رواية يتيمة المشاعر الفصل الثاني 2 بقلم الكاتبة نور ال زيادة
العوده للحاضر
____
نورزان: فزيت من صفنتي ورجعت لواقعي ولحاضري، البعيد عن هذيج الايام ، سمعت امي تصيحني
ام زيد: نورزان ماما تعالي سلمي على خالتج ام ريم
نورزان: ام ريم (بنت خالة امي) رحت عليهم
_شلونج خاله؟
ام ريم: هله حبيبتي شلونج شخبارج ؟
نورزان: الحمد الله
ام ريم: اكلج ام زيد شبيها بنتج ليش وجها اصفر
شنو حامل ؟
نورزان: همست… ياطلابة الحامل المتخلص
ام زيد: لا موحامل
ام ريم: شبيها لعد، اخر مره شفتها جانت ورده ومفتحه، اخاف منفوسه
ام زيد: ماأدري ام ريم مااعرف شجاها لهذا جبتها
ازورها بلكي تصير احسن
ام ريم: لعد زوجها وينه، اشو ماكو؟
ام زيد: هو ملتحق حاليا لهذا مااجه
ام مريم: ها الله يسعدهم، عبالي صاير شي او مشكله بينهم
ام زيد:(بعصبيه) يا ستار، شكو بينهم قابل اصلا هو يموت عليها، حتى هو طلب مني اجيبها، بلكي من تزور تتحسن
نورزان: باوعت عليهن وهنه وحده تبسمر بالثانيه
هذا كله لأن ام ريم خطبتني لأخوها وماوافقت
ترخصت منهن ورجعت لمكاني،ّ لأن الضاهر ام ريم محمله بگلبها علينا
بعد دقائق شفت حسام من بعيد يتقدم باتجاهي
استغربت هذا شنو جابه ؟سلم وباس راسي رديتله السلام
–انت مو ملتحق وبعد وقت لنزولك
حسام: شنو متريدين أجي ؟
نورزان: مو هذا قصدي، بس استغربت
حسام: لا حياتي لتستغربين، اني اصلا ألي طلبت من عمتي تجون زياره وكلتلها من اكمل شغلي اجيكم
نورزان: هنا عرفت وتأكدت كلام امي مو بسمار لأم ريم، يعني اتفاق هي وحسام،واني عبالي صدك امي مهتمه لأمري، وجايبتني ازور واغير جو
حسام: هاحبيبتي وين سارحه ؟
نورزان: لاهيج ماكو شي
حسام: اروح اسلم على الباقين وأجي
نورزان: راح حسام سلم ودخل زار وطلع اجه كعد يمي
_زين ماتأخرت، قبل الله ..
حسام: قبل الله اعمالج، يله حتى نتغده، لأن شكلج هابط الضغط عندج وجهج اصفر
نورزان: مابيه شي شبيكم كلكم، نفس الكلام
حسام: لتضوجين حبيبتي، اني غير علمودج
والله حتى دعاء مادعيت غير بس ألج، مااريد غير الله يحميج ويحفضج أليه، وتصيرين ام جهالي
نورزان: كلامه استفزني جاوبته بغضب…
رجعنا لهل الموضوع، انت متبطل اكول اسكت بس انت تحجيني گوه،، ومسرحيتك انت وامي ماعجبتني، خلي أبالك
حسام: يعني هسه صار اهتمامي وحبي ألج، مسرحيه؟ لوخوفي عليج؟ اني هناك بالواجب وبالي يمج، وهيج تجازيني
نورزان: يسلم بالك ماكو داعي تهتم،،،عفته وكمت …
وراها رحنا المكان تتجمع بي العوائل، تغدينا كلنا سوا،..اني اكلت لكمتين، اريد بس أنخلص ونرجع كلش تعبت وصلنه لبغداد مريت لأهلي اني وحسام اخذت غراضي وراها رجعت لبيت عيالي
اول مادخلنه الغرفه، تقدم عليه حسام ولزمني من فكي بقوه
حسام: انتي شلون هيج تحجين ويايا ؟
نورزان: ليش شنو سويت،؟ وشنو بكلامي كذب ؟
حسام: نورزان مو كافي انتي متملين
نورزان: انته ألي متمل ولا تحس،.اني تعبت حس بيه دااموت اعتقني لوجه الله
حسام: شنو قصدج ؟
نورزان: قصدي واضح،انت لو تحبني متعيشني كل هل شي، ….صار الوقت ترتاح واني ارتاح،،، طلكني
اني حجيت هل كلمه لوتحول الى بركان من الغضب عيط وكسر هجم الغرفه
حسام:لوتموتين طلاك مااطلك، تعيشين وتموتين وانتي مرتي
نورزان: هجم عليه وبدا يتقرب ويتجرأ بلمساته،،
بعدته بقوه ودفعته
قسما ب الله، اذا ماعفتني بحالي اموت نفسي
رد عليه مستهزء ..
حسام: يله منو مانعج، سويها خلي أنشوف
نورزان: حسيت اعصابي فرطت على الأخر، منا نفسيتي تحت الصفر ، جسمي كله يرجف مااعرف شصار بيه الدنيا غلقت ابوابها كلها بوجهي، وعقلي خلص توقف عن التفكير، …
باوعت شفت ماعون بي فواكه على الميز ماحسيت على روحي غير واني ساحبه سكينه الفواكه، وحاطتها على رقبتي
حسام: ولج مخبله شدتسوين، لتسويها صدك دااتشاقى وياج،…جيبي البيدج الله يخليج لتسويهاوالله اموت اذا صار عليج شي،، شتريدين اسوي بس عوفيها
نورزان: تطلكني
حسام: هاي هيه خلص وداعتج اطلك
نورزان:جاوبته بصوت عالي…
هسه، هسه، تطلكني، يله بسرعه
بديت اضغط السكين على رگبتي، حتى حسيت بالدم بدا ينقط على قميصي،….
نزلت راسي اباوع على الدم الصار بقميصي أنشدهت ل لحضه ماحسيت ألا السكين ينسحب من ايدي،،
رجعت للخلف واني متهستره ومنهاره لأن اخذها هنا جسمي ماعاد يحملي ضاق تنفسي وروحي احسها بدت تنسحب مني وگعت فاقده
فتحت عيوني لكيت نفسي على سرير بالمستشفى
وبيدي كانونه وحاطيلي سيروم ألتفت شفت حسام
كاعد يتناقش ويا الممرضه على صحتي،
احس راسي ثكيل ورقبتي مشدوده وجسمي كله تعبان..
حسام: حبيبتي الحمد الله على سلامتج، شلون صرتي؟
نورزان: مابيه شي لسه عايشه وماخلصت منك
حسام: هذا الكلام بعدين احاسبج عليه، هسه صيري زينه ونتفاهم،
نورزان:رجعت غمضت عيني ماأريد اشوفه كافي الضغط العشته بسببه عرفت صاير عندي انهيار عصبي ثاني يوم طلعنا من المستشفى، حتى اهلي ماسمعوا بالصار دخلت للبيت عمتي تباوعلي بحقد حتى ماكلفت نفسها تسأل
ضليت ايام، اني وحسام ماكو كلام بينا، وهو فرغ الغرفه من اي شي حاد، ومن الأدويه، عباله راح اعيدها،
مرت ايام، وخلصت اجازتي المرضيه، رحت للدوام، ورا المحاضرات رحت للكافتريا اني وزملائي هناك شفت سيف باوع بوجهي مستغرب
سيف: هاي شنو نونو شبيها رگبتج ؟
نورزان: مابيه شي جرح بسيط ليضل بالك
سيف: نورزان اني ليش مامرتاح ألج احس بيج شي؟احنا اصدقاء واخوان تربينا سوا اي شي تحتاجي.،، اني موجود
نورزان: ونعم الأخ متقصر
كعدنا نسولف وسيف هم ويانا، تذكرنا الايام القديمه ومشاكلنا اني وسيف
ساكار: هاي عود صدك هيج چنتو انتي وسيف مامبين عليكم هسه عبالك اخوان
نورزان: اخخخخ ،،، لو تدرين شنو سوى بيه ، مره وكعني وكعه، من هاي الزينه،شگ راسي بيها
سيف: انتي فضيحه لاماضي ولاحاضر ينضم عندج خلي أفلت عندي محاضره وأنتن گصن بيه
نورزان: ضلينا اني وساكار كاعدين وحدنا نسولف لأن ماعدنه محاضرات
ساكار: نورزان، اني صديقتج من فتره طويله وعشرت عمر وياج واعرف انتي كتومه ،ومتحجين شي لأي احد عن حياتج هواي اشياء عنج اسمعها من سيف مو منج
نورزان: صدكيني لو اعرف الكلام يفيد كان حجيت كل ألي بگلبي اني موقاصده اخفي حياتي عنج بالعكس اتمنى احجي بس مااحب اشكي واحمل همومي لغيري
ساكار: اني اختج مو بس صديقتج واذامااسمعلج واشيل همومج وياج معناها مو كفو اكون صديقه
نورزان: لو تدرين شكد محتاجه اطلع ألي بداخلي بلكي ارتاح محتاجه شخص يسمعني ويحس بيه وميحكم عليه ويكلي ألي بداخلج غلط
ساكار: نورزان ألي اعرفه متسوي الغلط وأذا غلطت فهل شي خارج ارادتها فضفضي وطلعي ألي بداخلج وطلعي بلاوي سيف
نورزان: ههههه،،، اهم شي بلاوي سيف
العوده للماضي
____
دفعني سيف، وكعت صرت مااشوف غمضت عيني و فقدت الوعي
، وعيت اني بالسياره ألم قوي براسي و شايلني عمو بين ايده أباوع علي تيشيرته بي دم، أنتبهلي تكلم بلهفه،
رافي: احمد باع فتحت عينها الحمد الله
نورزان: بچيت من الوجع ألي براسي كتله عمو شنو راح اموت؟
رافي: اسم الله عليج،، لتخافين مابيج شي هاي وصلنا للمستشفى وهسه تصيرين زينه
نورزان: دخلوني على الدكتور شاف راسي، واني بس ابجي، وعندي دوخه
الدكتور: لازم خياط، ونسويلها اشعه قبل كل شي
اخاف الوكعه مسببه ضرر براسها،
سوولي اشعه طلع مابيه شي بس يحتاج خياط، خيطوا راسي،واني ابچي وحاضنه عمو رافي خلصنه ورجعوني لبيت أهلي امي من شافتني اجتي تلكتني بخوف
ام زيد: هاي شبيها ؟
رافي: لتخافين خاله،،، بسيطه ان شاء الله
نورزان: باوعت عليه خزرتني جاوبتها بسرعه
_ جنت ألعب وتزحلكت على الصبه وكعت على راسي، مابيه شي… غمزت لعمو حتى يسكت
، دخلت للبيت وهمه راحو، ضليت ايام، وكلها تسأل عليه، ويجون يشوفوني، وصار اليوم ألي لازم افتح الخياط
العصر اجه عمو حتى ياخذني، بس امي ماقبلت
ام زيد: تسلم متقصر ابو زيد كال الجمعه، اوديها افتحه،
رافي: يووو، للجمعه بعيد، هسه اوديها اني واحمد وزيد نفتح الخياط ونجي عمي ابو زيد وين عنده وقت
ام زيد: مااعرف شنو اكلك بكيفك اخذها
نورزان: بدلت ورحنا، زيد رفض يروح ويانا
بالطريق احمد سألني
احمد: انتي ليش ماكلتي الحقيقه لأهلج ؟
نورزان: شنو، مافهمت؟
احمد: ليش ماكلتي سيف هو ألي وكعج
نورزان: اذا دروا اهلي بعد ميخلوني اجي يمكم وتصير مشاكل، وسيف مو قصده يأذيني
رافي: شفت، ومن اكلكم تختلف عن باقي ألي بعمرها،،، كلها تلومني،،، شوف عقلها شكبره، ولو اني مااحب تضمين شي عن اهلج
نورزان: اني مااضم عنهم شي بس هي سالفه مال صغار وصارت بدون قصد
احمد: ولايهمج، كلنا، طيحنا حضه حتى ابويه، بعد نهاءيا ميوصل يمج
نورزان: ليش هيج سويتو؟
رافي: يستاهل حتى مره ثانيه ميكررها
نورزان: لاعمو بالعكس هيج راح تخلو يكرهني اكثر
هو يضوج مني لأن عباله اخذتك منه
رافي: شلون يعني؟
نورزان: سولفتلهم كل الصار بيني اني وسيف بيومها
رافي: ها هيج الكلام ولهذا يتحسس منج، خلص اني احل الموضوع
نورزان: فتحت الخياط وصرت زينه ورجعت الحياتي الطبيعيه،
اجه سيف اعتذر مني، واني هم سامحته رجعنا طبيعي، نروح ألهم وهمه يجونا اني وسيف ندرس سوا وألي منعرفه عمو يدرسنه ، عمو حاول يوازن بيني وبين سيف حتى ليحس سيف اكو تفرقه
بعدها اني وسيف صرنا اصدقاء، بس، طبعا مو مثل علاقتي ويا عمو رافي، وكل مااكبر تقوى علاقتنا حتى اسرارنا سوا
، سنه من السنين صار شهر رمضان الكريم، وطلب عمو مني اصوم، لأن كبرت، بس اني ترددت،..كلي لازم تتعلمين، بدا يشرحلي عن الصوم وفوائده وشلون لازم اتقرب من رب العالمين بأداء العبادات المفروضه ،صراحه قنعني وقررت اصوم، …وهو قبلها اساسا علمني على الصلاة من علمني الصلاة، جابلي ايزار صلاة هديه
بابا وماما، كانو فرحانين بتغيري، ولهذا سامحين لعمو رافي يتدخل بحياتي، وبابا كلش يحبه،
وكان يتمنى يصير زيد مثل ولد ابو رافي، واخلاقهم، بس زيد معاجبه هل الشي وحتى اني دائما يحاول يمنعني عنهم لكن ماما وبابا، ولاول مره ميوافقو الرأي يمكن لأن عاجبهم التغير ألي صارلي،،، تصورت بوقتها مشاعر زيد مجرد غيره وتروح بمرور الوقت ماتصورت هل غيره راح تتحول الى حقد يدمر الكل..
يتبع…
الثالث من هنا
التعليقات