مهيب… اذا تسئلوني عن مشاعري
ماكان عندي اي مشاعري بهذا اليوم حسيت نفسي ممثل
اي اكيد ممثل لان هاي الاشياء لا زم يكون بيها احساس
اكثر ما يكون بيها توجيه
واني كنت حافظ الدور وانفذ مثل ما كنا متفقين
حتى لحد يشك هذا الزواج مزيف
بعد ما تعشت العالم ونص المعازيم راحوووو
اجا ابوي
ابو مهيب…ووين العريس نريد نزفه على العروسه
أجمعوا الولد وزفوني على العروس
من دخلت للغرفه وكفت وهي مدنكه
مهيب…اكعدي اخذي راحتح
دخلت فتحت الكنتور نزعت القميص والستره ولبست دشداشه نزعت البنطرون علكته
مهيب…اني طالع تكدرين تغيرين ملابسج براحتج
قربت على الباب اريد اطلع
نورس….بس اريد احجي وياك كلمه
مهيب التفتت عليها وكتلها اي تفضلي
نورس….شكرا لان ساعدتني
مهيب….هزيت راسي وطلعت من الغرفه
رحت لكيت جماعتي جاي يغسلون بلبيت من برا
بس شافوني كامو يضحكون ويصوفرون
….ولك ليش طلعت اكو عريس يطلع من غرفته ارجع واقفل الباب عليك جمانه السعيدي
بقيت واكف وياهم لمن كملو غسل كل المواعين والجدور وحملوهن ودزوهن للطباخ
كلمن راح الاهله بقو بس اهلي
امي….تعال مهيب تعال تعشى
مهيب…اي اجيت دخلت لكيت اني محضره العشى ومدخلته بغرفة النوم
نورس مبدله لابسه تراك بيجي حلو وفاتحه شعرها
وغاسله وجها
امي…يله تعال اتعشى انت ونورس
نورس…لا خاله مااريد اني موجوعانه
مهيب…تعاي اكلي
نورس…لا مااكدر شكرا
امي كامت تسوي لفه زغيره وتبقى تلح عليها لمن تاكل
واني اكلت وكمت غسلت
طلبت من البنات جاي
شربت الجاي بلمطبخ شفت نورس طلعت غسلت ورجعت
للغرفه
دخلت للغرفه هي كاعده على الجربايه
اني تمددت بلفراش الي بلكاع وتغطيت
اذكرت شي
مهيب….اريدج تنتبهين لا تحجين اي شي كدام البنات
لان مايعرفن منا لمن نشوف يمتى نعلن موضوع الحمل
نورس….اي
مهيب…تغطيت ونمت
هي طفت ضوه الغرفه ونامت
الصبح كعدت على صوت الباب انفتح نورس طلعت من الغرفه رجعت غمضت عيوني ماكدرت انام سحبت التليفون شفت الساعه
بلعشره بقيت اتكلب بلفراش
بعدين كمت من مكاني طلعت لكيت نورس كاعده بلمطبخ وياااا امي وخواتي لابسه ثوب سماني ورصاصي
مشجر مكياج حلو وعطر طيب شعرها رافعته ذيل حصان
تسولف وتضحك وياا البنات عبالك صار سنيين عايشه وياهن
مهيب…صباح الخير
الكل…صباح الخير
غسلت وكعدت نورس جابتلي صينيه بيها كلشي خير من الله وراحت جابتلي كوب جاي
مهيب…اكعدي اتريكي
نورس…اني سبقتك اكلت وياا البنات
اني كملت اكل اجتني نورس اجيب بعد جاي
مهيب…اي ابوي وين
نورس…عمو طلع للشغل
مهيب…زين
جابتلي الجاي وشالت الصينية
شويه واجو عليه ولد كعدنا اني وياهم برا نسولف
بعدين اجاني صديقي من بعيد واني آخرته للغده
كلما ادخل للمطبخ الكاها واكفه وياا امي وتشتغل تعجبت من كميه التفاهم والميانه بينها وبين خواتي وامي
تشتغل وياهن بلمطبخ
وكانما عايشه بهذا البيت صار سنيين
الولد اتغدا وطلع اني رجعت للغرفه تمددت وهي بقت تنضف وياا البنات بلبيت
العصر اجت امها وخواتها يشوفنها
دخلت للغرفه اخذت ملابسها وطلعت بدلت بلحمام
رجعت اتمكيجت وطلعت لان اجانا نسوان من الجواربن
اهلي كلهم من اول ايام العرس وهمه طايرين ببها
كلهم فرحانين بيها ابوي كلما يرجع يجيب وياا علاكة حلويات وينطيها
امي ميته عليها اسمها مايطيح من السانها
حتى خواتي وين ماتروح يرحن وراها
اما علاقتي اني وياها علاقه مابيه اي طعم مجرد تغسل ملابسي وتكويهن ترتب الغرفه
اذا اطلب منها اي شي راسا اجيبه ما تتأخر عليه
اني انام بلكاع وهي تنام على الجربايه
ماحجينا اني وياها على اي موضوع
احس مستحيه من الشي الي سوته وتتهرب مني واني هم مجاي احاول أقرب عليها مااريد ارجع احبها واتعلق ببها من جديد اني معتبرها ضيفه عدنا
مو شريكة حياة
كلما ادخل للغرفه وتكون موجده تطلع بسرعه تروح يم خواتي
مجاي احاول أحجي وياها غير الكلام العادي
اول فتره هواي ناس تجي علينا وماكنت فارغ حتى احجي وياها
يوم السابع عزمونا اهلها اني ماكنت اريد اروح بس ابوها بقه يلح عليه لازم تجي نريد نشوفك جمانه السعيدي
بدلت وطلعت من الغرفه وهي اجت من الحمام لابسه روب طويل ولا فه منشفه على راسها
طلعت من الغرفه حتى تاخذ راحتها
رحت كعدت وياا ابوي ننتضر تكمل هي امي حتى نروح
للعزيمه
امي كملت وهي بعدها
رحت دكيت الباب
مهيب…يله نورس راح االوكت
نورس…كملت اجيت
رجعت انتضرها عشر دقايق واجيت
لابسه ثوب طويل اسود بي نقط ابيض فتحت الصدر مربع
الردن منفوخه طويله من الصدر ضيك وبعدين نازل كلوش
حذاء عالي اسود شعرها رابطه نص وعايفه نص
مكياج حلو طالعه تخبل ماكدرت انزل عيني من عليها
وكانما اول مره اشوفها
ابوي…يله امشي مو تلح علينا اتاخرنا
مهيب…اي اجيت
راسا نورس لزمت ايد امي وكامت تمشي وياها
امي…الزمي ايد زوجج اني ليش لازمه ايدي
نورس….انتي الخير والبركه
صعدنا بلسياره ابوي كال نورس تصعد يم مهيب
نورس…لا عمو انت اكعد اني اكعد يم خاله
رحنا اني وياها وابوي وامي تعشينا وكملنا
اني متعود اشرب جاي مرتين ورا الاكل مرتين بلكوب لازم
بس كملنا اكل جابتلي جاي بلكوب وكعدت كبالي من كملت راسا اخذت الكوب وجابتلي جاي مره ثانيه
ابوها بقه يباوع عليها
وكانما متعجب شلون حفظت تصرفاتي بسرعه
رجعنا للبيت هي دخلت للغرفه قبلي اجيت تدخل باب الغرفه مقفول
مهيب….نورس كملتي
نورس…دقيقه جاي ابدل
مهيب بقبت واكف لمن كملت فتحت الباب لابسه تراك احمر نص ردن
طلعت برا تغسل وجها من المكياج
اني بدلت وتمددت اصفح بلتليفون
اجت من برا نشفت وجها خلت كريم طفت الضوه وتمددت
مهيب…اريد تلبسين حجاب
سكتت ماردت عليه
مهيب…سمعتيني
نورس…اي سمعتك صار بس ماعندي حجابات باجر اوصي خاله اجيبلي حجاب
مهيب…راح اعوفلج فلوس على الميز قبل لا اطلع
نورس….شكرا ابوي انطاني فلوس
مهيب…اني مسؤل عنج مو ابوج لا تاخذين منه فلوس
نورس…اي
نمنا كل واحد بمكانه
اني غفيت نايم نوم عميق سمعتها صاحت اي
حسيته تحركت على الجربايه
شويه نزلت اسمعها بس ما افتهمت هي شبيها
فتحت عيوني شفته طلعت من الغرفه
شويه ورجعت
مهيب….شكو ليش كاعده
نورس…اسفه كعدتك معدتي توجعني يمكن ثكلت بلاكل
مهيب…كعدت على حيلي اخذج للمستشفى
نورس…لا ارجع نام هسه اصير احسن
مهيب…رجعت اتمددت بس هي بقت تحوس ماكدرت ارجع انام مره ثانيه
طلعت من الغرفه وتاخرت طلعت وراها سمعته تتقئ بلحمام
رحت للحمام لكيته مدنكه وتتقئ
مهيب…هااا
نورس…روح خاف نفسك تلعب
مهيب…لا شنو نفسي تلعب اطلعي اخذج للمستشفى
نورس…هسه اصير احسن
مهيب…راح ابدل واطلع السياره وانتضرج
رجعت للغرفه بدلت وطلعت السياره
دخلت للغرفه ابوي سمع صوت السياره وطلع
ابوي…هااا بويه شكو
مهيب…نورس تتقئ صار اكثر من نص ساعه
ابوي…ليش شبيها
مهيب…مااعرف راح أخذها للمستشفى
ابوي.. اجي وياكم
مهيب…ما يحتاج هسه نرجع مدري مكثره اكل مدري
متسممه
اجت نورس لابسه بنطرون قماش اسود وقميص بنفسجي
ورافعه شعرها
شافت ابوي واكف برا
نورس…هاا عمو انت هم كعدت اسفه ازعجتك
ابوي…اروح وياج
نورس.. اني مااريد اروح بس مهيب صمم
ابوي…لا بويه روحي خاف تسمم
مهيب طلعت السياره اجت صعدت ورحنا للمستشفى
طلعت رأسها من الجام لان نفسها تلعب وكل شويه تريد تتقئ
وصلنا اني نزلت ومشيت كدامها
اجت وراي دخلت للطوارء دخلنا على الدكتور الخفر
الدكتور بقه يباوع عليها
الدكتور…..هااا تفضلي
مهيب…احجي وياي دكتور
الدكتور…العفو هي المريضه لو انت
مهيب….التفتت عليهااحجي شنو تحسين
الدكتور ابتسم من طريقتي بلكلام
نورس…دكتور اني حامل بلشهر الثالث والبارحة اكلت
هواي احس معدتي تغلي وبطني متشجنه
وكل اشويه اتقئ
الدكتور…لازم تحليل نعرف شنو صار وياج انتي حامل
مانكدر ننطيج اي علاج
نورس…تمام
الدكتور….هاج هاي الورقه وروحي الغرفة التحليل
مهيب…طلعنا اني وياها اخذتها للغرفه اكو ممرض وممرضه
اجا المرض يقرب عليها كتله لا الممرضه لو سمحت
قربت الممرضه اخذت منها دم
طلعنا اني وياها كعدنا بلردها وهي كل شويه نفسها تلعب
طلع التحلبل
ماكو شي يخوف شي بسيط وهم باديه علبها اعراض الوحم والاكل ثكيل
ضربوها ابره حتى لا تتقئ بعد
واكو علاج أخذنا من الصيدليه ورجعنا للبيت
التعليقات