شي،عيب لو حرام …سووا عندي عقده نفسيه صرت من انقهر لو اكل لو احبس روحي بغرفتي …وهل شي علمود ماكو احد يشوف ضعفي وقهري لأن كبريائي يمنعني حتى اخلي احد يشوف دموعي،،،،
بديت اصير متمرده وعنيده، بسبب تصرفاتهم ويايا، وهمه هم ابتعدو عني، واني هم مااسمع كلام، يعني طبعا هذا اذا قرروا يعلموني او يوجهوني لان همه مو بحالي اساسا، ،،،
والله ماابالغ اذا اكول مرات هوايه اتساءل واكول اخاف اني مو بتهم؟،،،
بيوم كنا كاعدين نلعب امي صاحتنا…
ام زيد: يله كومو خلي نروح لبيت ابن عمي
زيد: شوكت نروح؟
ام زيد: هسه يله بدلو ملابسكم
نورزان: بدلنا وماما رتبت شعرنا رحنا، وصلنا لمنطقه كلش حلوه، وكفت السياره يم بيت كلش كبير وحلو طرقنا الباب، ….طلعت مره تطلع اكبر من امي بالعمراول ماشافت امي سلمت عليها بلهفه واشتياق ..
ام رافي: شلونج ام زيد، والله مشتاقيلج، شنو هل غيبه ؟
ام زيد: الحمد الله انتو شلونكم؟
ام رافي: بخير،، تفضلو
نورزان: دخلنا للبيت كراج بوسط البيت طويل وعلى جهة اليمنى حديقه وعلى اليسرى هم حديقه وبيها مسبح، ،،،بيت فخم وحتى أكو ألعاب بالحديقه …
دخلنا للداخل استقبلنا رجل متوسط بالعمر، رحب بينا ترحيب حار
نبيل ابو رافي: ياهلا بأم زيد نورتينا بنت العم، شلونج؟ الأهل شلونهم؟، ابو زيد شلونه ؟
ام زيد: الحمد الله كلهم بخير
نورزان: باوع علينا وضحك وكال …
نبيل: لك هاي شنو هل الكتاكيت الحلوين
ام زيد: روحو ماما سلمو على عمو
نورزان: سلمنا وأستضافونا بالصاله
ابو رافي: ام زيد شنو هل الغيبه اشو ماكو لاتسالين لانشوفج؟
ام زيد: والله حقك بس تعرف بيت واطفال ومسؤوليه والله ماعندي مجال احك راسي..
نورزان: ضلينا كاعدين والكبار يسولفون وأحنا بس نباوع بالوجوه، ….
وراها اجوي بنات أثنين شابات يصيرن بناتهم سلمو علينه وحده اسمها سمر والثانيه منال…
سمر يطلع عمرها بوقتها كان ١٨سنه ومنال عمرها٢٣سنه متزوجه وعدها اطفال توأم٢(ولد-وبنت) غيث-وبراء عمرهم ٣سنوات
وراها بشويه اجوي ولد٣ اكبر واحد اسمه رافي والثاني احمد والثالث سيف اعمارهم بوقتها اكبر واحد١٧والثاني١٣والثالث كان ٦ سنوات يعني سيف كان بعمري
بعد ماسلمو وكعدوا كلهم وسوالف، صار وقت الغدا تغدينا كلنه وتوجهنا للصاله حتى يشربون جاي ويسولفون
بعد الضهر اجوي بيت عمهم ويصير ابن عم امي الثاني هو وعائلته
ابو رافي: هلا بأبو وسن تفضل …
نورزان:كان أبو وسن وزوجته وويا بناته (وسن-فرح-ورده) سلمو وكعدوا،،، الجهال راحو اشترو وأحنا ماتحركنا من مكانا
ابو رافي: عمو كومو لعبو تحركو البيت بيتكم ليش كاعدين؟
ام زيد: همه طبعهم هادءين
نورزان: باوع عليه عمو نبيل وركز
ابو رافي: تدرين ام زيد هاي البنيه هواي ألها شبه بيج اكثر من باقي اخوتها
ام زيد: اي بس هيه عيونها زرگ على عمتها وحتى طباعها هم مثلها
نورزان: صاحني وكمت وكفت يمه باس راسي وقدملي فلوس كال خلي واحد من الولد يروح يشتريلج خجلت و رفضت لكن هو أصر،، امي رفضت لكن خجلت بسبب أصراره اخر شي اشرتلي اوافق اخذتهن بتردد اشرلي على ولده اروح عليهم
رحت على ولد واكف وبصفه بنيه شويه اصغر منه، وهي بس تضحك وهو ولا معبرها، ،،،
-عمو نبيل يكول تاخذني تشتريلي؟، باوع عليه وسكت، بس البنيه ألي بصفه ضاجت جاوبت بمكانه
وسن: حبيبتي روحي على واحد ثاني يشتري ألج
نورزان: اني ضجت ودمعت، حسيت فشلتني، بس هو خزرها، ورد باوعلي
رافي: انتي شنو اسمج ياحلوه ؟
نورزان: اسمي نورزان،، ثنى قدمه ونزل لمستوايا
رافي: لتزعلين يله نونو امشي اشتريلج
نورزان: جاوبته بعصبيه …
_اني اسمي نورزان مو نونو وبطلت مااريد اشتري،
رفع راسه وباوع على وسن ورجع باوع عليه وكلي….
رافي : ليش ضجتي وعيونج دمعت ؟
نورزان: اني ماضجت ولا عيوني بيها دموع
رافي: اذا صدك ماضجتي امشي لعد ويايا نشتري
ام زيد: يله ماما روحي ويا عمو اشتري وجيبي لأخوتج وصيري حبابه
نورزان: طلعنا رحنا نشتري، اشتريت حلويات هوايه، طلعنا من الاسواق اجوي ولد سلمو على عمو، باوعوا عليه
–هاي شنو البزون ام عيون زرگ مين خاطفها ؟
رافي: گرايبي شبيكم قابل مثل گرايبكم الجلحان
ضحكوا كلهم مشينه سوا وصلنا لباب بيتهم
رافي: يله نونو طبي للبيت
نورزان: كتلك اسمي مو نونو
رافي: شوف العصبيه،،، يابه ولاتضوجين خلص، نورزان، نورزان، هاي هيه
نورزان: ابتسمتله وطلعت من الكيس نساتل قدمت أله ولأصدقاءه
رافي: هذني ألج ليش انطيتي ألنا ؟
نورزان: ميصير اكل وانتو لا
ضحك هو واصدقاءه وكال… يمه فدوه ل الله شنو هل الكرم
ادم :لك عمي شنو هل البزون،، شنو هل كياته هاي لوجهالنا جان خزونه
دخلت للبيت قدمت كل واحد حصته، وحتى وسن قدمتلها، ماقبلت تاخذ مني، وخزرتني
ام وسن خجلت، فبلشت تبرر لبنتها…
ام وسن: والله ياام زيد وسن مو قصدها ترد بنتج بس هي ورافي نفس الأعمار وتعرفه زين ميحب يتقرب للاطفال حتى يتنحس منهم وخافت ليضوجها
ام زيد: مصار شي عادي
قرر ابو رافي يغير الموضوع ويبعد التوتر الصار
ابو رافي: ام زيد وين ساكنين هسه؟
ام زيد: بمنطقة …….. قريبه منا بس صراحه نريد ننتقل منها ابو زيد معاجبته وبعيده عن عمله ودندور حاليا
ابو رافي: تعالو هنا المنطقه حلوه وخوش ناس
ام زيد: والله ياريت اذا اكو بيت مناسب هنا بعد احسن
ام رافي: نبيل مو اكو بيت بفرعنا عارضي للبيع
ابو رافي: اي هو قصدي عليه خوش بيت مساحته كبيره وحلو واعرف صاحبه حتى يسهل ألنا امره
ام زيد خبري ابو زيد وشوفي شيكول ورديلنا خبر حتى اشوفه ألكم
ام زيد: تمام، ان شاء الله يله احنا نترخص
ام رافي: وين يمعوده أحنا شفتهمنه منكم بعد وگت
ام زيد: بيت العامر ان شاء الله بس هم ياله
نورزان: سلمنه عليهم ورجعنا لبيتنا وامي خبرت والدي والدي رحب بالفكره…خصوصا هو ماعنده وقت يدور بيت لأن يطلع الصبح يرجع بالليل،
راحو وشافو البيت كلش عجبهم واتفقوا وراها بأيام اشتروا البيت وحضرنا نفسنه وانتقلنا لمنطقه جديده ولحياة جديده، وصرنا جيران بيت عمو نبيل
علاقتنا كلش قوت وياهم صرنا ناس تروح على ناس اذا احنا منروح همه يجونا صرنا اكثر من اهل
بس اكو بيهم شخص واحد كارهني مااعرف ليش وكل مره نروح يهاجمني بكلامه
سيف: اكلج نورزان لتلعبين بألعابي، اصلا بعد لتجين لبيتنا، يكون احسن
نورزان: كلش انقهرت، يعني وين مااروح احس نفسي وحيده وكارهيني هل شي خلاني حتى افقد ثقتي بنفسي
كعدت بالحديقه البرا مال الشارع ألي امام بيت عمو نبيل وصارت دموعي تنزل غطيت وجهي مااريد احد يشوفني واني منزله راسي، سمعت صوت لكن بقيت على وضعي
رافي: ليش كاعده هنا شو ارفعي راسج
رفعته ومن شافني انصدم بوضعي
رافي: هاي ليش هيج؟ شنو شبيج؟ شنو هل الدموع والوجه احمر منو وياج ؟
نورزان: جاوبته مستهضمه ودمعتي بطارف عيني… عمو اني ماكو احد يحبني ولا يريدني كلها تكرهني، ويصيحولي سمينه
رافي: ليش هيج تكولين ؟
نورزان: هاي الحقيقه
رافي: اي نعم انت صدك دبه حسيسه بس انتي حلوه تخبلين وين اكو بجمالج واكيد من تكبرين تضعفين بس مو لأن مو حلوه ها بس علمود صحتج، ..لكن انتي حاليا مناقصج شي وتخبلين
نورزان: ابتسمتله ممتنه من كلامه… قدم ايده على وجهي ومسح دموعي
رافي: لج دبه حسيسه بعد لتبجين حرام عيونج الحلوه لتنعمي
نورزان: باوعت علي بتعجب!!!
_صدك عمو اصير عميه لا عفيه اخاف اصير مو حلوه اني اصلا سمينه وأعمى شطلع
رافى: هههههههه، خرب ببليسج على هل الطلعه يعني عفتي سالفة متشوفين وتنعمين وحرتي بسالفة انو تصيرين مو حلوه
نورزان: ضحكت على ضحكه عليه وكمت من الارض،
_عمو ليش تكلي دبه حسيسه مو حميسه ؟
رافي: انتي ليش تدققين على كل شي ؟ ترا اني اعرف بس اتشاقه وياج،، يله امشي اشتريلج حلويات
نورزان: لا عمو مااريد
رافي: دكومي، كومي لازم كمتي تدورين رجيم، ترا اتشاقى وياج،…اكلي ولعبي وعيشي طفولتج ومن تكبرين اني بنفسي اوديج دكتور تغذيه يسويلج نضام غذائي حتى ليأثر عليج، خلي عندج ثقه بنفسج ولتضوجين من وزنج أنتي تخبلين
نورزان: صراحه بوقتها كلش تأثرت بكلامه (الانسان بكلمه يصعد للسما وبكلمه ينزل للارض)
صرت بعد مااضوج من جسمي وأي شخص يتكلم بي مااهتم بطلت اسوي عناد بنفسي وأئذي نفسي بالأكل
علاقتي قوة بي وبمرور الايام صار ينصحني ويعلمني ويزرع الثقه بداخلي و تخلصت من هل الطبيعه الموحلوه
عمو رافي من يكلي دبه حسيسه صرت افرح ومااضوج بس هو يضوج من اي واحد ثاني يكولها ألي يكلهم هاي كلمتي مااريد احد يقلدني بس اني اكولها
صرت بالمدرسه، بس الغريب كنت احسهم اصغر مني بالحجم وبالفكر احس عقلي ميتوالم وياهم
، شكد حاولت اتأقلم ماكدرت،كبر عقلي قبل وقته
كانوا اهلي اكبر حدودهم بالحياة والتربيه اكل و شرب و لبس و ادرسي هاي عيب وذيج ميصير وبس ابد ولا فد يوم كعدوا علموني الصح من الغلط او الحلال من الحرام كانت تربيتهم عباره عن اوامر واحيانا ضرب
لكن عمو رافي دائما يعلمني صرت اتعلم منا هواي اشياء واي شي اريد اعرفه او اتعلمه اسأله وهو ميقصر…
حتى بالدراسه ألي ماافهمه يدرسني اني وسيف لأن نفس العمر،،،
مرات اني واهلي نروح زياره ألهم بالليل او همه يجون نتعلل نكعد سوا نسهر و نلعب و اني ميحلالي غير لعب الكبار دومنه لو شطرنج لو طاولي مااحب ألعاب الأطفال وهل شي خلاني اتعلمهن وخصوصا اني ذكيه وبسرعه اتعلم صرنا من نلعب اغشش عمو واخلي يفوز ونصير نضحك عليهم وهمه يتخبلون..ومرات أنخبث عليهم خصوصا من يجون بيت عمهم وعماتهم ، تصير مؤامرات مو لعب خصوصا من وسن تلطش لعمو هي وبنات عمته وهو يتهزم منهن هو يأشرلي أنفذ الخطه ألي متفقين عليها حتى يتملص منهن لأن يلزكن وطبعا اني مااقصر
كان دائما يسمعلي ويعلمني اكثر حتى من اهلي
وبناتهم سمر ومنال هم يحبني وعمو نبيل وعمه اذا مااروح ألهم همه يسألون عليه
وهل شي يسعدني لأن كنت فاقده للأهتمام
امي متمنعني لأن خلصانه من مشاكلنا أني واخوتي وبنفس الوقت فرحانه لتغيري لأن اني متمرده ومو بسهوله اقتنع بكلام اي احد ومأمنه عليه لأن تعرف بيت عمو نبيل شنو واولادهم وبناتهم شنو تربيتهم…
حتى بابا هوايه يطلب من زيد يتعلم منهم ويكله اتمنى تصير مثل اخلاق الولد وتربيتهم
مرت الايام واني كل ماعمو يدرسنا احس سيف ضايج وماعاجبه احسه يغار مني بس اني مااهتم لتصرفاته لأن عمو يدافع عني ميسمح لأي احد يضوجني …حتى بالمدرسه يجي يسأل عليه مرات احس روحي بنته الى درجة حتى من انجح اول واحد اروح ابشىره ومن اخذ درجه قليله اروح عليه حتى يتوسطلي عند اهلي ويحجي وياهم …
يعني صار الشخص ألي احتمي من كل شي
مرات بابا وزيد يتذمرون من هل شي بس امي تقنع والدي تكله بس هو يكدرلها خلينا خلصانين من خبالها،،، صراحه اني صرت مااعبر هل كلام ولا اضوج،،، وحتى بطلت احس بداخلي شعور انو اني يتيمه وماألي احد…
لأن بالحقيقه اليتم الحقيقي مو دائما يكون بفقدان الأهل احيانا يكون يتم بالمشاعر، وبقلة الأهتمام وفقدان الحب ولمن نحس ماكو شخص يحس بينا ومن نعيش شعور الانسان ألي ماعنده سند بالحياة هذا احسه اليتم الحقيقي وهذا حالي عندي اهل وعايشه شعور اليتيمه
صح راح مني هل شعور وابتعدت عن المشاكل ألي تصير بيني وبين اخوتي لكن اني وسيف كأنما اعداء ابد منتوالم
مره كنا نلعب ببيت عمو نبيل اني وغيث وبراء اجه سيف ضل يدور حرشه ومشاكل، واجهته
_ انت شتريد ليش تدور مشاكل ويايا؟
سيف: اني اكرهج
نورزان: شمسويتلك اني ليش تكرهني؟
سيف: لأن انتي اخذتي اخويه مني
نورزان: استغربت،… ليش هيج تكول أني ماأخذته منك ؟
سيف: اخويه طول عمره بعيد عن الكل خصوصا الصغار لأن يضوج من الجهال وميحبهم بس انتي من اجيتي الوحيده يعاملج زين ويحبج
نورزان: لاهو مو يدرسنا سوا
سيف: قبل ماجان يدرسني بس على الواهس وياج ولأن نفس الصف هسه صار يدرسني يعني علمودج
نورزان: حجايه مني حجايه منه، تعاركنا اني وسيف وفجئه سيف دفعني، وكعت على راسي بقوه دخت وصرت ماأشوف شي بعدها فقدت وعي!!!
يتبع،….
الثاني من هنا
التعليقات