رواية يتيمة المشاعر الفصل السادس 6 بقلم الكاتبة نور ال زيادة
نورزان: كلام خالتي كان مفاجىء بالنسبه ألنا كلنا
صح ملاحضه نضرات احمد ألي بس مااعبر ولااهتم تصورت مجرد اعجاب لكن ماتخيلت يتقدم ألي،
ام احمد: بالنسبه للدراسه لتشيلون هم هو يريدها تكمل وحتى اذا رادت تتعين هم موافق
ام زيد: مااعرف شكول بس اخبر ابو زيد ويصير خير
نورزان: مااعرف ليش ضجت وخصوصا من كلام امي حتى مكالت نسأل اللبنيه….
، انتبهت لعمه ام رافي هم ضاجت، الحوار كله صار سخيف لهذا عفتهم وكمت صعدت لغرفتي
لان مااكدر احجي شي عيب ….
بقوا شويه لبعد الضهر وراها كلمن راح لبيته
ل الليل امي فاتحت الوالد بالموضوع
ام زيد: ابو زيد اليوم اختي ام احمد طلبت نورزان لأحمد، شنو رأيك؟
ابو زيد: احمد خوش ولد منلكي احسن منه شكو بيها
ام زيد: يعني اردلها خبر موافقين هاهيه
زيد: اي طبعا احمد خوش احمد
ريام: شنو السالفه اشو بكيفكم تفصلون وتلبسون ومحد كلف نفسه يسأل صاحبة الشأن
ام زيد: احنا ادرى بمصلحتها ونختارلها الأنسب
ريام: ليش هو لعب جهال، هذا زواج عمر كامل
ام زيد: لصمي حلگج ولتدخلين
نورزان: طلعت من غرفتي واني اسمع نقاشهم
وكأنما ماألي وجود ولا قرار،….
هنا طكت فيوزاتي….رجعت نورزان القديمه نزلت الدرج وتوجهت ألهم
_ها شنو الموضوع على شنو نقاشكم؟
ام زيد: على زواجج من احمد
نورزان: يازواج، قصدج على طلب احمد ألي
ام زيد: ماكو فرق راح ارد خبر لخالتج الباجر بالموافقه
نورزان: بس اني ماموافقه
زيد: بس احنا كلنا موافقين
نورزان: وهاي حياتي مو حياة غيري،
ام زيد: مو بكيفج تريدين تفشليني ويا اختي، وبعدين الولد ماناقصه شي
نورزان: يعني خايفه على مشاعر اختج واني مو مهم مشاعري، قررتي ووافقتوا حتى من غير متسألوني
زيد: لصمي حلگج وسكتي، خلص يمه كليلهم موافقين، وانت ضربي راسج بالحايط
ريام: شنو هل الحجي انتو تحجون صدك هذا زواج ياناس، انتو حجاب ماجبرتونا علي مو نوب زواج
نورزان: كلمه وماراح اعيدها ماموافقه ولتفكرون تجبروني على شي
ابو زيد: هاهيه سدو الموضوع كولي لأختج ماكو نصيب وخلص
ام زيد: تحجي صدك تريد تخجلني ويا اختي
ابو زيد: لعد اجبرها احسن؟ كم يوم وردي خبر
نورزان: كام ابويه راح ينام، وامي استلمتني غلط ورزاله ماخلت شي …واخر شي كلتلي…
ام زيد: معليه بكلام ابوج ولابيج راح اكلها موافقين وخلص انتي متعرفين مصلحتج
نورزان: سويها شكو بيها، بس ماكو احد يعتب عليه من اخزيكم بعدين، لأن لتتصورين راح اسكت…
تحيرون شتسوون بيه كل هل السنين واني ساكته
بس من الموضوع يوصل لهنا اعذروني….، الله حللي اوافق او ارفص بهل الموضوع وكلام الله فوق حتى رضا الوالدين
عفتهم وصعدت لغرفتي واني نار بداخلي، شنو هل الضلم شنو مسويتلهم اني يبيعون ويشترون بيه ؟
ورا كم يوم، ريام كلتلي الحجيه ام امي كلتلها لأمي لتوافقون على احمد ميفيدكم ومااعرف شنو حاجيتلها عنه، وامي ردت خبر لخالتي ماموافقين
يعني لوما بيبيتي كان فرضو عليه وزوجوني غصب،
رجع الدوام وحياتنا عاديه، واجه كذا واحد خطابه وعشت نفس المعمعه، ….بس قويت نفسي، وكل شخص اشوفه مو مناسب ارفضه، واهلي يجن جنونهم…
اعرف ميصير اوكف بوجهم، بس الموافقه والرفض حقي ألي الله حلله ألي،
حاليا كل تركيزي على مستقبلي صرت سنه ثانيه والدراسه صعبه وخاله كل حيلي بيها، بهل الفتره
عمه وعمو ابو رافي راحو عمره
قبل ليجون بلشوا بيتهم تحضيرات استقبالهم
ومنال وسمر طلبو من امي نحضر قبل بيوم
نساعدهم،لأن همه يمونون علينا، رحنا ب الليل
صار عشانا يمهم، واجوي بيت عمهم وعماتهم
وصارت لمه، …
بعد العشا بلشنه تحضير لغدا ثاني يوم …
كعدنا امي ومنال وسمر وبراء واني وريام
بالمطبخ نرتب شغلاتنه…لفينه دولمه اكثر من جدر وكبب وبورك وقطعنا اللحم وحضرنا رتبنا شغلاتنه كامله ب الليل بتنا يمهم كعدنا بالصاله نسولف ونرتاح شويه
الشباب كاعدين بالحديقه يلعبون دومنه ويشربون چاي، امي ومنال وعماتهم ومرت عمهم ناموا ساعه ب١٢ وأحنا ضلينا نسولف اجه علينا سيف
سيف: بنات فدوا ماكو لگمه والله جعنا
فرح: انت طول عمرك جوعان اخذلك شي من الثلاجه اكله
سيف: معدله ماعليج عتب،،، نونو فدوه متكومين
تسويلي شي اكله، اذا متصير عليج زحمه
نورزان: غالي والطلب رخيص هسه اسوي ألك وللولد
سيف: اي عفيه، ولو راح اتعبج
نورزان: اذا مااتعب لأخويه ألمن لعد اتعب
رحت للمطبخ واجني ريام وبراء هم يساعدني
همه ذبحوا وبقى المعلاگ، طلعته وبلشت اسوي
وطلعت بورك هم كليت ألهم
اني واشتغل، اجه عمو رافي دخل للمطبخ
رافي: ممم،،، الله،، شنو هل الريحه الطيبه، شنو دتسوين؟
نورزان: معلاك وبورك وفنكر
رافي: ريحته طيبه وشكله هم،
نورزان: جاب صمونه واجه يمي وكلي… خليلي
خليتله وصبيتله چاي،
احنا واكفين يم الطباخ اني اگلي وعمو ياكل ولزم الملعقه يحرك بطاوة المعلاك
اجني وسن وفرح و ورد وبنات عمتهم سجى ورهام
سجى: بنات تحتاجن مساعده؟
براء: لا شكرا، خلصنا، وانتن شكلجن تعبانات، روحن ارتاحن
نورزان:ابتسمت على بسمار براء،،
رافي: نورزان عاشت ايدج صدك طيبه، شلون سويتيها؟
براء: خالو شنو تريد تتعلمها
رافي: من سافرت هناك اني كنت احضراكلي وملابسي وشغلاتي كلها، وتعلمت كم اكله هم ولهذا صار عندي معرفه بالطبخ
نورزان: ممم،،، حلو الانسان يعتمد على نفسه ويتعلم
رافي: ها شكلج راح تغلسين ومتنطيني سر المهنه
نورزان: هههههه لا مو هيج قصدي راح اكلك
اول شي نقطع المعلاك ونغسله ونخلي مي يغطي
ونخلي على النارونخلي ورق غار من يستوي، نصفي ونغسله بمي حار حتى تروح الزفره
وراها بالطاوه نحمس بصل شويه ونضيف عليه المعلاك ونحمسهم زين سوا، ونخلي بهارات كاري ويا الحمس،ونضيف الطماطه المقطعه على الخليط ومن بعدها ملح ونخلي شويه دبس رمان ورشة نومي بصره مطحون،
رافي: ها هنا السالفه طعم الحامض نومي ودبس رمان،،بس تدرين منطي طعم كلش طيب، والله وكبرتي وصرتي تطبخين لا وتعلميني هم
نورزان: ضلينا نضحك ونسولف اني ويا حضرت صينيه مرتبه والبنات خلو طرشي وخضره وشيفوا زلاطه صبينا چاي واخذ الصينيه وراح
وسن: ماشاء الله صح كبرتي بس لسه بعدج سوالف وميانه ويا رافي ماتغيرتي
براء: وليش تتغير اكو اعتراض،
نورزان: اني وعمو رافي علاقتنه مبنيه على الاحترام وهذا ألي يميزنا،
براء: اي لاعى بحلكج هو خالو يحترمج لأن محترمه وعندج كرامه
نورزان: حسيتهن احترگن من ضوجتهن راحن نامن وأحنا ضلينا وراها سوينه كهوه لل٣يله قرروا ينامون وأحنا هم نمنا، لأن منتضرنه يوم طويل
ثاني يوم من الصبح بلشنا شغل والخطار جوي قبل جيت عمو وعمه حتى يستقبلوهم، …
اجوي الحجاج وصار استقبالهم حفله نفاخ ونشر وجكليت ونشرات ضوئيه على واجهت البيت، ياالله شلون حلوه الاجواء صارت
انجمعوا كلهم وصار الغدا وبلشنه صب الاكل اجوي بيت اهل عمه ام رافي،
ابن خالهم وسيف جوي بالمطبخ ويانا يساعدون بالصب ونقل الأكل، انتبهت على هل شخص عيونه زايغه مره عليه يباوع و على ريام يباوع، سمعته يسأل سيف علينه، بس سيف مانطا وجه
ورا بشويه اجه عمو رافي، ينقل اكل وياهم لكن بس فات للمطبخ ضاج وعقد الحاجب،
رافي: براء وريام ونورزان، كومن حضرن كعدت النسوان جوا حتى نصب ألهن هم
نورزان: كمنا بدون نقاش فتنا جوا لحد ماخلصو نقل الغدا…
، ألي افتهمته بعدين من براء ابن خالهم مو خوش ادمي وعمو راد يبعدنا لأن بس يباوع، خلصنا وكفينه كل الهوسه وصار العصر، بدى الخطار ينسحب ناس ورا ناس
ام رافي: والله ياام زيد مااعرف شلون اجازيكم ماقصرتوا وكفتو صدك وكفت اهل
ام زيد: شنو هل الكلام انت كلتيها احنا اهل
ام رافي: ولو جاي اثكل عليج بس الباجر اصدقاء ابو رافي راح يجون وابو رافي كلي كولي لبنيتي نورزان اريد منها تسويلي باچه لأن مشتهيها وصراحه هو هم مسولف بيها لأصدقائه ورايد يضوكها ألهم
ام زيد: ريام ونورزان هم بناتكم الباجر الصبح ان شاء الله ادزهن ألكم واذا تريدين اني هم حاضره
ام رافي: الله يسلمج متقصرين، ويوم ألي نفرح بيهن ان شاء الله
نورزان: رجعنا لبيتنا بعد التعب، حتى نمنا من وقت
حتى ثاني يوم من الصبح نرد نروح ولو ادري شراح يصير ثاني يوم كان ولا رحت ولا وصلت !!!!
يتبع….
السابع من هنا
التعليقات