رواية أول مرة أحب الفصل السادس 6 – بقلم شيماء صبحي
الكاتبة_شيماء_صبحي
وصلت للمكان الهادي وانا بحاول اهدى ولسا ببص قدامي لقيت مجموعه من الكلاب ماسكين فرختين ميتين وبياكلوا فيهم من الخوف والرعب اللي حسيت بيه صرخت بكل عزم وقوة والكلاب انتبهت ليا وجريوا عليا ولما الكل اتخضوا من صوتي قربوا عليا وانا من الصدمه جريت بكل قوتي وانا بقول بصراخ:كلاااااب..لااااا..لحقونييي!
اول ما جريت شوفت ماجد ماشي في نفس اتجاهي وطبعا كل اللي كانوا قريبين من المكان دا انتبهوا ليا وفي منهم اللي جري عليا علشان يشوف ايه اللي بيحصل ومنهم اللي اتجه علشان يوقف الكلاب ..
قربت انا من ماجد لما حسيت انه لتاني مرة يبق طوق النجاة ليا فـ نطيت بكل خوف ورعب وحضنته وانا بقول برعب:لا متخليهمش ياكلوني او يقربوا مني والنبي يا ماجد!!
ماجد كان مصدوم ومش عارف يرد عليا او علي الموقف ويقولي ايه فضل ساكت وانا اصرخ..
كنت ضاغطه عليه جامد ولسا بصرخ لحدما اتجه كام شخص عند الكلاب ومنعوهم يقربوا مني ولما لقيت اصوات الكلاب كلها اختفت وماجد لسا ساكت بعدت عنه علشان اعتذر منه لقيت وشه احمر وعيونه حمرا وبيبص عليا بكل غضب؟
بصيت حواليا لقيت ناس كتير متجمعين وباصين عليا مكنتش عارفه اعمل ايه او اعدي من الموقف دا ازاي او اقول لماجد اللي باصصلي بغضب ايه ..قولت في نفسي(اهرب دلوقت اروح فين)
الكل بيتهامس عليا وبيسألوا بعض انا ابق مين لآن شكلي غريب ففضلت ساكته بفكر لحدما لقيت اللي إسمها نتاشا دي بتقرب من ماجد وهيا قلقانه وبتطمن عليه وانا من غيرتي انها قربت منه قربت منه وانا بقول:ماجد انا..ماجد انا أسفه؟
طبعا قولت كلمتي وفكرت انه هيرد عليا وهيتعصب او يقول اي حاجه بس فجأني ماجد لما سكت ومردش عليا ومشي مع نتاشا اللي بتحاول تهديه وانا لما شوفته عمل كده اتحرجت جدا وحسيت اني غبيه جدا من الموقف دا ..
مرجان لما لاحظ ان أروي واقفه والكل بيبص عليها قرب منها وقال:تعالي معايا لان وقفتك دي هتضايق ماجد بيه أكتر !
بصيت علي العمال وحركت راسي ومشيت مع مرجان اللي اتجه بيا للمبني اللي ماجد قالي انه مكتبه ،دخلت انا ومرجان وانا ببص علي المكان بإعجاب ..شاورلي مرجان علي غرفة ضخمه وقالي:دي غرفه خاصه بماجد بيه تقريبا محدش بيدخلها غير نتاشا السكرتيره بما انك صديقته وقريبه منه ادخلي واقعدي فيها لحدما البيه يجيلك’
حركت راسي بموافقه علي كلام مرجان بس سألته بفضول:هو ماجد ممكن يجيلي بجد !
حرك مرجان راسه بعدم علم وقالي:ممكن يجيلك بس انا مقدرش أكدلك اوي ،وحتى لو مجاش مكتبه هناك تقدري تروحيله بنفسك ؟
شاورلي مرجان علي مكتب ماجد وانا حركت راسي ودخلت للغرفه دي وانا متوتره ومرجان مشي ..وفضلت انا ابص علي الاوضة دي وانا قلبي لسا بينبض بسبب اللي حصل..
في مكتب ماجد نتاشا اتكلمت بتساؤل لان ماجد ساكت وسرحان :مستر ماجد هوا حضرتك كويس!
انتبه ماجد ليها وحرك راسه وقال:ايوا يا نتاشا لو سمحتي هاتيلي كوبايه مايه!
نتاشا حركت راسها بالموافقه وخرجت بسرعه من المكتب علشان تجيب مايه وماجد سمح لنفسه يرتاح ويهدي ويفكر وكان تفكيرة دا في اروي اللي بسبب حركتها الاخيرة خلت قلبه ينبض بعد كل السنين اللي حرم نفسه من الحب فيها!
ماجد بتساؤل لنفسه:هيا اكيد متعرفش هيا عملت فيا ايه..دي مش طبيعيه اول مرة اقابل بنت زيها كده…اكيد انا مقابلتهاش صدفه..صح مستحيل دي تكون صدفه ابدا!!
نتاشا رجعت وهيا شايله كاس مايه وبتقرب منه فمدت ايديها بالكاس لماجد ولكن ماجد تجاهلها وقام خرج علشان يشوف اروي فين !
نتاشا استغربت رد فعله الغريب وحطت المايه علي المكتب وخرجت وراه.. كان ماجد بيقرب في اتجاه المزرعه واول حد شافه كان مرجان!
مرجان بابتسامه:ماجد بيه الانسه صديقة حضرتك موجوده في الغرفه بتاعتك!
ماجد حرك راسه واتجه بسرعة للغرفه علشان يشوفها ويطمن عليها واول ما دخل لقاها قاعده وسرحانه اتكلم ماجد وقال: انتي كويسه؟
انتبهت لدخول ماجد المفاجئ وكلامه ورديت عليه:الحمدلله انا بخير بس هو انا عاوزه اقولك اني اسفه بجد والله مش قصدي اعمل اي حاجه تضايقك.انا بقول كلامي وماجد باصصلي وسرحان فيا..ودا مش كلامي دي نظراته اللي كانت بتقول كده..
كملت كلامي :ماجد انت لسا زعلان مني؟
ماجد حرك راسه بالرفض وفضل مكمل في صمت وهو باصصلي ..بصراحه انا خجلت جدا وبعدت عيني من عليه أكتر من مره وفي كل مره ارجع ابص عليه الاقيه لسا سرحان فقررت انبهه لنفسه وقلقت بصراحه ليكون مش بخير!
اروي وهيا بتقرب من خد ماجد:انت كويس!
ماجد انتبه ليا وقال:بتقولي ايه؟
اتوترت وانا بسأله تاني:انا بقول انت كويس!
حرك راسه بالموافقه:ايوا انا كويس قوليلي بق خلصتي فرجة علي المزرعه؟
سالته بفضول وحماس:هو بعد اللي حصل دا ممكن اكمل فرجة عادي؟
حرك راسه ليا بالموافقه وانا اتحمست جدا وخبطت ايدي الاتنين في بعض وقولت:حلو اوي يا ماجد انا اصلا كنت هزعل لو قولتلي انك هتروحني بيتنا بدري!
قولت كلامي بضحكه حماسيه وهوا كان مبسوط اوي بحركاتها كان حاسس انها سحراه مش طبيعي يتوه فيها كده ، لان جمالها وهيا بتضحك مش طبيعي!
ماجد بتساؤل:هو انتي مش عاوزه ترجعي بيتك بدري ولا ايه يا اروي؟
فكرت في كلامه للحظة وقولت:لا عادي عاوزه ارجع بس ممكن مش دلوقت يعني في حجات عاوزه اشوفها هنا في المزرعه اللي جمالها مش طبيعي دي قبل ما امشي ..كملت كلامي بتساؤل ؛صحيح في هنا تماسيح!
ماجد باندهاش من سؤالي:دي مزرعه يا اروي مش حديقة حيوانات !!
حركت راسي بخجل وهو ابتسم وقالي:خلينا نكمل استكشاف قبل ما ميعاد الغداء يقرب !
حركت راسي بالموافقه ومشيت قدامه وهو ورايا وانا اول ما فتحت الباب لقيتها في وشي ايوا هيا اللي اسمها خفاشا دي..
اتخضيت بصراحه وصرخت صرخه صغيره في وشها ولقيتها رفعت حاجبها وبصت علي ماجد وقالت:مستر ماجد الجزار اللي اسمه رزق الجندي وصل وعاوز يقابل حضرتك!
(ثانية واحده كده هيا قالت رزق الجندي صح ..عارفين دا مين..ايوا هو اللي جه في بالكوا دلوقت دا فعلا بابا)
ماجد حرك راسه:خليه يستناني عشر دقايق وجايله هخلص حاجه علي السريع وجاي؟
نتاشا حركت راسها بالموافقه وقبل ما تمشي بصتلي من فوق لتحت بغيظ وانا رفعت حاجبي ليها بضيق وكان نفسي اوي اجبها من شعرها لانها بجد عصبتني.
ماجد وهو بيبصلي وبيسألني:خلينا نمشي!
اتوترت جدا وحركت راسي بالموافقه و فعلا خرجنا انا وماجد وانا طول ما انا ماشيه بحاول اخبي نفسي علشان لو بابا شافني هتبق كارثه لانه اكيد لسا ميعرفش اني مختفيه لان ماما عارفه كويس انه هيقلب الدنيا لما يعرف وهيعاقب عصام ومش هيسكت فحسيت انهم لسا مخبيين عليه فقررت استخبي في اي مكان لحدما هو يشتري العجول ويمشي..
ماجد وهو بيشاور علي الخيل:دول اقوي خيل موجود في مصر وشايفه اللي هناك دا..شاورلي علي خيل ابيض بعضلات:دا طبعا خيل عربي اصيل مش موجود منه دلوقت غير عدد قليل!
حركت راسي بابتسامه وانا بحاول مبينش اني خايفه او متوتره وبصراحه كان ماجد خفيف يعني بيشرحلي كل حاجه بسلاسه وبعدما لفينيا نص المزرعه جات خفاشا تاني وبلغته ان بابا مستعجل وعاوز ياخد كل العجول ويمشي وعاوز يقابل ماجد علشان يدفع الحساب !
حرك ماجد راسه وبصلي وطلب مني استناه مكاني ومتحركش لحدما هو يرجع وانا طبعا وعدته اني هفضل مكاني واول ما مشي قررت استكشف الباقي بنفسي !
___________________________
عصام كان تايهه في البلد اللي دخلها بعدما لف علي رجليه علشان يدور علي اروي ملقهاش بس لقي واحد من اهل القريه دي بيقرب منه لما لاحظ انه بقاله كتير بيلف في البلد فقرب من عصام واتكلم بتساؤل :بتدور علي حاجه يا اخينا ؟
عصام بخضه بصله وحرك راسه :ايوا بقولك ايه مشوفتش البنت دي هنا في البلد؟
طلع عصام صوره لأروي علي التيلفون ولما الشاب شافها قال باعجاب:بسم الله ماشاء الله دي مين الجشطة البلدي دي يا واد عمي!
عصام بصدمه:قشطة بلدي ايه بقولك شوفتها؟
الشاب وهو بيضغط علي شفايفه باعجاب:ودي انا لو شوفتها تفتكر هيسبهالك!
عصام اتعصب من كلامه وقال بغضب:متتكلم عدل يا جدع انت واحترم نفسك ، انت ازاي تتكلم علي اروي كده؟
الشاب ابتسم :وكمان اروي دي احلوت قوي..قولي يا اخينا هيا متجوزة؟
عصام بضيق:والله لو ما احترمت نفسك لهغلط فيك و..
الشاب وهوا ماسك عصام من هدومه:بتقول ايه ياض انت تغلط في مين ها انت متعرفش انا ابق مين ولا ايه؟
عصام بتوتر:يا استاذ،،هو انا اسمك ايه؟
الشاب:مرزوق؟
عصام بخوف:يا استاذ مرزوق البنت دي تايهه وانا بدور عليها وطبعا حضرتك مطمنتيش خالص دا انت خوفتني اكتر منك وعليها!
مرزوق وهو بينزله وبيعدله هدومه اللي بوظهاله قال :ما كنت قولت كده من بدري!! كمل بدهشه: بتقول انها تايهه!
عصام حرك راسه والشاب دا بصله وقال:تقربلك ايه القشطة دي معقوله تكون خطيبتك؟
عصام برفض:لا ابدا دي بنت خالة مراتي؟
الشاب ابتسم وقال:يعني القشطة مش مرتبطه؟
عصام بخوف من هيئته:لا مش مرتبطه؟
الشاب بابتسامه واسعه:حلو اوي ياعني انت بتدور عليها هنا ولحد دلوقت مش لاقيها؟
عصام بموافقه:ايوا فعلا دانا رجلي ورمت من اللف وانا لو مالقتهاش وانا لو رجعت من غيرها رقبتي هتطير وانا لسا عريس والله وفرحي كان اول امبارح؟
الشاب رفع حاجبه بتفكير..ممكن اساعدك بس عندي طبعا شرط ولازم تنفذه’
عصام سأله بلهفه :ايه.. شرط ايه دا؟
الشاب:هدور معاك علي القشطة ولو لقيتها هتجوزها قولت ايه؟
عصام باستغراب وهو بيرفع شفته الاعلي :تتجوزها!! دا ايه السلاسة اللي بتتكلم بيها دي انت متعرفش دي عامله ازاي ولا اهلها مين؟
الشاب بسخريه:وهيكونوا مين ياعني ابوها يبق عمدة مثلا!
ضحك عصام بقوه وقال بسخريه كبيرة علي كلام مرزوق:عمدة هههه لا يا عسل دا جزار وممكن يطير رقبتي انا وانت!
الشاب اتوتر وقال:بتقول جزار؟
عصام حرك راسه:ومش اي جزار دا معلم كبير وبنته دي مدلعه اخر دلع بس بصراحه دي عملت معايا حركة رجوله فقدر اقولك انها دلوعه بس جدعه وب١٠٠راجل !
الشاب فكر في كلام عصام وقال:بس برضوا دي دخلت نفوخي وهساعدك تلاقيها ..اهم حاجه انت متاكد انها في البلد دي؟
عصام برفض:بصراحه مش عارف هيا ممكن تكون هنا او في القريه اللي قبالكم هناك؟
الشاب حرك راسه:بسيطة متقلقش اهم حاجه وريني صورتها كده تاني!
عصام رفع التيلفون ليه والشاب قال باعجاب:يا سنه سوحه ياما ايه القمر دا كله !
عصام حط تيلفونه في جيبه وقال:والنبي يا مروزق ركز وان شاء الله لما نلاقيها ابق اعرض عليها الجواز براحتك كمل عصام بهمس :دا في المشمش ان شاء الله ؟
مرزوق اتحمس:ماشي يلا اتحرك قدامي!
عصام حرك راسه والشاب مشي وعصام وراه فقرروا انهم يدوروا في القريه دي علي اروي اخر مره ولو ملقوهاش هيروحوا للقريه الثانيه يدوروا عليها..
________________________
ماجد كان قاعد في مكتبه وقدامه والد اروي الحاج رزق الجندي جزار كبير في اسكندريه ومن احد التجار اللي ماجد بيتعامل معاهم!
رزق بجديه:تسلم علي الواجب اللي عملته اخر مره معايا يا ماجد بيه يسلم كرمك وزوقك!
ماجد ابتسم وبص علي رزق وحرك راسه:الله يخليك يا معلم رزق ،دي بس حاجه بسيطة بمناسبه افتتاح المزرعه الجديدة في اسيوط؟
رزق ابتسم وحرك راسه :ربنا يوسع عليك كمان وكمان يا بيه سيادتك تستاهل كل خير..وعلي العموم علشان مطولش عليك المرة دي انا هاخد خمسين عجل واتفضل الحساب اهو؟
طلع رزق شنطة مليانه فلوس وحطها علي مكتب ماجد وكمل رزق كلامه وقال:حضرتك تقدر تعدهم براحتك دول ٣مليون جنيه بالتمام والكمال؟
ماجد حرك راسه وابتسم :وانا ينفع اعد من وراك يا معلم برضوا حضرتك صاحب مكان وطبعا انا واثق فيك..نزل الشنطة وحطها جمبه علي الارض وقال:ادي الفلوس اهي مش هعدها!
ابتسم رزق وقام وقف ومد ايديه يسلم علي ماجد:تسلم يا ماجد بيه ومتحرمش من زوقك العالي دا ابدا؟
ابتسم ماجد وقال :تسلم يا كبير دانت والله نورت المزرعه كلها يا معلم رزق؟
رزق بابتسامه :المزرعة منورة بناسها يا بيه!
ابتسم ماجد ورزق خرج من المكتب ومعاه المساعد بتاعه اللي كان مستنيه برا فاخده رزق واتجهه للعنبر اللي فيه العجول علشان يشوفوهم قبل ما يحملوهم علي العربيات!
_________________________
كنت ماشيه وانا مبسوطه وحاسه اني مش عاوزه اسيب المزرعه دي ابدا لانها مليانه بالطاقه الايجابيه وبصراحه شكل العمال والدكاتره ونظافة المزرعه يشرح القلب كده ويرد الروح ؟
كنت بتفرج علي السماء وانا قاعده علي كرسي استراحه كان موجود جمب عنبر العجول ..
وانا قاعده وسرحانه سمعت صوت ابويا بيكلم جعفر المساعد بتاعه وبيقول:العجول دي منها اتنين هيطلعوا للناس الغلابه ركز معايا يا جعفر انا بثق فيك وان شاء الله اول ما نوصل بالسلامه هتنشر الخبر اللي اتفقنا عليه انا وانت في الطريق !
جعفر بفرحه:يعني خلاص يا معلم وافقت علي طلبي للجواز من الست اروي؟
رزق بابتسامه:طبعا يا جعفر هو انا هلاقي في رجولتك او في شهامتك دا انت سيد الرجاله كلها؟
اول ما سمعت كلامهم عني اتحضيت وكنت لسا هجري واستخبي منهم بس كلام جعفر خلاني اثبت مكاني وانا مصدومه:اوعدك يا معلم اني هشيلها في عيوني ومش بس عيوني دي هتبقي في قلبي كمان!
المعلم رزق وهو بيخبطة في كتفه:بتحبها قوي كدا يا واد!
جعفر بخجل:اوي ..اوي يا معلم انت متتخيلش الست اروي تبق بالنسبالي ايه!
ابتسم رزق وقال:يبق علي بركة الله اول ما اروي بنتي ترجع من أسيوط هنكتب الكتاب علي طول وهيا لو حبت تاخد وقت علشان تجيب المستلزمات بتاعها يبق بالكتير اوي الفرح بعد اسبوع قولت ايه!!
جعفر بفرحه:وهو في كلام يتقال بعد كلامك يا سيد المعلمين!
ابتسم رزق ووقتها شاف اروي اللي واقفه بضهرها فحس انه يعرفها بس ملحقش يدقق في ملامحها أكتر لانها فجأة اختفت من قدامهم!
كنت بجري بخوف وصدمه وقلق من اللي سمعته:يعني ايه هتجوز جعفر..جعفر يا بابا ملقتش غير المتوحش دا وتجوزهولي دا انا بترعب منه لو بس سمعت صوته هعيش مع دا ازاي ياناس!
كنت بجري وانا واخده قراري اني مش هرجع تاني للبيت،هو انا هبله يعني علشان ارجع وابويا يغصبني علي الجواز من جعفر:.لا طبعا جعفر مين اللي اتجوزه دا مش هيحصل ابدا ومستحيل اني اقبل بيه!!
ماجد كان بيدور عليا وانا كنت بحاول اتداري في اي مكان بعيد عن نظر ابويا والي شكله مطول هنا فكنت بفكر مع نفسي ازاي انا معرفش اسم المزرعه اللي ابويا بيتعامل معاهم..بس صحيح هعرف ازاي وانا اصلا عمري ما شغلت بالي بشغل بابا او اعرف هو بيعمل ايه كل اللي اعرفه اني اول ما احتاج حاجه نفسي فيها بابا قوام بيجبهالي ..
فكنت بجري وانا بنهج علي اخر ما فيا وماخدتش بالي من اللي واقف ومديني ضهره خبطت جامد فيه وقبل ما نقع احنا اللأتنين حاول ياخد الوقعه مكاني علشان ميأذنيش فوقع وانا وقعت فوقه وكل اللي بعمله هو اني مصدومه وببص عليه..
حولت اشوفه لقيته ماجد كان شعري نازل علي وشه فهوا بعده وفضل يبصلي ووقتها حسيت بقلبي بيدق بقوه ودي كانت اول مره قلبي يدق فيها بالشكل دا..
ماجد كان باصص عليا وساكت وانا في اللحظة دي مكنتش عارفه المفروض اعمل ايه فضلت باصه في عيونه اللي سحروني من اول ماشوفتهم بس شكلهم من قريب جدا مختلف تماما عن لما بشوفهم من مسافه بعيده..
ماجد بصوته الرجولي والمميز سألني وقال:انتي بخير يا اروي؟
انتبهت ليه وحركت راسي وقولت وانا بفتكر كلام بابا وجعفرعني :مش عاوزه اتجوز جعفر؟
ماجد ضم حاجبه وسالني باستغراب :تتجوزي جعفر ،جعفر مين؟
رديت بتوهان:المساعد بتاع ابويا ،مش عاوزه اتجوزه انا بخاف اوي منه دا متوحش!
حاول يفهم قصدي وهو ضامم حاجبه فانا لما فوقت لنفسي شهقت وقولت:اي دا هو انا ازاي نايمه في حضنك بالشكل دا؟
ماجد رفع حاجبة بصدمه وكان بيبصلي وهو مش فاهم انا بقول ايه او اي نوع شخصيتي بالظبط؟
قومت وعدلت هدومي وبصيت حواليا ملقتش بابا بس لما بصيت بعيد لقيته هو وجعفر ماشين في اتجاه بوابه المزرعه فبصيت علي ماجد وقولت:هو ميعاد الغداء قرب؟
ماجد وهو بيبص في ساعته:ميعاد الغداء بدأ من خمس دقايق بالظبط!
حركت راسي وهو كمل كلامه وقالي:تعالي علشان تاكلي لان شكلك مرهق..
حركت راسي وهو مشي وانا وراه لحدما دخلنا لمكان كان بعيد شويه لسا واخده بالي منه كان عباره عن مبني دور واحد ودا زي مطعم كده..
دخل ماجد الاول وانا وراه ووقتها شوفت العمال كلهم متجمعين وبياكلوا وكان شكلهم حلو اوي..
اول ما ماجد دخل كله رحب بيه بابتسامه فابتسمت علي ابتسامتهم ودخلت وانا بشاورلهم وبسلم عليهم،.، طبعا كلهم بصولي باستغراب لانهم لحد دلوقت ميعرفوش انا مين.. شوفت مرجان و اللي الوحيد اللي شاورلي ورفع ايديه يرحب بيا فـ فرحت جدا ونطقت اسمه بفرحه:مرجان ازيك!
ماجد وهو ماشي وقف وبص عليا وحذرني بعيونه ماتكلمش مع حد وانا سكت ولحدما وصلنا لمقعد اكتشفت ان مخصص لماجد فقط
،هو قعد وانا قعدت معاه فقرب مننا الطباخ وحطلنا الاكل ولاكنه زود طبق ثالث .. استغربت وسالت ماجد الطبق الاضافي دا لمين فكان لسا هيرد ولاكن هيا ردت بداله:معلش يا مستر ماجد اتاخرت علي حضرتك!
بصيت عليها بضيق وقولت:يادي خفاشا اللي مش هخلص منها بق دايما بتفصل اللحظات الحلوه بهجومها ده؟
ماجد رد عليها:اتفضلي اقعدي يانتاشا قبل ما الاكل يبرد !
نتاشا حركت راسها ومن قربها منه فهمت انها اقرب واحده منه في المزرعه دي كلها؟
فضلت اكل وانا بصالها وهيا كل نظراتها علي ماجد اللي مش مهتم بيها اصلا؟
خلصت اكل بسرعه لاني بطبيعتي باكل بسرعه وبصيت عليهم لقيت ماجد لسا الاكل قدامه كتير ونتاشا خلصت نص الاكل بتاعها..
لاحظ ماجد اني خلصت طبقي وبصالهم فسالني:محتاجه اكل لسا يا اروي؟
بصراحه ابق كدابه لو قولت لأ انا فعلا لسا جعانه لان الاكل اللي نزل دا كان عباره عن التصبيره اللي باكلها لما ماما بتكون بتجهز الاكل فـ بكل جديه حركت راسي وقولت:هو انا ينفع اطلب طبق تاني!
حرك راسه بالرفض وانا زعلت بس لقيته بيقرب طبقه مني وبيقول:انا شبعت تقدري تاكلي طبقي؟
اول ما عمل كده لقيت نتاشا وشها احمر علي الاخر وبصت عليه بصدمه وقالت :حضرتك ما اكلتش حاجه يا مستر ماجد دا الطبق لسا بحاله؟
حرك ماجد راسه:متقلقيش با نتاشا انا اكلت بس اروي جعانه ومحتاجه تتغذي.
كلامه فرحني جدا وخلي قلبي ينبض بقوه من تاني وهيا لقيتها بصالي والغيره والحقد هيخرجوا من وشها فانا قررت اكل بدل ما الاكل يبرد خالص ووقتها الاكل وقف في زوري بعد اول معلقه بصتلها وانا متاكده انها بصتلي في الأكل فبصيت لماجد وانا عاوزه اشرحله اني زورانه وانه يجبلي مايه من اللي قدامه بس معرفتش ..
ماجد بصلي لما لاحظ اني بشاورله وهو مش واخد باله سألني بقلق:مالك يا اروي انتِ بخير!
مثلت اني عاوزه اشرب وهو فهمني علي طول فمسك الازازه وقبل ما يقربها مني اخدتها نتاشا من ايديه بسرعه وقالت:شكرا يا مستر ماجد انا فعلا كنت عطشانه اوي..
نتاشا فتحت الازازه وشربت منها نصها وبصتلي وهيا بتمثل انها متفجأة اني عطشانه وقالت:اروي هو انتي عطشانه معلش يا قلبي ما اخدتش بالي ان مستر ماجد يقصدك انتي.
اتعصبت عليها وزقيت الازازه من ايديها بضيق لان اللقمه اللي كانت محشوره في زوري كانت نزلت فقولت بغضب:لا مش عطشانه وحتي لو عطشانه مش عاوزه منك حاجه يا خفاشا؟
نتاشا استغربت وقالت بضيق:اسمي نتاشا مش خفاشا؟
بصتلها بسخريه وقولت:والله الأسمين زي الزفت يعني اي نتاشا دي اصلا؟
سخريتي عليها وصلت لبقيت العمال وفضلوا يضحكوا بقوه عليها، فبصلتها لقيتها في نص هدومها فابتسمت بسخرية وقولت: انا خلاص شبعت يا ماجد هخرج بق علشان حاسه بسخونيه جايه من جمبك..
ماجد كان باصص عليا وهو مصدوم فقررت اقوم لاني فعلا متضايقه فخرجت من المطعم دا وانا بحاول اخد نفسي علشان متعبش دماغي بسبب البنت دي، فقررت اتمشي في المزرعة وفعلا اتمشيت لحدما وصلت عند عنبر الخيل اللي ماجد وصفهولي فقربت من مُهرة لسا مولوده ولمستها وبرغم خوفي منها الا اني حسيت احساس حلو وفضلت واقفه المسها بحنيه وانا سرحانه وبفكر لحدما فوقت علي صوت جاي ورايا فبصيت اشوف مين ‘
•تابع الفصل التالي “رواية أول مرة أحب” اضغط على اسم الرواية
التعليقات