رواية يتيمة المشاعر الفصل الثالث 3 بقلم الكاتبة نور ال زيادة

نورزان: تمر الأيام ونتغير، بس مهما نتغير تبقى عدنا طباع منكدر نتخلص منها، ولهذا العناد والتمرد، ابدا ماتخلصت منهن،،

ام زيد: نورزان لتداومين مدرسه اليوم، اذا مريضه

نورزان: مابيه شي، راح اروح

زيد: عوفيها يمه هاي متمشي غير ألي براسها

نورزان: داومت، طبيعي، بس ثاني درس بديت اتعب، ماضل عندي طاقه و حيل حتى اكعد، خليت راسي على الرحله،بيومها كان الجو مغيم وممطر،…

اجتي طالبه على الصف وكالت نورزان محمد، طالبيها بالاداره،…

سمعت كلامها لكن ماكدرت اتحرك، اخذتني الرجفه وشعور البرد القارص جسمي يرجف من الحراره، وماعندي حيل

راحت الطالبه بعد دقائق، اجى عمو رافي، استأذن

ودخل اجه يمي، سمعت صوته

رافي: شنو بيج نورزان شدتحسين ؟

نورزان: ما كدرت اجاوبه، حط ايده على جبيني

رافي: هاي شنو حرارتج؟؟ صايره نار،،!!! اخ،، منج ومن عنادج شوكت تبطلي ؟

نورزان: كومني، واني وكفت بتعب،، وجسمي يرجف،،، نزع قمصلته ولبسها ألي وسدلي السحاب..ألفاف هم نزعه ولف راسي بي، لفلفني تلفلف، حتى ادفى

استاذن من المعلمه واخذني وطلعنا، والمطر يتساقط علينه،بغزاره

صعدني بالسياره، ورحنا للمستوصف الصحي، شافتني دكتوره

كان بلعومي ملتهب، وحرارتي انطتني علاج، ورجعنا للبيت،…

اخذت العلاج ودفيت، كم ساعه وصرت احسن،،

ثاني يوم سمعت عمو متمرض،..لأن دفاني بملابسه وضل بملابسه الخفيفه وهو ضل بردان، والمطر علي،،،،، كلش انقهرت، وقررت ابطل شويه من، عنادي، لأن عنادي صار يأذيني ألي ولغيري،،

شويه، شويه بديت اتخلص من عاداتي المو حلوه، ألي ماكو احد كدر يخليني اغيرها غير الحب والأهتمام ….صح هنه بسيطات، بس ألهن اثر كلش قوي بحياة كل انسان،…وميحس بأهميتهن غير الفاقد ألهن،

صح ما كان ناقصني شي واملك كل ألي اريده بس من تجيني هديه حتى لو بسيطه من عمو افرح، احس ملكت الدنيا، مجرد شخص يذكرني لو بشي بسيط هل شي عندي كفايه،….

مرت الايام وخلصت ايام الابتدائيه ويوم من الأيام انعزمنا ب بيت عمو نبيل على عيد ميلاد رافي ضليت حايره وأفكر شنو اخذ هديه للانسان ألي صارلي اكثر من اب

ام زيد: يله بنات خلصتو

ريام ونورزان: اي ماما

ام زيد: يله زيد فضنا وين صرت

زيد: اني مااروح

ام زيد: ليش؟

زيد: ماعاجبني ومتواعد ويا اصدقائي

ريام: هو انت يايوم عجبك تروح ألهم

ام زيد: عوفو وامشو، هو الخسران، احنا نروح وابوكم من يجي، كال اجي عليكم

نورزان: رحنا ألهم ولكينا هناك بيت عماتهم وعمهم

وبنات عماتهم وعمهم يباوعوله بحقد وكأنما جاين ببيوتهم، بس احنا منهتم لتصرفاتهم ، لأن نعرف بيت عمو نبيل شكد يحبونه ويقدرونه، وملكاهم ألنه كفيل انو يفهمنه شنو معزتنه عدهم،،

احتفلنه كلنه وقطعو الكيك، وكل واحد قدم هديته، صراحه كانت هدايه حلوه،،

اجتي وسن تتلوة من تمشي، قدمتله الهديه وهي تتدلع بكلامها

وسن: كل عام وانت بألف خير رافي، ان شاء الله عريس،، هههه

رافي: شكرا، ولو بعد وقت هوايه حتى افكر بالزواج

وسن: ممم،،، على راحتك، هاي هديه بسيطه، مو بمقامك، وقدرك، بس صراحه ضليت فتره، يله لكيت شي مناسب، وان شاء الله تعجبك

رافي: شكرا، ليش كلفتي نفسج

وسن: لا بالعكس، الغالي للغالين

نورزان: قدمتله ساعه، فعلا فخمه ومبينه سعرها غالي

اخر وحده أني قدمتله الهديه،

نورزان: كل عام وانت بخير عمو

رافي: شكرا ،،،هذا شنو انت هم جايبه هديه،؟؟

نورزان: فتح الهديه، وتفاجأ!!

رافي: تدرين انتي جايبتلي هديه لاتقدر بثمن، وكل يوم تثبتين ألي انو تربيتي ألج صح

نورزان: اكثر شي اتمنى بحياتي الله يحفضك ويحميك، انت اول هديه قدمتها ألي ايزار صلاه، واني اليوم جبت ألك(كتاب الله) حتى كلام الله يحفضك

شال القران وخلا على راسه وقبله، كان بحجم اليد

رافي: شكرا، راح اشيله ويايا وين مااروح

نورزان: عمو وعمه وحتى امي، شفت بعيونهم فرح وفخر،

ام رافي: والله عرفت تعلم صح

ابتسم فرحان بكلامها لكن مو كل الموجودين عجبهم هل الكلام

اماامي صح احسها بعيده عني، لكن بنفس الوقت بديت احسها تتباهه وتتفاخر بيه وبأسلوبي

واخلاقي…بعد ماتحولت الى انسانه مميزه، نوعا ما …لأن بالنهايه ماكو احد متكامل، الكمال لله..

كبرت وصرت بالمتوسطه وكنت شاطره، لكن كانت مشكلتي التاريخ لأن تاريخ الاول متوسط صعب، والأصعب من تكون مدرسته عگره،،

درسها اكرهه وحتى اضوج اقرا ولهذا من صار عدنا امتحان، ماجاوبت زين

ست وسناء: نورزان، ليش مامجاوبه زين اني سامعه بيج شاطره، ليش بس درسي موزينه، ليش متدرسين؟

نورزان: العفو ست درست بس اني اساسا ماجاي افهم زين،(بعدني ممكمله كلامي، عاطت)

وسناء: شنو قصدج اني مااعرف ادرس، فوك صخام وجهج، فوكاها تتجاوزين عليه

نورزان: العغو ست مو قصدي، فهمتيني غلط

وسناء: نوب سويتيني ماافهم، الباجر يجي ولي امرج للمدرسه، ولو اني لو انتي

نورزان: كانت عايزه وتمت، هو بدون شي صوفتي حمره، واهلي يريدون عليه زله،….حرت شنو اسوي!!

ريام اقترحت عليه احجي لعمو، صح ترددت مااريد تتغير صورتي لأن هو يعرفني شاطره ،لكن ماعندي حل، لأن اعرف امي وابويه راح يوكفون ضدي مو ويايه، رحت عليه

رافي: ها نونو خيرج، ولو وجهج ميبشر بخير

نورزان: هههه،،، والله فاهمني وكاشفني

رافي: احجي وأتحفيني، ام البلاوي

نورزان: اعرف انت ابتليت على عمرك ويايا بس تحملني،،المدرسة مالتي ام التاريخ، شاده ويايه

رافي: ممم،،، ومن غير سبب؟

نورزان: لاعمو، هي لحالها

رافي: تمام، باچر ان شاء الله، امر للمدرسه واشوف بس مقدما، اذا مسويه شي كولي، مو تورطيني وتفشليني، يم المدرسات

نورزان: لا عمو اني تربيتك، ماعاش ألي يفشلك

رافي: هههه، هي هنا المصيبه، هو لأن انتي تربيتي

واعرفج كلش زين، اعرف وراج بلاوي، والله اليستر

نورزان: ثاني يوم، اني بالصف، اجتي بنيه كالت نورزان مطلوبه بالأداره، اجا ولي امرج،

كانت المدرسه ألي اداوم بيها متوسطه

وثانويه من الاول للسادس اعدادي

طلعت من الصف، كانت فرصه، واشوف طالبات واكفات خصوصا بنات بالسادس، انضارهن

متوجه اتجاه الاداره يباوعن ويبسبسن، ….

عفتهن ورحت، لكيت ست وسناء واكفه تسولف هي وعمو رافي، وابتسامتها واصله لأذنها، وأكو مدرسات وطالبات هم يباوعن، رحت وسلمت عليه، وكفت بصفه ،

وسناء: نورزان حبيبتي، لخاطرج، راح اعيد الامتحان

ولو صار لازم اسلم الدرجات

رافي: شكرا، ست، وأعذري نورزان، اذا حسيتيها قللت احترام وياج، حسبيها اختج الصغيره

وسناء: لاعادي مصار شي

نورزان: اباوع على ست وسناء هي عمرها يطلع بعمر عمو تقريباحارت شنو سوت حتى تلفت أنتباهه اني بداخلي اضحك،، وخطرت فكره ببالي، وقررت اطبقها؟؟

عادتلي الامتحان وجابتلي اسأله سهله مي طلعت درجه ممتازه، وتشكرت من ست وسناء

_ست عمي رافي يسلم عليج، ويكول اشكرج، لأن عدتي الامتحان، ومارديتيني،

(طبعا هي هنا ابتسمت ابتسامه، عبالك كلتلها يحبج مو شكرا)

أتبعت وياها هذا الأسلوب وكل مره أريد شي اروح واكلها عمي يسلم عليج وهي تنفذ صارت مره هي تدز سلام، مره هو (اللي بالاساس ميعرف بالموضوع)، وأي شي احتاجه من اي مدرسه اخرى، اروح عليها واكلها عمو يسلم عليج وماعنده وقت يجي يكول بلكي تحليها من يمج وهي صراحه متقصر،كل هذا تسوي ، بس بمجرد سلام ماأملتها بشي

ورا فتره صار عدنا اجتماع،اولياء الامور اجتي امي، هي وعمو، حتى تسأل عليه، وكل المدرسات مدحت بيه وبشطارتي، ومن رجعنا عمو رافي صاحني

رافي: نورزان تعالي

نورزان: نعم عمو محتاج شي

رافي: نورزان انت حاجيه شي لست وسناء

نورزان: مثل شنو يعني،(غشمت نفسي)

رافي: مااعرف حسيتها كلامها ويايا بميانه زايده وتكلي يوصلك سلامي ومن هل الكلام

نورزان: اني هنا دق ناقوس الخطر عندي وجهي بدا ينطي الوان، وهو فهم… ضيق عيونه

رافي: نورزان، ليش احسج مسويه مكسوره؟

نورزان: لا عمو يامكسوره، انت من جيت للمدرسه بلشت تسأل عليك واني هم حتى تساعدني اكلها عمي هم يسلم عليج

باوع عليه وتغيرت ملامحه للغضب

رافي: والله عرفت وراج سالفه، انت متجوزين من سوالفج

نورزان: عمو ماكلت شي هو مجرد سلام

رافي: ماكايله شي فد مره چان كلتي ألها عمي يريد يخطبج

نورزان: عمو لتضوج الله عليك ترا د اتشاقه

رافي: نونو بعد اذا سويتي هيج شي تنسيني ومااحجي وياج بعد

نورزان: هاهيه بس لتزعل بعد ماسويها…

ليش مو احنا ونحجي سمع كلامنا احمد، وماقصر ذاعها على وكاله مونتكارلو،،،

احمد:ابشركم رافي مصادق المدرسه مال نورزان

نورزان: نريد نسكته ميسكت فضحنه الكل ضحك وناس تحجي عليه صار هل موضوع حديث الموسم،، ولزموها علي لزمه وهو كل شي مامسوي على جلده،،،

مرت الايام وصار عمري ١٣سنه،، ومره بيت عمو نبيل سووا عزيمه (بيتهم ميخلى من العزايم) عزمو الاهل وأحنا هم

صار وقت الغدا كعدنه كلنا سوا لأن ماكو احد غريب صار سيف يتحارش

سيف: ولج نونو كافي اكل راح تنفجرين يمعوده

رافي: ولي لك قابل ماكله من چدك، ديربالك تغثها من اروح من هسه اكولك،

احمد ومنال: لاشحده، لتوصي عليها احنا منخلي، انت سافر وليضل بالك

نورزان: اني هنا بعد ماعرفت ابلع اللكمه، باوعت على عمو على امل يرد يكول ماكو هيج شي، بس مارد،،،، كلت الحمد لله وكمت، طلعت مباشرتا، للحديقه واني افكر بالشي السمعته بعد دقائق سمعت صوته ورايا

رافي: نونو ليش عفتي اكلج ؟

نورزان: صدك عمو راح تسافر لو شقه؟

رافي: صحيح راح اسافر ل………. حتى اكمل دراسه

نورزان: ليش متكمل هنا دراسه ؟

رافي: هناك احسن اذا اخذت شهاده من ارجع للعراق يصيرلي مستقبل افضل،، شوفي نورزان اني ادري بيج ضجتي، ومتريدين اسافر وصراحه ماكو شخص عاجبه يتغرب بس بنفس الوقت الدراسه برا افضل لمستقبلي

نورزان: نزلت دموعي،،، عمو زين اني منو ألي اذا انت سافرت؟

رافي: لا نونو لتحجين هيج كلها يمج، ماراح يتغير عليج شي،…وحتى اني دائما اضل اتواصل وياج بالتلفون وأي شي تحتاجين كلهم موجودين وصيتهم ميقصرون وياج،،وبعدين انتي هسه كبرتي وماضليتي محتاجه ألي

نورزان: راح اضل طول عمري محتاجه ألك عمو

عفته وفتت جوه،

ورا الغدا رجعنا للبيت وحبست روحي بالغرفه وللصبح مانشفت دموعي،حسيت نفسي راح ارجع وحيده، ضجت من سفره وحتى اخذت منه موقف، ولهذا حتى من راد يسافر مارحت ودعته…

سأل اهلي عليه واجه للبيت ماطلعت شفته

ثاني يوم كان موعد السفر، رحت للدوام واني شابعه قهر، وجهي مغيم وكلها تسألني شنو بيج

خلص اول درس وبالفرصه، اجتني طالبه كالت نورزان مطلوبه بالأداره رحت وتفاجأت بعمو جاي للمدرسه

رافي: هيج صارت نورزان، متريدين تودعيني

نورزان: سكتت لأن ماعندي جواب،، بس عيوني خانتني، نزلت دموعي

رافي: لتبچين ياعيون عمج دموعج تأذيني انتي عزيزة گلبي وبنيتي الحلوه ماكدرت اسافر قبل لاأودعج

نورزان: خليت ايدي على وجهي وزدت بالبچي تقدم لمني بحضنه حاول بكل الطرق يقنعني ويراضيني قفلت عليه من أيس ودعني وراح

كان اصعب يوم بحياتي بهذا اليوم حسيت نفسي رجعت يتيمه ووحيده.

يتبع….

الرابع من هنا