رواية أبيض وأسود الفصل السادس والثلاثون 36 بقلم منى محمود
رواية أبيض وأسود البارت السادس والثلاثون
رواية أبيض وأسود الجزء السادس والثلاثون
رواية أبيض وأسود الحلقة السادسة والثلاثون
بسمه قالت كلامها كله مرة واحدة وهي خايفه من رد فعل بهاء اللي كان مصدوم وفاضل باصصلها بصدمة وساكت ص
وهي بصاله بترقب ولما لاقته مصدوم ومش بياخد اي رد فعل اتحركت بهدوء عشان تدخل اوضتها بس اول ما جت تقف وقبل ما تتحرك خطوة واحدة كان ماسكها بقوة من ايديها وهو مكشر واتكلم بحده
ــ ايه الهبل اللي بتقوليه !؟ عيدي كدة اللي قولتيه تاني ؟ سمعيني يلا
عينيها دمعت
ــ في اي يا أبيه … دراعي بيوجعني سيبني لو سمحت
رد عليها بعصبيه اكتر
ــ والله ! دراعك بيوجعك ؟ معلش اصلي مفتري … انطقي اي الكلام اللي قولتيه دا يا بسمة ؟
بسمة كانت خايفه ومرعوبه من رد فعله بس قررت تكمل بشجاعه زي ما بدأت الظروف اللي هما فيها بتتعقد مش بتخلص وهي معندهاش استعداد يضيعو عمرهم بالوضع دا خدت نفس طوييييل واتكلمت بهدوء رغم كل اللي حاسه بيه
ــ ايه يا أبيه متعلمتش من كل اللي حصلنا أن رد فعلك يتغير ؟ متعلمتش من اللي حصل بينك وبين صاحبك انك تتحكم في رد فعلك ؟ تفكر الاول في الكلام وبعدين ترد ؟ أنا بصراحة مش فاهمه حضرتك ازاي شاطر جدا ك ظابط شرطة ازاي بتقدر تحلل شخصيات اللي قدامك وتعرف المجرم وبتكون هادي في كل خطوة مهما كانت الجريمة صعبه وازاي بتتغير وتتحول ٣٦٠ درجة لما بيكون الموضوع شخصي
بعد عنها بصدمة من كلامها وهي استغلت صدمته دي وقررت تواجهه بدون تراجع مهما كانت النتائج…
ــ مستغرب كلامي ليه ؟ شوف رد فعلك في كل موقف شخصي اتعرضتله وموقفك في كل جريمة مسكتها هتلاقي تناقض كبير بس انا بصراحة قلت انك اتغيرت بعد آخر مشكله مع بكر وبدور وانك بقيت اهدي واكيد هتفكر قبل ما تاخد رد فعل أو علي الاقل هتتناقش معايا تسمعني تكلمني مش نفس رد الفعل في كل مرة كان مفيش حاجة اتغيرت خالص كدة
بهاء اتكلم بخنقه
ــ امشي يا بسمه دلوقتي من قدامي … ادخلي اوضتك قبل ما فعلا تزعلي مني
بسمة بحنيه وحزن
ــ لا يا أبيه اسمعني للاخر ارجوك … يمكن اكون بدأت الكلام غلط يمكن كان مفروض امهدلك واحكيلك التفاصيل بس أنا بقالي فتره مترددة … أبيه انت مش بس اخويا انت صاحبي وسندي طول عمري عايشه وسط ناس بتكرهك وبتحاول بكل الطرق تكرهني فيك وعمرهم ما نجحو … عمري ما صدقت كلمة واحدة عليك عمري ما بعدت عنك واول ما بتحصلي اي مشكله بجري عليك انت واتحامي فيك… أنا والله العظيم ما اقصد ازعلك مني ابدا أنا بس محبتش انك تكرر نفس رد الفعل وتخسر الناس اللي بتحبك تاني المرة ال فاتت سامحو المرة دي هيبعدو خالص … وانا واثقه انك متقدرش تستغني عنهم عشان كدة كان لازم اوقفك أنا اسفه متزعلش مني
قالت اخر كلامها ودموعها بتلمع قرب منها وضمها وهو مبتسم رغم الدموع اللي لمعت في عينيه هو كمان
ــ كبرتي يا بسمة … كبرتي يا حبيبه اخوكي
طلعت بسمه من حضنه وهي بتبصله بحب
ــ عشان خاطري متزعلش من كلامي وخلينا نتكلم سوا واحكيلك كل حاجة ممكن ؟
ــ ممكن.. تعالي نكمل فطارنا الاول وبعدين نشرب القهوة سوا واحنا بنتكلم يلا
ــ يلا
ـــــــــــــــــــــــــــــــــــــــــــــــــــــــــــــــــ
في بيت علا ومؤمن
ــ مبسوطة أننا رجعنا بيتنا وحياتنا بدأت تستقر تاني ومبسوطة اكتر أن ماما وافقت تيجي تعيش معانا وتبقي تروح بيتها كل فتره كدة وعلي فكرة أنا هروح معاها لما تروح مش هسيبها تبات تاني لوحدها ابدا بس تفتكر هي هتبقي عايزة شويه خصوصيه ولا ايه ؟ انت ساكت ليه ما تاخد وتدي معايا في الكلام يا مؤمن الله
ــ اديني فرصه ارد وانا هاخد وهدي والله مش هقول لا ايه يا علا مالك يا حبيبتي بقالك مدة بقيتي بتتكلمي كتير علي غير طبيعتك خير يارب
ــ عايزني افضل ساكته يعني ؟ ماشي يا مؤمن شكرا
جت تقوم من جمبه شدها تاني وهو بيضحك
ــ انتي مجنونة يا علا ؟ أنا بسال بس علي سبب التغيير دا لكن مش عايزاك ساكته طبعا أنا حابب علا اللي بتتكلم وبتحكيلي كل حاجة بتحصل في يومها أو بتدور حتي في بالها مبسوط أن قربنا كدة من بعض بس بطمن اي سبب التغيير دا يعني بالنسبالكا سبب إيجابي ولا سلبي ؟
ــ سلبي ازاي مش فاهمه ؟ مش انت مبسوط يبقي دي حاجة حلوة ولا ايه ؟
ـــ بصي يا حبيبتي فرق في بين انك تكوني اتغيرتي وبقيتي تشاركيني كل اللي بيدور في بالك ايا كان عشان قربنا من بعض وفهمنا بعض اكتر وبين انك تكوني بتعملي كدة عشان تهربي من حاجة مش عارفه تواجهيها ف بتشغلي ديما بالك ب دوشه كتير وكلام ورغي عشان متفضيش تفكري أو تضطري تواجهي دا كدا يبقي تغير سلبي يا قلبي فهمتيني ؟
هزت راسها وهي حابسه دموعها ابتسم لها بتشجيع عشان تتكلم … سكتت شويه ترتب أفكارها وبدأت تتكلم
ــ هتصدقني لو قلتلك أن اللي بيحصل معايا دلوقتي الاتنين … السبب الإيجابي والسبب السلبي … الاثنين جوايا يا مؤمن
ــ طب اتكلمي اشرحيلي اكتر
ــ ااه يا مؤمن اشرحلك اي بس … أنا حقيقي مش قادرة اتكلم صدقني الكلام جوايا مش بيطلع مهما احاول بس في نفس الوقت أنا بقرب منك كل يوم اكتر من اليوم اللي قبله يعني حاسه ان السبب السلبي اللي حركني خلاني ابقي ايجابيه معاك وفي علاقتنا سوا … فاهم قصدي ولا أنا بعك ولا ايه
ــ لا فاهم يا حبيبتي فاهم … بس لو عايزة راي .. عشان تكملي صح لازم تواجهي الهروب مش حل
ــ يا مؤمن دول اهلي أنا أدري واحدة بيهم والله صدقني مش هيتغيرو مهما قولت ولا أنا هقدر اقاطعهم مهما عملو أنا بحبهم والله رغم كل الوجع اللي في قلبي دا لكن بحبهم واخاف ابعد عنهم ولادي لما يكبرو يبعدو عني هما كمان
ــ يا حبيبتي مين قال كدة ؟ مش مطلوب منك لا تبعدي عنهم ولا يتغيرو
ــ اومال مطلوب اي بالظبط ؟ مش فاهمه
ــ مطلوب تتكلمي … تعبري عن اللي جواكي بطريقه متجرحش اهلك بس المهم أن ال جوا دا ( شاور علي قلبها ) يطلع علي دا ( شاور علي شفايفها ) دا كل المطلوب منك … بطلي تشلي وتخزني جواكي … الضغط اخرته انفجار بلاش توصلي للمرحله دي … فرغي كل اللي جواكي حلو او وحش بأسلوب كويس اول باول … مش مطلوب منك اكتر من كدة … فهمتي يا روحي ؟
بصتله بكل الحب اللي جواها ليه ومن غير اي كلام رمت نفسها جوة حضنه وهي مبتسمة وحاسه أنها اخيرا وبعد تعب سنين لاقت الامان اللي كانت محرومة منه ….
ــــــــــــــــــــــــــــــــــــــــــــــــــــــــــــــــ
في فيلا نصر كان في مكتبه اللي تقريبا مقيم فيه ومبيخرجش منه إلا للضرورة ومعاه مهاب
ــ كل حاجة جاهزة يا مهاب
ــ تمام يا باشا متقلقش سعادتك وراك رجاله
ــ الغلطة في الطالعه دي بموتي يا مهاب مفيهاش رجعه ولا فرصه ولا هقدر انطق حرف واحد حتي
ــ كل اللي سعادتك أمرت بيه اتنفذ بالحرف وبعد حضرتك بسم الله ما شاء الله عليك دماغ الماظ يا باشا استحاله حد يشك حتي مجرد شك في خط سيرنا متقلقش أنا نفذت كلامك بالحرف الواحد
ــ اااه العمليه دي لو تمت زي ما أنا عايز … هنبقي في حته تانيه يا مهاب … كل اللي راهن علي وقوعي هيتخرس … هقف علي رجلي من تاني وابدء أظهر في الصورة وانا واثق من نفسي
ــ هتم علي خير ومن غير اي مشاكل ثق فيا حضرتك
ــ واثق يا مهاب ومعنديش اي شك فيك بدليل انك عارف تفاصيل العمليه دي وأحمد قاعد برة ميعرفش اي حاجة هو بس قلق من
قاطعه مهاب
ــ ولا اي حاجة هتحصل… أنا هخرج دلوقتي واه صحيح أنا متأكد أن احمد هيسالني رايح فين ف منعا لاي مشاكل هقوله اني استأذنت من حضرتك اروح مشوار شخصي ساعتين تلاته وراجع تمام ؟
نصر كشر
ــ ماشي يا مهاب هانت تتم العمليه واوعدك ان أنا بنفسي اللي هتعامل مع موضوع احمد دا … اتفضل انت دلوقتي الحق وقتك
ــ عن ازنك يا باشا
خرج مهاب وفعلا زي ما توقع وقفه احمد وسأله رايح فين … وأحمد قال نفس الكلام اللي قاله جوة ل نصر … مشوار شخصي ساعتين تلاته كدة وجاي والباشا عارف … كل دا مهاب كان متوقعه بس اللي متوقعوش لا هو ولا نصر أن احمد يصر يوصل مهاب بنفسه عشان عايز يتكلم معاه في موضوع ومهما مهاب يحاول يخلع منه إلا أنه كان يصر اكتر
ــ وهو الموضوع دا ميستناش يعني يا احمد بقولك مشوار شخصي ومعايا عربيتي
ــ صدقني يا مهاب الموضوع اللي عايزك فيه اهم مليون مرة من المشوار اللي انت رايحه… أنا عارف الحقيقه يا مهاب وهقولك علي كل حاجة
ــ حقيقه ايه ؟ بلاش كلام بالالغاز لو سمحت
ــ حقيقه اللي حصلك حقيقه نيره وبهاء وعمتك واهمهم حقيقه نصر باشا يا مهاب وعلي فكرة كل كلمه هقولهالك معايا عليها بدل الدليل اتنين وتلاته صدقني انت مش هتخسر حاجة بالعكس هتكسب كتير كتير اوي يا مهاب قبل فوات الاوان
مهاب كان باصصله بتركيز وحس بصدق كلامه فعلا زي ما حس ب الكره اللي مالي قلب احمد تجاهه وقرر يخاطر ويعرف معندوش استعداد يفضل عمره كله يقول لو كنت رحت معاه كان حصل اي … اتحرك معاه بسرعه قبل ما نصر يحس
في العربيه مهاب كان سايق وأحمد ماسك تلفونه وباين أنه مشغول اوي فيه
ــ لا ما أنا مخدتكش معايا عشان تقعد تلعب علي تلفونك وانا ابقي السواق بتاعك ما تنجز يا احمد في اي
احمد وهو بيحط التلفون قدام مهاب
ــ أنا مش بلعب أنا كنت بدور على دا
مهاب اول ما شاف اللي علي تلفون احمد فرمل العربيه بسرعه في وسط الطريق لدرجة أن كذا عربيه كانو هيخبطوه … اتنفس بسرعه والغضب سيطر عليه وفي ثانيه واحدة كان مطلع سلاحه ومصوبه علي رأس احمد وهو بيقول
ـــ هي فييييييين!!؟
ـــــــــــــــ
بسمة حكت ل بهاء كل حاجة حصلت تخصها هي وبكر وتخصه هو كمان مع بدور
ــ أنا حكتيلك كل حاجة يا أبيه ومش طالبه منك غير انك تفكر بهدوء ومتتسرعش ارجوك
ــ هو احم هو انتي لما يعني سالتي بدور علي امجد كانت بتتكلم بثقه ولا
قاطعته
ــ كانت بتتكلم بهدوء وثقه بدور واثقه من مشاعرها يا أبيه عشان كدة بقول ل حضرتك الخطوة الجايه لازم تكون من عندك انت مش من عندها
ــ طب وبكر ؟ الخطوة من عندي أنا بردو يا بسمة ؟
ــ اتكلم بصراحة ومش هتزعل مني ؟
ــ اتكلمي
ــ هي تبان أن لا ولازم زي ما انت هتاخد خطوة ل بدور أن بكر هو اللي ياخد خطوة ليا بس بصراحة بقا انت فعلا اللي مفروض تاخد الخطوة مع بكر لأن بكر حاسس انه أقل من أنه يدخل العلاقه دي ولو خاطر بسبب حبه ليا وحبي ليه هيخاف يخسرك بكر بيحبك اوي يا أبيه ولو ارتباطنا هيخليه يخسرك عمره ما هياخد الخطوة دي ابدا
ــ طب خليني اخلص الموضوع بتاع انهاردة دا واوعدك اني هفكر في كل كلامنا بهدوء وقبل ما اخد اي خطوة هشاركك يا ستي زي ما شاركتيني اتفقنا
ــ اتفقنا
ـــــــــــــــــــــــــــــــــــــــ
الساعات عدت بسرعه وجه وقت المقابله مع المجهول بكر كان مستخبي في شنطة العربيه
وصلو اللوكيشن اللي كان مخزن متطرف ومهجور في طريق الاسكندريه الصحراوي
نزل بهاء وبص يمين وشمال كان المكان فاضي تماما حس أنه كمين ولف عشان يركب عربيته تاني سمع صوت حد
ــ مستعجل كدة ليه يا حضرة الظابط ؟
لف بهاء لمصدر الصوت واتفاجا باخر حد ممكن يتوقعه واقف قدامة
ــ مستغرب صح ؟ متوقعتش تشوف راجل عجوز وضعيف زي وزمانك بتقول معلومات اي دي اللي عنده مش كدة ؟
ــ حضرتك بتعمل اي هنا ؟؟ هو في ايه ؟ أنا أنا مش فاهم حاجة
ــ في اني في لحظة واحدة خسرت كل حاجة … خسرت روحي وبقيت عايش نفس داخل ونفس خارج وبس … في نفس الساعه اللي بنتي استسلمت فيها ل نصر وطلعت تكدب وتفتري وتشهد زور كانت مراتي بتشوف شقي عمرنا وهو بالصورة دي مستحملتش وطبت ساكته … خسرت بنتي اللي اتقبض عليها وخسرت مراتي اللي اخوها مستناش لما ارجع أودعها دفنها علي طول وانا مع نعمة في القسم
ــ احم البقاء لله … ربنا يرحمها ويغفر لها أن شاء الله تكون في مكان احسن ويجمعك بيها في الجنه علي خير
رمضان والد نعمة عيونه دمعت
ــ ونعم بالله…أنا اسف يا باشا علي الكلام اللي بنتي قالته في الفديو هددها اللي ربنا ينتقم منه بينا وجه خدني من وسط بيتي وسريري في نص الليل ورجعني تاني يوم عشان يوصلها أنه يقدر يوصلي بكل سهوله … نعمة غلبانة يا بيه و
قاطعه بهاء بتأثر ل حالته
ــ أنا عارف نعمه كويس وعارف اخلاقها وتربيتها وكنت واثق أن نصر هددها ب حاجة قويه جدا عشان تطلع وتقول كدة
ــ نعمة اتحبست بسبب الفيديو اللي طلعت فيه دا بس المحامي طمني أنه هيطلعها خصوصا أنها قالت إن الفيديو تم تحت تهديد مقدرتش تسكت وتمشي في السكةي خصوصا لما عرفت أن أمها ماتت مستحملتش وفاقت ل نفسها وعشان كدة أنا هنا مع حضرتك دلوقتي
ــ أنا مش في أيدي اي حاجة اعملها ل نعمة للاسف أنا
قاطعه رمضان
ــ أنا مش عايزك تعمل حاجة ل بنتي انا جاي ابلغك رساله منها واحذرك
ــ تحذرني من ايه ؟
ــ أحذرك من التعابين اللي حواليك … نصر اشتري ناس كتير جوة القسم اللي انت شغال فيه الظابط احمد وظابط تاني هي معرفتش اسمه واتنين مخبرين والهدف من كل دا أنه ينتقم منك عشان اللي حصلهم بتقولك خلي بالك من أهلك لانه مجند اخوك ل حسابهم وناوي أن الوقت اللي هتضرب فيه في شغلك هو هو نفس الوقت اللي تضرب فيه في عيلتك وصاحبك
ــ متعرفش مجند مهاب ازاي ؟
ــ لا معرفتش حاجة عن الموضوع دا كل اللي عرفته أن هدفه الانتقام بس بطريقه مختلفه زي ما انت هديت كل حاجة. علي دماغهم وانت بعيد ومن غير ما اسمك يتجاب هو كمان عايز يعمل كدة. مستعد يدفع كل ثروته بس ينتقم منك حتي المجال المشبوه اللي ماشي فيه بالنسبالة تدميرك اهم منه
ــ تمام يا حج كتر خيرك علي مجيتك دي وتحذيرك ليا شكرا
ــ ربنا يا بني يحميك وينصرك عليه يارب حسبي الله ونعم الوكيل فيه وفي كل ظالم وارجوك سامح نعمه واوعي تشيل منها
ــ مسامحها والله مسامحها من قبل ما اعرف اي حاجة أنا كنت واثق أنه غصب عنها متقلقش أن شاء الله تكون بسيطة وهتخرج وتبقي جمبك والبقاء لله مرة ثانيه في زوجتك
ــ ونعم بالله يا حبيبي … أنا لازم امشي بقا
ــ هتروح ازاي تعالي اوصلك
ــ لا لا مينفعش نصر حاطط مراقبه عليا أنا جتلك ب صعوبه وهروح زي ما جيت متقلقش وزيادة ضمان معلش امشي انت الاول وانا همشي بعديك
ــ لا طبعا أنا لا يمكن امشي واسيبك في مكان زي دا وبعدين هتروح ازاي اصلا حضرتك معاك عربيه ؟
ــ ابن اخويا معايا بس خليته في العربيه لحد ما اتكلم معاك احنا واقفين من الناحيه التانيه للمخزن ومش هينفع نطلع سوا الطريق عليه كاميرات
ــ خلاص امشي انت الاول وانا هستني ساعه كدة واتحرك عشان اطمن انك بعدت وبقيت في امان
ــ ماشي يا حبيبي سلام عليكم
ــ وعليكم السلام يا حج
اتحرك رمضان ناحيه عربيته لحد ما اختفي عن أنظار بهاء وقتها طلع بكر من شنطة العربيه وقرب من بهاء اللي كان سرحان
ــ بهاء
لا رد
ــ بهااااء
ــ ايه ايه يا بكر خضتني
ــ سرحان في ايه اتكلم معايا متسكتش كدة
ــ سرحان في الدائره اللي دخلتها ومش عارف اطلع منها يا بكر
ــ عموما حج رمضان مقالش حاجة مش عارفينها احنا كنا عارفين أنه شاري ناس كتير وأحمد من مدة وهو مكشوف لينا
ــ أيوة وبعدين ؟
ــ بعدين ايه ؟ مش فاهم
ــ وبعد ما احنا عارفين وفاهمين هنعمل ايه يا بكر
ــ بقولك اي أنت لما بتتكلم كدا الدنيا بتسود في وشنا في ايه يا بهاء نروح ننتحر يعني ؟ اهدي كدة وخلينا نفكر بهدوء اهدي ارجوك متسودهاش في وشنا لله
ــ طب تعالي نروح بس سوق انت أنا اعصابي بايظة
ــ انت مش قلت للراجل ساعه وهتتحرك بعده ؟
ــ ما شاء الله علي حاسه السمع عندك في شنطة العربيه ومقفولة عليك وسامع دبه النمله
ــ قل اعوذ برب الفلق في ايه الله اكبر عليا اية يا عم في اي هتحسدنا علي سمعنا كمان
ــ هههههههههههه ما انت ماشاء الله بصراحة أنا توقعت هتطلع تقولي احكيلي اي اللي حصل أنا مسمعتش اي حاجة لكن انت طالع سامع كل حاجة ازاي مش عارف
ـــ هههههههههههه لا دا حسد بجد بقا
ــ اومال … يلا بكر يلا نتكل علي الله نصر لو مراقب عم رمضان فعلا يبقي اكيد زمانه عرف أنه قابلنا
ــ عندك حق يلا يا صاحبي
اتحركو بالعربيه علي بيتهم بكر كان بيحاول يهون علي بهاء كان حاسس ان التوهه بتزيد في عيون بهاء ودا كان بيخنقه ويحسسه بالعجز تجاه صاحبه
وصلو واتفق بكر معاه أن كالعادة ينام الاول وبعدين يتكلمو عشان يكون اهدي وبهاء كان حاسس انه فعلا معندوش طاقه لاي حاجة اليوم كانت أحداثه كتير بالنسباله ف دخل علي اوضته علي طول ونام
حلم بهاء أنه في ماشي في صحراء لا ليها اول ولا اخر عمال يبص حواليه بس مش شايف اي حاجة كان تعبان وعطشان وجسمة بدء يتعب … قعد علي الرمله بارهاق فجأة حس بضل فوقيه رفع رأسه شاف أمه واقفه وبصاله بحزن قام من مكانه فجأة واتكلم ب لهفه
ــ ماما … ماما حبيبتي اخيرا رجعتي تظهرلي اخيرا حمتي عليا يا حبيبتي
ــ هتفضل تايه كدة كتير ؟ مأنش الاوان انك ترسي يا بهاء ؟
ــ اعمل اي يا امي هو بمزاجي دا غصب عني
ــ لا يا حبيبي احساس التوهه اللي بيكبر جواك دا لحد ما هيسيطر عليك مش غصب دا بمزاجك انت مستسلم يا بهاء شوف نفسك دلوقتي وشوف نفسك من كام شهر فاتو هتعرف انت اتغيرت ازاي وليه … واجهه نفسك يا بهاء واجهه الجزء الاسود اللي جواك بطل تحبسه بطل تكبته طلعة وواجهه واقضي عليه للابد مش عايزة افضل زعلانه منك يا حبيبي مش عايزة افضل زعلانه وموجوعه عليك يا روحي واجهه نفسك يا بهاء قبل فوات الاوان … فوق يا حبيبي فوووووووق
ــــــــــــــــــــــــــــــــــــــــ
بدور كانت سهرانه مش جايلها نوم تاليا نايمة جمبها وهي ماسكه تلفونها عماله تقلب فيه بملل شد انتباها فيديو صاحبته بتقول فيه
ـــ مش مهم تكون شخص محبوب أو مكروه مش مهم تكون ناجح أو فاشل المهم انك تكون صريح مع نفسك عارف نقاط قوتك ونقاط ضعفك اتخانق مع نفسك عاتبها لما تغلط ولما تعمل حاجة حلوة كافئها خليك صديق وفي لنفسك وكون مرايه ليك وقتها بس هتحس انك مكتفي بنفسك لا بتشحت اهتمام من حد ولا مستني بفارغ الصبر نصيحه حد طور من نفسك اقري خد كورسات اشتغل عافر مع نفسك الحياه تستاهل انك تعافر لآخر نفس عشان تعيش راضي عن نفسك فيها الرضي مفتاح السعادة …
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية أبيض وأسود)
التعليقات